AMES - SERVIZOS COMPLEMENTARIOS

Os servizos complementarios de Ames contan con 2.359 usuarios/as

Ante as discrepancias existentes pola xestión dos comedores escolares nalgúns dos concellos da comarca da Santiago de Compostela, o Concello de Ames xa ten solventado a xestión deste servizo a través da súa propia Rede municipal de Comedores Escolares

Nos últimos catro anos produciuse un claro incremento no número de usuarios/as que participan nos servizos complementarios de educación

Estes servizos complementarios son pioneiros en toda Galicia e inclúen os programas Bos días cole, Tardes divertidas, a Rede Municipal de Comedores Escolares, os lúdicos e a Escola de verán.

Durante o presente exercicio dedicarase unha partida de 1.022.492 euros para sufragar os servizos complementarios

Ante as discrepancias existentes pola xestión dos comedores escolares nalgúns dos concellos da comarca da Santiago de Compostela, o Concello de Ames xa ten solventado a xestión deste servizo a través da súa propia Rede municipal de Comedores Escolares. Ademais durante os últimos catro anos produciuse un forte incremento no número de solicitantes e usuarios/as dos servizos complementarios, unha aposta do goberno local por ofertar diversos servizos destinados a axudar ás familias a conciliar a vida laboral e familiar. Isto significa que a poboación ve con bos ollos estas iniciativas que facilitan a vida das familias ao tempo que educan aos rapaces e rapazas en valores de respecto e convivencia e na necesidade de manter unha dieta equilibrada e saudable. Estes servizos complementarios son pioneiros en toda Galicia e inclúen os programas Bos días cole, Tardes divertidas, a Rede Municipal de Comedores Escolares, os lúdicos e a Escola de verán. En total, estes servizos contan con 2.359 usuarios/as.

Nos últimos días producíronse certas discrepancias sobre a xestión dos comedores escolares nalgúns dos concellos da comarca da Santiago de Compostela xa que as ANPAS decidiron non seguir coa prestación deste servizo de xeito directo. O Concello de Ames asegúrase a prestación deste servizo, xa que está xestionado directamente pola Administración local a través da Rede Municipal de Comedores Escolares.

O alcalde de Ames, Carlos Fernández, explicou que “ante a falta de atención da Consellería de Educación o Concello de Ames xa ten solventado a xestión dos comedores a través da Rede municipal de Comedores Escolares. O Concello de Ames presta un atención especializada a cada un dos alumnos/as que demandan o servizo de comedores escolares”. Ademais o rexedor municipal demándalle á Consellería de Educación que tamén manteña unha estreita colaboración neste ámbito con todos aqueles concellos que teñen garantido este servizo e non só con aqueles que teñen certas dificultades para poder ofrecelo.

Aposta polo gasto social e educativo

O goberno municipal iniciou no ano 2003, coincidindo co cambio de goberno, un conxunto de servizos destinados a facilitar a conciliación laboral dos pais e nais de Ames que teñen aos seus fillos escolarizados nos centros de ensino amienses, mediante un conxunto de programas como a Rede Municipal de Comedores, Bos días cole ou Tardes divertidas nos que, ademais de manter aos nenos activos mentres os pais/nais traballan, estes reciben educación de carácter cívico e alimentario, favorecendo entre os cativos e cativas unha boa dieta saudable e valores de convivencia e respecto cara os seus compañeiros. Nos últimos catro anos o número de usuarios non fixo máis que aumentar, o que indica ben as claras que estes servizos teñen moi boa acollida entre os cidadáns e as cidadás de Ames. Os servizos complementarios que ofrece o Concello de Ames pasaron a ser imprescindibles para a veciñanza amiese.

O goberno local aposta polo gasto social e iso vese reflectido no mantemento destes servizos que resultan indispensables para todos os veciños/as de Ames. Dende a Administración local cren necesario investir en gasto social e en materia de educación. O concello de Ames dispón dunha poboación eminentemente xoven o que provoca que se teñan que dedicar un gran número de recursos a este grupo social. O mantemento de todos este servizos supón un enorme esforzo económico e un gran gasto para as arcas municipais, pero dende o executivo local cren que é preciso apostar pola educación dos rapaces e rapazas que residen en Ames. Durante o presente exercicio dedicarase unha partida de 1.022.492 euros para sufragar os servizos complementarios.

Rede Municipal de Comedores Escolares

Os comedores escolares foron pioneiros á hora de ofrecer un servizo de xestión alimentaria directa que comeza e completa o ciclo, desde a elección do menú e a compra ata a cociña e a mesa sen pasar en ningún momento por mans alleas. Así, a Rede Municipal de Comedores Escolares contaba no curso 2007-2008 con 641 usuarios, mentres que neste curso 2010-2011 fan uso deles 971 nenos e nenas, o que supón un incremento de 330 usuarios, ou o que é o mesmo un incremento aproximado dun 51,5%. O incremento entre o curso pasado e este é de 149 usuarios.

Pola súa banda, os programas de Bos días cole e Tardes divertidas, cuxa finalidade é conciliar a vida laboral e familiar, ofrecen a posibilidade de que os pais/nais poidan deixar aos rapaces na escola antes do inicio das horas lectivas, para que poidan ir traballar e chegar ao seu posto de traballo á hora, ou deixalos pola tarde nas escolas mentres os pais/nais traballan. Estes servizos tamén incrementaron o número de usuarios nestes últimos catro anos.

Bos días cole incrementou entre o curso 2007-2008 e o presente curso 2010-2011 o seu número de usuarios en 175 nenos/as, o que supón unha subida dun 270%, xa que en 2007 contaba con 65 rapaces e rapazas e a día de hoxe presta servizo a 240 rapaces e rapazas. Con respecto ao curso pasado, o incremento foi de 18 usuarios, consolidándose deste xeito a tendencia a alza dos pais e nais que usan este servizo.

O incremento de usuarios do programa Tardes divertidas con respecto a ano 2007 foi de 70 rapaces e rapazas, un 175%, xa que hai catro anos eran 40 os seus usuarios e hoxe son 110. Con respecto ao ano pasado, sumáronse 36 novos usuarios, dándose así tamén un proceso de alza no número de interesados neste programa ano a ano.

Así, os programas Bos días cole, Tardes divertidas e a rede Municipal de Comedores Municipais dan servizo ao CEIP A Maía, ao CEIP Agro do Muíño, á Escola de Educación Infantil do Milladoiro e ao CEP de Ventín.

Tempadas lúdicas e Escola de Verán

Outros programas inseridos nestes servizos complementarios dependentes da Concellería de Educación son os lúdicos (primavera, xuño, setembro e Nadal lúdico) e a Escola de verán. No xuño lúdico, o incremento de beneficiados con respecto a ano 2007 foi de 27 nenos/as, o que supón unha subida dun 10%, mentres que con respecto ao ano pasado foi de preto de 40 novos usuarios, aumentando cada curso dende 2008 o número de beneficiados. No Nadal lúdico de 2007 foron 201 os rapaces e rapazas que se apuntaron a este programa, mentres que en 2010 foron 211, polo que o incremento con respecto a hai catro anos foi de 10 rapaces e rapazas, producíndose un incremento do 5%. Entre 2009 e 2010 o Nadal lúdico gañou 35 novos usuarios/as.

A Primavera lúdica e o Setembro lúdico conseguiron estabilizar o número de usuarios por riba dos 130 e os 200 usuarios/as respectivamente, de tal xeito que no programa da Primavera lúdica deste ano son 135 os nenos e nenas que se beneficiarán deste servizo e 204 os que o fixeron do setembro lúdico de 2010.

A Escola de Verán vai gañando alumnos/as ano a ano consolidándose a tendencia alcista, de tal xeito que se en 2007 foron 153 os rapaces e rapazas apuntadas, en 2010 houbo 200 usuarios/as, producíndose un incremento do 30,7%, uns 47 alumnos e alumnas máis, mentres que se comparamos os datos de 2010 cos de 2009 o incremento é de 40 persoas.

Así, queda sobradamente demostrado que os servizos complementarios desenvolvidos polo goberno municipal dispoñen da absoluta confianza dos pais e nais dos nenos/as que residen en Ames, converténdose nun servizo moi estendido na educación dos rapaces e rapazas do concello que, ademais de permitirlles aos pais/nais conciliar a vida laboral e a familiar, permítelles aos cativos e cativas contar cunhas horas fóra do horario escolar no que reciben unha boa atención e educación en valores e nunha dieta saudable.

AMES - ESTUDO SOBRE A SITUACION DO COMERCIO

O Concello de Ames elabora un estudio sobre a situación do comercio

Para elaborar este estudio fixéronse 225 enquisas a comercios, 250 enquisas a clientes e entrevistas en profundidade ás asociacións sectoriais

Dende o ano 2000 pasouse de 288 establecementos comerciais aos 749 que existen na actualidade

Co fin de mellorar o sector comercial o goberno local encargou a elaboración dun estudo que analizase a situación actual do comercio amiense. O obxectivo principal foi realizar un plan de acción, a través dunha diagnose e unha análise DAFO do comercio amiense, que indique as fortalezas, debilidades, así como os factores que poidan dar lugar a oportunidades e ameazas que presenta a actividade comercial no Concello de Ames. Debullado por sectores este estudio recolle información sobre as características do sector comercial, o asociacionismo, os hábitos de consumo da poboación residente e a valoración da clientela sobre as distintas tipoloxías comerciais. Para iso realizouse un amplo traballo de campo que consistiu na realización de 225 enquisas a comercios, 250 enquisas a clientes e entrevistas en profundidade ás asociacións sectoriais. Trala elaboración do devandito estudio realizouse un Plan de Acción Comercial para determinar as liñas estratéxicas que debe marcar o provir deste sector de cara aos vindeiros anos.

Hoxe en día, o comercio tradicional desempeña un papel fundamental na vida económica, social e cultural das cidades e vilas, pero durante os últimos anos, o comercio retallista estase a enfrontar a un profundo proceso de cambio caracterizado pola aparición de novas fórmulas de distribución comercial caracterizados polo autoservicio, polo maior tamaño dos establecementos e a diversidade de produtos. Ao mesmo tempo estanse producindo unha serie de cambios nos hábitos de compra dos consumidores e cambios no perfil da clientela.

Por outra banda, hai que ter en contan a aparición de novas tecnoloxías de información e comunicación que modifican as relacións comerciais tradicionais; os cambios urbanísticos; os cambios demográficos caracterizados polo envellecemento da poboación e o desprazamento da poboación cara a periferia dos núcleos urbanos.

Neste contexto de fondas transformacións, son varios os problemas aos que o sector comercial se enfronta, como a aparición e implantación de novas fórmulas comerciais, coas que compite de xeito directo e a incorporación de novas tecnoloxías. A falta de incorporación de novas tecnoloxías de comunicación e información supón unha ameaza para o pequeno comercio de perda de competitividade e de cota de mercado.

Para que o pequeno comercio poida manter unha posición competitiva, é necesario que potencie os elementos que o caracterizan como son a atención personalizada, especialización con respecto a outras fórmulas comerciais, maior coñecemento dos produtos e polo tanto a posibilidade dun mellor asesoramento ao cliente, proximidade entre o lugar de residencia e os lugar de compra, etc. Sendo fundamental acadar unha diferenciación competitiva e un posicionamento baseado na calidade do servizo.

O Concello de Ames para facer fronte aos cambios que se están a producir nos últimos anos, veu necesario a elaboración dun diagnóstico e dun plan de acción sobre o comercio e a hostalería que existen no termo municipal amiense. A concelleira de Promoción Económica, Emprego, Turismo e Medio Ambiente, Úrsula Seijas, explica que “a diagnose e o Plan de Acción Comercial de Ames, ten entre outros obxectivos, o de identificar as posibles carencias coas que conta o pequeno comercio do concello, de xeito que se propoñen as solucións máis axeitadas, e que aplicadas dunha forma coherente e progresiva, favorecerán un comercio axeitado á demanda existente, así como se propoñen as mellores medidas para que o comercio de Ames evolucione nas condicións máis vantaxosas”.

Traballo de campo

Para a realización da diagnose do sector comercial no concello de Ames, realizáronse un total de 250 enquisas á clientela e 225 enquisas aos comerciantes, divididas entre as dúas zonas comerciais de Bertamiráns e do Milladoiro. Ademais, para a elaboración e deseño das liñas de actuación do Plan de Acción, realizáronse entrevistas aos axentes implicados como son o persoal da Concellaría de Promoción Económica, á Asociación de Comerciantes de Bertamiráns (ACB), á Asociación de Empresarios, Comerciantes e Profesionais do Milladoiro (AEMI) e á Asociación de Empresarios do Parque Empresarial do Milladoiro.

O estudio está elaborado en base a seis puntos principais como son a oferta comercial, a demanda comercial, a problemática comercial, o asociacionismo, a análise DAFO e as liñas estratéxicas. Segundo se desprende deste estudo en Ames existen un total de 749 establecementos comerciais. A zona comercial do Milladoiro é que concentra a maior parte do tecido comercial.

Os comerciantes de Ames adoptan maioritariamente a forma xurídica de autónomo/a. Destes 749 comercios, o 64,4% son autónomos e como máximo dispoñen de dous empregados. Deste xeito, pódese dicir que o comercio de Ames segue a tendencia xeral do comercio en Galicia, xa que do total do comercio galego un 63% opera baixo a forma xurídica de autónomo.

Comercio eminentemente novo

Por outra banda pódese dicir que o comercio polo miúdo de Ames caracterízase por ser un comercio eminentemente novo xa que o 71,1% dos establecementos teñen menos de 10 anos. O 37,8% dos comercios do concello teñen entre 4 e 10 anos e o 23,1% ten entre 1 e 3 anos. A suma destas porcentaxes acada un 60% do total dos comercios enquisados. Dende o ano 2000 pasouse de 288 establecementos comerciais aos 749 que existen na actualidade.

O tamaño medio destes establecementos é de entre 51 e 100 metros cadrados e o 60,9% dispoñen dun local en aluguer. O 60,9% dos establecementos enquisados atópanse en inmobles en réxime de aluguer, mentres que o 33,8% están situados en locais en propiedade. Neste senso a situación en Ames é comparable á doutros núcleos urbanos, onde o réxime de propiedade que destaca é o de aluguer fronte á propiedade. Este réxime de propiedade atópase principalmente en cidades e nos concellos limítrofes ou próximos ás mesmas.

Análise DAFO

A ferramenta básica que se empregou foi a elaboración dun estudo que analizou a situación actual do comercio amiense. O obxectivo principal foi elaborar un plan de acción, a través dunha diagnose e unha análise DAFO do comercio, que indicou as fortalezas, debilidades, así como os factores que poden dar lugar a oportunidades e ameazas que presenta a actividade comercial no Concello de Ames. A través da análise DAFO obtívose unha visión interna e externa da situación do pequeno comercio en Ames respecto aos seu ámbito de actuación, o que ademais facilita a toma de decisións de carácter estratéxico.

O diagnóstico elaborado permite avaliar, de forma global, o estado de actividade comercial, as súas problemáticas, carencias e aspectos positivos e tomar despois medidas ao respecto para contribuír así á mellora do sector comercial en Ames. Con estes datos pódese actualizar e mellorar a información sobre o sector comercial, definir políticas de mellora e liñas estratéxicas de actuación, conclusións todas elas que están incorporadas ao plan de acción.

O plan de acción é un amplo e extenso documento no que se recollen 9 liñas estratéxicas de actuación divididas por entidades impulsoras, que son por tanto as asociacións comerciais, os propios comerciantes e a administración pública. Algunhas das propostas recollidas no Plan de Acción xa foron postas en marcha por parte do Concello e dalgunha asociación de comerciantes, e as outras serán unha boa ferramenta de traballo non só para o Concello senón tamén para todas as partes implicadas, e dicir, para as asociacións e como non, para os protagonistas do estudo: os propios comercios. Ames conta dende este momento cun estudo sobre o sector comercial e cun Plan de Acción, que marcará unha guía de ruta para este sector de cara aos vindeiros anos.

TORDOIA - FESTA DA XUVENTUDE

MÁIS DE DÚAS MIL PERSOAS PARTICIPAN NA QUINTA FESTA DA XUVENTUDE DE TORDOIA

 

Unha churrascada precedeu á verbena coas orquestras Olympus e Aché

 

16 de abril de 2011.- Máis de dúas mil persoas participaron a pasada noite na quinta edición da Festa da Xuventude de Tordoia, que se celebrou na explanada contigua ao novo campo de fútbol da Pontepedra. O bo tempo imperante propiciou a asistencia de veciños de toda a comarca, ademais da práctica totalidade da xuventude tordoiesa. A celebración, promovida polo Concello de Tordoia, superou así as expectativas da organización.

 

Gran parte dos participantes acudiron á churrascada previa á verbena, que comezou ás 20:30 horas e seguía recibindo comensais a medianoite. A carpa na que se instalaron as mesas para comer, con capacidade para unhas 400 persoas, ía renovando continuamente o aforo e estivo sempre chea. Todos os que o desexaron, mozos ou non, tiveron ocasión de probar o churrasco, acompañado por viño, auga, pan e café, ao prezo popular de 10 euros por persoa.

 

Tras a comida comezou a música e o baile. A orquestra Olympus repetiu presenza nesta Festa da Xuventude, este ano acompañada de Aché. Ambas formacións musicais fóronse repartindo as quendas para que a música e a diversión se prolongasen ata altas horas da madrugada.

PSOE BRION - PRESENTACION DA CANDIDATURA

 

XOSÉ LUIS GARCÍA, ALCALDE E CANDIDATO Á REELECCIÓN: “A PESAR DA CRISE FOMOS QUEN DE INCREMENTAR OS SERVIZOS AOS VECIÑOS DE BRIÓN”

 

A candidatura que encabeza o rexedor brionés foi presentada na noite do venres no Balneario do Tremo

 

Brión, 16 de abril de 2011.   O Balneario do Tremo foi o lugar elixido na noite do venres polo PSdeG-PSOE de Brión para celebrar o acto de presentación da candidatura coa que concorrerá a formación ás vindeiras eleccións municipais.  O alcalde e cabeza de lista, Xosé Luis García, fixo un balance da súa xestión á fronte do Concello e salientou o feito de que “a pesar da crise” o Goberno local foi quen de incrementar os servizos aos veciños e poñer á súa disposición novas infraestruturas. O novo instituto, o renovado colexio de Pedrouzos, a piscina cuberta e o campo de fútbol de herba artificial foron algúns dos exemplos citados polo rexedor, que presentou unha candidatura formada a partes iguais por mulleres e homes e cun 33 por cento de renovación.

 

A extensión á totalidade do municipio do servizo de saneamento, “un dos logros máis importantes pero quizais o menos visible”, supuxo, segundo García, un dos principais fitos da xestión do equipo que encabeza. O alcalde lembrou que no Concello existen agora ata 110 quilómetros de canalización, que na súa maioría é tripla, con recollida de pluviais, abastecemento de auga e saneamento de fecais. Estes traballos, explicou o rexedor brionés, significaron un investimento de máis de 12 millóns de euros.

 

As obras de abastecemento de auga de Ames-Brión, as 144 vivendas protexidas e as variantes da AC-51 e da AC-300 foron outros dos proxectos, algúns deles xa en marcha, mencionados polo rexedor brionés de cara á vindeira lexislatura.

 

O candidato socialista criticou asemade aos seus rivais políticos no seu discurso. Segundo García, a oposición “utilizou de forma sistemática a mentira e a descualificación para obter réditos políticos”. O rexedor condenou tamén o “continuo acoso” que o PP fai aos funcionarios do Concello, traballadores que, explicou García, “teñen demostrada a súa honradez e capacidade”.

 

María del Carmen Rey, Ramón Rodríguez, Patricia Vázquez, Jesús Quintela, José Bouzas, José Luis Sampedro, José Pedro Cambón, María rosa Romero, María Elena Mato, Elena Suárez, Manuel José Fernández e María del Mar Mouriño acompañan, por esta orde, a Xosé Luis garcía na candidatura.

PP MELIDE - DÉBEDA DO CONCELLO COA COMPAÑIA ELÉCTRICA

A empresa eléctrica ameaza con corta-la luz dos edificios públicos se Cea non lle paga a débeda de máis de 320.000 euros

 

·        Os populares solicitan a convocatoria urxente dunha Xunta de Voceiros se a actual rexedora non informa sobra a situación

 

Melide, 15 de abril de 2010. O PP de Melide informa de que a empresa subministradora de electricidade cortará o subministro eléctrico nos edificios públicos do concello se o actual goberno local non paga a débeda que ascende a 320.448,58 euros. Tal e como indica a voceira popular, Ánxeles Vázquez, a empresa concesionaria do servicio xa presentou dos escritos no concello o pasado 12 de abril, con rexistro de entrada 1.260 e 1.261, na que esixía o pago inmediato da débeda ou cortaría o subministro de luz.

 

Por todo iso, Vázquez anuncia a solicitude da convocatoria urxente dunha Xunta de Voceiros para a vindeira semana co fin de que Cea explique de forma inmediata o acontecido coa empresa subministradora de electricidade, así coma as medidas que ten previsto emprender para garanti-lo benestar dos veciños e o funcionamento dos edificios públicos, se finalmente se procedo ó corte de luz. Neste sentido, Vázquez informa de que “de non convocarse a Xunta de Voceiros, solicitaremos a convocatoria dun Pleno Extraordinario porque é moi grave que Cea manteña a calada por resposta e non dea a cara”.

 

Vázquez explica que o “Concello dispón de catro meses para solucionar esta situación ou pola contra comezaranse os cortes de luz que afectarán á escola infantil, ao pavillón de deportes, ó edificio multiusos e ós centros sociais”. A voceira popular lamenta a desidia do actual equipo de goberno por soluciona-los problemas dos veciños e a súa nefasta xestión para leva-las contas do concello e que pon en risco o benestar dos melidenses.

AMES - PLENO EXTRAORDINARIO

Apróbase en Pleno o pago de facturas pendentes por valor de 476.904 euros

Os asuntos económicos e de facenda centraron os temas que se debateron no Pleno extraordinario celebrado este venres 15 de abril. A corporación municipal aprobou por maioría simple (cos votos a favor do grupo de goberno e coa abstención dos grupos municipais popular e nacionalista) un recoñecemento extraxudicial de crédito para aprobar o pagamento de diversas facturas correspondentes a gastos efectuados en exercicios anteriores por valor de 476.904 euros. A corporación municipal tamén aprobou por maioría simple a aprobación definitiva da conta xeral de 2009. Ademais aprobouse por maioría simple unha modificación presupostaria, que é o primeiro paso para solucionar unha situación existente no Concello de Ames dende os anos noventa, polos servizos que ven prestando a empresa Espina & Delfín. Por ultimo, a corporación municipal aprobou por unanimidade o convenio de colaboración para organizar a VII Feira de Comercio Val da Maía.

A sesión plenaria extraordinaria que se celebrou este venres 15 de abril tivo un marcado carácter económico. En primeiro lugar debateuse a aprobación dun recoñecemento extraxudicial de crédito para aprobar o pagamento de diversas facturas correspondentes a gastos efectuados en exercicios anteriores, fundamentalmente do ano 2010, e que non foron aprobadas nese exercicio nin imputadas ao orzamento correspondentes por non existir crédito suficiente. Trátase de gastos correntes que ascenden a un importe total de 476.904,35 euros. Este punto xa foi incluído no pleno ordinario do mes de marzo, pero non puido debaterse porque á media noite levantouse a sesión plenaria.

A concelleira de Economía e Facenda, Patricia Conde, explicou que “estes gastos están financiados con diferentes expedientes. Por un lado sufráganse cunha transferencia de crédito que provén dunha partida correspondente ao gasto do plan comarcal de transporte. Visto que hai unha partida recollida no orzamento duns 300.000 euros aproximadamente e visto que xa foron aboados os atrasos correspondentes a exercicios anteriores podemos prescindir da cantidade de 100.000 euros. Polo tanto se transferirían uns 100.000 euros do plan comarcal de transporte. En canto ao plan comarcal de bombeiros, ao ter presupostado unha contía superior ao que final tivermos que aboar, tamén podemos dedicar o excedente para pagar estes gastos”.

Patricia Conde continuou dicindo“ao mesmo tempo xera crédito o expediente da axuda que nos dá a Deputación da Coruña, a través do Plan de Obras e Servizos, que ofrecía a posibilidade aos concellos de empregar o 50% desta axuda para sufragar gasto corrente. O Concello de Ames solicitou o ano pasado esta axuda e veulle aceptada polo que dispón de 237.354,26 euros máis, que non estaban previstos no orzamento, para gasto social. Tamén se financian estas facturas coa reserva do gasto que se fixera para a ampliación do servizo de limpeza viaria, polo que se poden dedicar uns 100.000 para este pagamento”.

Dende o BNG de Ames manifestaron que “non ían a impedir o pagamento destas facturas porque estaban comprometidos coas pequenas e medianas empresas ás que se lle tiñan que pagar estas facturas”. Mentres dende o PP de Ames incidiron en que dende o goberno municipal tiñan que “facer unha maior contención do gasto” e catalogaron esta operación de “irresponsable”. Este punto foi aprobado por maioría simple cos votos a favor dos concelleiros/as do grupo de goberno e coa abstención dos grupos municipais popular e nacionalista.

Conta xeral 2009

O segundo asunto que se recolleu na orde do día foi a aprobación definitiva da conta xeral de 2009. A liquidación desta conta aprobouse o 15 de decembro de 2010 por decreto de alcaldía e douse conta dela no Pleno ordinario do pasado mes de decembro. Unha vez que a conta foi formalizada polo departamento de Intervención, segundo establece a lexislación, convocouse a comisión especial de contas, cun prazo de 15 días de antelación para que os concelleiros/as da corporación municipal puidesen revisar a devandita conta xeral.

O pasado 9 de marzo os membros dos tres grupos políticos municipais, que forman a comisión informativa especial de contas, ditaminaron a favor desta conta. Tras este acordo abriuse un prazo de exposición ao público que rematou o 8 de abril, para que todas as persoas que o considerasen oportuno puidesen presentar as correspondentes alegacións. Ao non presentarse alegacións tivo que ser o Pleno o encargado de aprobar de xeito definitivo esta conta. Este punto foi aprobado por maioría simple, cos votos a favor do grupo de goberno e coa abstención dos grupos municipais popular e nacionalista. Agora deberá ser remitida ao Consello de Contas de Galicia e ao Tribunal de Contas.

A liquidación desta conta amosa un saldo positivo que ascende a 405.838 euros. O informe de liquidación pon de manifesto que se presupostou correctamente e se executou o orzamento de acordo coas previsións, e dicir, amosa que o gasto orzamentario foi inferior ao ingreso. Por outra banda o remanente de tesourería pon de manifesto que o estado de liquidez a curto prazo da entidade é negativo e ascende a 639.625,75 euros. Isto débese ao non concertar as operacións de préstamo que estaban previstas nos orzamentos elaborados polo Concello dende o ano 2004.

Deste xeito o Concello de Ames ponse ao día na rendición de contas. Dende o mes de xuño de 2009, momento no que se produciu unha reestruturación no departamento de Intervención, presentáronse as contas dos exercicios 2006, 2007, 2008 e 2009. O departamento de Intervención xa está traballando na elaboración da conta de 2010 co obxectivo de poder presentala ante do 1 de xuño deste ano.

Modificación orzamentaria

Ademais a corporación municipal tratou a modificación inicial dunha operación orzamentaria. Este punto foi presentado pola concelleira de Economía e Facenda, Patricia Conde, que dixo “trátase de darlle a aprobación inicial a unha modificación presupostaria, que é o primeiro paso para solucionar unha situación existente no Concello de Ames dende os anos noventa, polos servizos que ven prestando a empresa Espina & Delfín”.

Patricia Conde continuou dicindo que “a través da aprobación desta modificación orzamentaria o que se pretende é compensar os gastos que fixo esta empresa, que en moitos casos non pasaban tan sequera polo orzamento municipal, cos ingresos que recadaba e que non se ingresan nas arcas municipais. Consecuencia dese proceso de regularización sae un saldo a favor do Concello de Ames duns 857.000 euros que serán ingresados nas arcas municipais”.

O voceiro nacionalista, Xosé Fernández, manifestou o apoio do seu grupo municipal “para aclarar unha situación irregular que xa ven de moi vello. Nós non vamos poñer impedimentos para que esta situación se regularice, pero tamén temos que dicir que houbo moitos anos para poder facelo”.

Por parte do PP de Ames interveu o seu voceiro, Santiago Amor, que preguntou polos xuros que a empresa tería que aboarlle ao Concello de Ames por esta operación. Debido a iso presentou unha emenda para deixar este tema encima da mesa mentres non se aclarase este tema.

O alcalde de Ames, Carlos Fernández, respondeu a esta cuestión dicindo que “estamos a falar dunha operación de compensación que evita un preito. Se pedimos xuros de demora por estes cartos a empresa pedirá xuros de demora por valor de 857.000 euros. Polo tanto é unha compensación e uns intereses compénsanse cos outros”.

Primeiro votouse a emenda presentada polo PP de Ames que foi rexeitada cos cotos en contra dos nove concelleiros/as do grupo de goberno, a abstención dos cinco concelleiros/as do grupo municipal nacionalista e co voto a favor dos sete concelleiros/as do grupo municipal popular. Este punto saíu adiante por maioría simple cos votos a favor do grupo de goberno e coa abstención dos grupos municipais popular e nacionalista.

Convenio para organizar a VII Feira do Comercio
Por último a corporación municipal aprobou por unanimidade o convenio de colaboración para organizar a VII Feira de Comercio Val da Maía. Todos os anos se subscribe un convenio de colaboración entre o Concello de Ames e a Asociación de Comerciantes de Bertamiráns (ACB), a través do cal a Administración local achega unha contía económica para sufragar parte do custo total que se deriva da organización deste evento.

Este ano o Concello de Ames achegará a contía de 15.000 euros, que representa o 65,90% do presuposto total que custa a organización deste evento. O custe estimado da organización da VII Feira do Comercio Val da Maía ascende a 22,760,99 euros.