Máis de 100 tractores
participan no I Encontro de Novos Emprendedores Agrarios en Siador
A comitiva
partirá dende a rúa Entremesóns ata o recinto da Saleta, onde se celebrará a
concentración e actividades coma o
concurso de manexo dos tractores
O recinto
da Saleta, na parroquia silledense de Siador, acollerá o vindeiro sábado día 26
o primeiro Encontro de Novos Emprendedores Agrarios, unha cita coordinada pola Concellería de Medio Rural e Medio
Ambiente, que dirixe Antonio Couso Álvarez.
A celebración deste evento relacionado co sector agrogandeiro servirá tamén
para honrar a San Isidro, patrón dos agricultores. O programa festivo comezará
en torno ás 10.30 horas coa concentración de tractores na rúa Entremesóns de Silleda,
dende onde partirá a comitiva ata o
recinto saletino de Siador. Segundo as estimacións do concelleiro, prevese que
participen máis de cen vehículos agrícolas. Para as 12.00 horas está programa
unha conferencia do responsable comarcal de Unións Agrarias, Román Santalla,
sobre as axudas da Política Agraria Común (PAC) e ás 13.00 horas terá lugar
unha misa.
Xa pola tarde, logo do xantar, está
prevista a celebración do Concurso de Habilidade no Manexo do Tractor, no que
os que desexen participar poderán facelo ata dez minutos antes de que comece o
certame. Todos os participantes realizarán as maniobras co mesmo vehículo,
aportado pola organización.
Haberá premios para o conductor máis rápido e preciso (trofeo cedido por La Caixa ) e tamén para o segundo
clasificado. O público asistente será o xurado para elixir ao mellor tractor do
encontro, que tamén recibirá premio. Tamén se celebrará entre os asistentes, de
xeito gratuito, o sorteo dunha cesta con produtos da terra donada por varias empresas
da zona. O programa de actos complétase coa mostra de maquinaria de talleres da
zona, actuacións de música popular, ou
tiro con arco. Así mesmo, o Encontro de Emprendedores servirá como escenario
para a promoción de productos locais, como a artesanía ou productos
alimentarios como a rosquilla de Abades ou mel entre outros. Tamén está
confirmada a asistencia dunha representación da Federación Galega de Asociacións
de Mulleres Rurais (Fademur).
A Comisión de Novos Emprendedores formada por xente nova que decidiu xuntarse
para compartir experiencias nestes tempos difíciles para o sector agrario está
formada por Luis Cejo Ferreiro, Xosé
Miguel Louzao Loureiro, Alberto José Gómez Collazo, José Antonio Louzao
Loureiro e Manuel Iglesias Pérez, que contan co apoio do Concello de Silleda.
“A
formación deste grupo para organizar o encontro supón unha reactivación e
renovación do sector primario no municipio”, sinala o concelleiro Antonio
Couso, que ademais eloxia a ilusión “e as gañas de traballar” dos seus membros.
Así mesmo, o concelleiro de Medio Rural
agradece a colaboración das empresas e casa comerciais da comarca que colaboran
co seu patrocinio neste evento, que se prevé continuar en anos vindeiros.
Ningún comentario:
Publicar un comentario