Teo - Día das Letras Galegas


PRETO DE 500 PERSOAS ASISTIRON Á VELADA LITERARIA MUSICAL DAS LETRAS GALEGAS


18 de maio de 2012.- Preto de cincocentas persoas acudiron a presenciar a velada literaria musical coa que o Concello de Teo celebrou o Día das Letras Galegas, en colaboración co tecido asociativo cultural do municipio. A ampla asistencia deixou pequeño o auditorio do Centro Sociocultural da Ramallosa, que acolleu a actividade a pasada tarde.


A velada literaria musical desenvolveuse segundo o programa previsto. Comezou coa lectura, a modo de manifesto, do texto de Florentino L. Cuevillas "Sementeira", a cargo do alcalde, Martiño Noriega. De seguido, alumnado do obradoiro municipal de guitarra e Xoán Curiel intrepretou "Quen puidera namorala", de Cunqueiro.
Teo - Día das Letras Galegas - Maio 2012
O grupo de Canto Aleceia interpretou despois textos de Curros Enríquez, Afonso X, Martín Códax e Castelao. As pandeireteiras da Asociación Cultural Rosalía de Castro ofreceron unha interpretación de textos de López Abente e de Amado Carballo.
Despois, proxectouse o documental "O carro e o home", de Xaquín Lorenzo, e os gaiteiros e o grupo de baile da Asociación Cultural A Pontevella recitaron e interpretaron un texto de Xoán M. Pintos. A Mámoa ofreceu na súa actuación unha dramatización do conto "O Lordanas", de Ánxel Fole.
Representantes de distintos grupos políticos da corporación municipal leron textos entre as sucesivas actuacións. E do remate encargouse a Banda de Gaitas da Sociedade Recreativa de Calo, que interpretou e recitou a Añón, Rosalía e Pondal, acabando a velada co Himno Galego.

Ningún comentario: