O BNG - Asembleas Abertas comezou en Santiago de Compostela a rolda de presentacións das candidaturas para as eleccións municipais de 2015. En palabras do portavoz nacional Xavier Vence, o Bloque preséntase co aval dunha experiencia de goberno que ten dado a Santiago de Compostela “os seus mellores momentos como cidade”. “Esta candidatura ten experiencia, ten solvencia, ten ideas e ten proxecto para devolverlle á cidade o que foi e, ademais, conta cun grupo de homes e mulleres que senten Santiago e que, aínda sen ter o carné do Bloque, apostan por esta candidatura para derrotar o PP”, afirmou.
Deste xeito, Vence salientou a “pluralidade” da candidatura, “fiel reflexo” do que é a propia cidade de Compostela, integrada por persoas que teñen loitado por un Santiago mellor desde o colectivos sociais e veciñais, homes e mulleres do mundo da cultura, do deporte e do tecido económico local; “persoas que, sen ter o carné do BNG, apostan polo proxecto de BNG-Asembleas Abertas para liderar a derrota do PP o 24 de maio e pasar a páxina negra destes catro anos de despropósitos e de parálise”.
Subliñou ademais a importancia das eleccións municipais do 24 de maio como “o primeiro chanzo para mudar o actual réxime”, a oportunidade da cidadanía para desaloxar do poder a política de recortes de servizos públicos e sociais, de liberdades e de dereitos que impón o PP.
Unha candidatura para facer avanzar Compostela
Rubén Cela presentou o equipo de persoas que cualificou como “decisivo para rematar co peor goberno da etapa democrática de Santiago de Compostela” e que lle vai pór fin a “catro anos negros” que supuxeron un “retroceso brutal” nos avances da cidade.
O candidato avanzou as liñas que marcarán o modelo de cidade e a folla de ruta do nacionalismo na capital de Galiza, “porque esta candidatura non é para pasar páxina”, é para comezar a escribir un novo libro “onde se poña fronte á corrupción, limpeza e honestidade; fronte ao escurantismo e malas prácticas, transparencia e paredes de cristal”, explicou.
Propuxo tamén fronte á arrogancia e autoritarismo, diálogo e participación veciñal real; fronte á especulación urbanística amparada desde o Concello, outro modelo de vivenda pública, de urbanismo e de mobilidade; fronte aos recortes e a súa falsa austeridade, investimentos produtivos e políticas sociais que non confundan caridade con xustiza social. Referiuse ademais ás privatizacións e ao desmantelamento de servizos básicos e propuxo “máis e mellor sector público” e contra a “incapacidade manifesta e pésima xestión do día a día”, en referencia ao PP, ofreceu “traballo rigoroso e serio”.
Contra a censura e o apagón cultural
Rubén Cela fixo especial fincapé contra “a censura e o apagón cultural” e así avogou por “máis e mellor creación, apoio á nosa lingua e cultura, incluída a música ao vivo como unha riqueza e un elemento propio da identidade de Compostela”. Tivo tamén palabras contra o “localismo estéril e inútil” e ofreceu unha visión “desde a capital desta nación para facer avanzar Compostela e tamén o conxunto do país”, “porque Galiza non se pode entender sen Santiago e a cidade non se pode reconstruír sen Galiza”.
O acto contou coa participación do escritor Suso de Toro, quen criticou o PP por “irresponsábel” ao presentar a lista “que sumiu no caos a cidade”, en contraposición ao BNG que “tomou sempre a cidade en serio, que foi e está a ser unha candidatura responsábel e preocupada polas reivindicacións da veciñanza”. Así, afirmou que brinda o seu apoio a esta candidatura e non ás dos “partidos madrileños", “porque queremos que Galiza exista como país en por si e que sexa unha capital aberta para todos os galegos e galegas”.
Pola súa parte, a número 2 Goretti Sanmartín, advertiu que o BNG “sente noxo da podremia institucional que aturamos neste mandato, que rexeita radicalmente a dilapidación de cartos públicos, a falta de planificación dun goberno non elixido pola cidadanía que está ausente agás para o seu interese persoal e a especulación”.
No acto actuou a cantante Alba María e foi conducido por Suso de Toro e pola concelleira Elvira Cienfuegos, quen deron paso ás intervencións de diversas persoas que conforman a candidatura do BNG-Asembleas Abertas.
LISTA
BNG-ASEMBLEAS ABERTAS SANTIAGO DE COMPOSTELA
Ademais de Rubén
Cela (1), licenciado en Economía e actual portavoz municipal, forman parte
Goretti Sanmartín (2), doutora en Filoloxía Galego-Portuguesa e activista do
movemento feminista; Rafael Vilar (3), escritor e traballador na CIG, ademais
de concelleiro; Concha de la
Fuente (4 independente), ex-presidenta da asociación veciñal
“A Xuntanza” de San Pedro e traballadora da Radio Galega; Lois Calvelo (5),
ex-presidente da asociación veciñal do Castiñeiriño e activista do movemento
veciñal; e Pilar Lueiro (6), profesora de lingua galega e traballadora no grupo
municipal.
Tamén forman
parte da lista Odilo González (7), enxeñeiro informático, membro de Suevia
Fútbol Gaélico; Marta Domínguez (8), traballadora dunha planta de reciclaxe e
activista da Plataforma de afectados/as polas participacións preferentes; Xosé
Lois Mouriño (9), músico e artesán de instrumentos tradicionais; Lucía Carreira
(10), presidenta da Asociación Cultural-Musical Solfa e ex-vicepresidenta da
Federación Galega de Bandas de Música Populares.
Seguen Salvador
Martí (11), hostaleiro do bar Abrente e presidente da Asociación de Hostalería
Solidaria; Manuel Domínguez (12), presidente da Agrupación de Emigrantes
Retornados; e Margarida Ledo (13), catedrática de Comunicación Audiovisual na
Facultade de Ciencias da Información da USC e directora do Observatorio do
Audiovisual Galego.
No seguinte tramo
van Xabier Baldomir (14, independente), director do CEIP Santiago Apóstol;
Tania González (15), pedagoga, emprendedora, traballou na escola do CHUS e é
profesora de Brincadeira; Jonatan Barral (16, independente) estudante de
Ciencias da Comunicación, practica hípica e é medalla de bronce no campionato
de España paraecuestre; Lorena Tarrío (17) realizou ciclos superiores de
Nutrición e Laboratorio e actualmente prepara oposicións ao Sergas.
Continúan Fernando
García Tobío (18, independente), economista e traballador na Oficina da Cidade
Histórica e Rehabilitación; Belén Varela (19, independente) estudante de
psicoloxía e música na banda Solfa; Gabriel López (20), labrego e forma parte
da Mesa Nacional da Fruga; Isabelle Kerdudo (21), profesora da Escola Oficial
de Idiomas e activista polos dereitos dos animais en Abeiro e Adega; Jakson
René Rodrigues (22), doutorando en Turismo e traballa de xestor de
internacionalización; Sabela Mouriz (23, independente), activista feminista; Xosé
Manuel Casaleiro (24), director do CEIP Pío XII; e Elvira Cienfuegos (25),
concelleira e catedrática de Bioloxía e Xeoloxía no Instituto Xelmírez II.
.jpg)
