| O Concello de Ames aproba o Plan de Axuste 2012-2022 co obxectivo de completar en 5 anos o saneamento das arcas municipais e garantir os servizos básicos O documento, aprobado cos votos favorables do Grupo Popular, permitirá acollerse ao mecanismo de financiación para o pagamento aos proveedores das entidades locais habilitado polo Goberno do Estado. O Concello de Ames remitiu ao Ministerio de Facenda, con data 15 de marzo de 2011, unha relación de 836 facturas que suman un importe total de 2.228.813,65 euros. O alcalde de Ames asegurou que o Plan de Axuste é unha medida extraordinaria pero imprescindible pola situación económica herdada no Concello. “Nós estamos a facer os deberes e avanzamos día a día na nosa obriga prioritaria de poñer en orde as contas do Concello, atendendo ás necesidades dos veciños e pagando aos provedores”, sinalou. Os grupos da oposición non asistiron á celebración da sesión plenaria e votaron en contra do Plan de Axuste 2012-2022 na Comisión Informativa de Economía e Facenda celebrada esta mañá. Segundo o alcalde Santiago Amor, “con esta actitude a oposición demostra que non está á altura das circunstancias. Os dous grupos foron cómplices dunha caótica xestión económica que levou á quebra técnica a este Concello e agora non se atreven a dar a cara ante os cidadáns”. Ames, 29 de marzo de 2012. O Pleno do Concello de Ames aprobou esta tarde o Plan de Axuste 2012-2012 co obxectivo de sanear as arcas municipais nun prazo de 5 anos. A planificación establecida neste documento permitirá equilibrar de forma progresiva a realidade contable do Concello de cara a manter o nivel de prestación dos servizos básicos, programar importantes inversións nos próximos 10 anos e, en definitiva, estabilizar o nivel de emprego. Na sesión plenaria, o Goberno municipal presentou o Plan de Axuste 2012-2022 como un documento real, que planifica as liñas básicas de actuación munipal e garante a solvencia da institución. De xeito inmediato, o Plan de Axuste posibilitará acollerse ao mecanismo de financiación para o pagamento aos proveedores das entidades locais habilitado polo Goberno do Estado a través do Real Decreto Lei 4/12, de 24 de febreiro. A aprobación deste documento, que contou co voto favorable dos once concelleiros do Grupo Popular, fará posible afrontar pagamentos a provedores por 2.228.813,65 euros, importe que se corresponde coa relación de 836 facturas, emitidas por 205 proveedores con data anterior ao 1 de xaneiro de 2012, que o Concello de Ames remitiu ao Ministerio de Facenda con data 15 de marzo. Na súa explicación do Plan de Axuste 2012-2022, o alcalde de Ames destacou que se trata dunha medida extraordinaria pero imprescindible pola situación económica herdada no Concello polo actual Goberno municipal. Segundo afirmou Santiago Amor, “nós estamos a facer os deberes e avanzamos día a día na nosa obriga prioritaria de poñer en orde as contas do Concello, atendendo ás necesidades dos veciños e pagando aos provedores”. Neste sentido, o alcalde destacou que a tramitación do Plan de Axuste fíxose cunha transparencia absoluta, dando oportunidade a todos os grupos municipais de facer as súas propostas en tempo e forma. Así, Amor lembrou que o documento foi rematado na madrugada do mércores 28, despois dun labor encomiable por parte dos Sevizos Económicos do Concello, e só unhas horas máis tarde presentouse aos tres grupos municipais na xunta de voceiros. Do mesmo xeito, esta mañá celebrouse unha Comisión Informativa Permanente de Economía e Facenda e especial de Contas para ditaminar o Plan de Axuste 2012-2022 de forma previa á celebración da sesión plenaria. Os grupos da oposición non asistiron á celebración da sesión plenaria e votaron en contra do Plan de Axuste 2012-2022 na Comisión Informativa de Economía e Facenda celebrada esta mañá. Na celebración do Pleno, o alcalde Santiago Amor afirmou que “con esta actitude a oposición demostra que non está á altura das circunstancias” e incidiu en que “votan contra o Plan de Axuste para non ter que recoñer antes os veciños de Ames que eles arruinaron ao Concello”. “Os dous grupos foron cómplices dunha caótica xestión económica que levou á quebra técnica a este Concello e agora non se atreven a dar a cara ante os cidadáns”, engadiu. Medidas Plan de Axuste 2012-2022 O Plan de Axuste 2012-2022, que conta co informe favorable do departamento de Intervención, recolle ingresos correntes para financiar os seus gastos correntes e a amortización das operacións de endebedamento. No documento, apóstase pola tendencia a autofinanciación de determinados servizos (educativos, asistenciais e deportivos) e corríxense os desequilibrios detectados neles para garantir a súa continuidade así como doutras actividades municipais que poderían verse comprometidas. No capítulo de gastos, o Plan de Axuste recolle a continuidade das medidas xa adoptadas no último ano para sanear as arcas municipais e que permitiron un aforro duns 670.000 euros. Entre elas, cabe citar a rebaixa de 120.000 euros pola nova organización do Concello, que implicou a redución da convocatoria das Xuntas Ordinarias de Goberno, a rebaixa das asignacións por Grupo Municipal e por cada concelleiro, ademais da minoración do salario do alcalde e dos concelleiros con algún tipo de dedicación e da reestruturación dos traballadores a disposición dos grupos. Co obxectivo de acadar a maior eficiencia, asegurando a prestación do servizo a un menor custo, este ano renegociáronse, por exemplo, os contratos de telefonía, os seguros dos vehículos do parque móbil, as tarifas eléctricas ou os contratos de extintores e seguridade. Nesta liña de traballo, respecto aos custos de persoal queda establecido que non se cubrirán as baixas por falecemento ou xubilación, elimínanse as partidas de productividade e redúcense as gratificacións por horas extras (compénsanse por xornadas de descanso). Estudarase ademais a redución de días de libre disposición e determinarase que o disfrute das vacacións nos contratos temporais se realice antes de que expire o vínculo co Concello. Do mesmo xeito, promoverase que o persoal municipal realice aqueles traballos que estaban a ser externalizados e que son susceptibles de ser asumidos polos empregados da Adminsitración local dentro das súas competencias. Reducirase ademais a celebración de contratos menores, primando o requisito do menor prezo de licitación. O documento aprobado esta tarde establece unha previsión de ingresos a partir da revisión de determinados tributos como o imposto sobre vehículos de tracción mecánica (actualización anual co IPC) ou o imposto sobre construccións, instalacións e obras (incremento do 4% nas edificacións plurifamiliares, vivendas colectivas ou promocións de máis dunha vivenda con efectos de 2013). O Concello de Ames reforzará a eficacia da recadación executiva e voluntaria e potenciará a inspección tributaria para descubrir feitos impoñibles non gravados. Do mesmo xeito, actualizaranse as taxas pola prestación de servizos e ocupación do dominio público. Así, por primeira vez e como iniciativa pioneira no ámbito municipal, aplicarase a progresividade nos servizos de conciliación (“Bos días cole”, “Tardes divertidas” ou comedores escolares) de tal xeito que, por primeira vez, quen máis ten máis paga ao mesmo tempo que se aumentarán as bonificacións para as familias con menos recursos. Antes do inicio da matrícula nas actividades municipais de ámbito educativo, asistencial e deportivo será o Concello de Ames o que aprobará o número máximo de usuarios e o importe máximo de déficit que pode ser asumido. | Os Grupos municipais Socialista e de Ames Novo esixen tratar o Plan de Axuste co tempo e as garantías democráticas necesarias (Ames, 28.03.012) Os grupos municipais Socialista e de Ames Novo demándalle ao goberno Popular que aborde o debate sobre o Plan de Axuste co tempo necesario e a institucionalidade que lle corresponde a un tema transcendente para o futuro do municipio. Ambos grupos, que representan a totalidade da oposición, solicitaron a celebración dun Pleno extraordinario para o venres día 30 co obxectivo analizar debidamente a documentación e trasladar as consideracións oportunas. O goberno Popular ten coñecemento da obriga de elaborar o Plan de axuste desde a súa publicación no BOE o 24 de febreiro, e naquela altura xa sabía que debería aprobar o documento en Pleno antes do 31 de marzo, para logo remitilo ao Ministerio. Neste contexto o goberno Popular convocou o Pleno este luns día 26 sen incluír ningún tema relevante e deixando fora da convocatoria o Plan de axuste que debe ser aprobado en Pleno. O tema tratouse por primeira vez hoxe mércores 28 nunha Xunta de portavoces (convocada onte), e fíxose entrega do documento do Plan de axuste, manifestando o goberno a súa intención de aprobalo no Pleno ordinario do xoves 29 de marzo. Nesta Xunta de portavoces os grupos da oposición manifestaron a súa vontade para colaborar na busca dunha fórmula de debate no Pleno que asegurara un tempo mínimo para adoptar unha posición fundamentada sobre un tema clave. En concreto, propuxeron celebrar unha Comisión de Economía e Facenda o venres día 30 pola mañá, e a continuación realizar un Pleno extraordinario co Plan de axuste como punto da orde do día. Nesta vontade de procurar alternativas ambos grupos expresaron a súa intención de renunciar ao cobro das dietas do Pleno -dado que o día anterior se realizaría o Pleno ordinario. Esta proposta contaba coa conformidade dos departamentos económicos municipais que sinalaron que sería suficiente telo aprobado o día 30 de marzo. O goberno Popular desoíndo estas propostas formulou a súa incorporación no Pleno ordinario do xoves como unha moción de urxencia do goberno. Logo dunha solicitude de información pola oposición sobre a legalidade ou non dese procedemento, o goberno cambiou de opinión e convocaron unha Comisión de Economía e Facenda urxente para mañá día 29 pola mañá co fin de incluír o punto do Plan de axuste no Pleno ordinario. O Grupo Socialista e Ames Novo dada a situación adoptaron as seguintes decisións de forma conxunta: 1. asistir a Comisión de Economía e Facenda para garantir a representación cidadá e que quede constancia do seu posicionamento responsable e institucional a respecto do Plan de axuste; 2. dado o feito de convocar a Comisión e o Pleno o día da folga, ambos grupos terán unha presencia na Comisión exclusivamente para formular a alternativa que permita o debate con garantías do Plan de axuste; estarán presentes como "servizos mínimos" os portavoces de ambos grupos, José Miñones e Pilar Candocia; 3. o grupo Socialista e de Ames Novo trasladarán mañá a proposta para que se realice a Comisión e o Pleno o día 30 de marzo e poder celebrar con garantías e polas canles formais adecuadas o debate do Plan de Axuste, renunciando expresamente a cobrar pola asistencia; dita proposta cumpre todos os requirimentos do Ministerio e dos servizos técnicos económicos municipais. O Plan de Axuste é o documento máis transcendente que se vai aprobar nesta lexislatura e compromete os orzamentos municipais ata o ano 2022. O goberno Popular debe atender ás propostas da oposición para proceder coas formalidades democráticas requiridas nun tema clave. O mesmo que Santiago Amor demandaba cando estaba na oposición. NOTA PSOE SOBRE A XUNTA PORTAVOCES
| NOTA PREVIA DO CONCELLO
A Comisión de Economía e Facenda do Concello de Ames ditaminará mañá o Plan de Axuste 2012-2022 O documento será sometido a votación na sesión do Pleno municipal que se celebrará mañá xoves. A aprobación do Plan de Axuste 2012-2022 é unha medida extraordinaria e imprescindible para acollerse ao plan estatal de pagamento aos provedores das entidades locais. O Concello de Ames remitiu ao Ministerio de Facenda, con data 15 marzo, unha relación de 836 facturas, emitidas por 205 provedores que suman un importe total de 2.228.813,65 euros. A elaboración deste documento, dunha gran complexidade técnica, foi iniciada polos Servizos Económicos do Concello o 20 de marzo, o primeiro día hábil tras a publicación do modelo oficial, e rematouse esta mesma madrugada. O Plan de Axuste 2012-2022 foi presentado a primeira hora da mañá de hoxe aos grupos municipais nunha reunión da xunta de voceiros convocada polo alcalde Santiago Amor. Tras a celebración desta xunta de voceiros, o alcalde de Ames decidiu convocar de forma urxente a Comisión Permanente de Economía e Facenda e especial de Contas para avanzar na súa tramitación de xeito transparente e posibilitando que os grupos realicen as súas achegas. O Goberno de Ames entende que este mecanismo é fundamental para responder á crítica situación económica herdada no Concello e dá continuidade ao traballo realizado para sanear as arcas municipais. No último ano, as medidas de control do gasto público adoptadas permitiron un aforro duns 670.000 euros. Ames, 28 de marzo de 2012. O Concello de Ames celebrará mañá unha reunión da Comisión Informativa Permanente de Economía e Facenda e especial de Contas para ditaminar o Plan de Axuste 2012-2022 de forma previa á celebración da sesión plenaria. A aprobación en Pleno do Plan de Axuste 2012-2022 é unha medida extraordinaria e imprescindible para adherirse ao mecanismo de financiamento para o pagamento aos provedores das entidades locais habilitado polo Goberno do Estado a través do Real Decreto Lei 4/12, de 24 de febreiro. O Concello de Ames remitiu ao Ministerio de Facenda, con data 15 de marzo de 2011, unha relación de 836 facturas, emitidas por 205 provedores con data anterior ao 1 de xaneiro de 2012, que suman un importe total de 2.228.813,65 euros. Os Servizos Económicos do Concello de Ames iniciaron a elaboración do Plan de Axuste o martes 20 de marzo, o primeiro día hábil tras a publicación do modelo oficial na Orde HAP/537/2012 do 16 de marzo. A pesar da súa gran complexidade técnica, o esforzo dos Servizos Económicos do Concello fixo posible redactar o Plan de Axuste en só 8 días, rematando a súa elaboración na madrugada de hoxe mesmo. De cara a avanzar na súa tramitación coa transparencia debida e posibilitar o debate con todos os grupos municipais, o alcalde Santiago Amor convocou unha xunta de voceiros para analizar as liñas estratéxicas do Plan de Axuste. Tras a celebración desta xunta, o alcalde de Ames decidiu convocar con carácter urxente a Comisión Informativa Permanente de Economía e Facenda e Especial de Contas para ditaminar o Plan de Axuste antes da súa votación no Pleno de mañá 29 de marzo. Desde o Goberno municipal, considérase o Plan de Axuste 2012-2022 como un recurso fundamental e necesario para responder á crítica situación económica herdada no Concello. Segundo o alcalde Santiago Amor, responsable das áreas de Economía e Facenda, “traballamos desde o primeiro para dotar de liquidez ás arcas municipais e afrontar a nosa responsabilidade cos provedores”. “Non é sinxelo, pero estamos a avanzar na dirección correcta”, apunta o alcalde. Neste sentido, desde o departamento de Economía e Facenda calcúlase que as medidas de control do gasto público adoptadas no último ano permitiron un aforro duns 670.000 euros. En detalles, as principais medidas de aforro aprobadas poden desglosarse da seguinte maneira: -
A nova organización do Concello de Ames aprobada no Pleno de Organización do 8 de xullo de 2011, a proposta do Grupo Popular, supón un aforro anual de 121.578 euros respecto ao sistema establecido polos anteriores responsables do Goberno municipal. Este aforro explícase pola redución da convocatoria das Xuntas Ordinarias de Goberno, rebaixa das asignacións por Grupo Municipal e por cada concelleiro, do salario do alcalde e da reestruturación dos traballadores a disposición dos grupos. -
A redución das horas extras a cambio de xornadas de descanso supuxo un aforro de 80.000 euros. -
A modificación dos seguros de vehículos do parque móbil contabilízase nuns 9.000 euros. -
A utilización de medios propios e o cambio de xestión das bibliopiscinas supuxo un aforro de 20.000 euros. -
O cambio de contrato de telefonía aforrou 60.000 euros. -
A renegociación e o cambio de provedor do material de oficina, produtos de ofimática e consumibles supuxo un aforro de 6.800 euros. -
A supresión de vehículos de servizos cífrase nun aforro de 7.200 euros. -
A renegociación da mutua estableceu un aforro de 5.000 euros. -
O cambio de xestión das escolas deportivas e dos convenios cos clubs reduciu o seu custo nuns 95.000 euros. -
O cambio da conexión eléctrica/gasoil no subministro de auga no Milladoiro calcúlase nun aforro de 77.000 euros. -
A renegociacion de convenios de colaboración permitiu aforrar 30.000 euros. -
A cancelación de alugueres deportivos da nave polígono do Milladoiro aforrou 42.000 euros. -
Redución de 15.000 euros en gastos en publicidade e propaganda. -
A organización da celebración de concertos e da Festa da Xuventude a través de persoal propio e da renegociación das condicións anteriores supuxo un aforro de 20.000 euros. -
Do mesmo xeito, a organización da celebración das Festas de Nadal e de Reis a través de persoal propio e da renegociación das condicións anteriores supuxo un aforro de 15.000 euros. -
Os cambios de contratos en extintores e seguridade, entre outros, aforrou 3.000 euros. -
As revisións das tarifas eléctricas (eficiencia + revisión cadros/luminarias) cífrase nun aforro de 9.000 euros. -
A redución e a renegociación da iluminación de Nadal aforrou 45.000 euros -
O cambio na xestión da Feira do Comercio traduciuse nun aforro de 4.500 euros para as arcas municipais. -
A redución, renegociación e colaboración do Entroido e Magostos supuxo un aforro de 4.000 euros. -
A cancelación do aluguer dunha praza de garaxe sen uso sumou un aforro de 480 euros. Como avances para consolidar a liquidez do Concello de Ames, os responsables municipais lembran a recente formalización dunha operación de tesouraría co Banco Bilbao Vizcaya Argentaria que permitiu xa ao Concello de Ames no mes de febreiro dispor dun límite máximo de 2.775.000 euros, a través dunha conta de crédito, para afrontar pagamentos de facturas a provedores. Desde o Goberno municipal incídese ademais na importancia de ter conseguido a liquidación das contas de 2010 dentro do exercicio de 2011, feito que permitiu asegurar a transferencia de 400.000 euros que o Concello de Ames recibe mensualmente como participación nos tributos do Estado. Do mesmo xeito, ter liquidadas as contas en prazo permitiu tamén que o Concello de Ames siga optando ás subvencións convocadas pola Xunta de Galicia, xa que a Administración autonómica estableceu por decreto que, para concorrer ás súas convocatorias de axudas, as entidades interesadas deben ter pechado o exercicio anterior. |
| |
