MÁIS DO 50% DOS ALUMNOS DE FRADES
DISPÓN DE PERFIL NAS REDES SOCIAIS SEN TER A IDADE LEGAL MÍNIMA REQUERIDA E SEN
COÑECEMENTO DOS SEUS PAIS
Unha vintena de nais e profesores do CPI Pontecarreira participaron no
primeiro obradoiro “Familias e redes sociais” e acordaron facer unha nova
sesión o vindeiro mes de setembro
24 de maio de 2012.- Máis da metade dos
nenos e nenas de 5º e 6º de Primaria do CPI Pontecarreira, de entre 10 e 12
anos de idade, ten perfil nalgunha rede social (cando a idade mínima legal é de
14 anos) e o fan sen ningún tipo de coñecemento dos seus pais sobre para que o
utilizan ou con que persoas contactan. Son os resultados dunha equisa realizada
esta semana nunhas xornadas organizadas pola Mancomunidade de Municipios da
Comarca de Ordes no CPI Pontecarreira e cuxos resultados foron dados a coñecer
durante a primeira sesión do obradoiro “Familias e redes sociais”,
celebrado no propio centro escolar e no que participaron unha vintena de pais,
profesores e o alcalde de Frades, Miguel Prado Patiño.
A técnico do Servizo de Prevención de Drogodependencias da Mancomunidade de
Ordes, Mónica González, sinala que “estes dous obradoiros, primeiro cos nenos e
despois cos pais, foron moi útiles xa que descubrimos que máis da
metade dos cativos teñen contas en Facebook e en Tuenti e que son totalmente
alleos aos riscos e ameazas que poden conlevar un mal uso das Redes Sociais. E, ademais,
comprobamos que os pais non saben que suben, para que as utilizan ou mesmo que
dispoñen de perfil nas redes sociais”.
O encontro cos cativos serviu para coñecer que a
maioría entra nas Redes Sociais iniciados por un irmán maior ou por algún
adulto. Ademais, todos eles amosaron un total descoñecemento dos posibles
riscos que poden supoñer un mal uso das redes sociais, como o acceso a contidos
inaxeitados, as ameazas á privacidade, ciberbullying (uso de medios
telemáticos para exercer un acoso psicolóxico entre menores), o sexting
(envío de contidos de tipo sexual, sobre todo fotos ou vídeos, producidos polo
propio remitente) ou o grooming (termo utilizado para describir as
prácticas online de certos adultos que se gañan a confianza dun menor finxindo
empatía con fins, normalmente, de satisfacción sexual). “Iso si, cando se
preguntaba sobre as distintas habilidades cos navegadores, todos coincidían en
que o primeiro que se aprendía era a borrar o historial”, indica Mónica
González.
Formación para os pais
A utilización de datos extraídos dos seus propios
fillos e fillas sorprendeu á vintena de nais e profesores do CPI Pontecarreira.
“A gran maioría dos pais descoñecían que os seus fillos tiveran perfil nalgunha
rede social e os que sí o sabían dixeron que se viron presionados pola
insistencia dos cativos, coa excusa de que todos os seus amigos o tiñan”,
explica a técnico do Servizo de Prevención
de Drogodependencias da Mancomunidade de Ordes. De feito, a gran maioría
xa teñen integrado o perfil no seu móbil, polo que para os pais e nais é aínda
máis difícil saber cando están conectados ou non. “Sabemos que moitos deles
utilizan as redes sociais para chatear polas noites e que mesmo están dende as
dez da noite ata a unha da madrugada chateando, o que repercute no rendemento
escolar do día seguinte”, conclúe Mónica González.
Por outra banda, o obradoiro “Familias e redes
sociais, estamos conectados?” servíu tamén para comprobar a carencia de
formación dos pais e nais en materia de novas tecnoloxías e redes sociais. Por
esa razón, a Mancomunidade de Municipios da Comarca de Ordes
fará en setembro un novo obradoiro en Frades, nesa ocasión cun contido máis
práctico para que os propios pais e nais poidan facerse un perfil en redes
sociais e coñecelas dende dentro.
Os datos acadados esta semana en Frades
corroboran os ofrecidos nun informe da rede EU Kids Online, que advirte de
que,aínda que as distintas redes sociais establecen límites de idade para o seu
uso, a realidade amosa que case un 40% dos menores de entre 9 e 13 anos ten o
seu propio perfil nunha rede social (cando en España a idade mínima legal é de
14 anos). A segunda sesión deste obradoiro de pais e nais terá lugar hoxe xoves
24 de maio, ás 19:00 horas, en Trazo, onde está confirmada a asistencia dunhas
15 persoas. Durante o vindeiro curso 2012-2013, esta iniciativa chegará tamén
aos colexios de Cerceda, Mesía, Ordes, Oroso e Tordoia.

Ningún comentario:
Publicar un comentario