Xa está dispoñible o primeiro mapa xeorreferenciado de recursos turísticos do Concello
O Concello de Ames dispón dun mapa turístico xeorreferenciado que recolle os principais puntos de interese patrimonial. Este mapa recolle unha ficha por cada un dos case 50 elementos xeorrefenciados que contén o mapa. O contido destas fichas, que varía en función do carácter de cada elemento, inclúe datos relativos a súa localización, a historia, as principais características artísticas, ou incluso teléfonos de contacto, correos electrónicos e páxinas web no caso das empresas que ofertan servizos turísticos. As fichas que se recollen neste mapa compuxéronse coa información do estudo de patrimonio e co diferentes fotografías que foron seleccionadas do arquivo fotográfico elaborado polo fotógrafo Adolfo Enríquez. Este traballo pódese atopar na nova web municipal. Para iso tan só hai que premer no banner mapa multimedia.
O Concello de Ames a través da área de Turismo, integrada na Concellaría de Promoción Económica, Emprego, Turismo e Medio Ambiente, no seu empeño por valorizar os seus recursos turísticos foise dotando, nos últimos anos, de distintas ferramentas que fan posible dispoñer deste novo e innovador instrumento para dar a coñecer, tanto os principais elementos de valor patrimonial como as infraestruturas e servizos, que poden ser de interese para as persoas que nos visitan, así como para os veciños e veciñas amienses.
Para a creación deste mapa xeorreferenciado foi preciso, en primeiro lugar, realizar un traballo de cartografía que contempla diferentes capas de información como por exemplo: límites municipais, principais vías de comunicación, espazos naturais, recursos turísticos, etc. e que posibilitou elaborar, e editar en papel, un mapa en formato despregable que permite un manexo cómodo e práctico. Este mapa impreso vai complementado con dous planos de rúas, un de Bertamiráns e outro do Milladoiro.
Paralelamente o Concello encargou á empresa Dehistoria a realización dun estudio, que foi apoiado economicamente pola Deputación da Coruña, para a catalogación e documentación dos bens patrimoniais que se espallan ao longo e ancho do noso territorio, e que na maior parte dos casos, eran uns grandes descoñecidos. Este traballo desenvolveuse por parroquias, e comprendeu un recoñecemento do territorio municipal, así como a consulta e investigación bibliográfica e arquivística que permitiu coñecer a historia de cada lugar e os seus elementos patrimoniais.
O seguinte paso que foi necesario dar para achegarnos ao noso propósito foi a elaboración dun arquivo fotográfico profesional, encargado a Adolfo Enríquez, un dos fotógrafos máis prestixiosos de Galicia e gañador de varios premios. Esta iniciativa ten como obxectivo contar cun banco de imaxes do que botar man á hora de elaborar e editar todos aqueles materiais de carácter promocional e divulgativo do noso concello. Unha desas ferramentas fundamentais é, por suposto, este mapa.
Unha vez acadadas as pezas, soamente faltaba montar o quebracabezas. Así, o departamento de Turismo púxose mans a obra na recompilación de información, selección das fotografías e a redacción dos textos para elaborar unha ficha por cada un dos case 50 elementos xeorrefenciados que contén o mapa. O contido destas fichas, que varía en función do carácter de cada elemento, inclúe datos relativos a súa localización, a historia, as principais características artísticas, ou incluso teléfonos de contacto, correos electrónicos e páxinas web no caso das empresas que ofertan servizos turísticos.
A seguinte, e última fase, foi a integración de todos estes elementos na web municipal. Esta tarefa, ao igual que a cartografía, foi realizada por Signo, Ingeniería del Territorio, empresa con ampla experiencia no campo de sistemas de información xeográfica, na ordenación do territorio e o medio ambiente. Para facilitar a localización do mapa no portal web municipal www.concellodeames.org creouse un banner. Iso vai axilizar e mellorar a capacidade de resposta do departamento de Turismo para atender as demandas de información que se reciben desde diferentes localidades e ao longo de todo o ano.
O manexo do mapa e fácil e sinxelo, basta con picar sobre os pictogramas, e de xeito automático, aparece a ficha cos textos e as fotografías. É posible ampliar cada unha destas imaxes premendo dúas veces sobre elas. Na parte final, tamén aparece a opción de ampliación de datos.
“Este mapa é froito dun traballo de moitos anos. Despois de ter a idea fixo falta ir acadando cada unha das pezas necesarias. Esta é unha ferramenta moi importante non só para a dinamización do turismo en Ames, senón para valorizar e achegar a riqueza patrimonial do noso territorio a todos os veciños e veciñas amienses, aproveitando as vantaxes que nos achegan as TICS, que cada vez son empregadas por máis persoas”, declara a Concelleira de Turismo, Úrsula Seijas.
Hai dous pictogramas que non conteñen información. Son os relativos aos establecementos de restauración de Bertamiráns e O Milladoiro. “O motivo que explica esta circunstancia é que non contamos cunha relación actualizada destes establecementos, e dado o elevado número que existen nos dous núcleos, pensamos que require un estudio de campo previo. O Concello xa solicitou unha axuda á Deputación da Coruña para levar a cabo esta iniciativa, xunto cun programa de dinamización da hostalaría, que está pendente de resposta”.
