VALORACIÓN DOS SOCIALISTAS DE TEO
DO PLENO EXTRAORDINARIO DO 14/06/12
O Pleno Extraordinario celebrado o dia 14 de xuño tivo como único punto da orde
do día, a modificación á alza da operación de endebedamento vinculada ao
plan de axuste 2012-2022 para o pagamento de facturas pendentes a
provedores, conforme ao Real Decreto Lei 4/2012, do 26 de febreiro.
Lembremos que en data 15 de marzo de 2012, o Concello de Teo enviou unha
relación de facturas pendentes de pagar a provedores, facturas anteriores ao
31/12/2011, por unha contía total de 1.531.705,62 euros.
Tras diversos axustes, no Pleno ordinario de marzo de 2012 aprobouse, só cos
votos a favor do equipo de goberno e o voto de calidade do Alcalde, un Plan de
axuste vinculado a unha operación de endebedamento por 1.320.000 euros, co fin
de facer fronte ao pagamento destas facturas.
En data 11 de maio, unha vez aprobado o Plan de axuste polo Ministerio de
Facenda, por Resolución de Alcaldía aprobouse a operación de préstamo por un
importe de 826.412,43 euros, imposte xustificado en que non todos os provedores
amosaran a súa vontade de acudir a este procedemento de pago.
Agora, un mes despois desta Resolución de Alcaldía, e polas novas manifestacións
dos provedores, a operación total de préstamo ascende finalmente a
1.285.981,77 euros, case 214 millóns das antigas pesetas, un importe por
enriba do 10% dos recursos ordinarios do orzamento municipal, e así, polo tanto,
operación que debe ser aprobada polo Pleno.
Con tal motivo, celebrouse un Pleno extraordinario hoxe, 14 de xuño, ás 9
horas, onde a operación de crédito aprobouse cos votos a favor do equipo
de goberno, e as abstencións do resto dos partidos políticos con
representación no Concello.
A abstención da concelleira Uxía Lemus foi coherente coa posición mantida no Pleno
de marzo de 2012 con relación ao Plan de Axuste. Amosando a súa
desaprobación sobre as medidas incluídas neste Plan, centradas
principalmente nun aumento dos ingresos a través dunha inaudita suba de
taxas e impostos, Lemus entende que deixar aos provedores sen cobrar o
que lexitimamente lles corresponde non é a solución.
Polo tanto, á crítica a un plan de axuste, ligado a un plan de saneamento,
centrados en aumentar a presión tributaria sobre a cidadanía teense, mentres se
conxela parte da oferta pública de emprego, as inversións ou as subvencións, únese
á responsabilidade que deben ter todos os integrantes nunha corporación
cando hai facturas sen pagar a pequenas e medianas empresas, como
consecuencia da nefasta xestión económica do equipo de goberno, con
Martiño Noriega ao fronte, vendo os datos oficiais dos anos 2010-2011.
COMISIÓN EXECUTIVA LOCAL TEO
2
Polo tanto, a abstención dos Socialistas de Teo amosa a súa responsabilidade, ao
igual que a do resto dos partidos da oposición, ante a aprobación dunha operación
de crédito que, ademais, de non ser aprobada podería provocar unha maior
asfixia do Concello, incluídos problemas para o pagamento das nóminas aos
traballadores e traballadoras do Concello, como se observou noutras
administracións locais.
Coa nova operación de endebedamento, e tendo en conta os datos oficiais
proporcionados polo Concello, A DÉBEDA BANCARIA DO CONCELLO DE TEO
ASCENDERÁ A MAIS DE 3.089.000 EUROS, CUN AUMENTO DUN 64% DESDE
O ANO 2010 (cando no ano 2007 ascendía a 2.928.310,07 euros).
Por outro lado, o PSdeG de Teo quere amosar o seu apoio ás negociacións
dos concellos da comarca para a consecución dun parque comarcal de
bombeiros, coñecendo as dificultades do tema, co fracaso dos intentos pasados de
comarcalización do servizo.
Un dos obxectivos primordiais do Concello de Teo, o seu crecemento ata superar os
20.000 habitantes, significa tamén un aumento das competencias obrigatorias a
prestar polo Concello, conforme a normativa estatal, incluíndo a prevención e
extinción de incendios, así como protección civil.
Valorando moi positivamente o traballo exercido polos servizos de protección civil
do Concello neste tema, os Socialistas de Teo amosamos o noso apoio a unha
comarcalización do servizo, que permitiría que mellorase un servizo fundamental
para o Concello de Teo, desgraciadamente moi afectado tradicionalmente polos
incendios forestais.
