Ames atópase entre os concellos de Galicia con
maior poboación
O Concello de Ames pasa a ser un dos principais
municipios de Galicia en canto a poboación se refire. Segundo se desprende dos
datos do INE dispón de 27.893 habitantes. O
crecemento exponencial que experimentou este concello na última década sitúao
no posto décimo sexto se temos en conta aos 315 concellos de Galicia. Iso
pódese contrastar se revisamos os últimos datos oficiais proporcionados polo
Instituto Nacional de Estatística. Este é unha cifra provisional xa que o
padrón municipal con data de 1 de xaneiro de 2010 non se pecha ata finais deste
ano.
O lema de Ames “Un concello
emerxente” adáptase como anel ao dedo se temos en conta a realidade
social deste municipio nos últimos anos. Este concello da comarca de Santiago
de Compostela está medrando a pasos axigantados ata converterse nun dos
principias municipios de Galicia en canto a poboación se refire. Este
incremento poboacional ven determinado pola constitución de dous grandes
núcleos urbanos que aglutinan a maior parte de poboación. En Bertamirás e no
Milladoiro residen 18.545 habitantes. Milladoiro é o núcleo máis poboado con
11.376 veciños/as, en segundo lugar atópase Bertamiráns con 7.169. Os 9.348
habitantes restantes distribúense polas urbanizacións que hai no municipio e
polos diferentes lugares do rural amiense.
O pasado 1 de marzo pechouse o período para
contabilizar a poboación do exercicio 2009. Todas as cifras oficiais do padrón
municipal do Instituto Nacional de Estatística xéranse a partir do mes de marzo
cando reciben os datos proporcionados polos distintos concellos de Galicia e de
España. Así o Concello de Ames tivo que enviar antes desta data todos os
movemento poboacionsis que se produciron no seu territorio durante o 2009. Segundo
os datos proporcionados polo INE, a 1 de xaneiro de 2010, están censados en
Ames 27.893 habitantes, polo que está moi preto da cifra de 28.000 que se
previa para este ano.
Aínda que non se trata de datos oficiais Ames
experimentou un incremento de preto de 1.000 habitantes nos último ano,
concretamente censáronse 910 novos veciños e veciñas. Por franxas de idades hai
que destacar que un 22,32 % dos habitantes teñen entre 30 e 39 anos; un 18,99%
están entre os 40 e os 49 anos e un 13,04 teñen de 0 a 9 anos. Estes datos
indican ben as claras que existe unha poboación eminentemente xoven en idade de
traballar que se traslada a este municipio para establecer a súa residencia
habitual. Ademais este grupo poboacional elixe este contorno para criar aos
seus fillos e fillas, polo que isto provoca que haxa un gran numero de nenos e
nenas no noso municipio. Os mozos e mozas que residen no Concello, comprendidos
entre 0-19 anos, representan o 22,66% da pirámide demográfica.
Todas estas características sociais implican que
dende a Administración local se teña que dedicar un gran número de recursos a
políticas sociais como son o programa Bos Días Cole, o servizo da Rede de
Comedores Escolares e o programa Tardes Divertidas. Ao mesmo tempo tamén se
realizan actividades en períodos non lectivos, como os programas lúdicos
(Primavera lúdica, Xuño lúdico e Setembro lúdico) e numerosos obradoiros
destinados aos rapaces para colaborar coa súa formación persoal e profesional
día a día.
En contraposición existe un baixo porcentaxe de
poboación envellecida. As persoas de entre 60 e 69 anos representan o 6,65%
mentres que os de 70 a 79 suman unha porcentaxe do 4,23%. Este índice vai
decrecendo segundo aumenta o número de anos. Hai que destacar que nestes intres
hai dúas persoas centenarias no concello, un home e unha muller. Por outra
banda hai que salientar a paridade de sexos xa que só existen tres puntos de
diferenza entre os homes e as mulleres: os primeiros representan o 48,53% da
poboación, mentres que elas o 51,47%.
Preto dos 30.000 habitantes
Pero deixando de lado eses números e centrándonos
nos últimos datos oficiais publicados polo Instituto Nacional de Estatística a
data de 1 de xaneiro de 2009 podemos dicir que Ames é un dos concellos galegos
que máis medrou nos últimos quince anos. No ano 1996 había censadas 13.288
persoas, das que 6.453 eran homes e 6.835 eran mulleres. Vendo estes datos e
comparándoos cos actuais as diferenzas son significativas. Catro anos despois,
no 2000, a poboación amiense xa era de 16.549 habitantes pero o incremento máis
grande produciuse na última década chegando a case 28.000 cidadáns censados,
cun incremento de preto de 12.000 persoas.
Por outra banda se collemos estes datos
demográficos e os comparamos cos dos 314 municipios restantes de Galicia pódese
observar que Ames encóntrase entre os concellos galegos con maior índice de
poboación. Despois das sete grandes cidades de Galicia hai un grupo de seis
municipios que teñen cifras similares en materia de poboación. Ames, Carballo,
Culleredo, Oleiros, Ribeira e Redondela andan en torno aos 30.000 habitantes.
Entres estes dous grupos hai que destacar a Narón e a Vilagarcía de Arousa que
contan con algo máis de 37.000 habitantes censados.
Se temos en conta aos concellos da comarca, Ames
tamén sae gañador posto que só está por debaixo de Santiago de Compostela, que
conta con 95.092 habitantes. O terceiro posto é para Teo que conta con 17.807
veciños/as, despois está Brión (7.205), Vedra (5.059), Boqueixón (4.462) e Val
do Dubra con 4.423 cidadáns censados.
Na actualidade ocupamos o posto número décimo
sexto tendo en conta os concellos máis poboados de toda Galicia. O municipio
amiense foi subindo postos nesta clasificación a medida que pasaron os anos.
Así en 1960 ocupaba o posto número 55 con 9.597 habitantes. Dez anos despois,
en 1970, subiu catro chanzos ata chegar ao posto 51, pero o incremento máis
significativo comeza na década dos noventa. No ano 2000 Ames xa contaba con
16.549 veciños/as e xa ocupaba o posto vixésimo quinto. Este incremento persistiu
ata os nosos días ata chegar á décimo sexta posición.
Boas comunicacións e servizos
Este auxe poboacional ven determinado por un
incremento na oferta de servizos e de calidade de vida que ofrecen os núcleos
urbanos e rurais de Ames. Este incrible aumento confírmao coma un dos
municipios máis atractivos por varias razóns: a oferta de vivenda nova e de
calidade a bo prezo, ser un importante núcleo de puxanza económica, os servizos
municipais orientados á mellora na calidade de vida son moitas das
características que fan de Ames un perfecto destino para comezar a construír
unha nova vida familiar.
Ademais, a súa proximidade coa cidade de Santiago de Compostela e a mellora das comunicacións co resto de Galicia, en parte grazas á posta en marcha da autovía que une Santiago con Brión, supón un paso moi importante para empadroarse no Concello: prezos máis ao alcance dos cidadáns e todo preto da casa nun ambiente máis relaxado lonxe da tensión que se respira nas cidades.
Aínda que no futuro todo parece indicar que o crecemento da poboación non vai aumentar ao ritmo destes últimos anos, tanto pola crise como polo estancamento de poboación que sufre a sociedade española, Ames seguirá sumando habitantes ao seu censo. Deste xeito, poderá seguir presumindo de ser un dos municipios que máis medre en toda Galicia nos próximos meses e, por que non, alcanzar a cifra soñada dos 30.000 amienses.
Ademais, a súa proximidade coa cidade de Santiago de Compostela e a mellora das comunicacións co resto de Galicia, en parte grazas á posta en marcha da autovía que une Santiago con Brión, supón un paso moi importante para empadroarse no Concello: prezos máis ao alcance dos cidadáns e todo preto da casa nun ambiente máis relaxado lonxe da tensión que se respira nas cidades.
Aínda que no futuro todo parece indicar que o crecemento da poboación non vai aumentar ao ritmo destes últimos anos, tanto pola crise como polo estancamento de poboación que sufre a sociedade española, Ames seguirá sumando habitantes ao seu censo. Deste xeito, poderá seguir presumindo de ser un dos municipios que máis medre en toda Galicia nos próximos meses e, por que non, alcanzar a cifra soñada dos 30.000 amienses.
.JPG)
