Oroso - apertura da inscripcións nas "tardes divertidas"


O CONCELLO DE OROSO DÁ CONTINUIDADE AO PROGRAMA DE CONCILIACIÓN “TARDES DIVERTIDAS” E ABRE O PRAZO DE INSCRICIÓN PARA O CURSO 2012-13

O programa inclúe actividades, obradoiros, accións de reforzo escolar e mesmo transporte e recollida para aqueles rapaces que estén practicando calqueroutra actividade deportiva ou cultural


25 de maio de 2012.- O Concello de Oroso abre o prazo de inscrición no programa de conciliación familiar “Tardes Divertidas” para o curso 2012-2013, prazo que estará aberto ata o vindeiro 15 de xuño no centro cultural de Sigüeiro. Deste xeito, o Concello de Oroso dá continuidade a un programa que puxo en marcha o pasado 2011 e que permite que os nenos e nenas de entre 3 e 13 anos escolarizados en Oroso (tanto no CEIP como nas escolas unitarias) estén perfectamente atendidos despois da xornada escolar, concretamente entre as 15:45 e as 19:45 horas.

O concelleiro de Familia e Ensino, Antonio Leira, explica que “nestes tempos de crise, nos que non se deixa de falar de recortes, no Concello de Oroso seguimos mantendo a nosa aposta por darlle servizos aos nosos veciños, como é este programa de Tardes Divertidas que, ademais de ser unha axuda para conciliar a vida familiar e laboral dos pais, tamén se trata dun completo programa educativo e social”.

Contido do programa


Así, “Tardes Divertidas” ofrece a posibilidade de que os cativos poidan anotarse no programa e compaxinalo con outras actividades deportivas ou culturais nas que estén incritos. “Se o rapaz está inscrito en fútbol, tenis de mesa ou taekwondo, os monitores encargaranse de levalos e recollelos da actividade, de xeito que os pais só terán que deixalos e recollelos en Tardes Divertidas”, exemplifica Antonio Leira.

Ademais, “Tardes Divertidas” tamén contempla un traballo de reforzo escolar para os rapaces que o precisen, que poden recibir ese apoio nalgunha das súas materias e realizar os deberes aló. Todo iso unido a unha serie de actividades, de acordo con cada grupo de idade, como: obradoiros formativos e recreativos, actividades físicas, exposicións de traballos manuais, sesións de música e baile, circuítos de educación viaria ou festas temáticas.

Ningún comentario: