O Concello de
Ames encargou a proposta para realizar unha modificación puntual no PXOM co fin
de cambiar a cualificación da parcela que albergará o novo CEIP do Milladoiro
Ante o compromiso mostrado pola Consellería de Educación
e Ordenación Universitaria, para construír un novo centro de educación infantil
e primaria no Milladoiro, o Concello de Ames está traballando co obxectivo de
cederlle unha parcela á Xunta de Galicia que conte cunha superficie mínima de
12.150 metros cadrados. O alcalde de Ames, Carlos Fernández, contratou hoxe os
traballos para realizar unha modificación no Plan Xeral de Ordenación Municipal
co fin de cambiar a cualificación da parcela que está destinada á construción
do novo colexio no Milladoiro. O pasado mes de xaneiro, o Concello ofertoulle á
Consellería unha parcela de 16.765 metros cadrados. Porén, segundo o Plan Xeral
de Ordenación Municipal amiense, esta parcela está cualificada como solo
rústico apto para urbanizar, polo que é preciso realizar unha modificación puntual
no PXOM. Despois de que a Xunta de Galicia dese o visto bo a esta parcela agora
o Concello encargoulle á empresa Oficina de Planeamento SA que elabore a
documentación que é necesaria para cambiar a cualificación da devandita
parcela.
O Concello de
Ames conta na actualidade con dez centros escolares públicos que cobren todo o
espectro de idades de escolarización obrigatoria e pos-obrigatoria, é dicir,
entre os 3 e os 17 anos. Ademais existen dous centros de educación de 0 a 3
anos de titularidade municipal, unha localizada no núcleo de Bertamiráns e
outra no do Milladoiro, que ofertan en conxunto 215 prazas, e unha gardería
pertencente a rede da Galiña Azul da Xunta de Galicia, que está situada na rúa
Figueiras, no Milladoiro.
Respecto do tramo
de idade que comprende o ensino obrigatorio existen actualmente 10 centro
escolares, que atenden o segundo ciclo de educación infantil, os 6 ciclos de
educación primaria, a ensinanza secundaria obrigatoria e o bacharelato. No seu
conxunto atenden na actualidade a 2.420 alumnos. Proximamente será executado un
novo instituto de ensinanza secundaria no Milladoiro que contará con ensinanza
secundaria obrigatoria e tres liñas de bacharelato. En total, o Concello de
Ames ofrece 712 prazas de educación infantil, 1.146 prazas de educación
primaria, 427 de ensinanza obrigatoria e 135 prazas de bacharelato.
Segundo figura no estudo demográfico -mapa escolar-
realizado polo Concello de Ames a poboación en idade escolar vai seguir
medrando nos vindeiros anos polo que é preciso dispor de máis centros
educativos en Ames. Para paliar o déficit de dotacións escolares existentes no
municipio a Consellería de Educación Universitaria contempla a execución dun
novo CEIP no Milladoiro. Neste senso o Concello de Ames está traballando para
poñer a disposición do goberno autonómico os terreos necesarios para a
construción deste novo equipamento.
Para a execución deste novo colexio a Xunta de Galicia
pediulle ao Concello unha parcela que debe dispor de polo menos 12.150 metros
cadrados. Debido a que non existe no Plan Xeral de reservas dotacionais
axeitada para este equipamento, analizadas as diferentes alternativas
considerase necesario impulsar unha modificación puntual no Plan Xeral de
Ordenación municipal para poder construír esta infraestrutura no lugar de Cotón
(O Milladoiro), que linda co núcleo urbano.
O goberno municipal atopouse co problema de que no núcleo
do Milladoiro hai moi poucas parcelas que se poidan dedicar a equipamento
públicos. O planeamento urbanístico realizado polo anterior goberno limitou a
posibilidade de que o Concello obtivera terreos coa superficie necesaria para
equipamentos públicos, que demandan parcelas de grandes dimensións, nos
diversos sectores urbanísticos que se foron desenvolvendo, polo que resulta necesario
facer unha modificación puntual do PXOM para obter nunha mesma parcela os 12150
metros cadrados que demanda a Xunta de Galicia.
Para poder atopar unha parcela axeitada as
características que solicitaba a Xunta de Galicia o Concello de Ames encargoulle
un estudo a empresa Oficina de Planeamento SA en decembro de 2010.
Posteriormente, o
pasado 21 de xaneiro, o alcalde de Ames, Carlos Fernández, presentoulle ao
secretario xeral da Consellería de Educación e Ordenación Universitaria unha
proposta municipal sobre a implantación dun novo CEIP no Milladoiro. A parcela
proposta para a implantación do novo CEIP do Milladoiro dispón dunha superficie
de 16.765 metros cadrados e está situada nuns terreos que están situados nas
inmediacións ao núcleo urbano do Milladoiro (situado a 120 metros do solo
urbano clasificado) e colindantes co solo urbanizable do sector S-16
Galdrachán, con Plan Parcial aprobado definitivamente e en execución. O acceso
á parcela realizarase non soamente a través da estrada do Milladoiro a Laraño
(CP-0206), senón que se vería complementado co acceso a través do camiño de
Millalar a Ventín (ao sur da parcela) e coa conformación dun novo acceso que
una as anteriores dando continuidade aos viario principal do solo urbanizable
en desenvolvemento.
Dos 16.765 metros cadrados totais, 13.800 refírense á
superficie neta da parcela dotacional e 2.965 a superficie destinada a
ampliación do viario existente, novos accesos e aparcamento. Deste xeito
cúmprese os requisitos demandados pola Consellería de Educación sobre a
superficie e características que deben cumprir os terreos destinados á
implantación da nova dotación escolar. Ademais esta finca atópase a unha
distancia de 120 metros de solo urbano clasificado e colindante co solo
urbanizable S-16 Galdrachán.
Dada a cualificación urbanística que presentan os terreos
nos que se prevé a localización do novo centro de ensino, a modificación
puntual do Plan Xeral de Ordenación Municipal, terá por obxecto acomodar a
cualificación e, de ser o caso, a clasificación do solo necesario para dar
acollida á nova dotación escolar. No prazo aproximado de dous meses esta
empresa comprometese a ter todo a documentación necesaria para poder seguir coa
tramitación administrativa e cambiar a cualificación da devandita parcela.
Ampliación do
parque empresarial
Ademais, esta
mesma empresa realizou un estudo para buscar alternativas para a delimitación
dun ámbito de reserva de solo empresarial no municipio de Ames. Neste momento
no municipio de Ames está practicamente esgotada a capacidade de acollida do
parque industrial e empresarial do Milladoiro. Co obxecto de dar cabida a
distintas posibilidades para a implantación de novas áreas de actividade de
carácter industrial e empresarial cómpre as áreas do termo municipal máis
axeitadas para albergalas, así como definir as condicións deste tipo de áreas,
tanto no que se refire á súa dimensión, como ás condicións necesarias para o
seu desenvolvemento.
Para iso terase
en conta as posibilidades de desenvolvemento total ou parcial da área prevista
no Plan Xeral de Ordenación Municipal para estes usos, constituída polo sector
de solo urbanizable S-22 de Portanxil- Pegariños. Ademais avaliáronse outras
alternativas atendendo ás condicións topográficas e paisaxísticas, ás posibilidades
de interacción ambiental, e aos condicionamentos dos usos existentes e a
realidade catastral. Para a avaliación de localización das distintas áreas en
relación á proximidade as infraestruturas de comunicacións e á existencia ou
necesidade de execución de infraestruturas de servizos básicos (abastecemento
de auga, saneamento, enerxía eléctrica, gasística, e telecomunicacións) e
conexións exteriores coas existentes.
Parque ambiental
e deportivo do Milladoiro
Por outra banda estase realizando outro estudo para
modificar o plan xeral de ordenación municipal e a redacción do plan especial
de ordenación do parque ambiental e deportivo do Milladoiro. O PXOM delimita
unha importante reserva de solo rústico de protección de infraestruturas nas
proximidades o núcleo urbano do Milladoiro, concibida como unha reserva viaria
para a implantación dunha futura variable da estrada nacional 550, que acompañe
o trazado da autoestrada A Coruña-Vigo (AP-9)
Toda vez que o Ministerio de Fomento está nestes momentos
estudando a conformación dos corredores viarios para a implantación dunha
variante de trazado da N-550 entre Sigüeiro e Padrón (estudos nos que se
consideran inicialmente alternativas de máis longo alcance que as contempladas
no PXOM) ábrese a porta á posibilidade de acoutar a magnitude da reserva
prevista, destinando parte do solo inicialmente delimitado no Plan Xeral para
albergar outros usos dotacionais.
O obxecto da modificación do Plan Xeral de Ordenación
Municipal e a redacción do Plan Especial de Ordenación do Parque Ambiental e
Deportivo do Milladoiro, vai dirixido a acometer as actuación administrativas
necesarias para reaxutar o planeamento municipal coa redacción dunha
modificación puntual no PXOM no ámbito do solo rústico de protección de
infraestruturas atendendo ao previsto na LOUGA, co obxecto de que sobre dito
ámbito poidan localizarse outros usos complementarios da infraestrutura viaria.
Por outra banda preténdese axustar o ámbito de reserva
viaria ao necesario para permitir unha futura ampliación da autoestrada AP-9 ou
mesmo unha vía de circunvalación, compatible coas solucións plantexadas no
estudo que realiza o Ministerio de Fomento para a definición dos corredores
viarios.
O ámbito de solo restante (aproximadamente unhas 11,6
hectáreas) destinarase a conformación dunha importante reserva de solo para
albergar zonas verdes e dotacionais que poidan paliar o déficit que presenta na
actualidade o núcleo do Milladoiro.
Por último, abordarase a redacción dun Plan Especial de
Ordenación, que estableza as condicións de ordenación urbanística e integración
topográfica, paisaxística e ambiental para a implantación do futuro parque
ambiental, definindo a zona do ámbito e establecendo ademais as condicións para
a súa implantación, integradas no mesmo, das dotacións públicas de carácter
deportivo e das restantes que están previstas.
