O Concello de Silleda e o Instituto da Muller poñen en marcha o programa ‘Aurora’ para fomentar a empregabilidade das mulleres no rural
-O ciclo, con itinerarios de formación e de emprego, será desenvolvido pola Federación de Mulleres Rurais (Fademur)
-Participarán un total de 25 mulleres desempregadas do municipio. A entrevista cas primeiras seleccionadas será o vindeiro luns
-A iniciativa foi presentada hoxe pola alcaldesa de Silleda, Paula Fernández, a presidenta de Fademur Galicia, Rosa Arcos e a concelleira de Formación e Emprego, Margarita Campos
Silleda, 11 de novembro de 2011. O Concello de Silleda e o Instituto da Muller, organismo adscrito á Secretaría de Estado para a Igualdade, veñen de firmar un convenio para a posta en marcha no citado municipio do programa Aurora, que ten como principal obxectivo promover a empregabilidade das mulleres no ámbito rural. 
A iniciativa, cofinanciada polo Fondo Social Europeo, busca mellorar o acceso deste sector da poboación ao mercado laboral a través da participación das mulleres en itinerarios mixtos (de formación e emprego), deseñados tendo en conta as necesidades das participantes no proxecto.
En total, serán 25 as veciñas de Silleda que participarán neste programa, que tamén busca mellorar a autoestima, confianza e outros aspectos persoais, tales como habilidades sociales e comunicativas. “Trátase de traballar con elas para que sexan protagonistas no proceso de inserción laboral, de motivalas”, sinala a alcaldesa de Silleda, Paula Fernández, que presentou o proxecto xunto con Rosa Arcos, presidenta de Fademur Galicia , a entidade que desenvolverá o plan formativo.
Outra das premisas pasa por ofrecer unha formación ocupacional que se adecue ás novas demandas do mercado de traballo. Así mesmo, preténdese fomentar o traballo individual e en grupo, con asesoramento e formación.
Durante a presentación do programa Aurora, a alcaldesa, Paula Fernández explicou que o proceso de selección das 25 participantes xa está en marcha. Tamén se recurriu para elo á bolsa municipal do programa Silleda Emprega, buscando o perfil prioritario do programa: residentes no rural e sen formación específica. “Aínda así, se algunha muller que esté desempregada e non figure na bolsa de emprego, ou calquera outra que esté interesada, aínda que resida nos cascos urbanos silledenses, poden achegarse ata o Concello”, explicou a rexidora, aclarando ademais que a asistencia ao ciclo non está remunerada.
O vindeiro luns comezarán as entrevistas coas primeiras 40 seleccionadas na Casa da Xuventude, en horario de 10.00 a 14.00 horas. As mulleres interesadas en sumarse a esta iniciativa poden informarse nas dependencias municipais.
Formación ‘ad hoc’ e contacto con empresas
O ciclo formativo comezará nas vindeiras semanas e continuará ao longo de 2012. Será nesta segunda anualidade cando as participantes reciban unha formación adaptada ás necesidades laborais no municipio e na comarca do Deza, establecendo tamén conexión coas empresas. De feito un dos sectores que está no punto de mira é o da atención xerontolóxica, para o que xa se contactou con empresas deste sector. “Xa tempos unha empresa do ámbito sociosanitaria interesada en formar a estas mulleres, e con compromiso de contratar a 4 persoas”, avanzou Paula Fernández.
Pola súa banda, Rosa Arcos, lembrou que con esta iniciativa se loita contra a “invisibilidade das mulleres do rural” que dificulta o seu acceso ao emprego.
Fademur encargarase de todo a parte técnica e formativa . Tamén se desenvolverán accións formativas que lle permitan acceder a nichos de emprego. Ademais do sector de xerontoloxía, unha das partes do programa inclúe a realización do diagnóstico das necesidades do mercado laboral, polo que se podería establecer contacto con outros sectores empresariais.
O presuposto do convenio firmado entre o Concello de Silleda e o Instituto da Muller ascende a un total de 34.000 euros, dos que 4.000 serán aportados pola Administración Local (1.000 este ano e 3.000 en 2012). A colaboración suscrita estabrece, por parte do ente estatal, o compromiso de poñer a disposición a metodoloxía de intervención para o empoderamento das mulleres rurais, así como elaborar e adaptar os instrumentos técnicos, entre outros.
Mentres, o Concello de Silleda, neste caso a través de Fademur, encargarse do desenvolvemento das actuacións, información e difusión do programa, e tamén da intermediación laboral contactando con empresas que constitúan un oco de mercado con postos de traballo susceptibles de ocupar por parte das participantes neste programa.
“Consideramos que se trata dunha iniciativa moi proveitosa para un colectivo como é o das mulleres rurais que, grazas a prospostas coma estas, terán unha oportunidade tanto de obter formación como de buscar emprego nun momento de especial dificultade”, apuntou a concelleira Margarita Campos.
Silleda será pois un dos 12 municipios que contan con este programa do Instituto da Muller, no que figuran outros catro concellos galegos, os de de Boimorto (A Coruña), Coles, Carballeda de Avia e Calvos de Radín, estes últimos na provincia de Ourense.
