SILLEDA - Unha sentenza do Xulgado do Social Nº 3 obriga a readmitir aunha traballadora despedida polo goberno anterior

Unha sentenza do Xulgado do Social Nº 3 obriga a readmitir aunha traballadora despedida polo goberno anterior

Silleda, 16 de agosto de 2011. O Concello de Silleda terá que readmitir a unha traballadora do servizo de limpeza e recollida viaria que fora despedida o pasado mes de abril polo anterior goberno municipal. A sentenza do Xulgado do Social Nº3 de Pontevedra chega logo de estimar a demanda interposta por esta traballadora contra a decisión de prescindir dos seus servizos O fallo xudicial declara nulo o seu despido e en consecuencia condena ao Concello a readmitir a esta operaria nas mesmas condicións que tiña antes de ser despedida.

O anterior goberno municipal, segundo consta na denuncia, abriulle un expediente disciplinario a esta traballadora o pasado 3 de marzo “por venirse observando una notoria falta de rendimiento en el desarrollo de su trabajo así como por incumplimiento continuo de horario”, reza o texto. O 6 de abril, o goberno presidido por Ofelia Rey acorda extinguir o seu contrato.

OROSO - A SEMANA CULTURAL COMEZA CON CIRCO, CINE, MONICREQUES, MANUALIDADES, MAXIA E UNHA SAÍDA AO AQUAPARK

A SEMANA CULTURAL DE OROSO COMEZA CON CIRCO, CINE, MONICREQUES, MANUALIDADES, MAXIA E UNHA SAÍDA AO AQUAPARK

A programación do Concello ofrece actividades de balde para toda a familia desde este martes 16 ata o mércores 31 de agosto

16 de agosto de 2011.- O Concello de Oroso pon en marcha a programación da súa “Semana Cultural 2011” desde este martes 16 de agosto ata o mércores 31. A oferta municipal inclúe actuacións de circo, cine, obradoiros artísticos, teatro, música, títeres, xogos e deportes, en todos os casos con acceso de balde. O concelleiro de Familia, Benestar, Igualdade, Cultura e Ensino, Antonio Leira, explica que “deseñamos este programa tratando de ofrecer moita variedade e encaixar cos gustos e os intereses de todos os membros da familia, ademais de adaptarnos aos horarios e ritmo de vida do mes de agosto”.

Programación para esta semana

A primeira proposta coa que poden gozar pequenos e maiores é o espectáculo de novo circo, clown, malabares e acrobacias que “Culturactiva” ofrece na piscina municipal en Sigüeiro este martes 16 ás 19 horas. Ás 22 horas, a Praza de Alexandre Bóveda acolle o pase da película “La Saga Crepúsculo: Luna Nueva”.

Para mañá, mércores 17 de agosto, está programada a actuación dos monicreques de “Panamesiana Teatro”, representando “Oh, que bonito é Panamá”. Será a partir das 19 horas na piscina municipal, a non ser que a meteoroloxía obrigue a trasladar o evento ao polideportivo. O cine volverá a ter o seu espazo na Praza de Alexandre Bóveda, coa proxección de “Kika superbruja y el libro de los hechizos” a partir das 22 horas.

A primeira actividade prevista para a xornada do xoves 18 é un obradoiro de manualidades para nenos de catro a doce anos, que xa ten cuberta a vintena de prazas dispoñibles. Pola tarde, a partir das 19 horas, sen límite de aforo, actuará o “Mago Teto”, co seu espectáculo “O Afiador” na piscina municipal. A actuación trasladarase ao centro cultural se houbese mal tempo.

A seguinte actividade da “Semana Cultural Oroso 2011” será o venres 19, cunha excursión ao Aquapark de Cerceda para maiores de 8 anos empadroados no municipio. As prazas nesta viaxe son limitadas e cómpre inscrición previa no centro cultural. A saída será ás 11 horas desde Sigüeiro e o retorno está previsto para as 19 horas.

Na fin de semana, a programación non se detén e centrarase no deporte, coa celebración da segunda edición do Torneo Internacional de Tenis de Mesa Concello de Oroso. Disputarase tanto o sábado 20 como o domingo 21 no Complexo Deportivo Juanito Amigo, entre as 9 e as 21 horas, o domingo con formato de xornada de portas abertas.

BNG A ESTRADA - Grazas ás denuncias feitas polo BNG o goberno municipal equiparará os premios de homes e mulleres da categoría absoluta I Memorial Manuel Bergueiro

Grazas ás denuncias feitas polo BNG o Partido Popular equiparará os premios de homes e mulleres da categoría absoluta I Memorial Manuel Bergueiro

Magariños di que rectificar é de sabios, mais se o goberno municipal do Partido Popular tivera sempre presente as políticas de igualdade e de non discriminación da muller este tipo de erros non se producirían en ningún caso

A Estrada, 16 de agosto de 2011: Logo das denuncias feitas polo BNG o domingo sobre a discriminación da muller nos premios da categoría absoluta do I Memorial Manuel Bergueiro, o concelleiro de deportes, Ismael Pena, considerou que a diferencia nos premios da categoría absoluta entre homes e mulleres fora un erro.

Xosé Magariños, portavoz municipal do BNG, felicitouse pola rectificación feita polo goberno municipal, “unha rectificación que non se tería dado se o BNG non dera a voz de alarma sobre esta grave discriminación da muller nos premios do I Memorial Manuel Bergueiro.”

Por outra banda, Magariños quixo subliñar que “rectificar é de sabios, mais se o goberno municipal do Partido Popular tivera sempre presente as políticas de igualdade e de non discriminación da muller este tipo de erros non se producirían en ningún caso.” “Agardemos, “ engadiu o portavoz do BNG, “que en futuras convocatorias este tipo de feitos non se volvan a producir.”

Por outra parte, Magariños dixo que “é sorprendente que os cartaces do evento estean correctos cando o regulamento está mal, en todo caso, “ engadiu o portavoz municipal do Bloque, “no BNG queremos ver canto antes a equiparación dos premios entre homes e mulleres da categoría absoluta, tanto no regulamento como nas webs Correrengalicia.com e Championchipnorte.com, ás que fai referencia o documento citado, e que utilizan habitualmente os e as atletas para inscribirse nos eventos deportivos desta índole.”

O portavoz municipal do BNG subliñou finalmente que “xa que lle van a pasar o corrector de igualdade ao regulamento, que aproveiten para pasarlle tamén o corrector ortográfico de galego, que contén algún que outro erro de vulto.”

BRION – CAMPAMENTO EN BOIRO

MEDIO CENTO DE RAPACES DE BRIÓN PARTICIPAN NO CAMPAMENTO INFANTIL DE ESPIÑEIRA, EN BOIRO

A iniciativa, que se desenvolveu do 2 ao 13 de agosto, xirou arredor do mundo do humor a través de obradoiros, rutas de sendeirismo e clown

16 de agosto 2011. Medio cento de rapaces e rapazas de Brión, de entre 8 e 12 anos, veñen de rematar a súa estancia no campamento infantil de Espiñeira, en Boiro, nunha experiencia que os organizadores calificaron de gran éxito a pesares de que o tempo non acompañou, especialmente nos primeiros días en que a chuvia non permitiu disfrutar da praia. Monicreques, obradoiros de risoterapia, sendeirismo, arqueoloxía e días de praia sucedéronse durante estes doce días, do 2 ao 13 de agosto, en que os pequenos asistiron a este campamento temático de lecer que estivo centrado no mundo do humor.

Segundo explicou a directora do campamento, Ana María García, “a mensaxe que quixemos trasladarlle aos rapaces foi que o humor nunca poden ser a costa de ninguén e que os chistes fan graza cando podémonos rir todos, non cando hai alguén que sufre”. O racismo e a exlcusión foron tamén temas que se abordaron cos máis pequenos, empregando os títeres e obradoiros. Pero tamén houbo moito tempo para divertirse, con roteiros de sendeirismo que lles permitiron collecer a comarca do Barbanza, os muíños do río Loroño ou o Centro Arqueolóxico do Barbanza. Precisamente a arqueoloxía chamou a atención dos participantes no campamento, que compartiron espacio cun campamento de traballo promovido pola USC no Castro Neixón, onde se están realizando traballos de excavación.

TORDOIA - ÚLTIMOS TRABALLOS PARA REMATAR A REMODELACIÓN DA CASA CONSISTORIAL DE TORDOIA

ÚLTIMOS TRABALLOS PARA REMATAR A REMODELACIÓN DA CASA CONSISTORIAL DE TORDOIA

16 de agosto 2011.- A piques de quedar rematadas, as obras da Casa Consistorial do Concello de Tordoia continúan a bo ritmo agora que o tempo acompaña. Os traballos de pintura e renovación da cuberta, que se viron retrasados polas inclemencias climatolóxicas, veñen de ser retomados estes días co obxectivo de deixalos rematados antes de fin de mes. Estas obras de acondicionamento do inmoble encádranse nos traballos de ampliación do consistorio, que incluíron a execución de novas dependencias e un arquivo no soto.

A execución da nova cuberta, que permitirá substituír a anterior para cubrir as novas necesidades do edificio, recentemente ampliado na súa estrutura, é a última fase de esta remodelación integral da Casa Consistorial, que se quedara xa pequena trala súa constitución en 1967. Uns traballos que contan cun investimento en conxunto de preto de 120.000 euros, financiados pola Consellería de Presidencia nun 80% mentres que o resto son asumidos polo Concello. De feito estes primeiros traballos foran obxecto dunha visita por parte do conselleiro de Presidencia, Alfonso Rueda, o pasado mes de marzo.

Segundo explicou o alcalde de Tordoia, Antonio Pereiro, a execución destes últimos traballos permitirá rematar cos problemas de humidades que presentaban algunhas das estancias do Concello.

AMES - O club de Piragüismo Ribeiras do Tambre de Ames consegue o segundo posto no circuíto do Descenso do Tambre

O club de Piragüismo Ribeiras do Tambre de Ames consegue o segundo posto no circuíto do Descenso do Tambre

O Club de Piragüismo Ribeiras do Tambre de Ames conseguiu na XXVI edición do Descenso do Tambre un segundo posto na clasificación xeral por equipos do circuíto da praia fluvial de Tapia. Asemade, obtivo un primeiro e terceiro premio na categoría infantil A féminas K1, con Irene Mirás Vázquez e Andrea Tomé Pérez respectivamente. En alevín A féminas K1, María Catoira obtivo un terceiro premio, o mesmo posto que Martín del Río Viaño en alevín A masculino K1.

O Club de Piragüismo Ribeiras do Tambre do Concello de Ames conseguiu na XXVI edición do Descenso do Tambre celebrado na praia de Tapia, un segundo posto na clasificación xeral por equipos no circuíto da praia fluvial, nunha xornada na que a choiva non impediu que a proba se realizara, cun preto de 250 participantes. A competición estivo organizada polo susodito Club de Piragüismo Ribeiras do Tambre xunto co Concello de Ames, e xa é toda unha referencia para o piragüismo galego. O primeiro clasificado correspondeu ao Club de Piragüismo de Catoira, e o terceiro para o Club de Piragüismo de Narón.

Pero o Club de Piragüismo Ribeiras do Tambre acadou máis premios. Obtivo un primeiro e terceiro posto na categoría infantil A féminas K1, con Irene Mirás Vázquez e Andrea Tomé Pérez respectivamente. En alevín A féminas K1, María Catoira obtivo un terceiro posto, o mesmo posto que Martín del Río Viaño en alevín A Masculino K1.

Foron preto de 250 deportistas e 13 clubs de toda Galicia os encargados de participar. Na baixada desde a ponte de Portomouro ata a Praia Fluvial de Tapia participaron padexeiros das categorías cadete, xuvenil, sénior e veteranos. Dentro destas categorías competiron un total de 65 padexeiros que tiveron que percorre 6 quilómetros de distancia. Tampouco faltou o circuíto da praia fluvial, reservado ás categorías infantil, alevín e benxamín que percorreron 1.500 metros. Nas categorías de nenos/as participaron un total de 170 padexeiros.
O alcalde de Ames, Santiago Amor, a concelleira de Asociacionismo, Igualdade, Muller e Xuventude, María González, e a concelleira de Medio Ambiente, Desenvolvemento Sostible e Sanidade, Eugenia Martín, foron os encargados e facer entrega dos trofeos. Para os tres gañadores absolutos do descenso do Tambre (kayak masculino, canoista e kayak feminino) houbo un lote de material deportivo como agasallo.

O alcalde de Ames, Santiago Amor, acompañado polo concelleiro de Depores, Tempo Libre e Voluntariado, Manuel Ferreiro, e pola concelleira de Asociacionismo, Igualdade, Muller e Xuventude, María González, deron mostra do compromiso do Concello de Ames co deporte, neste caso co piragüismo amiense, e participaron nesta proba a bordo de dous kaiac.

TEO - O Pleno extraordinario aproba por unanimidade o proxecto de ampliación da estación potabilizadora de Pontevea

O Pleno extraordinario aproba por unanimidade o proxecto de ampliación da estación potabilizadora de Pontevea

· Promovéronse medidas de apoio ao ciclista Ezequiel Mosquera e fixáronse os festivos locais para a anualidade 2012.

O punto máis importante da orde do día e por mor do cal se realizou este Pleno extraordinario, o proxecto de ampliación da estación potabilizadora de Pontevea, foi aprobado coa votación favorable da totalidade dos grupos da Corporación. Tras a exposición dos diferentes puntos de vista sobre o proceso de financiamento da obra os voceiros de todos os grupos amosáronse satisfeitos coa solución adoptada. A potabilizadora terá unha achega do 70% por parte da Augas de Galicia e un 30% que deberá realizarse cos fondos propios do Concello, este 30 % representa un total de 304.309 euros que o Concello de Teo pagará en dúas anualidades.

Outro punto da orde do día xiraba en torno a unha moción presentada polo Grupo Municipal do PP sobre a adopción de medidas por mor do proceso federativo do ciclista Ezequiel Mosquera, á que o Grupo do BNG realizou diversas emendas que foron consensuadas polo Pleno e aprobadas, finalmente, por unanimidade. Un dos puntos aprobados foi o apoio a unha marcha protesta que sairá o vindeiro 20 de agosto do Concello de Teo ás 11.30 horas baixo o lema “Non queremos a Volta a España en Galiza sen Ezequiel Mosquera”.

Por último, outro punto da orde do día estableceu os festivos locais para o ano 2012, xa que o San Martiño coincide en domingo, e a ascensión coincide co festivo do Día das Letras Galegas. A proposta final fixou como festivos o 21 de febreiro, martes de Entroido, e o 9 de abril, luns de Pascua, día non lectivo no calendario escolar, polo que axudaría ás familias na conciliación da vida laboral e familiar.

AMES - Fuco e Veiga fanse co primeiro posto do campionato de chave da Peregrina

Fuco e Veiga fanse co primeiro posto do campionato de chave da Peregrina e o Bertamiráns gaña o torneo de fútbol "Café Don Budi"

No contexto das festas da Peregrina, celebradas durante a fin de semana en Bertamiráns, tivo lugar unha nova edición, como xa ven sendo habitual, do tradicional torneo de chave. O campionato gañouno a parella formada por Fuco e Veiga quedando nunha meritoria segunda posición o dúo formado por Lolo e Teresa. A concelleira de Asociacionismo, Igualdade, Muller e Xuventude, María González, e o concelleiro de Deportes, Tempo Libre e Voluntariado, Manuel Ferreiro, foron os encargados de entregar os trofeos aos campións e subcampións deste torneo de chave. A chave foi unha das actividades que se desenvolveu durante as festas da Peregrina pero non foi a única. O trofeo de fútbol “Café Don Budi”, que enfrontou ao Bertamiráns co Negreira solventouse coa vitoria do equipo local. Os concertos, a animación e o espectáculo realizado polas orquestras foron a garantía das festas que contaron cun alto nivel de asistencia.

Tras tres días de intensa festa en honra a Virxe da Peregrina, patroa do núcleo urbano de Bertamiráns, é preciso coller forzas. A oferta lúdica para estes días foi tan variada e rica en contidos que ningún amiense puido perderse este evento de referencia para todos os veciños e veciñas de Ames. Música folk, verbenas nocturnas ata altas horas da madrugada, gastronomía, atraccións para os nenos e nenas e o deporte constituíronse como os valores engadidos desta fin de semana.

En canto a oferta deportiva destacar unha nova edición do campionato de chave da Peregrina e os torneos futbolísticos celebrados o sábado e o domingo no campo municipal de Bertamiráns. O torneo de chave por parellas da Peregrina deu comezo o sábado ás cinco da tarde coa apertura das inscricións e co posterior inicio do campionato que contou coa participación de 10 parellas. Os vencedores desta nova edición do xogo popular foi a parella formada por Fuco e Veiga que, tras arredor de dúas horas intensas, alzáronse co primeiro posto superando coa súa precisión ao resto de participantes. Un campionato moi disputado que mantivo a emoción ata o último momento e no que se situou como subcampión o dúo formado por Lolo e Teresa. O concelleiro de Deportes, Tempo Libre e Voluntariado, Manuel Ferreiro, e a concelleira de Asociacionismo, Igualdade, Muller e Xuventude, María González, foron os encargados de entregar os trofeos á primeira e segunda parella clasificada.

O fútbol como rei actual do deporte non podía faltar nesta festividade. O sábado disputouse o partido entre o Bertamiráns B e o Villestro no que o segundo equipo do Bertamiráns conseguiu vencer aos visitantes cun resultado a favor de dous a cero. Ademais, con motivo das festas da Peregrina, o domingo ás 19:00 horas celebrouse o torneo de fútbol “Café Don Budi” no que o Bertamiráns se enfrontou ao Negreira. Un emocionante encontro que tivo que solventarse nos penaltis obtendo un resultado final a favor do equipo local de 4-3. O sábado os trofeos foron entregados polo concelleiro de Deportes, Tempo Libre e Voluntariado, Manuel Ferreiro, e o responsable do torneo Don Budi, mentres que o domingo o galardón entregouno o concelleiro de Deportes e Emilio Martínez Carballeira, concelleiro de Acción Parroquial e Rural.

Unha fin de semana onde o deporte se consolidou xunto coa música e a animación como a aposta principal de entretemento para os veciños e veciñas amienses. Bertamiráns converteuse durante toda a fin de semana nunha auténtica verbena na que o divertimento se consolidou como o obxectivo fundamental da comisión que, tras a celebración da festividade, agradece o nivel de participación aos veciños e veciñas e a colaboración do goberno municipal. As festas da Peregrina xa tocaron ao seu fin, agora, haberá que esperar ao ano que vén.

AMES - Comeza a funcionar a brigada de espazos públicos municipais

Comeza a funcionar a brigada de espazos públicos municipais

O Concello de Ames conta cunha nova brigada que se está encargando do mantemento, reparación e mellora dos espazos públicos do termo municipal de Ames, tanto no ámbito rural como nos principais núcleos urbanos, Milladoiro e Bertamiráns. Este grupo de traballo está formado por un carpinteiro, un albanel, un pintor e catro peóns. O servizo desta brigada está subvencionado pola Consellería de Traballo dentro da concesión de axudas correspondente ao Programa de cooperación das entidades locais para a contratación de persoas desempregadas posto en marcha pola Xunta de Galicia. A súa labor é manter en bo estado as instalacións e espazos públicos municipais (prazas, xardíns, etc.), así como limpar e reparar as beirarrúas e sinais das estradas da rede viaria do termo municipal. Na actualidade os operarios, que forman este grupo de traballo, atópanse en Bugallido pintando o interior da escola de educación infantil de Guimaráns.

O Concello de Ames ten un extensión aproximada de 79,60 quilómetros cadrados e conta con 116 núcleos de poboación repartidos en 11 parroquias. Dentro das entidades de poboación as máis importantes son os núcleos de Bertamiráns, na parroquia de Ortoño, e do Milladoiro, na parroquia de Biduído. Tanto nos núcleos rurais como nas localidades urbanas existen unha gran cantidade de espazos públicos nos que é preciso realizar periodicamente traballos de mantemento, reparación e mellora.

É por iso que dende a Concellaría de Vías, Obras, Parques e Xardíns préstaselle unha especial atención ao mantemento dos espazos públicos e da rede viaria municipal. Para executar estes traballos a Administración local conta, dende o pasado 1 de agosto, cunha nova brigada que se está encargando de arranxar e mellorar as instalacións dos espazos públicos municipais, así como as beirarrúas e a sinalización das estradas municipais. Este grupo de traballo encádrase dentro da Concellaría de Vías, Obras, Parques e Xardíns.

Normalmente, a brigada municipal de obras é a encargada de levar a cabo estas actuacións. Pero debido ao reducido número de efectivos dos que dispón non é posible levar a cabo un adecuado mantemento preventivo dos espazos públicos do concello, polo que normalmente as actividades céntranse nun mantemento correctivo e orientado a manter a seguridade e salubridade dos mesmos. A contratación destes traballadores dedicados ao mantemento destes espazos públicos reforzou a capacidade operativa da plantilla municipal, que se traduce nunha mellora xeral do estado dos devanditos espazos públicos.

Plan de traballo específico

A nova brigada está desenvolvendo un plan de traballo específico. As actuacións que realiza esta brigada comprenden o mantemento preventivo, reparación e mellora dos espazos públicos municipais, tanto dos núcleos rurais como dos núcleos urbanos do Milladoiro e Bertamiráns. Os traballos centráranse principalmente na mellora dos parques infantís, prazas públicas, beirarrúas e zonas de lecer do rural, tales como os campos da festa.

O Concello de Ames conta na actualidade con 25 parques infantís, dos que dous son de recente creación e os 23 restantes foron obxecto dunha intervención integral no ano 2006. Nestes 23 parques tan só se levaron a cabo pequenas reparacións que foron necesarias para manter a seguridade dos mesmos e labores de limpeza. Polo tanto, na actualidade é necesaria a realización de actuacións de mantemento tales como a retirada de herbas nos pavimentos de area; pintar a zona dos xogos infantís e o valado do peche dos mesmos; perfilado de camiños públicos do seu contorno e pintar o mobiliario urbano.

En canto ás prazas públicas, campos da festa e beirarrúas os traballos que se realizarán serán o pintado e reparación do mobiliario urbano, a reparación do pavimento en zonas nas que se atope deteriorado e o pintado de bordos.

Durante as primeiras semanas do mes de agosto, os carpinteiros e pintores estiveron reparando e pintando os bancos e a pérgola que se atopan na praza de Manuel Murguía, no Milladoiro. Na actualidade, tres dos operarios que forman este grupo de traballo atópanse en Bugallido pintando o interior da escola de educación infantil de Guimaráns.

A nova brigada foi contratada a través dunha subvención solicitada á Consellaría de Traballo e Benestar Social da Xunta de Galicia. A subvención, cuxo montante é de 86.259,60 euros, sufragará a contía dos salarios dos sete operarios. Esta axuda foi concedida a través do Programa de Cooperación das entidades locais para a contratación de traballadores desempregados. Os sete traballadores foron elixidos entre os propostos a Ames polo Servizo Galego de Contratación. A duración dos contratos dos sete operarios que forman esta brigada é de seis meses. Vai dende o 1 de agosto de 2011 ata o 31 de xaneiro de 2012.

PSOE AMES - Continúa o volantazo fiscal do goberno de Amor

Continúa o volantazo fiscal do goberno de Amor Unha vez mais Amor e o seu equipo anuncian novas subidas nas taxas municipais. Hai uns días fixeron público a suba do 100% nas escolas deportivas e hoxe nos sorprenden coa suba dos obradoiros de baile tradicional, gaita e percusión. E isto non remata aquí, parece que as subas continuarán nos vindeiros días. Os socialistas insistimos unha vez mais na deslealtade de Amor cos cidadáns. O PP mantivo sempre unha postura contraria a calquera suba das taxas. Durante a campaña electoral, aínda moi fresca, prometeron que non se subirían os servizos e todavía non levan 2 meses no goberno e a vida en Ames é cada vez máis cara. Apostan por cobrarlle aos cidadáns a súa falta de xestión. Se queren reducir gasto nestas actividades hai outro medios, outras alternativas sen recurrir á solución fácil de pasarlles a factura aos cidadáns. Estamos nun dos momentos máis duros da crise e Amor non se da por enterado. A xente que utiliza os obradoiros e as Escolas Deportivas do Concello son clases populares que o último que necesitan é que as actividades formativas municipais vaian pouco a pouco equiparándose no seu custe as realizadas por empresas privadas. A formación complementaria non pode supoñer un coste excesivo para o cidadán e un concello non pode entender que este tipo de actividades son un luxo e un custe insoportable Partido dos Socialistas de Galicia Grupo Municipal PSOE Ames Amor ten que poñerse a traballar, a xestionar un concello que ata hai dous meses funcionaba dun xeito modélico, dando bos servizos e reducindo a débeda herdada do PP. O aforro non pode ir orientado as actividades formativas, os socialistas sempre entendemos que son unha inversión, e como tal deben ser tratadas. Tampouco estamos de acordo con que a suba das taxas supoña unha mellora na calidade, xa que a calidade tamén está en non dar un servicio caro. Amor recibiu un concello saneado e con mais de 1’5 millóns de euros en caixa. Non ten motivos económicos para realizar esta política abusiva cos cidadáns. Ames, 13 de agosto de 2011. O Grupo Municipal Socialista de Ames.

BNG A ESTRADA - O Concello, gobernado polo PP, organiza un evento atlético onde se discrimina gravemente á muller

O Concello da Estrada, gobernado polo PP, organiza un evento atlético onde se discrimina gravemente á muller

Xosé Magariños esixe ao alcalde José López a inmediata equiparación dos premios entre homes e mulleres do I Memorial Manuel Bergueiro

A Estrada, 13 de agosto de 2011: O BNG da Estrada, a través do seu portavoz municipal, Xosé Magariños, esixe a inmediata rectificación dos premios da categoría absoluta do I Memorial Manuel Bergueiro. Este memorial de atletismo, que se levará a cabo o vindeiro 4 de setembro, contempla, tal e como se pode comprobar no regulamento do evento, uns premios para a categoría absoluta feminina de 100, 50 e 25 €, cando na categoría masculina é de 300, 200 e 100 euros para os tres primeiros clasificados e clasificadas.

Xosé Magariños considera que “isto é unha gravísima discriminación por cuestión de xénero, e polo tanto é absolutamente inadmisíbel, máxime cando o concello da Estrada conta cun plano de igualdade municipal, que neste caso estase a ignorar flagrantemente, e que en reiteradas ocasións se teñen aprobado mocións en contra da discriminación da muller, que agora quedan en papel mollado se non hai unha rectificación por parte do goberno municipal do Partido Popular”.

“Mais, se xa é grave que o Concello ignore os decretos, planos de igualdade e mocións que aproba o pleno da corporación municipal, o que xa non ten nome é que obvie o regulamento da RFEA que rixe para este tipo de eventos, que se menciona en diversos apartados das bases desta carreira, e que no artigo 17 di claramente que os premios serán iguais tanto para homes como para mulleres”, engade o portavoz municipal do BNG.

Xosé Magariños esixiulle ao Alcalde a “inmediata modificación das bases deste memorial de atletismo, equiparando a contía dos premios de homes e mulleres”. “De non facelo”, engadiu o portavoz do BNG, “o concello estará cometendo unha grave discriminación por cuestión de xénero, entre as que se atopan moitas corredoras do noso concello, onde hai dunha excelente canteira.” “Ademais”, engadiu Magariños, “o concello da Estrada ten un compromiso coa igualdade de xénero, e esta non só se circunscribe ao eido laboral, senón en todos os aspectos da vida, mesmo no deporte.”

O concelleiro do BNG, rematou dicindo que “agardo do alcalde unha rectificación dos premios deste memorial atlético; de non facelo, o BNG resérvase elevar esta queixa á Secretaría Xeral de Igualde da Xunta de Galiza para que tome as medidas oportunas”.

BRIÓN - O CONCELLO ABRE DESDE ESTE MARTES 16 DE AGOSTO AS INSCRICIÓNS PARA AS ACTIVIDADES CULTURAIS E DEPORTIVAS DE 2011-2012

O CONCELLO DE BRIÓN ABRE DESDE ESTE MARTES 16 DE AGOSTO AS INSCRICIÓNS PARA AS ACTIVIDADES CULTURAIS E DEPORTIVAS DE 2011-2012

A nova ordenanza fiscal establece descontos por participar en máis dunha actividade e a familias con dous ou máis fillos. Como novidade, este ano pódese pagar en dous prazos.

A programación dará comezo o 3 de outubro e contempla actividades extraescolares para nenos e nenas e diversas propostas para adultos

15 de agosto de 2011.- O Concello de Brión abre desde mañá martes 16 de agosto, e ata o 15 de setembro, o prazo para formalizar as inscricións nas actividades culturais e deportivas da súa programación para o novo cuso 2011-2012. O programa, que dará comezo a partir do 3 de outubro, inclúe propostas extraescolares para nenos e nenas e actividades deportivas e culturais para adultos.

Así, ofértase animación á lectura para os cativos de 3 a 6 anos. “Xogando cos contos” oferta dúas sesións semanais nas tardes dos mércores e os venres na biblioteca. Tamén se pode optar por obradoiros de informática, en distintos grupos de idade entre os 4 e os 12 anos, dous grupos do obradoiro de inglés para idades de 4 a 9 anos, e obradoiros de pintura para os de 6 a 12, con tres grupos de idade.

A escola de danza e música tradicional programa tamén clases de baile galego para os maiores de 3 anos, clases de pandeireta para os maiores de 4, e aprendizaxe de baile moderno tamén para maiores de 4 anos. En todos os casos está prevista a creación de grupos de idade para contar con clases máis homoxéneas e sacarlle o máximo rendemento aos cursos.

En canto ás escolas deportivas, a oferta do Concello de Brión abrangue predeporte (de 3 a 6 anos), judo, patinaxe, baloncesto, fútbol sala, fútbol-7, tenis (de 6 a 16 anos) e ximnasia rítmica (de 6 a13 anos).

Actividades de adultos

As demais actividades para maiores do Concello de Brión tamén presentan unha ampla gama onde escoller, con ximnasia de mantemento, pilates, aeróbic, baile galego, pandeireta e ioga. Todos estes cursos diríxense aos maiores de 16 anos. Está previsto distribuír ao alumnado en grupos de iniciación e de perfeccionamento, atendendo ao nivel de preferencia que indiquen os veciños no momento de inscribirse.

Bonificacións e reduccións nas cotas

O Concello contempla diversas bonificacións e reduccións nas cotas que se deben abonar para participar nestas actividades. Deste xeito, quen se inscriban en máis dunha actividade de escolas deportivas, escola de danza e música tradicional e outras actividades culturais para menores só pagaran integramente a primeira actividade (a de maior importe) e obterán unha bonificación do 50% nas restantes.

Do mesmo xeito, as familias con dous fillos e as consideradas numerosas terá unha bonificación do 50% no segundo fillo e do 100% (gratuidade) no terceiro e seguintes. No caso de que o segundo fillo se inscriba nunha segunda actividade, esta bonificación do 50% non será acumulable á bonificación do 50% por participar en máis dunha proposta. É dicir, non son compatibles as bonificacións de familias de dous fillos ou numerosas coas de inscrición en máis dunha actividade.

No que respecta ás actividades deportivas para adultos, ao inscribirse en máis dunha opción aplícase un desconto do 50% na segunda e restantes actividades, pagando integramente só a primeira das escollidas.

Pago en prazos

Como novidade este curso, e atendendo a situación económica, o Concello decidiu habilitar un sistema que permite o pago fraccionado das actividades, cun prazo a abonar no mes de setembro e o seguinte en febreiro de 2012.

OROSO - O CONCELLO MANTÉN ABERTO ATA O 1 DE SETEMBRO O PRAZO DE INSCRICIÓN DO PROGRAMA “BOS DÍAS COLE” PARA O CURSO 2011/12

O CONCELLO DE OROSO MANTÉN ABERTO ATA O 1 DE SETEMBRO O PRAZO DE INSCRICIÓN DO PROGRAMA “BOS DÍAS COLE” PARA O CURSO 2011/12

O concelleiro de Benestar, Igualdade, Cultura e Ensino, Antonio Leira, sinala que “o servizo adáptase ás necesidades reais dos pais”

13 de agosto de 2011.- O Concello de Oroso mantén aberto ata o 1 de setembro o prazo de inscrición no programa “Bos Días Cole”, un servizo de gardería e almorzo dirixido a rapaces e rapazas de entre 3 e 12 anos de idade que terá lugar no CEIP de Sigüeiro durante o curso escolar 2011-2012. As inscricións deben formalizarse nas oficinas do Centro Cultural Fernando Casas e Novoa de Sigüeiro, entre as 9 e as 14 horas.

O programa “Bos días cole” é unha iniciativa coa que o Concello de Oroso busca facilitarlles aos pais e nais do municipio a conciliación da vida laboral e familiar, xa que lles permite deixar aos cativos nas instalacións do CEIP de Sigüeiro dende as 7:30 horas ata o comezo das clases. Uns pequenos que pasan esas horas da mañá con obradoiros de manualidades, talleres de lectura de contos e diversos xogos.

“O servizo é o que se adapta ás necesidades reais dos pais”, explica o concelleiro de Familia, Benestar, Igualdade, Cultura e Ensino, Antonio Leira, “xa que poden elixir tanto a hora á que deixan aos pequenos como os días que empregan este servizo, ou mesmo deixalos ocasionalmente”. Así, o Concello de Oroso, coa colaboración da Deputación da Coruña, ofrece diversas alternativas aos pais e nais do municipio para que poidan iniciar a súa xornada laboral coa tranquilidade de que os seus fillos quedan ben atendidos ata a hora do inicio das clases.

Documentación

Para presentar as solicitudes de inscrición, cómpre achegar a fotocopia da tarxeta sanitaria, a carta de domiciliación e o modelo de impreso de solicitude debidamente cuberto. Toda a documentación ten que presentarse no rexistro municipal, xa que a reserva de praza será por orde de presentación no rexistro.

OROSO - O CONCELLO PREPARA O CEIP, A GARDERÍA E AS ESCOLAS UNITARIAS PARA O CURSO 2011-2012

O CONCELLO DE OROSO PREPARA O CEIP, A GARDERÍA E AS ESCOLAS UNITARIAS PARA O CURSO 2011-2012

Aproveitando as vacacións de verán, os operarios municipais realizan traballos de mantemento interior e exterior, pintura, e reparación e sustitución de elementos deteriorados

12 de agosto de 2011.- O Concello de Oroso ultima estes días os traballos de adecuación dos centros escolares do municipio para o vindeiro curso 2011-2012. Os operarios municipais realizaron durante as últimas semanas múltiples tarefas de mantemento interior e exterior, pintura e reparación e sustitución de elementos deteriorados no Colexio de Infantil e Primaria de Sigüeiro, na escola infantil A Ulloa e nas escolas unitarias de Senra, Vilacide, Deixebre e Trasmonte.

Deste xeito, o goberno municipal aproveita as vacacións escolares do verán para efectuar unha completa posta ao día das infraestruturas educativas, sen afectar ao normal desenvolvemento das clases a partir de setembro e para que pais e nais, docentes e sobre todo o alumnado atope as escolas nas mellores condicións posibles.

O concelleiro de Infraestruturas, Obras e Servizos, e alcalde en funcións, Eduardo Veiras, explica que os traballos que se están acometendo “son necesidades que nos trasladou a comunidade educativa, que o propio Concello observou ao longo do curso, e que tamén detectamos a comezos do verán despois dunha inspección a fondo do estado de todos os centros”.

Traballos realizados

Así, as principais tarefas que se están realizando son as de illamento e de pintura, tanto no interior como no exterior dos edificios, para evitar a aparición de humidades, eliminar algunhas que comezaban a verse e adecentar esteticamente os colexios. Os operarios tamén se encargaron de pequenas reparacións das instalacións eléctricas e de fontanería, sustituiron elementos deteriorados do mobiliario e, en xeral, correxiron calquera desperfecto observado.

As melloras trasládanse tamén ás zonas exteriores de recreo dos colexios. Nelas, reparáronse os elementos de xogo que o precisaban, efectuáronse traballos de mantemento dos espazos verdes e axardinados, e repúxose a area de varios espazos de xogo.

AMES - O Concello modifica o modelo de xestión do obradoiro de baile tradicional, gaita e percusión para sacarlle maior rendibilidade

O Concello de Ames modifica o modelo de xestión do obradoiro de baile tradicional, gaita e percusión para sacarlle maior rendibilidade

O goberno local firmará un convenio con asociacións municipais para que xestionen o obradoiro de baile tradicional, gaita e percusión de tal forma que este obradoiro se imparta en mellores condicións

Con este convenio o concello aforrará máis de 7.000 euros

Ames, 12 de agosto de 2011. O Concello de Ames firmará un convenio con asociacións municipais para que xestionen o obradoiro de baile tradicional, gaita e percusión de tal forma que este obradoiro se imparta en mellores condicións que en anos anteriores. Outra das novidades é que o custe da actividade terá unha pequena suba. Cando se crearon estes obradoiros a intención era que se camiñase cara ao autofinanciamento dos mesmos, deste xeito, e coa suba que experimentarán este ano, daráselle cumprimento ao que figura nas bases dos obradoiros.

Coa modificación do sistema de xestión dos obradoiros búscase que o servizo se preste en mellores condicións que anteriormente, así coma unha maior eficiencia económica. A empresa que xestionaba ata o de agora as clases de baile, gaita e percusión facturou 25.382 euros dende outubro de 2010 a maio de 2011, polo que esta actividade lle saía ao concello en 173,6 euros por persoa. Polo tanto ata o de agora o Concello poñendo a cantidade de 141,6 euros por alumno, gastou 21.097 euros, mentres que os 134 asistentes ao obradoiro aportaron 4.288 euros. O déficit que soportaba o concello con esta actividade era de máis de 20.000 euros. Co convenio que vai firmar o concello aforraranse como mínimo 7.000 euros.

O concelleiro de Cultura, Alfonso Rey, explica que “non se trata en ningún caso de privatizar o servizo senón de ofertar un servizo dun xeito máis rendible e máis útil para os cidadáns amienses”. Alfonso Rey achaca que co anterior sistema os obradoiros non foron capaces de dotar ao Concello de Ames dun grupo municipal de gaitas que puidera actuar en actos e festas do municipio. O que se pretende agora é que as persoas que acudan a este servizo poidan formar un grupo que actúe en diferentes eventos municipais se así o desexan.

Alfonso Rey aclara ademais que non se elimina o servizo senón que se muda o modelo de xestión, esta iniciativa enmárcase dentro dunha serie de medidas que se están adoptando dende a Administración local como é o caso do cambio dunha nave industrial que se empregaba no Milladoiro para o uso deportivo, pola reubicación dos clubs e equipos en instalacións mellor acondicionadas para a práctica do deporte e cun custe moi reducido para o Concello.

Neste obradoiro seguirase impartindo baile tradicional, gaita e percusión coma se viña facendo ata o de agora.

SILLEDA - Ofelia Rey falseou as contas de 2010 para que o resultado da liquidación fose positivo

Ofelia Rey falseou as contas de 2010 para que o resultado da liquidación fose positivo

-Facturas de caixón e débedas de imposible cobro maquillan o resultado final do exercicio

-O informe de Intervención é claro e contundente: “o remanente que reflicte a liquidación non é real”, reza

-Non se contabilizaron pagos pendentes por valor de 720.000, co que se desvirtua o resultado final

Silleda, 12 de agosto de 2011. O goberno municipal de Silleda deu hoxe a coñecer o resultado da liquidación do exercicio 2010, que arroxa unhas cifras totalmente desvirtuadas como demostra o informe de Intervención ao respecto. O resultado orzamentario arroxa un saldo de + 353.000 euros porque Ofelia Rey “olvidou” contabilizar facturas por máis de 720.000 euros. De terse contabilizadas estas facturas, que pasaron directamente aos xa tristemente famosos caixóns de Silleda, o resultado sería de -336.000 euros.

A alcaldesa de Silleda, Paula Fernández Pena, analizou hoxe en rolda de prensa o informe de Intervención, que advirte claramente deste e outros "erros". Na súa intervención centrouse na débeda. “O anterior goberno, utilizando un asesor externo que  cobrou 6000 euros para deseñar argucias e disimular as miserias económicas, pretende facernos crer que correxiron a débeda municipal, cando en realidade o que fixeron foi case duplicala". Fernández Pena analizou o dato do remanente de tesourería que pasou de -693.000 euros no 2009 a +794.000€ en 2010, apoiándose para elo no informe de Intervención, que di textualmente que "esta mellora radical do remanente de tesourería non responde a unha mellora real da situación económica e financieira do Concello”. A alcaldesa explicou as razóns de esta teórica mellora: "Sen ningún pudor  decidiron que o Concello de Silleda iba a ingresar 1.084.000 euros  ata agora

considerados como de imposible cobro” conseguindo así un aumento tan inmediato como irreal nos ingresos que maquilla as contas.

Segundo a alcaldesa, de terse contabilizado correctamente as facturas, e se non houberan inflado os  ingresos con cartos que non se van a cobrar, o resultado do remanente de tesourería sería de -1.213.806,94 euros, “o que supón un retroceso nas políticas económicas de difícil recuperación", engade.

En canto ao gasto corrente,  a liquidación establece que houbo unha reducción do 6,71%,  cando en realidade, se se contabilizaran os 720.000€ mencionados (e que corresponden a gastos correntes e servicios) se reflexaría "un incremento real do 34,50%". A alcaldesa di que o goberno de Rey "non deu contabilizado estes cartos porque gastaron moito máis do que había no presuposto". Esto demostra a falla de rigor xa denunciada dende a oposición na redacción do orzamento. Así tal e como se advirte no informe de Intervención, foi necesario realizar numerosas transferencias de crédito (cambio de partidas), “o que demostra que o presuposto estaba mal plantexado, como xa advertimos no seu día, e que o tiveron que retocar durante todo o exercicio.

Ademais, realizáronse ata 26 xeracións de crédito, correspondentes a axudas de outras Administracións. Estas ascenden en total a 1.682.000 euros. “Se temos en conta que 1 millón de euros desta cantidade correspondía ao Plan E, queda claro que da Xunta e a Deputación só viñeron 682.000 euros, co que non cadran as cifras dadas nas súas valoracións sobre inversións millonarias para Silleda”, engade a rexedora.

O mesmo acontece no apartado de persoal, onde os datos non reflicten a realidade. A liquidación di que se aforrou un 18,49%  neste apartado ao pasar de 2,7 no 2009 a 2,2 millóns de euros en 2010. Pero o informe de Intervención aclara que no ano 2009 un total de 473.000 euros  corresponden ao Obradoiro de Emprego sufragado pola Xunta. Tamén hai que ter en conta que no 2010 produxose unha reducción salarial dun 5% a nivel estatal para os funcionarios.  “Polo tanto, en canto ao gasto de persoal non houbo reducción senon máis ben o contrario”, destaca Fernández Pena.
O apartado de ingresos tamén arroxa comparativas que deixan en evidencia a xestión do anterior goberno non adscrito. Así, o informe determina que durante a etapa de goberno socialista a previsión inicial de ingresos aumentou en 2.644.000 euros,  mentres, a previsión inicial de ingresos feita polos non adscritos só se incrementou en 1.719.000 €.

Outro dato curioso refírese aos dereitos recoñecidos netos, que se rebaixaron respecto ao ano 2009, mentres que os impostos directos se incrementaron nun 6,12% ; os indirectos nun 38,35% e as taxas nun 36,46%. “Ofelia Rey cobroulles aos veciños de Silleda duas taxas de lixo nun ano,  mentres que as empresas que operan no noso territorio non lles pasaba o recibo”, sinala a alcaldesa.

Potenciar ingresos propios

Nas súas conclusións, o departamento de Intervención alude á excesiva dependencia do Concello das transferencias doutras Administracións, que suponen o 64% dos ingresos, fronte ao 36% de recursos propios. É por iso que Intevención recomenda potenciar medidas para a recadación de ingresos propios e que as taxas sirvan para cubrir a prestación de servizos. “Dende este goberno municipal seguiremos traballando na posta en marcha de ordenanzas para regular os servizos municipais”, explica a alcaldesa.

Así mesmo, Paula Fernández apuntou que se está a evaluar, coa elaboración da Relación de Postos de Traballo (RPT) do Concello a creación dunha oficina municipal de recadación.

Ademais, á vista do informe de Intervención considérase necesario a depuración tanto de obrigas e os dereitos recoñecidos de cobro, anteriores ao ano 2002, xa que existen “indicios razoables de que poida haber posibles duplicidade e erros, ademais de ser posible que existan dereitos e obrigas prescritos” , di o informe.

Do mesmo xeito, o informe recomenda adoptar medidas urxentes de control de gasto, aparte de mellorar os ingresos.

AMES – FESTAS BIDUIDO

A veciñanza de Biduído celebra as súas festas patronais durante esta semana

Os días 15, 16 e 17 de agosto celebrase na parroquia de Biduído as festas en honra a Nosa Señora, festividade que se organiza cada ano nesta localidade amiense. Co remate das festas da Peregrina en Bertamiráns, os e as amienses poden gozar durante a próxima semana doutro evento festivo máis, as festas de Biduído. Unhas festas onde haberá música para bailar e divertirse, así como varios actos relixiosos.

Nos tres días que dura esta festividade celebrarase unha misa solemne e posteriormente unha procesión na honra da Nosa Señora. O luns 15 de agosto, tras os festexos relixiosos terá lugar unha sesión vermouth a cargo da orquestra Soprano, grupo de música que se encargará tamén pola noite de encher de luces e son a primeira xornada das festas.

O martes a sesión vermouth correrá a cargo do Trío Alba que pretende que os veciños de Biduído non deixen de danzar tanto na sesión da mañá como tamén durante a verbena nocturna. Por outra banda, o mércores 17 de agosto rematarán as festas de Biduído coa actuación final da orquestra Naranja, que co seu repertorio musical quere que todas aquelas persoas que asistan as festas gocen e se entreteñan como nunca.

Dende a comisión de festas de Biduído agradecen a participación de todos aqueles veciños e empresas que coa súa colaboración fixeron posible a realización das festas e invitan a que os e as amienses non falten “ningún día” a este evento festivo no que o divertimento estará asegurado.

TEO - CONVÓCASE UN PLENO EXTRAORDINARIO PARA A APROBACIÓN DO PROXECTO DE AMPLIACIÓN DA ETAP E O COFINANCIAMENTO DUN 30% DA OBRA

CONVÓCASE UN PLENO EXTRAORDINARIO PARA A APROBACIÓN DO PROXECTO DE AMPLIACIÓN DA ETAP E O COFINANCIAMENTO DUN 30% DA OBRA

· O Concello deberá achegar algo máis de 300.000 euros en dúas anualidades correspondentes ó 2012 e ó 2013

12 de agosto de 2011. O alcalde vén de convocar un Pleno extraordinario para o próximo día 16 de agosto ás 11 horas. Nesta sesión debe aprobarse o proxecto de ampliación da ETAP de Pontevea (Teo), que subministra auga potable a toda a rede municipal. Ademais da aprobación do proxecto, que será contratado e executado pola administración autonómica, a Xunta de Galicia tamén solicitou o cofinanciamento da obra por parte do Concello, asunto que debe aprobar o Pleno.

A urxencia desta obra motivou esta convocatoria nun mes no que non hai previsto a convocatoria de plenos ordinarios. O punto máis importante será, sen dúbida, a achega económica municipal. O escrito de Augas de Galicia, remitido ó Concello a pasada semana, establece que a achega municipal debe ser de 304.309 euros, correspondente ó 30% do orzamento de execución da obra. A achega municipal imputarase ás anualidades do 2012 e do 2013 na mesma porcentaxe cada ano, 152.154 euros.

A obra prevista permitirá dobrar a capacidade de potabilización da planta, para o que se ampliarán as instalacións da Estación de Tratamento de Auga Potables, ademais de ampliar os bombeos na captación e na saída da planta. Os problemas de infradimensionamento da estación viñan provocando problemas puntuais de abastecemento na época estival e problemas de turbidez noutras épocas, sobre todo nos tramos de final de rede.

Ademais deste punto principal, incluirase tamén na orde do día unha Proposta da Alcaldía cos festivos locais de 2012 e unha solicitude do Partido Popular de adopción de medidas por mor do proceso federativo do ciclista Ezequiel Mosquera.

A orde do día ten os seguintes puntos:

1. Ditame da Proposta da Alcaldía de festivos locais 2012.
2. Ditame da Proposta da Alcaldía da ampliación da ETAP de Teo.

Ditame da solicitude do Partido Popular de adopción de medidas por mor do proceso federativo do ciclista Ezequiel Mosquera

AMES - O equipo de Nova Unión Galicia de Brazilian Jiu-Jitsu gaña tres medallas de ouro no Campionato Ibérico

O equipo de Nova Unión Galicia de Brazilian Jiu-Jitsu gaña tres medallas de ouro no Campionato Ibérico

O equipo de Nova Unión Galicia de Brazilian Jiu-Jitsu do ximnasio Sport Unlimited do Concello de Ames, conseguiu tres medallas de ouro no Campionato Ibérico, celebrado no pasado mes de xullo en Lisboa. Ademais das tres medallas de ouro, quedaron no sétimo posto na clasificación final por equipos. O Brazilian Jiu-Jitsu é unha arte marcial, deporte ou forma de defensa persoal que se centra nas técnicas que se orixinan no jiu-jitsu xaponés, e se derivan do judo, tal e como era practicado en Xapón no século XIX.

O equipo de Nova Unión Galicia de Brazilian Jiu-Jitsu do ximnasio Sport Unlimited, veciños do Concello de Ames e composto por tres deportistas liderados polo seu adestrador, o campión do Brasil Adriano Bellumath, participaron o pasado 16 de xullo no Campionato Ibérico (España-Portugal) de Brazilian Jiu-Jitsu celebrado en Lisboa. En total obtiveron tres medallas de ouro (tres de tres) entre case 200 competidores de ambos países participantes. Ademais, quedaron na sétima posición na clasificación final por equipos. Os campión foron Víctor Varela Uzal, na modalidade sénior - lixeiro, Jaime Garaboa Villaverde, na modalidade sénior – semipesado, e Miguel Vila Ageitos, en sénior - superpesado.

O Brazilian Jiu-Jitsu

O Jiu-Jitsu brasileiro, coñecido internacionalmente pola súa tradución ao inglés, Brazilian Jiu-Jitsu, é unha arte marcial, deporte ou forma de defensa persoal que se centra nas técnicas que orixinan no jiu-jitsu xaponés, e se derivan do judo, tal e como era practicado en Xapón no século XIX, aínda que mellorado sobre todo na loita corpo a corpo no chan.

Nos seus inicios foi coñecido como Gracie Jiu-Jitsu (debido ao apelido da familia que o desenrolou, os cales tiñan antecedentes escoceses) e se especializaba na loita que se practicaba no chan, sendo o obxectivo gañar unha posición de control contra o opoñente no chan e a partir dela utilizar luxacións nas articulacións (nocellos, ombros, cervicais, xeonllos) ou estrangulacións (principalmente as sanguíneas) para forzar ao opoñente a renderse, deixándoo nunha situación hipotética de violencia extrema, fora de combate ou inconsciente dependendo na técnica de sometemento usada polo practicante.

Segundo o seu fundador, Hélio Gracie: “Deus creou aos homes, uns fortes e outros menos. O Jiu-Jitsu iguala ou minimiza esa disparidade de diferenza de forza e/ou altura unha vez que un opoñente de menos envergadura ou peso decide proxectar ao seu adversario levándoo ao chan para desde aí utilizar algunha técnica de Jiu-Jitsu”. Actualmente este deporte atravesa un período de expansión en todo o mundo que non rexistra precedentes grazas a eficacia da súa técnica.

AMES – A OMIX NAS REDES SOCIAIS

A Concelleira de Xuventude, María González, convida á cidadanía a trasladarlle as súas inquedanzas ao Concello tamén a través das redes sociais coma o facebook e o tuenti da OMIX

Ames, 09 de agosto de 2011. Con motivo da celebración do día Internacional da Xuventude o próximo venres día 12 de agosto, o concello de Ames, e especialmente a concellería de Asociacionismo, Igualdade, Muller e Xuventude convida a tódolos mozos e mozas, así coma aquelas persoas que así o desexen, a achegarse ao Concello para transmitir as súas inquedanzas e proxectos. A Concelleira de Xuventude, María González, convida aos mozos e mozas a transladarlle as súas inquedanzas ao Concello tamén a través das redes sociais coma o facebook e o tuenti da OMIX de Ames.

Dende a concellería que dirixe, María González quere por en valor a promoción e participación dos mozos na vida municipal e para elo lembra que Ames dispón da Oficina Municipal de Información Xuvenil (OMIX). “É importante que os amienses saiban que sempre serán escoitados e que é a nosa responsabilidade adecuar a oferta ao que eles demanden”.

Dos 29.338 habitantes censados en Ames, 9.143 son persoas con idades comprendidas entre os 12 e os 30 anos polo que os datos do padrón indícannos que o 31,60%, do total de habitantes son mozos e mozas, o cal supón unha cantidade de persoas xoves moi importante e reforza o feito de que Ames é un dos concellos de Galicia cun maior crecemento demográfico, duplicando nos últimos anos por 20 a súa poboación.

Atención ao público da OMIX de Ames

A OMIX está ubicada na Casa do Concello en Bertamiráns, os luns, mércores e xoves e na casa da cultura de Milladoiro os martes e os venres. Esta oficina ofrece o servizo de información, asesoramento e documentación especializado en temas de interese para os mozos e mozas en formación, ocio, axudas e subvencións, voluntariado, asociacionismo etc. Ademais a Oficina Municipal de Información Xuvenil leva a cabo tamén a organización e xestión de programas de actividades no concello, a tramitación do carné xove, e información sobre como poder obter outros tipos de carnés que permiten gozar de vantaxes e descontos en moitos bens e servizos.

Na OMIX tamén se pode recabar información sobre programas da Dirección Xeral de Xuventude e Voluntariado como por exemplo “xuventur”, “xuventude en Acción” e “Campaña de verán”. Ademais a OMIX está conectada ás redes sociais para ser máis accesible a tódolos cidadáns e para adecuarse ás prácticas de comunicación que teñen hoxe en día os mozos e mozas.

BNG A ESTRADA - A Estrada leva perdidos dous meses por mor dun goberno municipal lento na xestión e na toma de decisións

A Estrada leva perdidos dous meses por mor dun goberno municipal lento na xestión e na toma de decisións

A Estrada, 11 de agosto de 2011: O Consello Local do BNG reuniuse o pasado martes, entre outros asuntos, para analizar a inactividade do goberno local e as últimas declaracións do alcalde da Estrada, José López, a respecto do suposta liquidación negativa do orzamento de 2011 e das facturas pendentes de pago do ano pasado, que afectaban ambas á área da responsabilidade do BNG no goberno do anterior mandato.

Por unha banda o BNG reafirma as declaracións feitas polo seu portavoz municipal, Xosé Magariños, no sentido de que se trata dunha estratexia puramente electoralista para desacreditar a xestión de calquera goberno que non estea presidido polo Partido Popular; pero tamén para estender a psicose da débeda pública e xustificar así todo tipo de recortes sociais e de subida de impostos, e sobre todo para non facer todas aquelas fastuosas promesas electorais que fixo o PP durante a campaña electoral das municipais.

Mais por outra banda, o BNG considera que o Alcalde, entre declaración e declaración está a ser profundamente irresponsábel ao dar unha imaxe do concello que non se corresponde coa realidade, xa que dá sensación de que A Estrada está en bancarrota e isto é rotundamente falso.

Coa prudencia de quen descoñece exactamente cal vai a ser o montante final da liquidación do orzamento de 2010, si é conveniente que os veciños e veciñas coñezan que unha das facturas de maior importe, a de Fenosa, fora devolta no seu momento pola ex-concelleira de facenda Maribel Ruíz Ferro, por seren esta incorrecta; polo tanto, calquera retraso no pago desta factura só é imputábel á empresa por non remitir en tempo e forma a citada factura.

En todo caso, o máis lamentábel de todo, é que A Estrada leva perdidos dous meses por mor dun goberno municipal lento na xestión e na toma de decisións. A estas alturas a liquidación do orzamento de 2010 xa tiña que estar feita e as facturas pagadas, pero o novo goberno municipal manéxase mellor nos medios de comunicación que nos despachos.

Con todo, o da liquidación do orzamento de 2010 é unha mostra máis da lentitude deste goberno municipal, pero o BNG da Estrada non quere esquecer unha vez máis o PXOM; segundo palabras do alcalde José Lopez, o Plan Xeral sería unha prioridade, pero dous meses despois da toma de posesión, á parte das declaracións aos medios, oficialmente nada novo se sabe sobre o principal problema que ten o concello da Estrada.