Xabier Canabal Fernández, María Carmen Soutullo Carolo e Perfecto Barcala Mosquera, concelleiros do Grupo de Veciñ@s, fan entrega mediante o presente escrito, dun decálogo de propostas en relación á organización municipal ao fin de que sexan tidas en conta polo Alcalde da corporación nos primeiros plenos municipais.
PRIMEIRO: TRANSPARENCIA E PARTICIPACIÓN VECIÑAL.
O Grupo Municipal de Veciños establece prioritario nos primeiros plenos da lexislatura tomar iniciativas en favor da Transparencia e Participación Veciñal. Así, entre outras medidas, propoñemos:
· Creación dun Regulamento de Participación Veciñal que permita aos veciños participar activamente nos asuntos municipais, así como a intervención nos plenos da corporación.
· Creación dunha bolsa pública de emprego, para que todos teñan igualdade no acceso aos postos de traballo do concello e onde as empresas interesadas poidan ofertar traballo.
· Creación dunha bolsa pública de Contratación, onde se ofertarán accións a desenvolver polo concello e se inscribirán as empresas que queiran acceder a contratos coa administración.
· Transparencia nas contas públicas: Publicación das contas públicas do concello así como do estado de execución orzamentaria.
· Control de subvencións públicas; As axudas públicas que reciban os diversos movementos veciñais serán en convocatoria pública e estarán publicadas na web do Concello.
SEGUNDO: REMUNICIPALIZACIÓN DOS SERVIZOS PÚBLICOS.
A privatización dos Servizos públicos foi unha práctica extendida no noso concello con dúas consecuencias directas:
· O encarecemento dos servizos públicos básicos.
· A corrupción na adxudicación de servizos públicos. No caso concreto de Boqueixón, a Operación Pokemon deixou as claras a corrupción existente no servizo de Axuda a Domicilio, e actualmente, e despois dun lote de iniciativas presentadas, viuse que o contrato da auga asinado en 2004 (coa ampliación no 2006 ata o 2043) é claramente ilegal.
O modelo municipal de Veciñ@s baséase nunha recuperación de todos aqueles servizos públicos que actualmente se atopan externalizados en mans de empresas privadas. E facémolo en base aos principios de economía, transparencia e eficacia.
É así que a curto prazo propoñemos a asunción dos servizos públicos da auga municipal e da Axuda a Domicilio, onde o concello podería incidir directamente sobre a redución dos custos, sobre as taxas (baixada detaxas) e nunha mellora na prestación destes servizos.
Por outra parte tamén vemos imprescindible estudar a Curto Prazo a recuperación do Servizo de Urbanismo, que podería mancomunarse con algún dos concellos limítrofes.
E a medio prazo propoñemos ao Alcalde o estudo detallado de todos aqueles servizos externalizados en mans de empresas privadas, ou públicas, para ver a posibilidade de prestalos directamente.
TERCEIRO: PLENOS ORDINARIOS.
En aras a unha maior transparencia e participación dos asuntos municipais, o grupo de Veciñ@s dálle unha especial relevancia ao Pleno Municipal sobre a Xunta de Goberno e as Resolucións da Alcaldía, por estar representados a voluntade popular das eleccións do 24 de maio.
Por iso ainda que o artigo 46.2.a) establece un mínimo de un pleno ordinario cada tres meses nos concellos de menos de 5.000 habitantes, somos partidarios de que estes se celebren mensualmente, preferiblemente os últimos xoves de cada mes en horario de tarde – noite (a partires das 20.30 h), ao fin de que quen quixer poida interesarse directamente sobre os asuntos do pleno.
Por outra parte tamén solicitamos a gravación e publicación dos plenos ordinarios a través da páxina web.
CUARTO: CONSTITUCIÓN DA XUNTA DE GOBERNO.
Segundo establece o artigo 20 1.b) da Lei 7/1985, de 2 de abril, reguladora das Bases de Réxime Local, “A Xunta de Goberno Local existe en todos os municipios con poboación superior a 5.000 habitantes e nos de menos, cando así o dispoña o regulamento orgánico ou así o acorde o Pleno do seu Concello”.
Ao ser Boqueixón un concello de menos de 5.000 habitantes, e non existindo de momento “regulamento orgánico do pleno”, Veciñ@s considera que non debera retirarlle funcións ao pleno para outras comisións ou xuntas delegadas do Pleno.
Por iso propomos a eliminación da Xunta de Goberno Local, ou se non é posible, a inclusión de todos os grupos municipais na mesma. Así pois, no caso de que o Pleno acorde necesario crear a Xunta de Goberno Local, esta proposta deberá ser motivada, deberáreunirse como máximo en sesión ordinaria unha vez ao mes, dentro dos primeiros 15 días, e deberá estar representada por todos os grupos participantes do Pleno.
QUINTO: CONTRATACIÓN.
En aras a unha maior transparencia na contración de obras e servizos municipais, o grupo municipal de Veciñ@s, propón a adxudicación de obras e servizos mediante o procemento aberto, non contemplando o procemento negociado, que é unha figura que o lexislador deixou na lei de contratos e polas que se realizan habitualmente adxudicacións sen trasparencia e a veces a división de proxectos en “fraude de lei”.
É así que propomos:
· A adxudicación de obras e servizos mediante o procedemento aberto.
· Que os pregos de clausulas de contración sexan informados pola mesa de contración.
· Que todas as contracións, con independencia das cantidades, sexan análise de proposta da propia mesa de contración.
· Que todos os grupos políticos con representación municipal estén representados nestas mesas de contración.
SEXTO: DISPOSICIÓN DE LOCAIS AOS GRUPOS MUNICIPAIS.
Para unha separación entre o traballo dos grupos municipais e a actividade propia do Concello, Veciñ@s considera de especial importancia que cada grupo conte cun local na propia casa do Concello, atendendo e dando cumprimento ao artigo 27 do Real Decreto 2568/1986, de 28 de novembro, polo que se aproba o Regulamento de Organización, Funcionamento e Réxime Xurídica das Entidades Locais, e que establece que “na medida das posibilidades funcionais da organización administrativa da entidade local, os diversos grupos políticos disporán na sede da mesma dun despacho ou local para reunirse de maneira independente e recibir visitas de cidadáns, e o Presidente ou o membro da Corporación responsable da área de réxime interior porá á súa disposición unha infraestrutura mínima de medios materiais e persoais.”
Tendo en conta a actual dimensión da Casa do Concello, consideramos que existe sitio máis que suficiente para dar cabida a dous locais para as dúas formacións con representación municipal, e así tamén solicitamos o acceso ao wifi do concello e dalgún medio de impresión para desenvolver o noso traballo.
Asemade solicitamos a disposición dun buzón de correos no Concello para recibir a correspondencia.
SÉTIMO: ACCESO AOS EXPEDIENTES E INFORMACIÓN MUNICIPAL.
O grupo municipal de Veciñ@s solicita poder acceder aos expedientes e información municipal cunha periodicidade mínima dun día por semana (preferiblemente os sábados en horario de mañá), así como o acceso extra a outra información e expedientes cando por motivos xustificados, requira o emprego dalgún día extra.
O grupo municipal de Veciñ@s comprométese a que o acceso á información non dificulte o normal traballo dos funcionarios e traballadores do Concello.
OITAVO: RETRIBUCIÓNS INDIVIDUAIS E ASIGNACIÓN A GRUPOS.
O grupo municipal de Veciñ@s, considera asemade necesario que se retribúan aos grupos municipais, prioritarimente sobre as retribucións/dietas individuais que veñen asignándose aos concelleiros nos últimos anos.
Por iso, e sendo conscientes da actual situación económica do Concello, e non querendo que se destinen máis fondos á retribución dos membros da corporación propoñemos que as asignacións / dietas aos concelleiros se reduzan como minimo do 50% do actual, e se asigne aos grupos políticos unha retribución en función dos seus concelleiros.
NOVENO: RETRIBUCIÓNS AOS CONCELLEIROS DELEGADOS.
En aras a un Principio de Economia, o Grupo Municipal de Veciñ@s considera que os concelleiros delegados non deberán percibir dietas polas distintas reunións de concelleiros delegados.
Porén, se a proposta da alcaldía e contraria a este principio, o grupo de Veciñ@s esixirá que de todas estas reunións se levante acta, que será enviada por medio de correo electrónico a totalidade d@s concelleir@s.
DÉCIMO: ADICACIÓN EXCLUSIVA.
O Grupo Municipal de Veciñ@s considera necesario que exista unha única adicación exclusiva no Concello, que debe ser a do seu Alcalde – Presidente.
Por iso dende o grupo consideramos e esiximos que o Alcalde teña adicación exclusiva aos asuntos do Concello durante os vindeiros 4 anos, esixíndolle tamén traballo e adicación a prol d@s veciñ@s, polo que deberá percibir unha retribución razonable, e que en todo caso non supere os 3,5 SMI Brutos (Salario Minimo Interprofesional).
E para que así conste aos efectos oportunos, asinamos a presente proposta de organización, En Boqueixón, o 16 de xuño de 2015.
