Preto de 1.000 usuarios
acudiron aos orientadores laborais do Concello de Ames
Ames dispón de dous orientadores laborais,
que se encontran nas dependencias municipais da Casa do Concello, en
Bertamiráns, e nas oficinas municipais do Milladoiro. Estes traballadores
dedícanse a asesorar a todas aquelas persoas que precisan información na busca
de emprego, sumando 921 usuarios atendidos en total, tanto provenientes do
Servizo Público de Emprego como pola súa conta. Este departamento súmase ás
restantes iniciativas en materia de dinamización do emprego como son Inserames
III, a Rede XIANA ou Ames Solar, entre outros.
Este servizo que leva a cabo o goberno municipal ten como
principal obxectivo avaliar o perfil curricular de cada demandante de emprego.
Ao mesmo tempo actúa sobre as actitudes e capacidades destes para establecer
medidas que adecúen os seus intereses e motivacións á situación actual do
mercado. Ademais, tenta detectar e dinamizar as posibles iniciativas de
autoemprego.
Estes orientadores determinarán os obxectivos profesionais
dos usuarios do servizo así como as competencias xerais e técnicas profesionais
das que dispoñen grazas a unha ferramenta fundamental: a entrevista. Nestas
citas perséguese fomentar e potenciar a autonomía do demandante no proceso de
inserción laboral establecendo un plan de traballo inicial para que este poida
afrontar a súa busca.
De xeito máis específico, os orientadores da oficina de
Bertamiráns e da do Milladoiro avaliarán cada perfil de xeito individual
concretando e clarificando o que persegue profesionalmente. Deste modo
permitirase unha optimización no asesoramento e na toma de decisións
potenciando os seus puntos fortes de cara a acadar un emprego adecuado aos seus
intereses e posibilidades.
Primeiro paso
A primeira ferramenta de axuda é a entrevista. Nesta cita, os
orientadores son os encargados de informar acerca do servizo de orientación
laboral e doutros servizos do Servizo Público de Emprego. En termos xerais,
analízase a situación actual do demandante e o seu perfil para avaliar se o
usuario é, ou non, un posible candidato a desenvolver un itinerario
personalizado de inserción (IPI).
O traballo deste persoal vai ás veces máis aló de informar,
orientar e deseñar un plan, senón que a motivación para non desistir na busca é
fundamental nesta época de crise. Os últimos datos do Instituto Galego das
Cualificacións arroxan un total de 2.442 parados no municipio no primeiro
trimestre deste ano.
A poboación en situación de demanda de emprego, composta
polos residentes de máis de 16 anos do Concello de Ames, caracterízase
simultaneamente por tres características básicas. A primeira deles é estar sen
traballo, nin por conta allea nin por conta propia, a segunda é estar en busca
de traballo e a terceira está relacionada coa súa dispoñibilidade para
traballar.
Obxectivo: dinamización na crise
Este novo dato estatístico supón un aumento de 537 parados
respecto dos datos do ano 2008, producíndose un forte incremento na poboación
masculina. Esta tendencia ascendente que experimentou o paro no Concello
concéntrase no sector da industria manufactureira, na construción, no sector do
motor e na hostalería.
Nos anos precedentes o colectivo feminino representou o
63’64% do total de desempregados pero na actualidade o forte incremento
no sector masculino aproximou esas porcentaxes. Das 2.442 persoas
desempregadas, 1.319 son mulleres, representando o 54’01%, mentres que
1.223 son homes, o que supón o 45’98% do total da poboación.
Estes datos reflicten a importancia de levar a cabo este tipo
de medidas dinamizadoras que promovan o non estancamento e motiven a busca de
emprego.
Seguintes pasos
Unha vez levada a cabo a entrevista, e que o demandante se
considere candidato ou candidata á elaboración dun Itinerario Personalizado de
Inserción, comeza a fase de recollida de información e a elaboración do perfil.
Neste apartado, os orientadores analizarán os datos curriculares, a
dispoñibilidade e afondan no obxectivo profesional principal.
A partir de aí, elabórase un plan individual, de acordo co
participante, establecendo tarefas, estratexias, actívanse os servizos e
programas nos que participará e recóllese nun documento de compromiso de
actividades asinado polo interesado e o titor.
A fase de desenvolvemento das actividades descritas no
itinerario comezará segundo o planificado á vez que se leva a cabo un
seguimento que permitirá, de ser necesario, modificar e redefinir as pautas
para asegurar o correcto funcionamento da orientación laboral.
Usuarios
As persoas atendidas polo servizo de orientación laboral
ascenden a preto de 1.000, das que 552 foron usuarios enviados polo Servizo
Público de Emprego, máis do 50%, e 371 foron usuarios non direccionados polo
SPE que acudiron por conta propia. Ademais, 28 usuarios foron susceptibles dun itinerario personalizado de
inserción (IPI).
As oficinas repartiron o traballo case ao 50% xa que a
delegación de Bertamiráns atendeu a 441 desempregados e a do Milladoiro a 480,
aportando resultados similares.
No que respecta á distribución por sexo, os datos apuntan a
unha maior presenza da muller aínda que con porcentaxes moi próximas ás que
obteñen os homes. Así, o 53’81% das persoas derivadas polo Servizo
Público de Emprego, que acudiron ás oficinas, son mulleres polo 46’19%
que representan os homes.
As sondaxes dos datos relativos á inserción ata este comezo
de ano confirma o difícil momento que nos deixa a crise económica, onde o 87%
dos usuarios permanecen desocupados polo 13% que atoparon emprego. Se ben non
hai que ser pesimistas ante as fortalezas e as oportunidades que presenta o
territorio amiense cun comercio maioritariamente de nova creación e moi
densamente situado por eixes, así como polo apoio da Administración local
mediante actuacións dinamizadoras e de promoción.
Outras medidas ocupacionais
Durante este período 2009/2010 o Concello de Ames continuou
coas súas iniciativas para axudar na dinamización do emprego no territorio
municipal. Algunhas das máis importantes son Ames Solar, a Rede Xiana, os plans
de cooperación, os cursos do Plan AFD ou Inserames III.
Ames Solar desenvólvese
dende o pasado xuño para loitar contra o desemprego e promover o uso das
enerxías renovables. Participan 26 persoas ás que se lle facilita formación e
emprego durante un ano na instalación de enerxía solar térmica e noutras
medidas de aforro enerxético. Na primeira fase o alumnado comezou colocando
paneis solares na escola infantil municipal O Bosque e no Club de Piragüismo Ribeiras
do Tambre, na área recreativa de Tapia. Na súa segunda fase comezaron as obras
nos pavillóns do Milladoiro e de Bertamiráns.
A Rede Xiana estivo dirixido a sectores da poboación con
maior taxa de desemprego para fomentar unha mellor formación e capacitación
profesional. Unhas 15 persoas gozaron coa aprendizaxe e as posteriores
prácticas en entidades e organizacións públicas e privadas a través de acordos
coa Deputación da Coruña.
Son 100 usuarios os que se están beneficiando do Programa
Integrado en materia de Emprego, InserAmes III, que busca a integración no
mercado laboral daquelas persoas que se atopan no paro. Durante o mes de
novembro e decembro levouse a cabo a fase de formación transversal, xunto coas
sesións de titoría correspondente aos itinerarios personalizados. Dende comezos
de ano están participando en diferentes actividades formativas.
Outras das medidas foron o curso do Plan AFD de monitor de
actividades de tempo libre infantil e xuvenil, ao que asistiron 15 persoas, e
os plans de cooperación mediante os cales se puideron contratar a 27
desempregados e desempregadas para tarefas de interese xeral no Concello de
Ames.
O Concello de Ames, coñecedor da importancia que ten o tecido
empresarial do pequeno comercio como motor económico e xerador de emprego,
tamén aposta pola formación de todos aqueles emprendedores que aposten por
poñer en marcha novas iniciativas empresarias. Deste xeito durante o mes de
abril desenvolverase un seminario formativo que terá como principal obxectivo
xerar, madurar e avaliar, dunha maneira sinxela, unha idea de negocio e ver as
posibilidades que ten para converterse nun proxecto de empresa.
O incremento do desemprego, xunto coa evolución constante do
mercado de traballo, froito das evolucións sociais, tecnolóxicas e
organizativas, fai que a busca de emprego comporte unha dificultade engadida
para as persoas que se ven nesa situación. Este servizo facilitado dende a
Administración local persegue precisamente axudar nese eido para mellorar as
condicións de vida dos veciños e veciñas amienses.
