MELIDE - O Concello de Melide acometerá obras por valor de 188.487,35 €

O Concello de Melide acometerá obras por valor de 188.487,35 € entre as que destacan o acondicionamento de viais e ampliación das zonas de saneamento

• O Concello de Melide financiará conxuntamente coa Deputación de A Coruña dentro do Plan de Cooperación dos Concellos obras por contía de 188.487,35 €.

• As obras financiadas conxuntamente entre o Concello de Melide e a Deputación manifestan a vontade da alcaldesa de Melide, Ánxeles Vázquez de seguir traballando mediante o establecemento de convenios con outras administracións co fin de que Melide poida contar coas infraestruturas pertinentes e co debido mantemento das mesmas.

Melide, 9 de setembro de 2010.- O Concello de Melide acometerá obras por un valor total de 188.487,35 € dentro dos plans de cooperación da Deputación de A Coruña cos Concellos pa provincia. No primeiro proxecto, que constará da apertura de novos viais coas correspondentes beirarrúas no lugar de Os Ánxeles, S. Cibrao, Cabanelas, Xubial, Piñeiro, Seixas, Zas de Rei, Piñor, O Folicheiro, Rúa Ourense e Rúa Emilio Pereiro no que o Concello terá que financiar a súa parte con 9.424, 37 € mentres que a Deputación financiará o resto. O segundo proxecto que ascende a 91.068,41 €, consta de establecer redes de pluviais e de reposición de firme na Rúa Javier Rodríguez, máis en sete rúas máis,nas que a Deputación de A Coruña financia un total de 82.115,92 € mentres que o goberno local aportará 8.952,49 €. Dito proxecto tamén engloba o saneamento, caixas de rexistro e aglomerado das zonas citadas. A alcaldesa de Melide, Ánxeles Vázquez, ten vontade de seguir traballando para conseguir o establecemento de convenios con outras administracións co fin de que Melide e as parroquias que forman o concello poidan contar coas pistas en boas condicións e un saneamento de augas residuais propio dunha vila como é o caso de Melide.

BRION - UN HIMNOTIZADOR DE CABALOS, PRINCIPAL NOVIDADE DA XXIX FESTA DO CABALO DE BRIÓN

UN HIMNOTIZADOR DE CABALOS, PRINCIPAL  NOVIDADE DA XXIX FESTA DO CABALO DE BRIÓN

Preto de 400 exemplares participarán na ruta cabalar, nas probas de salto e no concurso morfolóxico entre o 17 e o 18 de setembro

9 de setembro de 2011.- Brión converterase no centro do mundo do cabalo na vindeira fin de semana do 17 e 18 de setembro, datas nas que terá lugar a súa tradicional Festa do Cabalo que este ano chega á súa vixesimonovena edición. Uns 400 exemplares participarán nesta festa organizada pola Asociación Festa do Cabalo de Brión, en colaboración co Concello de Brión e a Deputación Provincial da Coruña.

A principal novidade desta edición chega de México, país do que é oriundo Marcelino “Chico” Ramírez, un dos grandes mestres da comunicación con cabalos e unha das primeiras figuras do mundo na especialidade de doma ecuestre natural. En Brión, “Chico” Ramírez presentaralles aos espectadores o seu método de himnose, manexo e monta natural do cabalo. Un espectáculo único en Galicia e que de seguro sorprenderá tanto a expertos como a novatos no mundo do cabalo.

Durante preto dunha hora, “Chico” Ramírez ofrecerá un espectáculo de doma dun cabalo que nunca antes fora montado. Para iso, este enxeñeiro agrónomo utilizará unha disciplina que el mesmo denomina “Manejo natural del Caballo”. Unha modalidade que xurde dunha combinación da psicoloxía conductista e da etoloxía (rama da bioloxía que estuda o comportamento dos animais).

Este mestre mexicano asegura que co seu sistema é posible obter xentilmente a cooperación do cabalo nas tarefas que se lle solicitan. Unha demostración que poderán ver en vivo e totalmente de balde todos os que se acheguen o domingo 18 de setembro, ás 18:00 horas, polo monte Rañalonga de Brión.

Preto de 400 participantes

Un dos responsables da Asociación Festa do Cabalo de Brión, Manuel Fernández, espera reunir nesa fin de semana a varios milleiros de persoas no monte Rañalonga, onde dende o ano 1982 se concentran os afecionados ao mundo do cabalo. “Xa temos confirmada a presencia duns 400 cabalos nas probas, dos que case a metade participarán o sábado na ruta cabalar polas beiras do Tambre, que terá lunha duración aproximada dunhas 3 horas”, explica Manuel Fernández.

Todas as persoas que queiran participar nalgunha das probas do Concurso Morfolóxico podrán inscribirse na mesa da Organización o mesmo domingo 18 de setembro, entre as 9:00 e as 10:00 horas. Iso si, deberán ser identificados correctamente tanto o xinete como o cabalo participante na proba.

Programa da Festa

A XXIX Festa do Cabalo abrirá as súas portas o sábado 17 de setembro, ás 16:00 horas, cunha ruta cabalar polo monte Rañalonga, seguindo o cauce do río Tambre. Mentres uns participan nese percorrido, no recinto cabalar do monte Rañalonga terán lugar as probas de saltos de obstáculos nas súas distintas modalidades (1 metro, Maxi-Mini, Seis barras e Salto de potencia).

Ás 21:00 horas terá lugar unha das probas máis divertidas, a tradicional carreira de burros, que dará paso a unha cea entre os participantes. Para asistir á cea, os participantes teranse que anotar antes do 15 de setembro. O prezo é de 20 euros.

O domingo 18 de setembro as probas do concurso morfolóxico comezarán ás 10:00 horas, co concurso de potras e potros cruzados. Durante toda a xornada sucederanse as distintas categorías. Paralelamente, ás 11:00 horas terá lugar unha xincana, seguida co concurso de arrastre (13:00 horas).

Ás 14:00 horas farase unha pausa para o xantar. No recinto de Rañalonga haberá unha pulpería privada para todos os que o desexen. Xa pola tarde, e despois da embertada de xovencas (17:00 horas), terá lugar a exhibición de manexo natural de cabalos de “Chico” Ramírez (18:00 horas) e un espectáculo de doma (ás 19:00 horas).

A Festa do Cabalo de Brión rematará pasadas ás 20:00 horas coa entrega dos premios. En total, a XXIX Festa do Cabalo de Brión repartirá 4.050 euros en premios. Dende a Asociación Festa do Cabalo de Brión advirten aos participantes que o maltrato aos animais será motivo de descalificación automática.

BNG A ESTRADA - O BNG insta ao alcalde a arranxar xa as deficiencias do multiusos

O BNG insta ao alcalde a arranxar xa as deficiencias do multiusos

“López é o responsábel desta situación, xa que formaba parte dun goberno municipal que construíu esta chapuza, e non é de recibo que agora que ten nas súas mans a solución, adíe o arranxo para que nun futuro sexa aínda máis gravoso para as arcas municipais.”

A Estrada, 9 de setembro de 2011: Hai escasos días o Alcalde da Estrada, o popular José López, daba conta da imposibilidade do concello para afrontar o arranxo das goteiras do multiusos, cuxo custe, segundo o alcalde, ascende a 17.000 €, 12.000 € dos cales tería que afrontalos mediante crédito, por mor da liquidación negativa de 2010.

O portavoz municipal do BNG, Xosé Magariños, declarou que coincide “co alcalde na gravidade do problema do multiusos, pero temos que recordar desde cando temos ese problema, quen son os culpábeis do estado deste recinto e cal é o custe real do arranxo das múltiples deficiencias deste”, subliñou Xosé Magariños.

Neste sentido, Xosé Magariños, dixo que “esta é unha das chapuzas herdadas do goberno de Chito Campos, do que formaba parte o actual alcalde José López”. “Este recinto multiusos, feito con cargo aos orzamentos da Xunta de Galiza, foi mal construído desde un principio, de aí os problemas que ten”, e engadiu o concelleiro nacionalista, “e o daquela goberno municipal do PP, do que José López formaba parte, no canto de reclamar á empresa adxudicataria o arranxo das deficiencias, primeiro recepcionaron a obra, e despois denunciárona no xulgado, dilatando a solución do problema varios anos.”

“Mais non só iso,” subliñou o portavoz do BNG “os 17.000 euros dos que fala o Alcalde é só unha parte do custe total do arranxo, que segundo as estimacións feitas por un perito independente durante o período no que o compañeiro do BNG, Xoán Carlos Castro Blanco era concelleiro de deportes, ascende a 36.000 euros, máis do duplo do que di o alcalde.”

“Neste sentido”, engadiu Magariños “quero destacar os esforzos feitos polos meus compañeiros e compañeiras do BNG no anterior goberno municipal para desatascar este problema e darlle unha solución definitiva, entorpecida pola labor do anterior goberno do Partido Popular, e xa nos orzamentos deste ano, como recoñece o Alcalde xa hai había unha partida orzamentaria para esta cuestión.”

“López é o responsábel desta situación, “subliñou Xosé Magariños, “xa que formaba parte dun goberno municipal que construíu esta chapuza, e non é de recibo que agora que ten nas súas mans a solución, adíe o arranxo para que nun futuro sexa aínda máis gravoso para as arcas municipais.”

“El é o alcalde, que busque a solución” espetou o portavoz do BNG, “sempre pode petar nas portas dos gobernos amigos da Xunta e da Deputación de Pontevedra, que malo será que non poidan asumir o arranxo do multiusos, cando hai uns meses, en plena campaña electoral, a Diputación encheu o noso concello de carteis anunciando obras de dubidosa utilidade pública.”

Para rematar, o portavoz municipal do BNG, quixo “recordarlle ao señor Alcalde que o Centro de Tecnificación de Badmintón, único en toda Galiza, ou o club de baloncesto, ou a Fundación de Exposicións e Congresos da Estrada, están a utilizar estas instalacións, e non é de recibo que as estean a utilizar nas condicións terceiro mundistas nas que se atopan”; e xa para rematar, Xosé Magariños pediulle ao “Alcalde que se mova, porque por moito dramatismo que lle bote nas súas intervencións públicas non conseguirá arranxar o problema.”

AMES - Comedores Escolares, Tardes divertidas e Bos días cole serán unha realidade este ano por primeira vez no CEIP Barouta

Comedores Escolares, Tardes divertidas e Bos días cole serán unha realidade este ano por primeira vez no CEIP Barouta

Ames, 09 de setembro de 2011. O CEIP de Barouta ten todo a punto para que o vindeiro luns, co inicio do curso, se poñan en marcha tamén por primeira vez os servizos de comedores Escolares, Tardes Divertidas e Bos Días cole para todos aqueles nenos que desexen acceder a estes servizos que ofrece o Concello de Ames para facilitar a conciliación da vida laboral e familiar. O goberno do Partido Popular quixo dotar ao CEIP Barouta dos mesmos servizos que teñen o resto dos colexios amienses, por iso o vindeiro curso será o primeiro no que este centro ofrecerá o servizo de comedores escolares, o Bos Días Cole e o Tardes Divertidas. O goberno municipal fai unha importante e clara aposta pola conciliación da vida laboral e familiar e ten un compromiso firme na prestación dos servizos complementarios. Coa incorporación de Barouta agora son todos os colexios do Concello de Ames os que ofrecen servizos de conciliación e de comedores.

Barouta ten apuntados nove nenos para o Bos Días Cole, 12 para o Tardes divertidas e 48 para o servizo de comedor escolar. Tanto o Bos Días Cole coma o Tardes Divertidas non teñen pechada a matrícula. Aínda que o número de nenos que empregarán os servizos de Tardes Divertidas e Bos días Cole non chega ao que o Concello prevía inicialmente para ofertar o servizo, “farase un esforzo para que Barouta oferte os mesmos servizos que os resto dos centros” explica o concelleiro de Servizos, Ramón G. Argibay.

O goberno local lembra que Ames arrastra problemas de prazas en colexios dende a época do bipartito da Xunta, cando non se fixo nada por este concello en materia educativa. Ademais, o anterior rexedor, Carlos Fernández non tivo previsión sobre o aumento de nacementos no concello de Ames e non puxo a disposición da Xunta os terreos para construír un novo centro de infantil a pesar de que a Consellería de Educación mostrou sempre a súa boa disposición para dotar ao concello dun novo centro.  Agora o actual executivo local está traballando para dotar á localidade de Bertamiráns dunha nova escola infantil.

Maís de 2.800 nenos de tódalas idades están matriculados nalgún centro escolar público en Ames

O ano pasado Barouta tivo 158 nenos matriculados, este ano o número ascendeu a 169. Ese lixeiro incremento é un fiel reflexo do que aconteceu na maioría dos outros centros escolares de Ames, o CEIP A Maía, pasou de 639 a 643 nenos, CEIP Ventín pasa de 421 a 471, a Escola Infantil de Milladoiro pasa de 300 a 310, o IES mantense nos 600 alumnos e o CEIP Agro do Muíño tamén aumenta os seus 410 alumnos matriculados o ano pasado, aínda que non se concretou en cifra. Soamente os centros O Bosque e A Madalena reducen o número de matrículas, O Bosque pasa de 120 a 115 alumnos e A Madalena, que tiña 97, queda con 91.

En total, en Ames, 1.118 rapaces e rapazas empregarán o servizo de comedores, 285 fan uso do Bos Días Cole e 155 están matriculados no servizo de Tardes Divertidas.

SILLEDA - Mellora da sinal de TDT a través dos repetidores de Parada e Graba

Mellora da sinal de TDT a través dos repetidores de Parada e Graba

Os veciños que aínda teñan dificultades para sintonizar algunha canle de televisión deben de poñerse en contacto cun antenista

Silleda, 9 de setembro de 2011. En días pasados, técnicos da entidade Retegal achegáronse ata o municipio de Silleda para ver as posibilidades de mellora do sinal de Televisión Dixital Terrestre (TDT), xa que se viñan rexistrando aínda zonas de sombra nas que non se vían distintos canles televisivos. Dende esta empresa, xa se puxeron en contacto cun antenista da localidade para revisar os repetidores de Graba e Parada, en cuxa zona de influencia se viñan producindo queixas dos veciños pola mala recepción do sinal de TDT.

“Logo da revisión realizada se xurde algún problema nunha vivienda na que non perciben correctamente o sinal, os usuarios deben saber que isto se debe ao alimentador da antena, que estaría adaptado para a televisión analóxica”, sinala Antonio Couso, concelleiro de Medio Rural. Deste xeito, e segundo indica o edil silledense, os veciños deben de poñerse en contacto con calquera antenista autorizado para tratar de solventar o problema. “En caso de que aínda tiveran dificultades despois da visita do antenista, os usuarios poden achegarse ata o Concello para estudar o seu caso e, se cabe, facer as oportunas reclamacións”, engade Antonio Couso.

FRADES - OS VECIÑOS DE CÉLTIGOS CELEBRAN ESTA FIN SE SEMANA AS SÚAS FESTAS DE AUGASANTAS

OS VECIÑOS DE CÉLTIGOS CELEBRAN ESTA FIN SE SEMANA AS SÚAS FESTAS DE AUGASANTAS

09 de setembro de 2011.- Os veciños e veciñas de Céltigos celebrarán esta fin de semana as súas tradicionais festas de Augasantas, nas que contan coa colaboración do Concello de Frades. Unhas festas que darán comezo mañá sábado 10 de setembro, ás 13:30 horas, momento da celebración da misa solemne e dunha sesión vermouth a cargo da orquestra Estrellamar, que tamén protagonizará a verbena nocturna canda un dúo musical.

Para a xornada do domingo 11 de setembro está prevista tamén unha misa solemne ás 13:30 horas e unha sesión vermouth a cargo dun dúo musical. Como acontece con todas as comisións de festas, o Concello de Frades colabora este ano cunha aportación de 770 euros (550 euros para sufragar os gastos da festa e outros 200 euros para a limpeza do campo da festa).

AMES – o concello acollerá un curso de autoprotección para mulleres víctimas da violencia de xénero

Ames acollerá un curso de autoprotección para mulleres víctimas da violencia de xénero

O curso é unha iniciativa da Secretaría Xeral de Igualdade, en colaboración co Sindicato Unificado de Policía e o  Servizo de atención á Muller de Ames e celebrarase os días 19, 20, 22, 26, 27 e 29 de setembro en horario de 18.00h a 20.00horas

Ames, 09 de setembro de 2011. O Concello de Ames acollerá un curso de autoprotección para mulleres víctimas da violencia de xénero durante os vindeiros días 19, 20, 22, 26, 27 e 29 de setembro en horario de 18.00 h. a 20.00 horas da tarde. Trátase dunha iniciativa posta en marcha o pasado ano pola Secretaría Xeral de Igualdade en colaboración co Sindicato Unificado de Policía. As localidades de Arteixo, Ribeira, O Barco, Verín, Cangas, Moaña e Ponteareas acolleron os cursos celebrados no que vai de ano. Ames, Monforte e Vigo tamén foron localidades elixidas para impartir o curso nos meses de setembro e outubro.

As beneficiarias deste curso aprenderán técnicas de seguridade estática e dinámica para reaccionar ante unha situación de violencia e como actuar se hai un menor presente. Os contidos didácticos están orientados á adquisición de destrezas que lles proporcionen ás mulleres unha maior habilidade para xestionar positivamente as situacións de risco por violencia e, consecuentemente, teñan unha percepción de maior seguridade persoal. O encargado de impartir estes talleres é Alejandro Gómez, un axente adscrito ao Sindicato Unificado de Policía Nacional.

Cada curso ten unha duración de 12 horas, divididas en sesións teóricas e prácticas, consistentes en analizar a tipoloxía dos comportamentos violentos que se producen e os escenarios máis frecuentes destes, entre os que o máis habitual é o domicilio. En canto aos contidos prácticos que se imparten o curso destacan técnicas para practicar esquivas, o uso correcto da distancia ante unha agresión, os movementos precisos para un desprazamento eficaz, o compostamento recomendable se hai menores presentes, ou o uso da voz para conter a violencia do agresor.

Contacto para máis información

Todos os veciños e veciñas que estean interesados en poñerse en contacto co departamento da Muller poden acudir á unidade municipal de servizos sociais de Bertamiráns, que se atopa a Casa da Cultura de Bertamiráns, ou á unidade municipal de servizos sociais do Milladoiro, que se atopa nas oficinas xerais do Milladoiro. Tamén poden chamar ao números de teléfono 981 890 964 e 981 535 941 ou mandar un correo electrónico solicitando a información que desexen á dirección muller@concellodeames.org.

OROSO - ABRESE O PRAZO DE INSCRICIÓN NAS ACTIVIDADES DEPORTIVAS, POR PRIMEIRA VEZ SE FARÁ POR RIGUROSA ORDE DE INSCRICIÓN

O CONCELLO DE OROSO ABRE O PRAZO DE INSCRICIÓN NAS ACTIVIDADES DEPORTIVAS, QUE POR PRIMEIRA VEZ SE FARÁ POR RIGUROSA ORDE DE INSCRICIÓN

As novidades deste ano é a organización de cursos de golf e de xadrez

9 de setembro de 2011.- O Concello de Oroso abre o prazo de inscrición nas súas actividades deportivas para o novo curso 2011-2012, unhas clases que se impartirán entre os meses de outubro e maio. Unha convocatoria que este ano inclúe unha importante novidade con respecto a anos anteriores: a admisión dos participantes farase por rigorosa orde de anotación. Ata o de agora realizábase un sorteo cando o número de inscritos superaba o número de prazas dispoñibles.

As inscricións realizaranse no centro deportivo Juanito Amigo de Sigüeiro entre o 12 e o 30 de setembro. As follas de inscrición poden descargarse da páxina web municipal: www.oroso.es. O prezo das actividades xestionadas directamente polo Concello (como pilates, taichí, ioga ou ximnasia de mantemento) teñen un prezo anual de 80 euros para os empadroados en Oroso e de 130 euros para os non empadroados. O resto das actividades están conveniadas con clubes deportivos, que serán os encargados de xestionar os cobros. En ambos casos, o Concello de Oroso establecerá un desconto do 20% nas tarifas para as familias numerosas.

Golf e xadrez, novidades

Para este curso 2011-2012, o Concello de Oroso mantén a mesma oferta deportiva do ano pasado, á que hai que engadir dúas novidades: cursos de golf e de xadrez. Os cursos de golf serán organizados e impartidos por Tambre Golf, mentras que os de xadrez correrán a cargo do Clube Universitario de Xadrez de Santiago. Neste caso, compre sinalar que en 2010 o Concello de Oroso xa ofertara a posibilidade de organizar un grupo de xadrez, pero que non se chegou a impartir ao non contar cun número mínimo de participantes.

A oferta deportiva deste ano en Oroso, ademais dos mencionados golf e xadrez, inclúe: tiro con arco, fútbol, tenis de mesa, patinaxe, hockey, ioga, baloncesto, taichí, beisbol, ximnasia de mantemento, fútbol sala, taekwondo e pilates. Anotacións e máis información no centro deportivo Juanito Amigo de Sigüeiro.

TORDOIA – CURSOS DE INFORMÁTICA

O CONCELLO DE TORDOIA ABRE O PRAZO DE INSCRICIÓN EN CURSOS DE INICIACIÓN Á INFORMÁTICA

9 de setembro de 2011.- O Concello de Tordoia organiza uns cursos de iniciación á informática no que poderán anotarse todos os veciños e veciñas que o desexen, sen ningún tipo de límite de idade. Uns cursos que comezarán a impartirse a finais deste mes nas instalacións da Casa da Cultura de Tordoia.

O obxectivo destes cursos é achegar ás novas tecnoloxías informáticas aos veciños que o desexen, de xeito que adquiran os coñecementos precisos para poder manexarse no sistema operativo Windows e algúns dos seus programas, así como adentrarse tamén na Internet. Os veciños poderán anotarse ou conseguir máis información sobre os cursos na Casa da Cultura ou ben no teléfono 981 683 006.

BOQUEIXÓN - LESTEDO PREPARASE PARA CELEBRAR A VIRXE DE LOURDES

LESTEDO PREPARASE PARA CELEBRAR A VIRXE DE LOURDES.

A parroquia boqueixanesa de Lestedo xa ten todo listo para a celebración da que é unha das súas grandes festas do ano, a celebrada da honra da Virxe de Lourdes.

Mañán día 10 de setembro dará comezo a festa cunha verbena na que van a participar dúas das mellores orquestras do panorama musical galego actual. Aché e Panorama que atraerán a Lestedo a milleiros de persoas para disfrutar dunha noite de música e baile que durará ata ben entrada a madrugada.

Na xornada do domingo será unha xornada mais tranquila e que comezará coas misas na hora da Virxe de Lourdes que terán os seu punto álxido ás 13:30 coa misa cantada, posteriormente e contarase coa actuación das Bandas Santa Cruz de Rivadulla e de Negreira que voltarán a escea a partir das 10 da noite para deleitar a todos os presentes co seu repertorio musical.

BRION - ABERTA A INSCRICIÓN NA XXIX CARREIRA PEDESTRE DA AMAÍA, QUE POR PRIMEIRA VEZ PODERÁ FORMALIZARSE A TRAVÉS DA INTERNET

O CONCELLO DE BRIÓN ABRE A INSCRICIÓN NA XXIX CARREIRA PEDESTRE DA AMAÍA, QUE POR PRIMEIRA VEZ PODERÁ FORMALIZARSE A TRAVÉS DA INTERNET

A proba venres 1 de outubro remata o prazo de inscrición nunha proba na que están anotados máis de 200 atletas

8 de setembro de 2011.- O Concello de Brión abre o prazo de inscrición para a XXIX Carreira Pedestre da Amaia, que terá lugar o domingo 2 de outubro. Unha proba que este ano inclúe distintas novidades, entre as que destaca a posibilidade de formalizar a inscrición a través da Internet (www.concellodebrion.org). Deste xeito, ademais de apostar polas novas tecnoloxías, o Concello tamén mantén as modalidades tradicionais de anotación: presencial na Casa da Cultura ou por teléfono no 981 50 99 08. O prazo de inscrición remata o vindeiro 30 de setembro.

O outro gran cambio desta edición ten que ver cos percorridos habituais da carreira para facela máis vistosa. Así, o percorrido dos rapaces menores de 12 anos será circular de duas voltas arredor da Carballeira de Santa Minia, ata completar uns 500 metros. A proba terá lugar ás 10:30 horas.

Na categoría absoluta, a proba incrementa a súa lonxitude nuns dous quilómetros e elimina a primeira pendente forte xusto despois da saída, o que axudará a que a carreira non se rompa xa dende o seu inicio. A proba terá unha lonxitude de 8 quilómetros e comezará a disputarse ás 11:00 horas.

Premios

O Concello de Brión repartirá máis de 1.000 euros en premios entre as 13 categorías en disputa. Haberá trofeos e premios en metálico para os 6 vencedores absolutos, 3 homes e 3 mulleres, trofeos para os tres primeiros clasificados de cada categoría e trofeos o primeiro home e primeira muller en cruzar a meta empadroados no Concello de Brión. Tamén haberá camisetas e bebidas para tódolos participantes que cheguen a meta dentro do control, que se pechará 50 minutos despois de que o primeiro clasificado entre na liña de meta.

A Carreira Pedestre da Amaia é unha das probas atléticas máis importantes do panorama galego. Con 29 anos de antigüedade, converteuse ao longo dos anos nunha proba de referencia en toda a comarca de Santiago. A carreira Pedestre celébrase todolos anos o domingo seguinte á celebración da Romaría de Santa Minia, parte da Carballeira de Santa Minia e percorre, ao longo dos seus 8 km, tanto o núcleo municipal coma distintas aldeas do noso municipio.

O “maratón da Amaía” (como se denominaba nos seus inicios) sumouse os actos de celebración da Santa Minia, alá polos anos 80, pola enorme expectación e éxito da súa organización.Unha organización que corre integramente a cargo do Concello de Brión e que, grazas á presenza de importantes atletas, mellora ano tras ano.

O corredor lituano, afincado en Santiago, Robertas Geralavicius proclamouse campión da edición de 2010. Completaron o podio masculino Rafael Fuentes e Akka Essaadaoui. En canto á clasificación feminina absoluta, a victoria foi para a atleta Paula Mayobre, de Ares, seguida por María Jesús Gestido e por Esther Navarrete.

AMES - O Estado dálle o concello só un mes máis para presentar as contas do 2010

O Estado dálle a Ames só un mes máis para presentar as contas do 2010

Dende que o Partido Popular está no goberno estanse aforrando arredor de 1.000 euros por día, pero pode non ser suficiente debido a que a situación herdada é peor do esperado

Ames, 08 de setembro de 2011. O pasado mes de xullo o Estado informou ao Concello de Ames da súa intención de reterlle a cuantía correspondente a este municipio procedente dos fondos recadados polos impostos estatais por non ter pechada a conta do ano 2010. O executivo local levou ao pleno dese mesmo mes unha petición de prórroga que foi aprobada por unanimidade e na cal se lle solicitaba ao Ministerio de Economía máis tempo para liquidar a conta. O Concello non tivo resposta ata esta semana cando se recibiu un escrito no que se informa de que durante o mes de setembro non se lle reterán os 400.000 euros correspondentes ao Concello de Ames, é dicir, o Estado concédelle ao concello un mes de prórroga. Deste xeito o Ministerio desoe o acordo plenario que solicitaba unha marxe de tempo ata o 31 de outubro.

Para o rexedor amiense, Santiago Amor, esta prórroga é “a todas luces insuficiente”, aínda así “estamos traballando coa mirada posta no horizonte do 30 de setembro e os traballadores dos servizos económicos están facendo un esforzo adicional para ter a conta aprobada o antes posible, se a podemos liquidar o 26 de setembro non será o 30”. O Concello de Ames atópase ante unha situación herdada do anterior goberno, dirixido polo socialista Carlos Fernández, que deixou o Concello absolutamente endebedado e ao borde da quebra técnica, unha que quebra será unha lamentable realidade en caso de que o Concello sufra finalmente a retención das retribucións estatais.

As nóminas dos traballadores municipais poderían estar en perigo

Carlos Fernández recibiu un concello con contas saneadas e sobrada solvencia económica pero durante os oito anos de goberno socialista Ames xestionou de xeito irresponsable. Aos 400.000 euros que o Estado pode deixar de transferirlle ao Concello engádeselle o feito de o Concello ten que devolver nun período de cinco anos a liquidación negativa do 2008, que ascende a -411.294,35 euros, e que de feito está devolvendo xa, pois o Estado resta da súa retribución mensual 6.854,91 euros dende xaneiro deste ano. Ademais Ames ten que devolverlle ao Estado tamén 1.382.295,64 da liquidación negativa do ano 2009. “A día de hoxe Ames non ten diñeiro para o gasto corrente as nóminas dos traballadores poderían estar en perigo, o mesmo que acontece con algúns servizos” afirma Santiago Amor, “é probable que os esforzos adicionais que están facendo os servizos económicos non cheguen a tempo”, engade.

O rexedor explica que a lexislación contempla como primeiro pago dun Concello o das nóminas dos seus traballadores, que ademais é un pago que hai que facer a todos os traballadores ao mesmo tempo e que malia que dende que o Partido Popular está no goberno se están aforrando arredor de 1.000 euros por día, pode non ser suficiente. “A situación herdada é moi difícil de mellorar, con todo, dende o grupo de goberno estamos traballando para recabar financiamento e seguir prestando os servizos básicos contando coa colaboración dos traballadores municipais” asegura Santiago Amor.

“O anterior rexedor actuou dende a irresponsabilidade e dende a falla de consideración total polos veciños e contribuíntes e os provedores deste Concello” Explica Amor, e matiza que moitos dos gastos que se fixeron en Ames non eran necesarios, coma un vídeo promocional que custou 8.000 euros e que se fixo meses antes das eleccións, ou os 70.000 euros do axardinamento dun cemiterio para o que non se preveu xestión nin mantemento posterior. A situación na que se atopan as arcas municipais evidencia a mala xestión económica do anterior goberno froito dunha absoluta irresponsabilidade e falla de previsión.

OROSO - O CONCELLO CELEBRA ESTE VENRES UNHA GRAN FESTA DE FIN DE VERÁN

O CONCELLO DE OROSO CELEBRA ESTE VENRES UNHA GRAN FESTA DE FIN DE VERÁN PARA OS NENOS QUE PARTICIPARON NOS PROGRAMAS DE CONCILIACIÓN

8 de setembro de 2011.- O Concello de Oroso celebra mañá venres 9 de setembro unha gran festa de fin de verán con inchables para todos os nenos que participaron nos programas de conciliación familiar levados a cabo durante o último ano. Uns programas que rexistraron unha participación de preto dos 200 usuarios.

A festa, que é entrada totalmente libre e gratuíta, terá lugar mañá venres 9 de setembro, de 11:00 a 13:00 horas, no pavillón polideportivo de Sigüeiro. A oferta de programas de conciliación postos en marcha polo Concello de Oroso inclúen o Verán Lúdico e os distintos programas para as vacacións escolares como Diver Nadal, Diver Primavera (para a Semana Santa), Diver Verán (para finais de xuño) e Diver Outono.

Ademais, o Concello de Oroso conta tamén co programa “Bos días cole” e porá en marcha o vindeiro luns unha nova iniciativa, as “Tardes Divertidas”, dirixido a todos os nenos de 3 a 12 anos escolarizados en Oroso. Este programa desenvolverase dende o vindeiro 12 de setembro ata o 22 de xuño de 2012 nas instalacións do CEIP Sigüeiro, en horario de 15:45 a 19:45 horas, de luns a venres.

ASOCIACION HOSTELERIA – DATOS OCUPACIÓN AGOSTO

A ocupacion hoteleira en Santiago no mes de agosto foi do 74%, cinco puntos menos ca no ano 2009 „h Os hoteis e pensions de tres estrelas foron os que rexistraron un mellor comportamento „h Os datos de ocupacion de Santiago seguen a ser superiores a media galega, situada nun 65% „h A caida da rendibilidade hoteleira e do prezo medio son datos moi preocupantes para o sector „h Os empresarios saben que o futuro do turismo de Galicia pasa pola internacionalizacion do sector e por potenciar Lavacolla como porta de entrada do turismo a comunidade, favorecendo as conexions aereas internacionais A ocupacion media durante o pasado mes de agosto en Santiago e comarca foi dun 74%, unha cifra dez puntos mais baixa ca rexistrada o pasado ano Xacobeo e cinco puntos por debaixo da de 2009. Malia todo, Santiago segue a estar por riba da media de ocupacion hoteleira a nivel Galicia, que este pasado agosto foi do 65%. Por categorias de aloxamentos, son os de tres estrelas, tanto en pensions coma en hoteis, os que mellor comportamento rexistran, con cifras que superan o 80%. Hosteleria Compostela considera que os datos son relativamente positivos, nun momento de incertidume coma o actual pero lamenta que o nivel de ocupacion se mantena grazas o descenso dos prezos medios por oitavo mes consecutivo nos aloxamentos turisticos. Esta situacion e especialmente preocupante nunha cidade coma Santiago, que con 12.000 prazas de aloxamento ten o maior nivel de especializacion turistica de Galicia, e onde o turismo representa un 25% do PIB e actua como motor dinamizador de moitos outros sectores coma os transportes ou o comercio. Dende o colectivo de hosteleiros atribuen esta situacion a dous factores fundamentais, que son a caida da demanda, a causa da recesion economica, e a oferta ilegal de aloxamentos e as practicas de publicidade enganosa, que continua a agromar tanto na capital coma a nivel galego, e que aproveita o baleiro legal que brinda internet para comercializar como hoteis aloxamentos que non o son. Froito desta situacion esta a verse deteriorada a imaxe da pranta hoteleira compostela, que o ano pasado foi valorada como a mellor de todas as cidades de Espana polos internautas, producindose asi un dano intanxible¡¨, que ¡§non se pode cuantificar¡¨ pero que ten unha influencia determinante nos datos do sector. Por outra banda os hosteleiros fixeron especial fincape na necesidade de promocionar o turismo internacional a traves da potenciacion de Lavacolla como porta de entrada do turismo en Galicia. Actualmente o turismo internacional representa en Santiago un 40% do total, e crece a un ritmo do 11% a nivel galego, polo que compre que ¡§as administracions dediquen recursos a promocionar enlaces transatlanticos e outras conexions para explorar moitas potencialidades que ainda non foron aproveitadas¡¨. Neste sentido, o voceiro dos hostaleiros destacou a importancia do Camino de Santiago e a CdC, dous elementos unicos que nos distinguen e nos proxectan no mundo, e que poden ter un papel fundamental para atraer visitantes dos EEUU, America do Sur ou dos paises de Europa do Leste. Esta estratexia de internacionalizacion turistica favorecera tamen a desestacionalizacion turistica, xa que o turista internacional acostuma viaxar en tempada baixa e, amosando un perfil moi interesante dende o punto de vista da estadia media e do poder adquisitivo. Do mesmo xeito, e preciso fomentar a Razon Social: Asociacion Provincial de Empresarios de Restauracion e Hospedaxe de Santiago de Compostela Registro General de Asociaciones de la Xunta de Galicia con el no 15/203. N.I.F.: G-15.063.613 diversificacion da nosa oferta, potenciando o turismos de congresos, gastronomico, idiomatico, arquitectonico, patrimonial, deportivo ou de terceira idade. E se o futuro do turismo de Galicia pasa necesariamente pola potenciacion do turismo internacional, Lavacolla ten que ser un obxectivo prioritario na politica aeroportuaria das administracions, mais alo de localismos e visions de curto prazo, pois actualmente e o principal aeroporto receptor da nosa comunidade e move mais da metade do trafico aeroportuario que chega a Galicia. Coa nova terminal que se inaugurara o proximo 17 de setembro, Lavacolla comezara unha nova etapa na que Hosteleria Compostela apela o sentido comun das administracions para que se faga un reparto de patrocionios publicitarios para companias de baixo custo coherente e axustado o funcionamento do aeroporto, que actualmente pese a ser o unico rendible e un dos que maior crecemento rexistran a nivel Espana, e o que menos apoio recibe por parte da Xunta de Galicia. Dende Hosteleria Compostela fan fincape na necesidade de optimizar recursos nun momento de crise internacional coma o actual, polo que ¡§non parece que se estea a actuar con criterios de eficiencia nin de eficacia cando se estan a ampliar os tres aeroportos de Galicia, investindo enormes cantidades de dineiro publico na ampliacion das terminais e insonorizacion de vivendas en Vigo e A Coruna. As previsions para setembro non son tan boas como a principios de veran, xa que non se percibe demasiada presion na demanda, a pesar de que ser este un mes tradicionalmente ligado a un perfil de turista cun poder adquisitivo medio-alto, a diferenza de agosto, que e a epoca preferida polos excursionistas. Nos ultimos anos o mes de setembro adoita ser un bo mes para o sector pero hai datos que impiden que haxa demasiado optimismo. Por unha banda a proliferacion das reservas de ultima hora e de agardar as ofertas para facer as reservas, e pola outra, a tendencia durante o veran de medrar o numero de viaxeiros pero a reducirense as pernoitas e a estadia media. Outro dato preocupante e que Galicia e a quinta comunidade cos prezos hoteleiros mais baixos de Espana e a estancia media do turista situase nas 2,28 noites, fronte as 3,77 de media estatal. Co descenso da rendibilidade hoteleira, froito do descenso da demanda e da proliferacion das practicas ilegais e de publicidade enganosa, descende tamen a capacidade sector turistico para crear emprego e dinamizar outros sectores economicos, polo que compre explorar todas as potencialidades turisticas de Galicia para asi favorecer a recuperacion da economia e a saida da crise e do contexto internacional de incertidume que atravesamos. E todo isto acontece nun momento no que a nova Lei de Turismo de Galicia inicia o seu tramite parlamentario e a reorganizacion de Turismo de Galicia nun so ente se presenta como unha oportunidade unica para consolidar o turismo como un sector estratexico da nosa economia, actuando con criterios de eficiencia e eficacia para extraer todo o potencial da nosa comunidade como destino turistico internacional a traves de inversions estratexicas e de accions coordinadas, coherentes e optimizadoras de recursos publicos, con politicas transversais e consensuadas co sector empresarial, que promovan os principais atractivos turisticos de Galicia, xerando retorno para todo o sector economico que actua transversalmente como motor de crecemento e dinamizacion economica da nosa comunidade e por onde pasa necesariamente a saida da crise.

OROSO - O CONCELLO DE PRESENTARÁ ESTE XOVES O PROGRAMA DE CONCILIACIÓN

O CONCELLO DE OROSO PRESENTARÁ ESTE XOVES O PROGRAMA DE CONCILIACIÓN “TARDES DIVERTIDAS” AOS PAIS E NAIS DO MUNICIPIO

O programa inclúe actividades, obradoiros, accións de reforzo escolar e mesmo transporte e recollida para aqueles rapaces que estén practicando calqueroutra actividade deportiva ou cultural

Os programas de conciliación familiar do Concello de Oroso rexistraron preto 300 usuarios durante o último ano

7 de setembro de 2011.- O centro cultural de Sigüeiro acollerá mañá xoves, ás 19:30 horas, a presentación do novo programa de conciliación da vida familiar e laboral que o Concello de Oroso vai crear este ano: “Tardes divertidas”. Unha presentación dirixida especialmente aos pais e nais dos case 300 usuarios que tiveron os distintos programas de conciliación familiar postos en marcha polo Concello de Oroso no último ano.

Durante o acto, o concelleiro de Familia e Ensino, Antonio Leira; membros da ANPA ‘A Nosa Escola’ e membros do equipo de monitores explicaranlles ás familias os novidosos servizos que se van ofrecer neste programa e respostarán a todas as dúbidas dos pais e nais sobre o seu funcionamento. “Nestes momentos xa temos algúns rapaces anotados pero vemos que son moitos os pais que piden máis información, polo que pretendemos ter un encontro con eles para aclararlles todas as dúbidas que teñan”, explica Antonio Leira.

Un progama novidoso

O programa “Tardes Divertidas” está dirixido a todos os nenos de 3 a 12 anos escolarizados en Oroso, tanto no CEIP como nas escolas unitarias, e desenvolverase dende o vindeiro 12 de setembro ata o 22 de xuño de 2012. O programa terá lugar nas instalacións do propio CEIP Sigüeiro, entre as 15:45 e as 19:45 horas, de luns a venres.

Nestes tempos de crise, nos que non se deixa de falar de recortes, “en Oroso lonxe de recurtar servizos, imos amplialos”, explica Antonio Leira, quen se amosa especialmente satisfeito polo contido do programa “Tardes Divertidas”. “Non é só unha axuda para conciliar a vida familiar e laboral dos pais, senón que se trata dun completo programa educativo e social”, sinala o concelleiro de Familia e Ensino.

Así, “Tardes Divertidas” ofrecerá a posibilidade de que os cativos poidan anotarse no programa e compaxinalo con outras actividades deportivas ou culturais. “Se o rapaz está inscrito en fútbol, tenis de mesa ou taekwondo, os monitores encargaranse de levalos e recollelos da actividade, de xeito que os pais só terán que deixalos e recollelos en Tardes Divertidas”, exemplifica Antonio Leira.

Ademais, “Tardes Divertidas” tamén contempla un traballo de reforzo escolar para os rapaces que o precisen, que poden recibir ese apoio nalgunha das súas materias e realizar os deberes aló. Todo iso unido a unha serie de actividades, de acordo con cada grupo de idade, como: obradoiros formativos e recreativos, actividades físicas, exposicións de traballos manuais, sesións de música e baile, circuítos de educación viaria ou festas temáticas.

Información e inscricións

Para solventar todas as dúbidas que poidan xurdir en canto a actividades, horarios, tarifas... o Concello de Oroso invita a todos os pais e nais a participaren na presentación do programa “Tardes Divertidas”, que terá lugar no centro cultural Fernando Casas e Novoa de Sigüeiro mañá xoves, ás 19:30 horas. Ademais, os interesados en formalizar a súa inscrición poden facelo no centro cultural, onde poden recoller os impresos de solicitude ou ben descargalos da web municipal www.concellooroso.com.

Os prezos fixados son de 60 euros para quen decidan acollerse a opción mensual, de 20 euros para quen se inscriban na modalidade semanal e de 6 euros para quen fagan un uso ocasional do servizo en días soltos. As familias numerosas ou que teñan dous irmáns empregando o servizo terán un desconto do 20%. Tamén terán un desconto as familias asociadas á ANPA ‘A Nosa Escola’, que colabora co Concello na posta en marcha das “Tardes Divertidas”.

Finalmente, o concelleiro de Familia e Ensino volveu destacar o acordo coa asociación de nais e pais e amósase “moi satisfeito porque é un programa que viñamos planeando as dúas partes desde hai tempo para atender a crecente demanda das familias para poder conciliar a súa vida laboral e familiar”. Leira agarda proseguir con esta liña de traballo con outras ANPAs do municipio, para desenvolver diferentes iniciativas en conxunto.

Programas de conciliación

As “Tardes Divertidas” engádense á ampla oferta de programas de conciliación da vida laboral e familiar que o Concello de Oroso desenvolveu nos últimos anos. Así, durante este último curso escolar un total de 80 alumnos participaron no “Bos Días Cole” (que atende aos cativos no colexio no intervalo que vai desde as 7:30 horas ata o inicio das clases). Neste ano, xa están anotados outros 75 rapaces e rapazas.

E durante as vacacións escolares, o Concello de Oroso tamén ofrece os programas Diver Outono, Diver Nadal, Diver Primavera e Diver Verán, que reuniron a outros 196 cativos.

AMES - A brigada de obras está acondicionando os centros de ensino

A brigada de obras está acondicionando os centros de ensino amienses antes do comezo do curso escolar

A brigada municipal de obras está preparando os centros de ensino amienses para que estea todo a punto de cara ao vindeiro luns, 12 de setembro, momento no que comeza o novo curso escolar 2011-2012. Os operarios da brigada están reparando o valado da carballeira de Ventín, lugar onde se atopa a zona de xogos deste colexio. Ademais, pintaron o interior da escola de educación infantil de Guimaráns, na parroquia de Bugallido, e acondicionaron o parque infantil do CEIP de Barouta. Estes son algúns dos traballos que a brigada municipal de obras está realizando estes días nos colexios e nas escolas unitarias de Ames. Xardineiros, albaneis, carpinteiros, fontaneiros e electricistas traballan arreo para que todo estea listo nos edificios educativos do concello para o inicio do novo curso escolar.

O mantemento dos catro colexios de Ames; A Maía, Agro do Muíño, Barouta e Ventín e das catro escolas unitarias; A Tarroeira, Guimaráns, Covas e Agrón depende, en boa medida, do Concello. De aí que a brigada municipal de obras estea estes días ocupada en facer todos os traballos necesarios para que os colexios e as escolas presenten as mellores condicións para o inicio do curso escolar 2011-2012.

Á parte dos traballos extraordinarios, sempre hai traballos correntes que hai que facer nos colexios, como pintar algunha aula, colocar encerados, suxeitar andeis, arranxar luces, repoñer accesorios de baño ou revisar as caldeiras. A época de vacacións é sempre a máis axeitada para facer este tipo de traballos. Deste xeito, a brigada dependente da Concellaría de Vías, Obras, Parques e Xardíns realizou diferentes traballos nos catro colexios de educación primaria de Ames e nas escolas unitarias.

Na escola de educación infantil de Guimaráns, situada na parroquia de Bugallido, pintáronse as paredes interiores e o teito do edifico, así como as portas da escola. Tamén se arranxou a tarima flotante do piso e os xogos do parque infantil. Nos colexios de educación primaria de Ames realizáronse diferentes traballos de mantemento. No CEIP de Barouta amañáronse e pintáronse os valados e os xogos do parque infantil, así como o areeiro que está neste parque. Tamén se reparou unha fonte e pintáronse catro aulas.

No CEIP Agro do Muíño reparáronse varias portas corredizas que non funcionaban correctamente. Agora mesmo os operarios da brigada de obra atópanse nas instalacións do CEP de Ventín arranxando os postes de madeira do valado da carballeira, onde está situada a zona de xogos deste colexio. Primeiro tiveron que substituír os postes vellos que estaban estragados por uns novos e, de seguido, aplicáronlle unha capa de cemento para suxeitalos correctamente e impedir que afrouxen co paso do tempo. Ademais, aproveitaron para pintar os postes e darlle un tratamento co fin de que soporte as inclemencias meteorolóxicas do próximo inverno. Tamén limparon a fachada do edificio onde se atopa o ximnasio, arranxaron as baixantes dos canelóns e repararon algunhas plaquetas do pavimento que estaban soltas.

Mañá está previsto que os operarios da obrigada se despracen ata o CEIP A Maía para arraxar varias portas e soldar as porterías da zona de xogos. Trátase de traballos que na maioría dos casos son de mantemento das instalacións dos colexios, pero que son necesarios para o correcto funcionamento destes centros de ensino que comezan a súa actividade o vindeiro luns 12 de setembro.

SINDICATOS EDUCACION – MANIFESTACIÓN 9 SEPTEMBRO

Pola calidade do ensino público, non ao incremento do horario lectivo para o profesorado nin aos recortes no ensino público.

O venres, 9 de setembro, o profesorado galego de Educación Infantil, Primaria e Secundaria está convocado a unha manifestación que partirá ás 11:30 da Alameda de Compostela, para dirixirse á Consellaría de Educación seguindo o seguinte itinerario: Alameda, Senra, Fonte de San Antonio, Virxe da Cerca, Rodas, San Roque, Basquiños, Pastoriza, San Caetano con remate diante da Consellaría de Educación e Ordenación Universitaria.

Esta manifestación é a terceira mobilización previa ás xornadas de folga do día 21 e 27 de setembro.

Todas as organizacións sindicais convocamos esta manifestación para esixir a retirada da proposta de incremento de horario lectivo para o profesorado de Infantil, Primaria e Secundaria e o incremento das funcións do profesorado, así como para denunciar a política de recortes no ensino público. Igualmente, esiximos o mantemento e o cumprimento do Acordo de 8 de xuño de 2007, sobre a xornada de traballo do profesorado do Corpo de Mestres e a derrogación da ORDE de 23 de xuño de 2011 pola que se regula a xornada de traballo do persoal funcionario e laboral docentes que imparten as ensinanzas reguladas na Lei orgánica 2/2006, do 3 de maio

Estas propostas xa foron realizadas na Mesa Sectorial de 21 de xuño por todas as organizacións sindicais nela presentes e que representamos aos máis de 32.000 docentes do Ensino Público.

Os recortes que as organizacións sindicais anunciabamos en xuño quedáronse curtos ante os recortes feitos pola consellaría: 14 unitarias, 77 unidades de infantil e primaria (161 postos de traballo). Tampouco se cubriron ás máis de 900 xubilacións de docentes.

Denunciamos o talante antidialogante e a prepotencia da Consellaría de Educación que se negou a atender as nosas demandas e do Conselleiro que a preside que se negou a reunirse co órgano de representación do profesorado. Denunciamos tamén os seus ataques constantes ao ensino público, agora contra o profesorado, coa única intención de desprestixiar o público.

Todo indica que a manifestación de mañá será multitudinaria e canalizará o descontento unánime do conxunto do profesorado galego, que se sente desprezado e “ninguneado” pola Consellaría.

CIG-ENSINO CCOO-ENSINO FETE-UGT ANPE STEG CSI-F

AMES - A Policía local intensifica os controis en colaboración coa Garda Civil

A Policía local intensifica os controis en colaboración coa Garda Civil para dotar o concello de maior seguridade

A Policía local amiense realizou 28 atestados e 11 dilixencias por asistencia en accidentes de tráfico durante o mes de agosto

Ames, 06 de setembro de 2011. A Policía local dá conta dalgunhas actuacións que desenvolveu durante as últimas semanas. Este corpo de seguridade realiza os seus labores co fin de garantir o benestar de toda a veciñanza amesá. . Os axentes do corpo de seguridade de Ames procederon á detención dun rapaz que lle roubara un bolso a unha moza na zona de Brión o pasado 28 de agosto. Neste mesmo mes foi denunciada o roubo dun móbil a unha menor e feitas as investigacións oportunas o corpo de seguridade localizou ao suposto autor. Na madrugada do día 13 de agosto, un condutor foi denunciado por estar baixo a influencia de bebidas alcólicas, dando un resultado de 1,10 mg/l, do mesmo xeito nas últimas semanas houbo varias denuncias administrativas por alcolemia ao volante, en concreto o 14 de agosto un mozo daba 0,63 mg/l, o 16 tamén se denunciou un condutor por ter unha taxa de 0,64 e o 14 do mesmo mes outro mozo conducía cunha taxa de 0,63.

Durante o pasado mes de agosto, a Policía local realizou 28 atestados por intento de entrada en vivendas, danos en vehículos, varios furtos, alcolemias positivas, lesións ou ameazas entre outros e 11 dilixencias por asistencia en accidentes de tráfico. Por outra banda, a seguridade viaria segue a ser unha prioridade para a Policía local de Ames, que traballa para concienciar a cidadanía da importancia de non conducir baixo os efectos do alcol nin as drogas.

Tal e como se acordara na pasada Xunta Local de Seguridade estase a intensificar a coordinación entre os corpos de Seguridade do Estado e a Policía Local para maior seguridade. En xeral as actuacións que realiza a policía local de Ames son os servizos de patrulla, atención aos veciños e veciñas sobre os problemas ou necesidades que lles poidan xurdir, colaboración con departamentos do Concello como o de Medio Ambiente, Urbanismo ou Obras, así coma atender as chamadas do 112 entre outras.

SILLEDA – FESTA DA BICICLETA

Silleda celebrará a Festa da Bicicleta

o vindeiro sábado 17 de setembro

-Será pola tarde, con saída dende a praza Siñor Afranio e chegada á praza da Igrexa

Silleda, 6 de setembro de 2011. O vindeiro sábado día 17 de setembro celebrarase en Silleda unha nova edición da Festa da Bicicleta, na que poderán participar xentes de todas as idades. A única condición é acudir provistos de casco para garantir a seguridade no percorrido. A ruta partirá ás 17.30 horas da praza Siñor Afranio (xunto á Casa da Cultura) e descorrerá polos alrededores da vila de Silleda.

Así, o percorrido continuará pola rúa Morón, a avenida da Estación, as inmediacións do recinto feiral Semana Verde, a carretera de acceso a Vila de Cruces, o entorno das Pedrosas, avenida do Parque… para rematar finalmente na praza da Igrexa. O percorrido total suma 6,2 kilómetros. Haberá agasallos para todos os que se suman a esta iniciativa deportiva, organizada polo Concello de Silleda e a Deputación de Pontevedra.

Liga local de fútbol sala

Por outra banda, tamén no ámbito deportivo, cómpre salientar que está xa aberto o prazo de inscrición para participar na liga local de fútbol sala. Os interesados poden informarse e anotarse chamando ao número de teléfono 669 599777. A reunión cos inscritos terá lugar o vindeiro día 28 de setembro ás 21.30 horas na Casa da Cultura de Silleda. O sorteo realizarase, no mesmo lugar, o 5 de outubro, tamén ás 21.30 horas. O comezo da competición terá lugar o 17 de outubro.

OROSO - O OROSO TM PRESENTA EN SOCIEDADE AOS NOVE EQUIPOS COS QUE COMPETIRÁ ESTA TEMPADA NAS DISTINTAS LIGAS NACIONAIS E GALEGAS

O OROSO TM PRESENTA EN SOCIEDADE AOS NOVE EQUIPOS COS QUE COMPETIRÁ ESTA TEMPADA

NAS DISTINTAS LIGAS NACIONAIS E GALEGAS

Ao acto asistiron máis de 70 socios do clube e os xogadores dos distintos equipos

5 de setembro de 2011.- Máis de 70 socios e socias do Oroso TM asistiron este sábado á presentación oficial dos nove equipos do Oroso TM que competirán esta tempada 2011-2012 nas distintas ligas nacionais e galegas. Un acto celebrado nas instalacións do complexo deportivo Juanito Amigo de Sigüeiro.

O Oroso TM afronta unha tempada que se presenta longa e dura, despois de cinco tempadas consecutivas de ascensos tanto para o seu primeiro equipo (que militará na Primeira División Nacional) como para os seus filiais. Dende a directiva do clube recoñecen que “será difícil manter a dinámica, e maís en ligas tan duras como nas que se xogará este ano” porén adiantan que non renuncian a nada e que seguirán “confiando na nosa gran canteira para seguir acadando éxitos sen precedentes no tenis de mesa galego”.

Categorías

Así, o primeiro equipo (Oroso TM) militará na 1ª División Nacional, compartindo grupo de Liga con 4 conxuntos galegos, co Oviedo TM, co Avilés TM, co Burgos TM e cos tres equipos tinerfeños (Círculo Amistad, Tegueste e Universitario de La Laguna.) Por primeira vez na súa historia, o club orosán terá que desprazarse ás illas nas súas viaxes de competición ligueira. Aínda que o Oroso TM será o novato da categoría, os responsables do clube non renuncian a nada e esperan “poder dar a sorpresa e alcanzar as primeiras posicións da clasificación”.

O segundo equipo do clube, o Oroso TM-Lácteos Tambre, militará na 2ª División Nacional Masculina e estará formado íntegramente por rapaces da cantera orosá.

Na máxima categoría autonómica, o Oroso JosMar Vulco terá como principal obxectivo a permanencia, xa que será o equipo máis novo da Liga, formado por xogadores alevíns e infantís. O Oroso Trastes participará na 2ª división galega, onde terá que desprazarse por toda Galicia.

Na 3ª división galega haberá tres equipos: Oroso Valoriza, Panadería Sigüeiro e Escola Oroso TM. O ascenso dalgún deles sería todo un éxito para o clube, xa que están formados polos máis novos xogadores do Oroso TM.

En canto á categoría feminina, o clube tiene programada a participación de 2 equipos na Liga de 2ª División Nacional Feminina, se ben o prazo de inscrición aínda non está pechado e faltan por publicar os respectivos grupos da competición.

TEO – preinscrición escolas deportivas

A CONCELLERÍA DE DEPORTES OFERTA PARA ESTE CURSO NOVE DISCIPLINAS PARA NENOS/AS E 4 PARA ADULTOS/AS

· Manuel Anxo Fernández, concelleiro de Deportes, destaca “a aposta por manter no nivel de servizos ofertados”

· O prazo para facer a preinscrición comeza onte 5 de setembro e remata o 20

05 de setembro de 2011. O concelleiro de Deportes, Manuel Anxo Fernández, presenta este ano a oferta de escolas deportivas para o curso 2011-12 cunha oferta que mantén a liña iniciada no anterior mandato. Así este ano haberá nove disciplinas para nenos/as dende os 3 anos e catro actividades diferentes para os/as adultos/as.

O responsable municipal de Deportes destaca “a aposta e o esforzo realizado dende o Concello económicamente por manter o nivel de servizos ofertados e a calidade da oferta”. O mantemento de actividades realizadas en anos anteriores tamén permite unha continuidade na formación. Manuel Anxo Fernández explica que “o deporte é un elemento capaz de fomentar valores moi positivos e resulta importante que a oferta de escolas deportivas sexa ampla e garanta unha formación específica no propio termo municipal”.

As actividades para os máis pequenos son patín, con nove grupos segundo o lugar no que se imparte e o nivel do alumnado, tenis, con 4 grupos, minideporte, con 2 grupos, baloncesto, con 2 grupos, taekwondo, con 2 grupos, e tiro con arco, minitenis, ciclismo e atletismo, cun só grupo, xa que tamén se ten en conta a demanda.

Pola súa banda a oferta para adultos céntrase máis en actividades de mantemento, como ximnasia de mantemento, os programas Cóidate, Ponte en forma, aínda que tamén hai espazo para un deporte como o tenis.

O prazo para realizar a preinscrición abre o 5 de setembro e remata o 20. Para formalizala hai que entregar unha ficha no Rexistro Xeral do Concello. A partir do 21 de setembro poderase confirmar telefonicamente no Departemento de Deportes a dispoñibilidade da praza. A partir daí e ata o 30 de setembro debe formalizarse a matrícula. As clases funcionarán entre primeiros de outubro e o mes de xuño. No caso de que existan máis solicitudes que prazas farase un sorteo público o día 20 de setembro ás 14:40 horas na Casa do Concello.

As actividades realizaranse en instalacións municipai, centrándose sobre todo nos pavillóns municipais de Calo, Os Tilos e A Ramallosa aínda que tamén se utilizarán outros locais como Casas Comúns.

FRADES - ENTREGA DE 9.800 EUROS EN AXUDAS ECONÓMICAS A ONCE ASOCIACIÓNS

O CONCELLO DE FRADES ENTREGA 9.800 EUROS EN AXUDAS ECONÓMICAS A ONCE ASOCIACIÓNS VECIÑAIS, CULTURAIS E DEPORTIVAS DO MUNICIPIO

05 de setembro de 2011.- O Concello de Frades vén de formalizar un convenio de colaboración con once asociacións veciñais, culturais e deportivas sen ánimo de lucro do municipio por un importe de 9.800 euros para a realización de actividades lúdicas, culturais e deportivas durante este ano 2011. Un convenio asinado na casa do concello de Frades polo alcalde de Frades, Miguel Prado Patiño, e os representantes destas once entidades fradenses.

Estas once asociacións, o mesmo número que na convocatoria de 2010, terán ata o vindeiro 2 de novembro para xustificar as súas respectivas subvencións e presentar no Rexistro Xeral do Concello de Frades unha memoria detallada das actividades realizadas e unha relación dos ingresos e dos gastos da mesma.

Estes 9.800 euros súmanse aos 9.000 euros concedidos en xuño polo Concello de Frades ás comisións de festas das doce parroquias do municipio. Estas axudas ascenderon este ano a 770 euros por cada comisión de festas: 550 euros para sufragar os gastos da festa e outros 200 euros para a limpeza do campo da festa.

BRION - XXIII FESTA DOS VELLOS DE BRIÓN

PRETO DE SEISCENTOS VECIÑOS PARTICIPAN NA XXIII FESTA DOS VELLOS DE BRIÓN

Os presentes tiveron un especial recordo para Luciano Pena, funcionario xubilado que puxo en marcha esta festa e que participa por primeira vez nela ao cumprir 65 anos

4 de setembro de 2011. Preto de seiscentos veciños e veciñas de Brión, entre maiores de 65 anos e acompañantes, participaron hoxe domingo na XXIII Festa dos Vellos de Brión. Unha celebración que tivo lugar no pavillón polideportivo de Pedrouzos e na que os brioneses disfrutaron dun xantar de confraternidade.

Servido polo restaurante A Magdalena, o menú estivo composto, como xa é tradicional, por empanada, polbo e carne ao caldeiro, así como postre, café e bebida. A charanga Os Celtas de Negreira encargáronse de poñer a nota musical.

Como anfitrión da festa, o alcalde de Brión, Xosé Luís García, tivo palabras de agradecemento para todos os participantes na Festa dos Vellos e os animou a “seguirdes activos e seguir colaborando na construcción de Brión”. Xosé Luís García asegurou que “o Brión de hoxe é posible grazas ao voso traballo e nestes momentos de crise necesitamos máis do voso consello pois vós sí que sabedes o que son as crises e que ás persoas hai que valoralas polo que son e non polo que teñen”.

Finalmente, o alcalde brionés tivo un especial recordo para Luciano Pena, funcionario xubilado este ano e que foi o principal artífice da posta en marcha da Festa dos Vellos hai 23 anos. “Hoxe participa por primeira vez nela como un máis, pois vén de cumprir os 65 anos”, lembrou Xosé Luís García. Todos os asistentes uníronse nun sonoro aplauso cara Luciano Pena.

TEO - MÁIS DE 130 RAPACES/ZAS PARTICIPAN NO DIVERTEO SETEMBRO ANTES DO COMEZO ESCOLAR

· Os participantes traballaran sobre a temática da reciclaxe e a natureza

· O Diverteo é un programa de conciliación que se realiza nos centros escolares de Calo, Os Tilos e A Ramallosa, nos períodos de vacacións escolares

04 de setembro de 2011. O Departamento de Educación destaca a alta participación que se mantén no programa de conciliación Diverteo. Neste caso no período que se está desenvolvendo neste comezo do mes de setembro, antes do inicio do curso escolar de infantil e primaria, máis de 130 nenos/as están participando nesta actividade. Por centros nas instalacións do CEIP dos Tilos hai anotados 47, en Calo 48 e na Ramallosa 39.

Os participantes no Diverteo setembro segundo explica a concelleira de Educación María Álvarez Garea “están traballando sobre a temática da natureza e os elementos de reciclaxe”. Como se trata de talleres que funcionan dun xeito continuado nos períodos de vacacións escolares, o Concello destaca “a importancia de buscar un eixe temático que se manteña todo o ano, buscando a continuidade e a coherencia, xa que os asistentes tamén repiten en moitas ocasións” explica a titular municipal de Educación.

O Diverteo é un programa que facilita a conciliación da vida familiar e laboral aos pais e nais con nenos/as de entre 3 e 12 anos empadroados no Concello. Realízase nas instalacións dos centros de infantil e primaria do Concello en horario de 08:00 a 14:30 horas.

Enquisa de satisfacción

Neste verán o Departamento dirixido por María Álvarez Garea realizou unha enquisa de satisfacción ós pais e nais usuarios dos programas de conciliación, concretamente os participantes no Verán animado, que se realiza no mes de xullo. A valoración da actividade é alta, acadando un notable o Concello con entidade organizadora. Tamén destaca a nota que acada a empresa xestora do servizo, cunha boa imaxe do traballo para as familias e mesmo da temática sobre a que se traballa cos/as pequenos/as.

Entre as demandas dos pais destaca a petición de ampliar o Verán animado ó mes de agosto ou a posible mellora das instalacións nas que se fan os programas.

FRADES - MÁIS DE 3.000 PERSOAS PARTICIPARON NA ROMARÍA DAS VIRTUDES DE VITRE (FRADES)

MÁIS DE 3.000 PERSOAS PARTICIPARON NA ROMARÍA DAS VIRTUDES DE VITRE (FRADES)

O entorno da capela das Virtudes quedou pequeno para acoller a máis de 150 tendas colocadas por familias e peñas de amigos procedentes de toda a comarca

Mañá domingo terá lugar a Festa na honra a San Roque, en Santaia de Moar, coa actuación da orquestra Bámbola

3 de setembro de 2011.- Máis de 3.000 persoas participaron hoxe sábado na tradicional Romaría da Nosa Señora das Virtudes, que se leva celebrando na parroquia fradense de Vitre dende hai máis de tres décadas. Unha romería recoñecida en toda a contorna polos xantares tradicionais que se celebran no entorno da Capela das Virtudes e nas que este ano se instalaron máis de 150 tendas, dende pequenos grupos familiares de 10-15 persoas ata grandes peñas ou grupos de amigos de máis de 50 membros.

Aínda que o punto álxido da festa foi ás 14:00 horas, coincidindo coa saída en procesión da imaxe da Virxe das Virtudes e a sesión vermouth, o movemento en torno á capela das Virtudes comezou preto das 10 da mañá. Nese momento comezaron as celebracións relixiosas (ás 10, 11, 12 e 13:30 horas) e foron moitas as persoas que chegaron a montar as súas tendas para o xantar.

Romeiros de toda a provincia

A maioría dos romeiros procedían dos municipios de Frades, Mesía e Ordes, aínda que tamén había unha importante representación do resto de municipios da comarca, así como peñas de amigos doutras partes da provincia. De feito, segundo explican dende a Comisión de Festas, houbo reservas procedentes de toda a comarca e mesmo dende a Coruña e dende Ferrol. Incluso houbo bastante xente que veu marcar o seu espazo con cordas semanas atrás. De feito, a afluencia de xente foi tal que mesmo houbo moitos que tiveron que acomodarse nas tres grandes explanadas reservadas como aparcamento, pois non quedaba sitio algún.

En Vitre ubicáronse téndas de todo tipo, xa que o aguaceiro da noite do venres fixo que todos quixeran xantar a cuberto. Así, había dende pequenos grupos familiares de 10-15 persoas ata grandes grupos de máis de 50 membros, así como pequenos refuxios improvisados con plásticos ata grandes tendas de xardíns. Cada grupo de romeiros trouxo o xantar da súa casa, se ben foi común un “menú” no que non faltaban empanada, tortilla e, sobre todo, o churrasco. Para os que non trouxeron tenda, houbo unha pulpería dando servizo durante todo o día. Así mesmo, cada grupo trouxo a súa propia bebida, salvo a auga, que era recollida por todos nunha fonte cercana.

Saída en procesión da Virxe

A iso das 14:00 horas tivo lugar o momento máis agardado da xornada. Mentras uns comezaban a preparar os churrascos, centos e centos de fieis participaron na saída en procesión da figura da Virxe entre a capela das Virtudes e o cruceiro. Ao longo deses pouco máis de 300 metros de distancia, foron moitos os fieis que se achegaron para frotar as súas postais contra o manto da Virxe e realizar ofrendas á santa.

Unha procesión que os fieis viviron con especial devoción, despois de que unha forte tromba de auga afectara á procesión do Rosario celebrada na tarde de onte venres. Ao final, diante da cantidade de choiva que caía, a procesión tivo que facerse en coches, que percorreron o traxecto entre a Igrexa de San Juan e a Capela das Virtudes.

Na xornada de hoxe sábado, o tempo acompañou durante toda a mañá, o que animou a moitos a achegarse ata o campo da festa. Aló, unha vez rematadas as celebracións relixiosas, disfrutaron coa música da charanga Ruada e da agrupación folclórica de Mesía, que puxeron a nota musical ata a sesión vermouth coa orquestra Alarma, que volverá tocar pola noite na verbena popular.

O alcalde de Frades, Miguel Prado Patiño, salientou o traballo realizado pola Comisión de Festas para seguir mantendo “unha das grandes, por non decir a máis grande das festas de merendas que quedan na provincia da Coruña”. O Concello de Frades colaborou na organización da festa e trasladou ata a zona unha serie de contenedores de lixo para recoller todos os refugallos da romaría. Ademais, dende primeira hora membros de Protección Civil encargáronse de ordear a chegada dos vehículos ao campo da festa.

Mañá domingo, festa en Moar

Mañá domingo, a festa trasladarase ata Santaia de Moar, onde terán lugar as festas na honra de San Roque. A misa solemne está prevista para as 13:30 horas e a sesión vermouth correrá a cargo da orquestra Bámbola, que pechará á noite os festexos cunha verbena popular.

BNG ORDES - MOCIÓN PARA QUE SE MANTEÑAN AS AXUDAS PARA AS ASOCIACIÓNS CULTURAIS E DEPORTIVAS E SE PAGUEN AS PENDENTES

O BNG PRESENTARÁ UNHA MOCIÓN PARA QUE SE MANTEÑAN AS AXUDAS PARA AS ASOCIACIÓNS CULTURAIS E DEPORTIVAS E SE PAGUEN AS PENDENTES

Gonzalo Castro afirma que as axudas á cultura e o deporte supoñen a cuarta parte do que pretende cobrar o goberno municipal en soldos e asistencias

O BNG fixo público o contido dunha carta remitida polo goberno municipal ás asociacións e entidades nas que se lles informa da eliminación das axudas para actividades culturais e deportivas.

Gonzalo Castro, portavoz municipal do BNG, acusou ao alcalde de Ordes, Manuel Regos “de cinismo político, xa que mentres apela a unha suposta austeridade para eliminar unhas axudas moi importantes para as asociacións culturais e deportivas do noso concello, e que supoñen un montante anual de 50.000 euros, pretendeu aprobar no mes de xullo unha proposta de soldos e asistencias para os membros do goberno municipal que se aproximaba aos 200.000 euros anuais”.

O portavoz municipal nacionalista lamentou que “en lugar de comezar por dar exemplo coas súas propias retribucións, o goberno municipal pretende afogar e deixar sen capacidade para realizar actividades ás asociacións culturais e deportivas, que realizan un traballo moi meritorio e con moi poucos recursos”.

Axudas de 2010 e 2011

Gonzalo Castro informou tamén de que “desde o BNG mantivemos conversas con representantes de varias asociacións culturais e deportivas, onde se nos comunicou que ainda se atopaban pendentes de pago as axudas a actividades culturais e deportivas do ano 2010, ao que hai que engadir o feito de que para o ano 2011 ainda non foron publicadas as bases para as axudas por parte do alcalde”.

A xuizo do portavoz municipal do BNG “esta actuación do alcalde constitue un auténtico agravio comparativo para a cultura e deporte do noso concello e demostra a súa nula sensibilidade con estes asuntos, ao pretender deixar sen recursos as asociacións, mentres pretendeu aprobar unhas retribucións para o seu goberno que supoñen catro veces máis do montante total das subvencións en cultura e deportes”.

Moción do BNG

Finalmente, Gonzalo Castro anunciou que “despois de falar con representantes das asociacións, o BNG asumiu o compromiso de defender as súas reivindicacións no Pleno, razón pola que presentaremos unha moción no Pleno de setembro para que se abonen as axudas á cultura e deporte pendentes de pago e se manteñan as mesmas para o próximo ano”.

TEO - O CONCELLO ORGANIZA A I MARCHA CICLOTURISTA BTT O PRÓXIMO 10 DE SETEMBRO

Dende o Departamento de Deportes destacan que se trata dunha marcha non competitiva dirixida ós amantes da natureza e da bicicleta

· Deportes tamén abre o prazo para a inscrición na Liga de fútbol sala municipal

03 de setembro de 2011. O Departamento de Deportes pecha este ano o programa Deporte Aventura Teo 2011, coa celebración da I Marcha cicloturista BTT polo municipio o próximo 10 de setembro. As persoas interesadas en participar aínda poden anotarse poñéndose en contacto co persoal de Deportes no teléfono 981 815 700 ou no correo electrónico deportes@concellodeteo.com.

O programa Deporte Aventura Teo 2011 realizouse durante os meses do verán e nel ofertáronse actividades que combinaban o deporte, o coñecemento do medio natural do propio entorno e a aventura. Así fixéronse saídas en canoa e rafting polo río Ulla, paintball e bicicleta. Esta programación está dirixida pola concellería de Manuel Anxo Fernández, que xestiona Deportes e Medio Natural.

A actividade que falta é a da marcha cicloturista que se fará o vindeiro sábado e para a que se planificaron dous percorridos segundo a dificultade, un de 10 quilómetros e o outro de 30. Para participar hai que ter 12 anos de idade como mínimo.

Dende Deportes destacan a importancia de anotarse na marcha de xeito previo sendo imprescindible o uso de casco e roupa axeitada para a actividade. Ó remate da proba facilitarase o uso dun servizo de ducha no pavillón municipal Ezequiel Mosquera, na Ramallosa.

Liga de fútbol sala

Por outra banda durante estes días tamén se abre o prazo para anotarse na XIV Liga de fútbol sala Concello de Teo. Esta actividade realízase para fomentar o deporte e os valores positivos propios desta disciplina como o xogo en equipo. Os equipos interesados en participar deben presentar unha folla de solicitude debidamente cuberta a partir do luns 5 de setembro ata o 30 do mesmo mes no Rexistro Xeral do Concello. Os combinados teñen que pertencer ó Concello, podendo ter un máximo de 4 xogadores non censados en Teo por equipo.

Dende o Departamento de Deportes tamén se destaca que aquelas persoas ou entidades que desexen facer uso dos pavillóns polideportivos municipais de Calo, Os Tilos e A Ramallosa entre o 1 de outubro e o 31 de maio poden presentar xa a solicitude no Rexistro Xeral do Concello. Máis información sobre estas actividades no Departamento de Deportes.

TEO - ÁBRESE O PRAZO PARA A PREINSCRIPCIÓN NOS OBRADOIROS CULTURAIS OFERTADOS POLO CONCELLO PARA ESTE CURSO

ÁBRESE O PRAZO PARA A PREINSCRIPCIÓN NOS OBRADOIROS CULTURAIS OFERTADOS POLO CONCELLO PARA ESTE CURSO

· A información e a ficha de inscrición xa se pode consultar no Concello, no Departamento de Cultura e na web municipal

· A preinscripición nas actividades farase ata o 20 de setembro e a matrícula debe formalizarse entre o 21 e e 30 do mesmo mes, unha vez teña a confirmación da admisión no obradoiro solicitado

03 de setembro de 2011. O Departamento de Cultura, dirixido por Carme Hermida, vén de publicar a oferta de obradoiros culturais para este curso 2011-12. O prazo para realizar a preinscrición está aberto dende o 1 de setembro e remata o 20. Nesta primeira fase debe entregarse unha ficha no Rexistro Xeral do Concello na que se marcan as disciplinas nas que a persoa está interesada. A partir do 20 de setembro confirmarase a admisión na actividade solicitada poñéndose en contacto co persoal de Cultura e será o momento no que debe formalizarse a matrícula, entre o 21 e o 30 de setembro.

A información sobre as actividades, horarios e lugares nos que se realizarán, así como a ficha de preinscrición xa se poden consultar nas oficinas do Concello, no Departamento de Cultura ou na web municipal www.concellodeteo.com.

A Concelleira de Cultura, Carme Hermida, explica que a oferta “increméntase con algunha actividade nova respecto doutros anos pero mantén a coherencia coas disciplinas con maior aceptación para que o alumnado poida continuar coa súa aprendizaxe”. A titular de Cultura tamén destaca “que seguimos presentando unha oferta para un público amplo, en gustos e en idades, con actividades diferenciadas para nenos/as e adultos/as”.

Así, unha das novidades será o Obradoiro de Bailes modernos nos que se aprenderán estilos xuvenís e divertidos como o funky, hip hop, streetdance ou pop dance. Este obradoiro será impartido, como todas as disciplinas, por especialistas na materia. O obradoiro de baile moderno será os luns no CSC da Ramallosa entre as 18:00 e as 19:30 horas e está dirixido a mozos/as de entre 12 e 20 anos.

Outras disciplinas ofertadas son artes plásticas, para nenos/as dende os 3 anos ata os 16; artes escénicas con teatro xuvenil e teatro de adultos; artes musicais centrándose no obradoiro de guitarra que contará con dous niveis, básico e medio segundo o nivel de cada alumno, xa que esta actividade xa se fixo outros anos cunha notable aceptación. O baile non se centrará só no estilo máis moderno e haberá talleres de baile tradicional, no que se fará exercicio utilizando os pasos do baile galego, e bailes de salón, con diferentes grupos segundo sexan de iniciación ou xa conten con coñecementos previos. Respecto ó nivel dos participantes os monitores poderán cambiar de nivel ós participantes segundo o seu criterio.

Os obradoiros comezarán o 3 de outubro e rematarán no mes de xuño. Segundo explican dende Cultura para poder realizar cada taller debe haber inscritos un mínimo de 10 participantes. Cabe destacar que no caso de que a demanda supera a oferta de prazas farase un sorteo público ás 14:45 horas o día 20 de setembro na Casa do Concello. No caso de que se dea esta circunstancia as persoas empadroadas terán prioridade no acceso ás prazas.