Teo - resposta as palabras da concelleira socialista


O GOBERNO DE TEO LAMENTA QUE A CONCELLEIRA SOCIALISTA SE DEDIQUE A SEMENTAR DÚBIDAS SOBRE A TRANSPARENCIA DO CONCELLO EN VEZ DE INFORMARSE ANTES


·        A primeira parte da operación de crédito para o pago a provedores foi aprobada o 11 de maio por resolución de alcaldía, de acordo coa normativa xurídica vixente.

·        A operación será ampliada na medida en que novas empresas se adhiran na seguinte fase, entre os meses de xuño e de xullo.


21 de maio de 2012.- O goberno municipal de Teo lamenta o intento da portavoz do PsdeG-PSOE de sementar dúbidas e xerar desconfianza sobre o funcionamento e a transparencia do Concello no relativo á tramitación da operación de préstamo aprobada no mecanismo de pago a provedores impulsado polo ministerio de Facenda e Administracións Públicas.

O alcalde, Martiño Noriega, acaba de remitirlle á concelleira socialista toda a información sobre a operación de préstamo. Non obstante, Noriega intúe que “a información era o que menos lle importaba e prefería sementar dúbidas no funcionamento e na transparencia do Concello cunha nota de prensa”, tendo en conta que difundiu esta última en vez de agardar a obter a información que lle solicitaba á administración. Este comportamento unicamente “xera desconfianza e non deixa de ser unha praxe de dubidosa ética”, tal como advirte o rexedor teense.

A tramitación, paso a paso
O executivo local explicoulle por escrito á portavoz do PSOE que na tramitación da operación estase seguindo escrupulosamente o establecido na normativa xurídica aplicable. Así, o plan de axuste aprobado polo pleno municipal recibiu informe favorable do ministerio o 30 de abril, incluindo nel unha operación de préstamo de 1.320,457,22 euros.

Dese total, nunha primeira fase do procedemento de pago a provedores aprobouse formalizar 826.412,43 euros. Este importe corresponde ás facturas da relación certificada das empresas que manifestaron a súa vontade de acudir ao procedemento antes do 22 de abril. A aprobación desta primeira fase realizouse por unha resolución da alcaldía o 11 de maio, ao tratarse do órgano competente para a aprobación de tal operación, por non superar o 10% dos recursos ordinarios do orzamento municipal (1.042.362,86 euros). Así o establece o Real Decreto Lexislativo 2/2004 de 5 de marzo.

O goberno municipal tamén lle explica á portavoz do PSOE teense que a operación de endebedamento se ampliará na medida en que novas empresas se adhiran ao procedemento nunha seguinte fase. Os provedores que así o estimen poderán cobrar nesta fase, que se vai completar entre os meses de xuño e de xullo. Unicamente se o importe total do endebedamento supera o 10% dos recursos ordinarios a competencia pasará a ser do Pleno da Corporación.

Ningún comentario: