O PP traizoa aos veciños e veciñas da Estrada eliminando a bonificación dos recibos da contribución
“A bonificación dos recibos da contribución, por mor dunha ponencia de valores mal feita, beneficia a todo o pobo da Estrada, que se conseguiu grazas ao esforzo e apoio de centos de veciñas e de veciños que durante 50 días estiveron pechados no concello, e que loitaron para pagar uns recibos da contribución xustos”
“Sendo o BNG a forza minoritaria da oposición, en tendo en fronte a un PP con maioría absoluta e a un PSOE en contra dos veciños e veciñas, aprobamos en solitario a bonificación que pretende eliminar agora o PP”
A Estrada, 11 de outubro de 2011: O PP acaba de aprobar na Comisión de Facenda de hoxe martes a eliminación da bonificación do IBI da vila e do rural. O BNG da Estrada votou en contra da modificación da ordenanza por considerala “non só inxusta e inoportuna, senón unha traizón ao pobo da Estrada”, afirmou o seu portavoz municipal, Xosé Magariños.
O concelleiro nacionalista considera “un erro eliminar estas bonificacións porque veñen a solucionar provisionalmente unha ponencia de valores mal feita con subas desproporcionadas e inxustificadas do recibo da contribución”. “E o PP e o actual alcalde son culpábeis desta situación, xa que foron eles os que aprobaron esa ponencia feita para saquear os petos dos veciños e veciñas”, engadiu o portavoz municipal do BNG.
“Porque hai que recordar”, explicou Xosé Magariños, “que sendo o BNG a forza minoritaria da oposición, en tendo en fronte a un PP con maioría absoluta e a un PSOE en contra dos veciños e veciñas, aprobamos en solitario a bonificación que pretende eliminar agora o PP, até que haxa unha nova ponencia de valores”.
“Unha bonificación, que beneficia a todo o pobo da Estrada”, engadiu o portavoz do BNG, “conseguida grazas ao esforzo e apoio de centos de veciñas e de veciños que durante 50 días estiveron pechados no concello, que loitaron para pagar uns recibos da contribución xustos.”
Xosé Magariños afirmou que “a eliminación da bonificación do IBI terá consecuencias nefastas para moitas familias (traballadores, pensionistas, parados, ...), que nesta fase da crise, que a cada paso é máis virulenta, van ter que facer verdadeiros malabarismos non só para afrontar os gastos diarios, senón para pagar a suba de impostos que vai aprobar o Partido Popular”.
“O PP deixou de lado o seu programa de goberno con proxectos imposíbeis e boas palabras para dar paso ao programa oculto, esquecendo a xestión da que tanto presumían, para dar paso ao máis doado, a suba de impostos”, afirmou o portavoz do BNG.
“Se o PP quere ter máis ingresos non ten máis opción que aprobar canto antes o PXOM, así non só se actualizaría a ponencia de valores desastrosamente mal feita, senón que permitiría a dinamización da economía local”, explicou Xosé Magariños. “Se durante o bipartito o PP non adicara os catro anos poñer paus nas rodas, agora xa teríamos o plan xeral aprobado, e a situación do concello sería ben distinta”, manifestou o portavoz municipal do BNG.
“Con esta medida, o PP está a traizoar aos seus propios votantes, xa que non o elixiron alcalde para subirlles os impostos, senón para facer unha boa xestión dos recursos, cousa que non está facendo, se avaliamos os 100 primeiros días de goberno”, engadiu Xosé Magariños.
“E quero recordar”, engadiu o concelleiro nacionalista, “que o BNG nestes últimos anos no goberno municipal mantivo conxelados os impostos municipais, e facendo unha boa xestión dos recursos, puido afrontar os gastos do concello e facer investimentos”.
“En 2004, o pobo da Estrada demostrou que a mobilización social dá os seus froitos”, afirmou o portavoz municipal do BNG. “Se en 2004 fomos quen de parar a un goberno municipal en contra dos veciños e veciñas, en 2011 tamén podemos conseguir frear esta subidas dos impostos municipais, pero cómpre mobilizarse e facelo xa!”, remachou Xosé Magariños.
