De Lugares e Órganos’, o programa de música e outras paisaxes de Compostela que organiza a concellaría de Acción Cultural para esta Semana Santa, presenta na xornada de mañá, sábado 26, ‘Ventanía. Arredor dos aires e afectos’ coa compañía Traspediante, da man da bailarina Begoña Cuquejo e o músico Pablo Seoane. Será na Igrexa da Universidade ou da Compañía en tres pases: ás 19.30, 20.15 e 21.00 h. Ademais, haberá de novo un itinerario polos órganos da cidade, nesta ocasión ás 11.00 h.
As entradas para as actividades e concertos son de balde previa retirada de invitación no despacho de billetes do Teatro Principal, aberto de 18.00 a 21.00h. De non esgotarse, tamén se poderán recoller o propio día da actividade no lugar de celebración da mesma desde 1 hora antes do seu comezo. As invitacións serán válidas ata 10 minutos antes do inicio da actividade. A partir dese momento, a organización resérvase o dereito a empregar as localidades non ocupadas.
Para descubrirmos os vestixios dunha frutífera actividade arredor do órgano na cidade de Compostela e o rico legado organístico que aínda se conserva nela, propoñemos unha serie de itinerarios nos que percorreremos algúns dos órganos que integran estas descoñecidas paisaxes. Nesta edición comezaremos por tres órganos que abranguen diferentes épocas e estilos: os órganos das igrexas da Compañía, de San Francisco e das Ánimas. Durante o percorrido poderemos ver moi de cerca estes instrumentos e aprender cousas sobre os seus construtores, estilos e a época na que foron construídos pero, sobre todo, poderemos escoitar tamén o seu son e entender así mellor a maxia e segredos destes poderosos instrumentos.
Itinerarios polos órganos de Compostela
Capacidade máxima: 50 persoas
Lugar de encontro: na porta da igrexa da Compañía ou da Universidade ás 11.00 h
Adrián Regueiro, órgano
Andrés Díaz Pazos, relator
Órganos e organería en Compostela
Pódese afirmar, de xeito documentado, que dende
principios do século XVI a cidade de Compostela foi o máis importante centro de
construción de órganos e de formación de organeiros do noroeste peninsular.
Probablemente esta actividade viñera xa sendo realizada na cidade dende a baixa
Idade Media, pois sabemos que a catedral e algún outro templo contaban con
órgano, e mesmo que algún mestre local foi construír instrumentos fóra, como é
o caso de Alfonso Gondissalbo que, en 1414 constrúe un instrumento para a
catedral de Barcelona. A razón da profusión destes artesáns na cidade era a
existencia de numerosos clientes aos que atender. O primeiro deles, dende logo,
a Catedral e a súa fábrica, pero tamén os numerosos conventos e igrexas da
cidade. Por esta causa hoxe en día a cidade alberga aínda 16 órganos, en
estados diversos de conservación. Nas proximidades da cidade tamén atopamos
algúns instrumentos interesantes que foron fabricados por mestres composteláns,
como na vila de Padrón. Todos estes instrumentos, e outros moitos espallados
por Galicia e mesmo fora dela, son testemuña da importante actividade organeira
que, desde Compostela, se desenvolveu ao longo de varios séculos, e que
tentaremos descubrir a través destes itinerarios.
Ventanía. Arredor dos aires e afectos
Cía. trasPediante
>
Sábado 26 de marzo, Igrexa da
Compañía ou da Universidade. Tres pases, 19. 30 h 20.15 h, 21.00 h
Begoña Cuquejo,
movemento
Pablo Seoane,
órgano
Ventanía
é unha creación da coreógrafa e bailarina Begoña Cuquejo canda o músico Pablo
Seoane, na busca do encontro entre dúas linguaxes: a da expresividade do son do
órgano e a do corpo en movemento, que se fornecen mutuamente para convidar ao
público a participar dunha experiencia estética e sensorial, posibilitando unha
atmosfera adecuada na que reflexionar, evadirse ou enfrontar cara a cara,
sentimentos e afectos universais. A representación proponse como un “sitio
específico”, concibida, para existir no espazo do coro alto da igrexa da
Compañía en conxunción todos os seus elementos (órgano, facistol, cadeirado,
arquitectura...), elementos que inspiran, á vez que condicionan e mesmo
provocan, tanto a creación coreográfica como a musical.
