Traballadores concello de Ames – festival de apoio os servizos públicos

Organízase un festival de apoio aos servizos públicos de Ames

Música, poesía, contacontos, monólogos e comunicados. O Comité de Empresa do Concello de Ames e os nove afectados pola proposta de despedimentos presentada polo goberno municipal organizan para o venres, 27 de xaneiro, ás 20:15 na Casa da Cultura de Bertamiráns un festival de apoio aos servizos públicos de Ames. Con este acto lúdico, os organizadores queren dar a coñecer á cidadania a proposta de peche dos servizos municipais de Normalización Lingüística, Animación á lectura, Brigada de Medio Ambiente e Radio Municipal. Ademais preténdese que sirva para que o goberno de Ames reconsidere a proposta de despedimentos que presentou o pasado 15 de novembro. O acto estará presentado por Nazaret López e contará coa participación da cantautora María Xosé Silvar, Sés, que estará acompañada á guitarra por Xabier Olite, o grupo Som do Galpom, o monologuista Celso Sanmartín, o actor Federico Pérez, os escritores Carlos Negro e Séchu Sende, as contacontos Divina Fernández, Bibiana Calvo, o xornalista e actor Manel Pardo, Alba Nogueira, Nel Vidal (CTNL), Rosa Aneiros (Colexio de Xornalistas), Enrique Sanfiz (Sonradiofusión) e Santiago Montes (Sindicato de Xornalistas de Galicia). Todas as persoas que colaboran no acto fanno de xeito desinteresado e de balde. A entrada será gratuíta. Os organizadores animan a toda a veciñanza amiense e da comarca a que acuda a este festival para expresarlle ao goberno de Ames a súa oposición ás medidas anunciadas de peche de servizos e despedimento de traballadores.

O Comité de Empresa do Concello de Ames e os nove traballadores/as afectados pola proposta de despedimentos presentada polo goberno municipal están traballando de maneira conxunta para organizar un festival de apoio aos servizos públicos de Ames. Cómpre destacar que todas as persoas que participarán neste acto farano de xeito desinteresado e non cobrarán nada. Isto é un mostra clara de compromiso e apoio cos servizos públicos de Ames de diferentes colectivos do ámbito cultural, da comunicación, da lingua, do medio e doutros sectores da sociedade galega.

A través deste festival preténdese facer reflexionar ao goberno municipal co obxectivo de que retiren a proposta de despedimentos que implica o peche de varios servizos municipais como son a radio municipal (Ames Radio), o Servizo de Normalización Lingüística de Ames, a brigada medio ambiental e o Servizo de animación á lectura das bibliotecas municipais. O evento será totalmente gratuíto polo que se anima a toda a veciñanza amesán e da comarca a que acuda a este festival para expresarlle ao goberno de Ames a súa oposición a estas medidas.

O acto estará conducido por Nazaret López. O cartel do festival está encabezado pola artista Sés. María Xosé Silvar lidera Sés con unha impoñente voz. Formada na música e en baile tradicional, María Xosé Silvar é profesora e licenciada en Filoloxía Galega e Antropoloxía Social. En 2007 creou xunto a tres amigos o grupo Chámalle Xis!, un dos grupos revelación daquel ano e un dos gañadores do concurso Acoruña Son, apadriñado por Santiago Auserón. Despois de máis de 30 concertos por toda Galicia con Chámalle Xis! e despois de colaborar con grupos como Zënzar, AiraPro produce o primeiro álbum de María Xosé Silvar (ou Sés, como se lle chama na casa), con temas propios e acompañada dunha banda de músicos profesionais. Un proxecto en feminino no que o carácter, a forza e a creatividade de María Xosé rompe o molde da muller na música galega. En xullo de 2011 edítase o primeiro disco de banda, titulado Admirando a condición que é o que se presentará en directo o próximo 27 de xaneiro na Casa da Cultura de Bertamiráns. No Festival, Sés estará acompañada á guitarra por Xabier Olite.

A parte musical do Festival completan os amesáns Som do Galpom. Vinculados especialmente á emisora municipal de Ames á que sempre consideraron como o seu “primeiro fogar mediático”, os da Moniña, que mesturan reggae, funky e rap cunha sólida formación musical e unhas letras intelixentes, gañaron no 2008 o Foundation Reggae Festival, e despois o II Certame Nsaio no Camiño. Despois dun primeiro EP que levaba por título o propio nome do grupo, en marzo de 2009 publicouse o seu primeiro disco, En Terra de Ninguém.

O ámbito cultural estará representado por Carlos Negro, poeta que reside en Ames e profesor de lingua e literatura galega. Ademais de participar no 2003 proxecto colectivo "Negra sombra", unha intervención poética contra a marea negra, ten colaborado en diversas revistas de literatura e poesía, entre as que se encontran Olisbos e Dorna.

Outros dos escritores galegos que participarán no festival será Xosé Luís González Sende, máis coñecido como Séchu Sende. Iniciouse como poeta vinculado ao Colectivo Poético Serán Vencello, formando parte da xeración dos 90 e que máis tarde se revelou tamén como un dos narradores de principios do século XXI. Licenciado en Filoloxia Galego-Portuguesa, como sociolingüista foi cofundador da Cooperativa Tagen Ata, Língua e Comunicación. En 2003 gañou o Premio Blanco Amor coa novela Orixe. O seu libro de conxunto de relatos curtos Made in Galiza (2007) recibiu o Premio Anxel Casal ao Mellor Libro do Ano, concedido pola Asociación de Editores Galegos. No ano 2010 publicou o libro ilustrado Animais, un conxunto de textos e deseños que forman un himno á vida natural e unha denuncia do progreso mal entendido, desde múltiples rexistros, desde a ironía e o humor até o surrealismo.

Tamén haberá contacontos. Divina Fernández e Bibiana Calvo, traballadoras municipais do servizo de animación á lectura da Biblioteca municipal e que se atopan incluídas na proposta de despedimentos presentada polo goberno municipal, realizarán varios contacontos.

O actor e humorista Federico Pérez, coñecido entre outras cousas polo seu papel de Josito bedel na serie da Televisión de Galicia “Padre Casares” e o xornalista e actor Manel Pardo, ámbolos dous veciños de Ames farán sendos monólogos que axudarán ao público a entender a realidade do conflito. Tamén participará no Festival o contador e poeta Celso Sanmartín, autor, entre outras obras de “O tigre das cenorias”, “Propiamente son captivo” e “Gratas e boas novas”.

O Festival contará ademais coa presenza de diferentes institucións que virán a dar o seu apoio aos servizos públicos de Ames entre os que se atopan Alba Nogueira, profesora de dereito administrativo da USC e última premiada, xunto co Concello de Ames, no Premio Lois Peña Novo, Nel Vidal, presidente da Coordinadora de Traballadores/as de Normalización da Lingua, Rosa Aneiros do Colexio Oficial de Xornalistas, Henrique Sanfiz, secretario de Sonradiofusión, Asociación de amizade coa Radio Local e Santiago Montes, secretario xeral do Sindicato de Xornalistas de Galicia.

Oroso – animación a lectura agora nas mañáns dos sábados

O CONCELLO DE OROSO CAMBIA ÁS MAÑÁS DO SÁBADO O SEU PROGRAMA DE ANIMACIÓN Á LECTURA PARA FACILITAR A ASISTENCIA DOS PEQUENOS

Os obradoiros gratuitos terán lugar na biblioteca municipal de Sigüeiro e haberá que anotarse previamente na propia biblioteca

20 de xaneiro de 2012.- A biblioteca municipal de Sigüeiro inicia este mes de xaneiro unha nova edición do seu programa de animación á lectura, dirixido a nenos de entre 5 e 12 anos de idade. Un programa que este ano presenta dúas novidades: por unha banda apóstase definitivamente pola realización de obradoiros no canto de sesións de contacontos e, por outra, o horario trasládase das tardes dos mércores ás mañás dos sábados, ás 11:00 horas.

O concelleiro de Cultura, Antonio Leira, explica que “o cambio de horario débese a que pretendemos facilitar unha maior participación dos pequenos e evitar que o horario de tarde se solapase con outras actividades deportivas ou de conciliación familiar postas en marcha no último trimestre, como as Tardes Divertidas”. Ademais, o cambio a un horario matinal favorecerá a participación dun maior número de veciños, xa que será unha opción na que deixar aos cativos mentres se fan as compras da fin de semana ou se acude ao mercadiño semanal de Sigüeiro.

O cambio dos contacontos polos obradoiros de animación á lectura débese á propia dinámica dos asistentes, que prefiren sesións que combinen a animación á lectura cunha actividade práctica e relacionada coa época do ano na que se realiza, como os obradoiros de Entroido, San Valentín, do Día do Pai, etc

Programa de actividades

O programa dos Obradoiros de Animación á Lectura do Concello de Oroso comezará o vindeiro sábado 21 de xaneiro cun obradoiro de reciclaxe, seguido dun taller de títeres o sábado 28 de xaneiro. O mes de febreiro comezará con dous obradoiros xa tradicionais: un taller de San Valentín e un obradoiro de entroido, un dos máis concorridos do ano e no que os pequenos aprenden a facerse os seus propios disfraces.

Para o mes de marzo están programados outros tres obradoiros: un taller con baetas (3 de marzo), outro con cortizas (31 de marzo) e outra das citas tradicionais como o obradoiro do Día do Pai (17 de marzo), no que os participantes elaborarán un peculiar agasallo para os seus pais.

Todas as actividades terán lugar na biblioteca municipal de Sigüeiro, ubicada no Centro Cultural Fernando Casas e Novoa, ás 11:00 horas. A asistencia é totalmente de balde, se ben é preciso anotarse previamente na biblioteca municipal (981 690 903) xa que o número de prazas por obradoiro é limitado (en previsión do material que se vaia a empregar durante a sesión).

O Programa de Animación á Lectura de Oroso é unha iniciativa posta en marcha polo Concello de Oroso para fomentar o hábito da lectura entre rapaces menores de 12 anos. Un programa totalmente gratuito que foi distinguido en dúas ocasións co Premio de Animación á Lectura María Moliner, que convoca o Ministerio de Cultura.

Ames – notas 20 xaneiro

O Concello de Ames organiza unha recollida tapóns de plástico en favor de Paula No partido benéfico de baloncesto Concello de Ames xa se recadaron 2.600 euros Ames, 20 de xaneiro de 2012. O Concello de Ames, a través da Oficina de Voluntariado, puxo en marcha unha campaña para recoller tapóns de plástico en favor de Paula, unha nena de 16 meses que ten agenesia sacra. Paula é unha nena de Boiro que naceu sen sacro. Precisa dunha intervención cirúrxica moi custosa en Alemaña. Reciclando tapóns pódemos axudala. O Concello de Ames enviaralle os tapóns á plataforma de apoio a Paula. Despois a devandita plataforma remitiralle todos os tapóns que xunte á empresa Acteco, unha compañía de reciclaxe de Alacante, que llos tocará por diñeiro. A entrega de tapóns pódese realizar nas Casas da Cultura de Bertamiráns e do Milladoiro, en horario de mañá de 9:00 h. a 14:00 horas, e de tarde de 16:30 h. a 22:00 horas. O Concello de Ames estase sumando ás iniciativas postas en marcha en favor de Paula, unha nena de 16 meses que ten agenesia sacra. Paula naceu sen sacro e con dúas vertebras mal formadas o que lle afecta as extremidades inferiores. Esta rapaza non pode andar e necesita un tratamento cun custo moi elevado. Para pagar parte do tratamento que terá que realizar Paula en Alemaña, a Oficina de Voluntariado, organizou unha campaña de recollida de tapóns de plástico. A entrega de tapóns pódese realizar nas Casas da Cultura de Bertamiráns e do Milladoiro, en horario de mañá de 9:00 h. a 14:00 horas, e de tarde de 16:30 h. a 22:00 horas. Unha vez pechada a campaña, a Oficina de Voluntariado de Ames enviaralle os tapóns á plataforma de apoio a Paula. Posteriormente, esta plataforma remitiralle todos os tapóns que xunte á empresa Acteco, unha compañía de reciclaxe de Alacante, que llos tocará por diñeiro. Dende a plataforma de apoio a Paula manifestan que as iniciativas postas en marcha ata o de agora tiveron moi boa acollida entre a sociedade galega e xa se recadaron 135.000 euros, preto da metade da cantidade necesaria para costear as intervencións ás que a nena ten que ser sometida en Alemaña. Anteriormente, o Concello xa organizou o III partido benéfico de baloncesto Concello de Ames. O obxectivo desta cita deportiva foi recadar diñeiro para Paula. Neste partido o XL Milladoiro enfrontouse contra un equipo de famosos de Galicia entre os que se atopaban Pepo Suevos, Óscar Pereiro, Xavier Deive, Terio Carrera, David Amor e Federico Pérez entre outros. Nesta iniciativa recadáronse 2.600 euros. Ademais de colaborar con esta iniciativa poden facer unha achega económica no número de conta 2080-0311-15-3000161584. Para máis información poden chamar á Oficina Municipal de Voluntariado de Ames marcando o número de teléfono 981 883 703.

As empresas Labralia e Panadería Artesana repiten o primeiro e o segundo premio do concurso de escaparatismo de Ames Ames, 20 de xaneiro de 2012. Esta mañá reuniuse o xurado do VI concurso de escaparatismo de Ames e fixéronse públicos os gañadores. O primeiro premio recaeu na empresa Labralia, que xa se fixera co primeiro posto o ano pasado. O segundo premio foi para Panadería Artesana, que tamén repite posto, o terceiro premio foi para Organza Decoración, o cuarto para Floristería Carmiña e o quinto para Quens. O concurso tivo na súa sexta edición 35 participantes e segundo o xurado o nivel foi alto. Os parámetros a ter en conta foron a orixinalidade e o deseño, e dentro deles valoráronse aspectos técnicos coma a colocación, a separacións de ámbitos, a produción, ou os materiais empregados. Este ano foron moitos os establecementos que optaron por decorar co branco e o vermello como cores predominantes. A concellería de Comercio, Promoción Económica, Traballo e Turismo puxo en marcha este concurso no que os comerciantes amienses competiron co engalanado dos seus escaparates que estiveron expostos dende o cinco de decembro de 2011 ao 5 de xaneiro de 2012. Os premios este ano están máis repartidos ca nunca e en lugar de tres foron cinco as empresas premiadas. O primeiro clasificado, Labralia, recibirá 600 euros de premio, 400 euros recibirá Panadería Artesana e 200 euros recibirá o terceiro premiado, Organza Decoración. O cuarto premio consiste nunha fin de semana para dúas persoas en sesión termal valorada en 200 euros e recaeu na empresa Floristería Carmiña e o cuarto, que foi para Quens, é unha fin de semana rural para dúas persoas valorada en 100 euros. O Concellerio de Comercio, Bernardo Moar destacou que “este ano se produciu unha sinerxia entre os participantes e as empresas que non concursaron pero que tamén decoraron moi ben os escaparates”. Moar explicou ademais que este concurso axuda a facer dos establecementos focos de atracción e aumenta o interese dos clientes polos produtos. O concelleiro tamén agradeceu a participación dos comerciantes de Ames neste concurso que este ano tivo ademais o maior número de participantes dende a súa creación. O xurado estivo composto polo alcalde de Ames, Santiago Amor, o concelleiro de Comercio, Bernardo Moar, Álex Righi tesoureiro de AEMI (Asociación de Empresarios de Milladoiro), Juan Carlos Zahera, Presidente da ACB ( Asociación de Comerciantes de Bertamiráns), Antonia Pinto Veloso, escaparatista de Covas e por un técnico municipal do departamento de promoción económica. Nos próximos días entregaranse na Casa do Concello os diplomas, os cheques e os vales para as estancias no balneario e na casa de turismo rural.

Brión – prazo de solicitudes para recoñecemento de competencias profesionáis

BRIÓN ABRE O PRAZO DE SOLICITUDES PARA O RECOÑECEMENTO DE COMPETENCIAS PROFESIONAIS ADQUIRIDAS A TRAVÉS DA EXPERIENCIA PROFESIONAL

O prazo de inscrición nas 17 modalidades ofertadas remata o vindeiro 15 de febreiro

20 de xaneiro de 2012.- O Concello de Brión informa da apertura do prazo de presentación de solicitudes para inscribirse na segunda convocatoria do recoñecemento das competencias profesionais adquiridas a través da experiencia laboral. Unha convocatoria que realiza a Consellería de Educación e Ordenación Universitaria para a avaliación e acreditación das competencias profesionais adquiridas polas persoas a través da experiencia laboral ou de vías non formais de formación.

Nesta convocatoria, acreditaranse un total de 17 modalidades: xestión administrativa, instalacións elécticas e automáticas, instalacións de telecomunicacións, eficiencia enerxética e enerxía solar térmica, soldadura e caldeiraría, cociña e gastronomía, servizos en restauración, xestión de aloxamentos turísticos, aceites de oliva e viños, carpintaría e moble, laboratorio de análise e control de calidade, emerxencias sanitarias, farmacia e parafarmacia, educación infantil, confección e moda e electromecánica de vehículos automóviles.

As persoas que desexen solicitar o recoñecemento dalgunha destas competencias profesionais deberán dirixirse á Casa da Cultura (981 509 908). O prazo de inscrición remata o vindeiro 15 de febreiro. Para presentar a solicitude será preciso encher unha folla de inscrición, presentar un historial persoal de acordo co modelo currículum vitae europeo, informe de vida laboral, declaración responsable de non estar matriculado ou cursando un curso de FP e unha fotocopia compulsada do contrato de traballo ou certificación da empresa onde adquirise a experiencia laboral.

Teo – visita de escolares a EDAR de Pontevea

MEDIO NATURAL E O IES DE CACHEIRAS ORGANIZAN UNHA VISITA DE ESCOLARES Á EDAR E Á ETAP DE PONTEVEA

· O alumnado de 1º de Bacherelato atendeu as explicacións dos técnicos de Aquagest sobre os procesos das plantas de tratamento

· Manuel Anxo Fernández destaca “a importancia da colaboración institucional coa comunidade educativa de cara a que os máis novos/as coñezan as infraestruturas do seu Concello”

20 de xaneiro de 2012. O departamento de Medio Natural, dirixido por Manuel Anxo Fernández, coordinou co instituto de Cacheiras unha visita de escolares á Estación de Tratamento de Auga Potable (ETAP) e á Estación Depuradora de Augas Residuais (EDAR) en Pontevea, na xornada de onte.

Un grupo de escolares de 1º de bacherelato, case 50 rapaces e rapazas de 17 anos, puideron visitar as dúas plantas e atender ás explicacións dos técnicos da empresa Aquagest sobre os procesos que se realizan nestas instalacións de xestión municipal. A visita estivo coordinada cos mestres de química do IES, Mari Ángeles Fandiño e Miguel Cambeiro, quen estivo acompañada do edil de Medio Natural e de persoal técnico municipal.

Durante a visita a ETAP os/as alumnos/as puideron ver os paneis de control e os depósitos que se usan para tratar a auga potable. A ETAP de Pontevea, cuxo proxecto data do ano 1995, realiza a captación de auga do río Ulla, sendo a infraestructura que abastece de auga potable a todo o Concello de Teo.

A EDAR, situada tamén nas marxes do río Ulla, na localidade teense de Pontevea, é unha planta realizada pola Xunta de Galicia e xestionada polo Concello dende o 2010. Esta resultou a visita de máis interese para os escolares xa que puideron ver e atender as explicacións sobre o proceso de depuración de augas residuais, augas fecais e as diferentes fases do tratamento químico utilizado. Manuel Anxo Fernández destaca “a importancia da colaboración institucional coa comunidade educativa de cara a que os máis novos/as coñezan as infraestruturas do seu Concello así como aspectos concretos relacionados co medio natural”. De feito “este tipo de visitas é a mellor maneira de que eles sexan conscientes por exemplo da existencia destes procesos, tanto na potabilizadora como na depuradora, e que vexan a magnitude incluso do custe que pode ter”.

O Concello xa realizou noutras ocasións actividades co IES de Cacheiras organizando visitas ó Punto Limpo. Está previsto que nos próximos meses se faga unha campaña de concienciación sobre a recollida de residuos urbanos e se traballe de novo co instituto e tamén cos CEIPs.

Silleda – notas 20 de aneiro

Manuel Cuíña pregúntalle ao PP de Silleda se coñece a media de usuarios que ten o Punto Limpo -“ Non sabemos se ao PP lle parece ben empregar os recursos municipais en ter todos os días da semana a unha persona atendendo un servizo ao que o ano pasado acudiu unha media de tres persoas diarias” -O concelleiro de Medio Ambiente, Antonio Couso, ve “demagógico relacionar a reducción do horario cos vertedoiros incontrolados” Silleda, 20 de xaneiro de 2012. O concelleiro de Obras e Servizos, Manuel Cuíña amosou hoxe a súa sorpresa polas críticas do PP ao novo horario do Punto Limpo, que dende o pasado día 1 de xaneiro se reduciu aos mércores e sábados (de 09.00 a 14.00 horas). Cuíña pregúntase se o PP de Silleda “coñece a media de usuarios que acoden ao Punto Limpo, que o ano pasado se situou en tan só tres persoas, sendo a xornada do sábado a de maior afluencia”. “Non sabemos se ao PP lle parece ben empregar os recursos municipais en ter todos os días da semana a unha persona atendendo un servizo con este balance”. Así mesmo, lembra que outros municipios limítrofes con máis do dobre de población teñen este servizo aberto ao público dous días á semana durante 4 horas e os sábados. “Dende o goberno municipal entendemos que a cidadanía tamén debe de ser comprensiva e adaptarse á situación”, engade. Sobre os depósitos ás portas das instalacións, advirte que se trata de “casos puntais” e ve “perigoso” que o voceiro do PP “relacione a reducción do horario coa aparición de vertedoiros incontrolados, por ser algo claramente demagógico”. O goberno silledense, dende o departamento municipal de Medio Ambiente, que dirixe Antonio Couso, ven facendo “un gran esforzo na loita contra esta lacra”. Nos últimos meses “cando o Punto Limpo abría de luns a sábado” o personal do Grumir “que xa non temos dende o pasado día 31 de decembro” acometeu a limpeza de varios vertedoiros no rural “ e a Policía Local está a investigar a procedencia dos residuos”, engade Couso. “En lugar de erixirse en defensores do Medio Ambiente o PP debería de contribuir a concienciar á poboación contra este grave problema e non cuestionar un traballo que xa de por sí resulta complicado”, engade.

O Concello de Silleda acomete unha reordenación do tráfico no entorno da praza do Entroido da Bandeira -O edil Manuel Cuíña, que se reunirá cos veciños, explica que os cambios nas direccións responden ás características dos tramos “de escasas dimensións” e onde non sería factible o aparcamento se hai dobre sentido Silleda, 20 de xaneiro de 2012. O Concello de Silleda vén de iniciar a reordenación do tráfico rodado en varias rúas do entorno da praza do Entroido e a rúa do Parque da Bandeira, logo dos traballos de mellora acometidos nos últimos meses coa dotación dunha nova capa de rodadura. Os cambios quedarán reflexados na nova sinalización que xa comezou a aplicarse. Mentres a rúa do Parque e a travesía da Feira manteñen o dobre sentido, outros tres quedarán só cunha única dirección: a renque do Peixe, rúa da Feira e un pequeño tramo na Renque da Froita. Este último quedaría pechado ao tráfico na parte lindante coa praza do Entroido. Con esta medida, preténdese facer unha regulación do tráfico rodado nesta zona da vila da Bandeira “onde non hai anchura suficiente para permitir dobre circulación e estacionamento de vehículos”, explica o concelleiro Manuel Cuíña, lembrando que nunca se acometeu ningunha medida deste tipo no entorno destas rúas. O responsable de Obras e Servizos manterá unha xuntanza coa asociación veciñal Avema para explicarlle en detalle os cambios acometidos. “Coma no caso doutras variacións, esperaremos un tempo prudencial a modo de proba ou adaptación, e despois veremos se continuamos coa proposta ou se hai que facer variacións”, engade o concelleiro.

PSOE Vedra – e falso que se aforre nas contas municipáis

OS SOCIALISTAS DE VEDRA ESIXIMOS QUE SE DEMOSTRE O SUPOSTO AFORRO NAS CONTAS MUNICIPAIS

Vedra, 20 de xaneiro de 2012. “Falso e enganoso”. Así calificamos dende o Grupo Municipal Socialista de Vedra o anuncio do aforro nas contas municipais acadado polo goberno de Martínez nos últimos sete meses.

Segundo nos consta ao Grupo Socialista, os case 130.000 euros que din aforrar, veñen, non de reducir os gastos de protocolo, entre outros, senón de aproveitar a caixa única coa que se xestionan os fondos do concello e de non pagar a construtores e proveedores por obras rematadas e financiadas mediante convenios coa Deputación Provincial da Coruña, cuxos cartos xa foron ingresados hai meses nas arcas municipais. Fan propaganda de aforro cuns cartos xa gastados e polos que están a esperar as empresas que fixeron as obras.

Así mesmo, dende o Grupo Socialista cuestionamos o que os populares dan en chamar “austeridade”. A redución do gasto dos órganos municipais vén imposta pola caída en picado de licenzas de obras e demáis actividades ecómicas. Sobre as quilometraxes que deixan de cobrar o Alcalde e a Concelleira de Obras, os socialistas manifestamos que debería darlles vergonza mencionalos tan sequera, porque se un non traballa, non ten quilometraxes que pasar, como é o caso de Martínez e Piñeiro, e aseguramos que en 7 meses de goberno, levan executado o “nada por cento” do seu programa electoral. “O máis con menos” é palabrería barata. Deberían centrarse en atender as necesidades dos veciños e veciñas en non en seguir as diretrices de propaganda do partido.

Por todo isto, dende o Grupo Socialista imos solicitar informes á Intervención para comprobar de xeito fehaciente a procedencia e a contía deste suposto aforro. Así mesmo, estamos a valorar pedir a comparecencia en pleno da Concelleira de Economía e Facenda, a propia Piñeiro, que sería a primeira da lexislatura, para que explique o estado das contas.

BNG A Estrada – moción en contra da suba do IBI

Ames – ANPA Agro do Muiño – ciclo de conferencias

A ANPA de Agro do Muíño promove o ciclo de conferencias e debates “Proxecto educar sen estres” A primeira conferencia impartirase o xoves 26 de xaneiro no auditorio da Casa da Cultura de Bertamiráns ás 21.00 horas Ames, 20 de enero de 2012. A ANPA do CEIP Agro do Muíño promove o ciclo de conferencias do “Proxecto educar sen estres” que xestiona a Asociación Bioturmalina. Coas conferencias preténdese fomentar a educación en valores, as novas ferramentas pedagóxicas e educativas para o benestar e o desenvolvemento harmonioso dos nenos e mozos de hoxe. O ciclo consiste en tres conferencias que se impartirán no auditorio da Casa da Cultura de Bertamiráns, a primeira delas celebrarase o xoves 26 de xaneiro baixo o lema “Educar sen estres”. Nela trataranse métodos de xestión do estres, educación emocional e capacidades creativas na casa e nas aulas. A seguinte conferencia celebrarase o día 22 de marzo e tratará o tema “A motivación na educación”, nela abordaranse ferramentas educativas e pedagóxicas para unha educación máis harmoniosa. Finalmente celebrarase unha última conferencia o día 24 de maio baixo o título “Fomentar un novo modelo de aprendizaxe para completar as necesidades educativas, sociais e culturais do alumnado” e coa finalidade de mellorar a integración social, estimular as habilidades motrices e integrar os potenciais culturais. A vicepresidenta da ANPA de Agro do Muíño, Maribel Pérez, explicou que un dos puntos máis interesantes das conferencias é o feito de que durante a última media hora das mesmas se farán mesas redondas e debates cos asistentes. Ademais o peche das conferencias farase coas performance “Os 4 elementos con nen@s e educadores”, “O teu nen@ interior” e “ O poder do corazón”. As conferencias faranse no Auditorio da Casa da Cultura de Bertamiráns serán todas ás 21.00 horas e están abertas a todo o público que desexe participar nelas. É o terceiro ano que a ANPA de Agro do Muíño organiza ciclos de conferencias para tratar temas educativos. A asociación de Nais e Pais de Agro do Muíño considera “que este tipo de iniciativas son unha necesidade importante” e en función da acollida que teña plantéxanse continuar con actividades e talleres onde as familias compartan tempo e experiencias. As persoas encargadas de impartir as conferencias serán Dulcina Gómez Araújo e Fausto Dopico Gutiérrez. Dulcina G. Araújo é licencia da en Ciencias Empresariais, e formouse como técnico superior en xestión cultural e como orientadora educativa. É membro do Consello Galego de Medio Ambiente e desenvolvemento sostible da Xunta de Galicia e participou en numerosos simposios e conferencias a nivel nacional e internacional. Fausto Dopico é Doutor de Económicas na USC e dende hai anos traballa na investigación sobre novas formas de potenciar o benestar na sociedade. Ambos son membros de Bioturmalina, unha asociación que oferta actividades bioculturais e traballa principalmente nos ámbitos da sustentabilidade ambiental, educativo e de benestar social. A administración autonómica, as administracións locais, colexios, empresas privadas, centros socioculturais, asociacións etc. forman parte dos axentes cos que traballa Bioturmalina. Dende a ANPA de Agro do Muíño animan a todo o mundo a que participe nestas conferencias xa que se tratan temas de interese non só para as familias, senón tamén para o público en xeral.

Santiago – axenda do 21 o 23 de xaneiro

Sábado 21

11.00 h

Na praza da Quintana, un grupo de 30 nenos e nenas de entre 6 e 14 anos que habitualmente participan nas actividades dos centros socioculturais de Conxo e Vite irán á pista de patinaxe acompañados polos monitores.

12.00 h

Na Catedral, o alcalde compostelán, Xerardo Conde Roa, asiste ao funeral polo ex presidente da Xunta, Manuel Fraga.

Domingo 22

12.00 h

No Teatro Principal, concerto da Banda Municipal de Música dirixida por Xosé Carlos Seráns.

Luns 23

12.00 h

Na Casa do Concello, ROLDA DE PRENSA da concelleira do grupo municipal socialista, Marta Álvarez-Santullano, sobre asuntos de carácter local.

12.30 h

Na Casa do Concello, a voceira da Xunta de Goberno Local, Paula Prado, exporá en ROLDA DE PRENSA o resumo dos acordos adoptados na última sesión.

20.00 h

No Salón Vermello, o alcalde compostelán, Xerardo Conde Roa, fai entrega dos premios á deportividade da Federación Galega de Fútbol.

Fundación Araguaney - Fotógrafos de prensa galegos exporán os seus traballos grazas á Fundación

Santiago de Compostela, Mércores 18 de Xaneiro de 2012. Máis dunha trintena de fotoxornalistas, entre os que só hai unha muller, exporán os seus traballos fotográficos grazas a unha nova iniciativa da Fundación Araguaney. Trátase dunha exposición de fotografía de prensa que o equipo da Fundación leva organizando durante este mes de Xaneiro e que poderá ser visible a partir do mes que vén. A mostra pretende ensinar ao público o traballo dos coñecidos como “gráficos”, que día a día captan cos seus cámaras os mellores instantes e déixannolos ver nos xornais ilustrando as noticias.

O obxectivo co que xorde a exposición que a Fundación Araguaney titulou “Os nosos gráficos, as súas imaxes”, é o de recoñecer o labor dos reporteiros gráficos galegos, permitíndolles que nos mostren os mellores momentos do pasado ano 2011.

A mostra desenvolverase a principios do mes de Febreiro na Galería Caroní da Fundación Araguaney (Rúa do Vilar, 21). Grazas ao gran número de fotógrafos que participaron, o público poderá ver unha recompilación de imaxes que ilustran momentos do 2011 que foron noticia nos diarios de cabeceira de Galicia. Serán sobre unha trintena de fotos que apareceron na prensa galega e que retratan momentos de temática variada. Dende un rescate nas costas de Finisterre, ata a apertura do novo aeroporto de Lavacolla, pasando por algunha cita deportiva e política.

A mostra estará formada por máis de trinta fotos de gran tamaño. Cada unha delas levará unha reseña co nome do seu autor, a data de publicación e o medio escrito no que saiu.

Auditorio de Galicia – próximos concertos no Compostela Rock

Os irlandeses xuntaron a máis de 500 persoas na Sala Capitol

Tralo éxito da inauguración con The Answer, Compostela Rock continua con Corizonas, Diamond Dogs, Cooper e Mark Lanegan

• Ademais, e xa no mes de maio, estarán tamén no ciclo Toy Dolls e Leiva

Santiago de Compostela, 02/01/2012.- Compostela Rock, nova aposta da concellaría de Cultura, inaugurouse o pasado sábado, 14 de xaneiro, cos irlandeses The Answer, na Sala Capitol ás 21.30h.. O concerto foi un éxito e máis de 500 persoas gozaron da banda, elixida por AC/DC como teloneiros na súa última xira mundial, que chegaba a Compostela para dar o único concerto en Galicia, logo de estar en Madrid, Barcelona e Bilbao, no que presentaron o seu novo disco, ‘Revival’. O ciclo continua agora con Corizonas, Diamond Dogs+Sugar Mountain, Cooper e Mark Lanegan+Creature with The Atom Brain para continuar xa en maio con Toy Dolls e Leiva. Todos na Sala Capitol.

Corizonas son os próximos convidados do ciclo e chegarán a Compostela o venres, 10 de febreiro nun concerto no que se presenta a nova banda en Galicia e ofrecen en directo os temas do seu novo disco ‘The News Today’. As entradas, 15€ anticipada e 18€ na billeteira, poden mercarse xa na rede Ticketmaster, incluída a súa web, Discos Gong, Carrefour, FNAC, Halcón Viajes, Tendas Tipo, A Reixa Tenda, www.iwanna.org e www.salacapitol.com.

En febreiro tamén, o día 25, temos o terceiro concerto do ciclo, nesta ocasión con Diamond Dogs que terán como teloneiros aos Sugar Mountain. Os suecos chegan a Compostela para presentar o seu novo álbum ‘Set Fire To It All’ capitaneados por dous dos guitarras máis importantes que tiveron: International Fred e Lars Karlsson. Como diciamos, acompáñanos como teloneiros os galegos Sugar Mountain que presentan un amplo repertorio dos seus discos e novas cancións da súa próxima gravación.

Cooper chega o 1 de marzo para presentar en Galicia o seu novo disco, ‘Mi universo’, co que logran actualizar un xénero, como é a música beat, facendo que soe á vez clásica e moderna, persoal e universal. O grupo é un proxecto musical formado por Alex Díez e os seus amigos nos primeiros meses do ano 2000

E en marzo, o 28, estará en Compostela Rock Mark Lanegan con Creature with The Atom Brain. Lanegan promete unha noite memorable na que presenta en Galicia ‘Blues Funeral’, o seu novo disco tras oito anos desde o último. Como banda teloneira actuarán os belgas Creature with the Atom Brain, que contan entre as súas filas con Aldo Struif (ex Millionaire).

Compostela Rock, novo ciclo da concellaría

Dentro das novidades na programación para 2012 que pon en marcha a concellaría de Cultura, unha das apostas firmes é o Compostela Rock, ciclo que se alongará durante todo o ano e se celebrará en diversos espazos da cidade. Abranguerá concertos de rock, pop e xéneros próximos en todos os seus estilos e variantes intentando así achegarse ao maior rango de idades entre o público ao que vai dirixido. O que se busca é dar estabilidade na programación da concellaría a un tipo de música que ata o de agora non o tiña e materializar unha realidade da programación da cidade.

BNG A Estrada – crítica a colocación de antenas de telefonía nun campanario

O BNG ve un disparate colocar antenas de telefonía no campanario da igrexa da Estrada

Xosé Magariños comprende a inquietude e a alarma social que hai nos veciños e veciñas da Praza da Inmaculada, e pídelle ao concello que elabore unha ordenanza para evitar este tipo de desatinos

A Estrada, 19 de xaneiro de 2012: Esta tarde o portavoz municipal do BNG, Xosé Magariños Maceira, e o responsábel local do BNG da Estrada, Xosé Manuel Baños, mantiveron unha reunión coas representantes dos veciños afectados pola colocación dunha antena de telefonía que pretende instalar a compañía Movistar na igrexa de San Paio da Estrada.

Xosé Magariños manifestoulles que “a igrexa parroquial non é sitio onde colocar ningunha antena, xa que estamos falando de elementos patrimoniais catalogados -a igrexa e a escultura de Asorei situada na praza-, e aparte estamos a falar dunha zona especialmente saturada deste tipo de aparellos electromagnéticos”.

Neste sentido o portavoz do BNG di “comprender a inquietude e a alarma social que hai nos veciños e veciñas da Praza da Inmaculada, senón non se explica que xa teñan recollidas máis de 1.000 sinaturas en contra deste proxecto”. Xosé Magariños e Xosé Manuel Baños amosáronlle todo o apoio do BNG a esta “xusta reivindicación veciñal”.

O concelleiro nacionalista manifestou ademais que “xa son horas de que o noso concello conte cunha normativa específica para a colocación destes aparellos, limitando a súa ubicación a determinados sitios”; e engadiu que “se o goberno municipal non se pon as pilas, o BNG estudará a posibilidade de presentar unha ordenanza propia que regule esta anarquía”.

Por outra parte, Magariños recordoulles que “en 2005 a Consellaría de Cultura que naquela altura estaban en mans do BNG, obrigou a retirar unha antena situada na igrexa de Ouzande, e agardemos que agora que o sentido común, e se impida a instalación de antenas na igrexa de San Paio da Estrada”.

Teo – comenzan a funcionar as aulas de estimulación integral

COMEZAN A FUNCIONAR AS AULAS DE ESTIMULACIÓN INTEGRAL EN TEO DIRIXIDAS A PERSOAS CUN DETERIORO COGNITIVO LEVE

· Dende o departamento de Benestar impulsouse un convenio con Agadea, que é a encargada da selección dos/as usuarios/as destas Aulas

· As persoas interesadas en participar poden poñerse en contacto cos Servizos Sociais do Concello

19 de xaneiro de 2012. O departamento de Benestar, dirixido por Ignacio Iglesias, informa de que esta mesma semana comezaron a funcionar as Aulas de estimulación integral, unha iniciativa dirixida a persoas en estados iniciais da enfermidade de deterioro cognitivo. Esta actividade estase realizando na Casa Común de Rarís de 15:30 a 19:30 horas os mércores e venres. As persoas interesadas en participar ou que atendan a algún doente que cumpra os requisitos poden poñerse en contacto co departamento de Servizos Sociais no teléfono 981 809 707.

As Aulas de estimulación integral están coordinadas dende a Asociación Galega para a Axuda dos Enfermos con Demencia tipo Alzheimer -Agadea- e son froito dun convenio de colaboración asinado entre esta entidade e o Concello de Teo en outubro do ano pasado. De feito é persoal de Agadea o encargado da selección das persoas que participan nesta terapia así como de impartila.

Nas Aulas poténcianse as capacidades das persoas para mellorar a súa calidade de vida a través de diferentes técnicas como xerontoximnasia, psicomotricidade, estimulación cognitiva, musicoterapia ou arteterapia.

Esta actividade está destinada a persoas cun deterioro cognitivo lixeiro, que aínda pode estar sen diagnosticar; leve, canso xa soe estar diagnosticado ou moderado sempre que non presenten alteracións importantes do comportamento.

Antes de incorporarse ó grupo de traballo realízase unha valoración inicial social e psicolóxica para comprobar que o perfil do destinatario se adapta á terapia. Con posterioridade a terapeuta que dirixe a aula desenvolverá unha valoración funcional do/a asistente.

As persoas que inicien a terapia terán un período de adaptación durantes as primeiras sesións no que se irá incrementando o tempo para facilitar a súa adaptación partindo de dúas horas iniciais cada tarde de asistencia.

Ames – aprobación inicial da cesión de un terreo para un novo CEIP no MIlladoiro

O goberno de Ames levou a cabo a aprobación inicial do plan especial de equipamentos para a futura construción dun novo CEIP no Milladoiro

A Xunta de Goberno de Ames aprobou a licencia de obra maior para a construción da nave de mantemento, a marquesina de prácticas de golf de catro pistas de tenis descubertas e o aparcamento do Aeroclub

Ames, 19 de xaneiro de 2012. A Xunta de Goberno de Ames levou a cabo a aprobación inicial do plan especial de equipamentos para a futura construción do colexio de educación infantil e primaria de Ames no Milladoiro. O emprazamento do novo centro educativo será na rúa Nova, na estrada de Milladoiro a Ventín. A parcela que o goberno popular de Ames pon a disposición da Xunta é de 20.600 metros cadrados e a clasificación actual da mesma é de solo rústico apto para urbanizar. A xunta de Goberno de Ames tamén aprobou a licencia de obra maior para a construción da nave de mantemento, a marquesina de prácticas de golf de catro pistas de tenis descubertas e o aparcamento das futuras instalacións que o Aeroclub está construíndo en Ames.

A Xunta de Goberno Local sacou adiante a aprobación inicial da parcela para cederlle á Xunta de Galicia unha parcela para a nova escola do Milladoiro coa aprobación inicial do plan especial de equipamentos para a futura construción do colexio de educación infantil e primaria de Ames no Milladoiro. Este plan someterase a exposición pública durante un mes. Con esta importante modificación urbanística e unha vez superados os trámites administrativos necesarios, o goberno do Partido Popular de Ames porá a disposición da consellería de educación o solo necesario para a construción dun novo colexio de infantil e primaria no Milladoiro.

Cómpre lembrar que a Consellería de Educación solicitara en febreiro do ano 2010 ao anterior goberno dos socialistas un mínimo de 13.000 metros cadrados para a construción dun centro. “En tan só sete meses no goberno estamos en condicións de afirmar que o terreo terá máis de 20.000 metros cadrados, que terá unha boa ubicación propicia para a expansión natural do núcleo de Milladoiro e que satisfará unha gran necesidade para os veciños de Ames” explicou o concelleiro de urbanismo, Ramón García Argibay.

O novo centro de infantil e primaria disporá de tres aulas por curso, considerando tres cursos de educación infantil e seis de educación primaria, suporá un total de 27 aulas. A superficie a construír é de 3.400 metros cadrados, aos que se sumarán 350 m² para o comedor e 90 para a comida, o que fai un total de 3.840 m². Ademais contémplase a construción de dúas pistas deportivas de 20x40 cada unha. Unha das pistas debería estar polo menos parcialmente cuberta. Tamén se construirá un porche cuberto para o recreo dos nenos e nenas de infantil de 540 m² e a escola contará ademais cunha área de xogos de 340 m².

Licencia para a construción dunha nave de mantemento, unha marquesina e un aparcamento nas instalacións do Aeroclub

A Xunta de Goberno local tamén aprobou a licencia de obra maior para a construción da nave de mantemento, a marquesina de práctica de golf de catro pistas de tenis descubertas e o aparcamento para o complexo que o Aeroclub está construíndo na parroquia amiense de San Mamede de Piñeiro.

O seis de outubro de 2011 a Secretaría Xeral de Ordenación do Territorio e urbanismo informou favorablemente para a práctica de actividades deportivas que se desenvolverán ao aire libre en solo rústico. O 27 de decembro de 2011 a Xunta de Goberno Local concedera a licencia de instalacións e obra para o campo de golf. As obras deberán dar comezo antes de seis meses e terán que finalizar antes de tres anos.

O concelleiro de urbanismo, Ramón G. Argibay, explicou que nos sete meses de goberno popular xa se deu a licencia de campo de golf para a nave, para a pista de tenis e para o aparcamento das instalacións do Aeroclub.

García Argibay tamén destaca a importancia dos pasos dados para poñer a disposición da Xunta unha parcela para construír un centro educativo. “Queremos que os nenos de Ames teñan centros suficientes e de calidade para poder estudar no noso municipio, e traballaremos para que iso sexa posible”.

Silleda – a titularidade dun camiño levarase de novo o pleno por orden do xulgado

O Xulgado obriga a levar de novo ao pleno o dictame sobre a titularidade pública dun camiño na parroquia de Fiestras

-No ano 2008 a oposición votou en contra da titularidade pública pese aos informes técnicos. A sentenza, ratificada polo TSXG, esixe aos concelleiros que argumenten porqué se contrarian informes e probas

-O expediente podería abordarse na sesión ordinaria do vindeiro xoves día 26, ao igual que a desafección doutro camiño en Siador

-Hoxe celebráronse as comisións informativas nas que tamén se abordaron cuestións coma o plan de rotura de presas, a modificación na composición da Mesa Local do Comercio, ou a denominación dunha nova rúa

Silleda, 19 de xaneiro de 2012. Esta mañá celebráronse no concello de Silleda dúas comisións informativas (de Comercio e Emprego e outra de Réxime Interno) nas que se debatiron asuntos a incluir na orde do día do vindeiro pleno ordinario, que terá lugar o xoves día 26 (ás 20.00 horas).

Ademais dos temas previstos e xa informados, os servizos técnicos municipais están a traballar para incluir nesta sesión os expedientes relativos a dous camiños.

O primeiro deles refírese a desafección dun camiño público en Siador, xa aprobado polo Pleno no ano 2009, pero que tiña pendente a exposición pública do acordo. O prazo desa exposición rematou o pasado mércores 18 sen que se presentara ningunha alegación ao respecto. O camiño está situado entre dúas fincas do mesmo propietario.

Outro dos expedientes nos que se traballa para levar ao pleno é o do caso do camiño de Fiestras, protagonista dun sonado litixio. O caso remóntase a un pleito de 7 veciños da localidade contra outros tres por unha acometida de agua. Un dos demandantes, logo de perder varias veces pola vía civil, procedeu ao peche do camiño polo que pasaba a auga, argumentando que se trataba dunha vía privada.

Ao non existir un inventariado de bens públicos municipais, o Concello de Silleda viuse obrigado a investigar sobre a titularidade deste camiño de Fiestras. Realizadas as xestións oportunas e practicados os indicios correspondentes, os informes tanto do técnico municipal como da Secretaría Xeral do Concello concluíron que o camiño é público.

Pero sometido o asunto á votación plenaria en marzo de 2008, co PSOE de Paula Fernández no goberno, os dous grupos da oposición naquel momento (PP e BNG) votaron en contra, rechazando o carácter público da via.

O acordo plenario foi recurrido por unha das partes implicadas e agora unha setenza do Xulgado do Contencioso Administrativo de Pontevedra, que xa foi ratificada polo Tribunal Superior de Xustiza de Galicia (TSXG), ordena volver a someter o asunto a votación no Pleno, como organismo competente para determinar o carácter públio ou privado do camiño.

A sentenza recolle ademais que os concelleiros “terán que argumentar porqué adoptan un acordo contrariando todos os informes técnicos e probas existentes, que dín que o camiño é público”, engade o fallo xudicial.

Ao pleno por terceira vez

Esta sería a terceira vez que o asunto se trata no pleno. En xullo do ano 2007, incóase o expediente para dilucidar a titularidade do citado camiño. No pleno do 27 de marzo de 2008, a oposición rexeitou a titularidade pública, e meses despois, o 31 de xullo dese mesmo ano, levouse de novo a pleno o asunto, propoñendo estimar o recurso contra o acordo anterior. O resultado da votación fora o mesmo, cos votos en contra dos grupos que daquela estaban na oposición.

Outro dos asuntos, que saíu adiante cos votos a favor do concelleiros do goberno bipartito e a abstención dos representantes do PP, foi o plan de rotura de presas, aprobado na xunta local de Protección Civil e que precisa o visto bo final do pleno.

Inclusión da Rúa N no rueiro

Outro dos asuntos que se tratará no pleno é a proposta da Alcaldía para denominar como rúa N un tramo anexo á praza do Emigrante (esquina coa rúa República Arxentina). Este tramo só foi aberto inicialmente e hoxe xa conta cun edificio no que residen varias familias, que non podían empradroarse en Silleda por non ter nome a rúa e polo tanto tampouco número no edificio.

A comunidade de propietarios presentara en abril do ano 2011 un escrito expoñendo a problemática e pedindo unha solución ao anterior goberno. “Non tivemos coñecemento da situación ata hai uns días, cando os veciños viñeron a interesarse polas xestións”, explica a alcaldesa, Paula Fernández. Á vista da situación e como medida urxente, a rexidora contactou coas entidades que forman parte da comisión do rueiro, e acordaron facer unha proposta seguindo o mesmo criterio de denominación que para outras rúas sen urbanizar ou con trazado aínda non aberto na súa totalidade, cunha denominación provisional usando letras (neste caso correspondería o N)

Na comisión de Comercio e Emprego, abordouse a modificación na composición da Mesa Local do Comercio, constituida o pasado día 30 de novembro, e na que agora se reduce o número de representantes municipais, que debe ser igual ao de membros do sector do comercio e representantes dos consumidores. Nun primeiro momento entedeuse que o Concello, como Administración Local, podería ter 3 representantes, considerando a Alcaldesa, como presidenta da Mesa, era membro nato.

Agora serán só dous (Paula Fernández como alcaldesa e o concelleiro de Comercio Klaus Brey), pasando a figurar como secretario o traballador municipal Alfredo Abeledo.

Psoe Ordes – petición de depósitos de augas

O PSOE SOLICITA DEPÓSITOS DE CAPTACIÓN DE AUGA PARA USOS AGRÍCOLAS E CONTRAINCENDIOS EN BARBEIROS, VILAMAIOR, PARADA E LESTA

Xesús Pedreira lembra que os terreos xa están dispoñibles e que o Concello de Ordes ten concedidos 53.463,14 euros a cargo do PEIM

19 de xaneiro de 2012.- O Partido Socialista de Ordes proporá ao pleno municipal de Ordes, que se reunirá en sesión ordinaria o vindeiro xoves 26 de xaneiro, a construción de depósitos de captación de auga para tarefas de usos agrícolas e contraincendios forestais nas parroquias de Barbeiros, Vilamaior, Parada e Lesta. Unhas obras que se farían con cargo aos 53.463,14 euros que lle corresponden ao Concello de Ordes con cargo aos Proxectos Estratéxicos de Infraestruturas no Medio Rural (PEIM Rural 2010-2011).

O voceiro municipal do PSdeG-PSOE en Ordes, Xesús Pedreira, explica que “nas parroquias de Barbeiros e Vilamaior xa existe terreo reservado na concentración parcelaria para este fin e, no caso de Parada e Lestas, os veciños doarían o terreo para estes depósitos”. Pedreira Mirás fai fincapé na importancia da realización deste tipo de medidas preventivas, sobre todos despois dos recurtes aplicados en materia de xestión forestal e de prevención de lumes por parte da Xunta nos exercicios 2010 e 2011, cifrados en 22 millóns de euros. Na práctica, isto supuxo “o abandono das políticas de ordenación forestal e de prevención de incendios para o rural de Ordes”, denuncia o edil socialista.

O PEIM Rural 2010-2011 é froito dun convenio asinado en setembro de 2009 polo daquela Ministerio de Medio Ambiente e Medio Rural e Mariño coa Consellería do Medio Rural, que subvencionan os 12,5 millóns de euros do plan. De acordo coa poboación rural, coa extensión municipal e co número e a dispersión dos núcleos e entidades de poboación, a Ordes correspóndelle un total de 53.463,14 euros.

Santiago – axenda venres 20 e corte de tráfico

Venres 20 9.00 h No Hostal dos Reis Católicos, o alcalde compostelán, Xerardo Conde Roa, asiste ao almorzo informativo organizado por Fórum Europa no que participa como ponente o arcebispo de Santiago, Julián Barrio. 11.30 h Na Casa do Concello, ROLDA DE PRENSA do concelleiro de Medio Rural, Luis García Bello, sobre asuntos da súa área. 12.00 h Na Casa do Concello, ROLDA DE PRENSA do voceiro do grupo municipal socialista, Xosé A. Sánchez Bugallo, sobre asuntos de carácter local. 12.30 h Na Casa do Concello, ROLDA DE PRENSA do concelleiro de Deportes, Adrián Varela, para presentar o Campionato Galego de Cross. 18.00 h Na Catedral, o alcalde compostelán, Xerardo Conde Roa, asiste aos actos da festividade de San Raimundo de Peñafort que organiza o Colexio de Avogados. Ás 19.00, no salón nobre do pazo de Fonseca, asiste á entrega da medalla de ouro a título póstumo a Antonio Castro García.

Corte de tráfico na avenida do Camiño Francés Por mor das obras de construción do túnel das Cancelas, pecharase ao tráfico a avenida do Camiño Frances, no tramo comprendido entre a avenida de Rodríguez de Viguri e a rúa Monte dos Postes, dende as 23.30 h da noite do venres 20 de xaneiro ata as 7.00 h do sábado 21. Os desvíos faranse pola rúa das Fontiñas e as Cancelas. O Concello de Santiago de Compostela prega aos cidadáns desculpen as molestias que esta alteración no tráfico lles poida ocasionar. ----------------------------------------------------------------------------------------------------------------   17.00 h Na Fundación Camilo José Cela (rúa Santa María, 22, Iria Flavia, Padrón), o alcalde compostelán, Xerardo Conde Roa, participa nos actos do XXV aniversario da devandita fundación.   21.00 h No Teatro Principal, Escola de Teatro Valle-Innova presenta 'Próxima estación' de Alberto Dosil. [A beneficio de Proxecto Home]. 21.30 h No Auditorio de Galicia, 'Semente de Músicas: 18 cordas e tres sereias. Concerto solidario polo direito a medrar en galego' con Uxía Senlle, Ugía Pedreira, Guadi Galego, Fred Martins, Guillerme Fernández e Sergio Tannus.

BNG A Estrada – moción sobre os cabalos do monte

O BNG da Estrada rexistra unha moción na que se pide unha modificación da orde pola que se diferencie entre cabalo de compañía e équidos destinados á produción

A Estrada, 18 de febreiro de 2012: O portavoz municipal do BNG, Xosé Magariños, e Francisco Xabier Barreiro Carracedo, presentaron hoxe en rolda de prensa unha moción na que se pide unha modificación da orde pola que se diferencie entre cabalo de compañía e équidos destinados á produción.

Para o BNG o aproveitamento dos recursos pastables dos nosos montes con diferentes especies de gando, especialmente de equino, ten unhas consecuencias moi positivas no eido rural e na sostibilidade dos ecosistemas de monte, xa que xestiona a biomasa arbustiva transformando a enerxía solar en proteínas, sen custos de produción e sen consumo de enerxía no proceso de transformación como exemplo máximo de xestión sustentable, contribuíndo ademais a:

- Conservar o medio natural e a paisaxe pois a presenza de gando mantén un monte aberto e vivo que favorece a biodiversidade e o uso social.
- Diminuír a incidencia dos incendios forestais dificultando a formación dunha fronte ou liña de fogo continua e facilitando a penetración dos servizos de extinción. Deste xeito debe considerarse o pastoreo como o instrumento máis eficaz na prevención de incendios.
- Ao controlar o toxo, favorecer a aparición da vexetación herbácea e pastos de maior calidade e, polo tanto, doutras especies de gando máis esixentes.
- Fixar poboación en zonas deprimidas.
- Conservar unha raza autóctona, adaptada xeneticamente aos nosos montes.

Pero ademais dos valores anteriores, o cabalo do monte é un elemento etnográfico milenario e singular dos montes galegos en xeral e dos estradenses en particular, sendo para a economía estradense un xerador de recursos turísticos de primeiro orden; non podemos esquecer a importancia que ten a Rapa das Bestas como imaxe de marca do turismo estradense.

Actualmente o sector equino en Galiza está a pasar por unha fase crítica, onde os produtores son incapaces, en moitos casos, de vender os poucos poldros que logran criar no monte. Esta situación veuse complicar coa publicación do RD 1515/2009, do 2 de outubro, polo que se establece un sistema de identificación e rexistro dos animais da especie equina, e da orde do 29 de marzo de 2010, pola que se establecen medidas en relación co sistema de identificación dos équidos na Comunidade Autónoma de Galiza, pola cal os cabalos deberán ser identificados cun documento individual e cun transpondedor electrónico, dándolle o tratamento de animal de compañía e impedindo a normalización do sector equino extensivo e a súa explotación gandeira.

Isto implica un gasto na identificación de reprodutoras non asumible para os gandeiros e que as subvencións, polos prazos de tempo cos que traballan, tampouco cobren. Mais no caso de poldros para sacrificio resulta xa imposible, pois a tarifa de identificación por animal establecida polo colexio de veterinarios é de 40 € cabeza, un valor que hoxe non ten un poldro de dúas primaveras (14 meses) destinado para sacrificio.

As consecuencias desta falta de previsión son funestas e os gandeiros optan por desfacerse das égoas.
Neste sentido o BNG da Estrada pide un acordo do pleno do concello para acadar:

- Unha modificación da orde pola que se diferencie entre cabalo de compañía e équidos destinados á produción, realizando para estes un sistema semellante, tamén en custos, ao das outras especies.
- Considerar a cría do cabalo de monte como un ben a apoiar e fomentar.
- Avanzar na ordenación do monte e nos compromisos entre gandeiros e propietarios.
- Considerar o aproveitamento gandeiro da biomasa xerada no monte como un dos medios máis eficaces contra os incendios forestais.
- Trasladar este acordo ao presidente da Xunta.

Ames – novo prazo de matrícula na escola de música

A Escola Municipal de Música de Ames abre un novo prazo de matrícula para o curso 2011/2012

Nesta segunda quenda de matrícula ofrécense 13 prazas para asistir a clases de música e movemento, linguaxe musical, guitarra, percusión ou batería e violín

Ames, 18 de xaneiro de 2012. Dende o día 19 de xaneiro a Escola Municipal de Música de Ames, que depende da Concellaría de Cultura, Educación e Patrimonio, abre un novo prazo de matrícula para cubrir novas prazas durante este curso. As clases comezarán o día 1 de febreiro e os interesados poderán inscribirse tanto nas clases de música e movemento, para nenos e nenas de entre 4 e 7 anos, como de linguaxe musical ou práctica instrumental (guitarra, percusión ou batería e violín). O prazo para matricularse estará aberto ata o día 27 de xaneiro. No caso de haber máis inscritos que prazas realizarase un sorteo o propio venres 27 de xaneiro, ás 20:30 horas, na Casa da Cultura do Milladoiro. Será preciso acudir ao sorteo ou mandar algunha persoa en representación.

Unha vez máis os rapaces e rapazas do concello que o desexen teñen a oportunidade de incorporarse á Escola Municipal de Música de Ames para comezar ou ampliar os seus estudos na arte musical. Para iso, tan só é necesario estar empadroado no municipio e matricularse entre o día 19 e o 27 de xaneiro na Casa da Cultura do Milladoiro, en horario de 9:30 h. a 13:00 horas, ou no Pazo da Peregrina en Bertamiráns, en horario de 9:00 h. a 14:00 horas.

As persoas interesadas en matricularse na Escola Municipal de Música de Ames só teñen que achegar cuberto o impreso 1 correspondente á solicitude de matrícula. Despois do sorteo (se é preciso facelo, e se non tamén), haberá que entregar as fotos, o resgardo do ingreso do importe da matrícula (impreso 2) e o impreso de domiciliación bancaria cuberto (impreso 3). Os nenos e nenas que estean interesados poderán presentar a solicitude para varios instrumentos e farase unha lista de agarda por si quedara algunha praza libre antes de que remate o curso no mes de xuño. A devandita lista non tería validez para o próximo curso.

As clases comezaron no mes de outubro pero sempre se abre unha segunda quenda de matrícula para cubrir as prazas que quedaron libres. Neste novo prazo de matrícula cóbrense aquelas prazas que quedaron baleiras despois das baixas producidas dende o mes de outubro ata xaneiro. A EMMA oferta leccións de música e movemento, dirixidas aos cativos de catro a sete anos, como de linguaxe musical, práctica instrumental, canto moderno e combo (conxunto instrumental de música moderna) para rapaces e rapazas maiores de sete anos. Para poder matricularse en instrumento é preciso ter cumpridos os 7 anos no ano 2011. Nesta segunda quenda de matrícula ofrécense 13 prazas para asistir a clases de música e movemento, linguaxe musical, guitarra, percusión ou batería e violín.

Prazas ofertadas

Na modalidade de música e movemento, que se imparte no Multiusos de Aldea Nova os mércores e venres en horario de 18:30 a 19:30 horas, ofértanse 2 prazas. Na materia de linguaxe musical ofrécense 4 prazas. Estas clases impártense os xoves nas instalacións do Multiusos de Aldea Nova. Para as clases de guitarra ofértanse un total de 4 prazas divididas en diferentes horarios (para as clases que se imparten no Multiusos de Aldea Nova os martes de 18:00 a 18:30 horas ofrécese unha praza; para as clases que se imparten no Colexio de Ventín os luns de 17:45 a 18:15 horas ofrécese unha praza; para as clases que se imparten no Colexio de Ventín os mércores de 20:30 a 21:00 horas ofrécese unha praza; e para as clases que se imparten no Colexio de Ventín os mércores de 21:00 a 21:30 horas ofrécese unha praza).

Para o instrumento de percusión ou batería, que se imparte no Multiusos de Aldea Nova, os mércores de 17:30 a 18:00 horas hai dispoñible unha praza libre. Por último, para as clases de violín ofértanse dúas prazas para poder optar a tres posibles horarios. Para os martes hai dous horarios dispoñibles, de 18:00 a 18:30 horas ou de 20:00 a 20:30 horas, mentres que os xoves pódese acudir de 16:00 a 16:30 horas.

A través deste servizo os rapaces e rapazas amienses teñan a oportunidade de adquirir coñecementos teóricos e prácticos na música e axudar desta forma na súa formación artística. Os rapaces e rapazas que se matriculen este mes na EMMA comezarán as clases o vindeiro día 1 de febreiro (seguirase o calendario escolar).

A admisión do alumnado no caso de existir máis demanda que número de prazas ofertadas será por sorteo público, que se realizará o venres 27 de xaneiro, ás 20:30 horas, na Casa da Cultura do Milladoiro. Será preciso acudir ao sorteo ou mandar algunha persoa en representación.

Para responder a calquera tipo de dúbida ou pregunta sobre os cursos da EMMA, os interesados teñen á súa disposición o número de teléfono 981 535 940 en horario de 9:30 h. a 13:00 horas de luns a venres. Así mesmo, os que o prefiran poden tamén enviar un correo electrónico á responsable da Escola de Música escolademusica@concellodeames.org

Auditorio de Galicia – concerto da Orquestra Sinfónica de Galicia

O concerto, que está dentro do programa de abono será a partir das 21.00h.

Víctor Pablo Pérez dirixe á Orquestra Sinfónica de Galicia no Auditorio de Galicia

• A orquestra estará acompañada no Concerto para violín e orquestra ‘1001 Noites no Harén’ de Say pola violinista Patricia Kopatchinskaja

• Interpretarán pezas de Fazil Say, Albert William Ketèlbey, Carls Nielsen e Camille Saint-Saëns

Santiago de Compostela, 18/01/2012.- A Orquestra Sinfónica de Galicia dará mañá, xoves 19, no Auditorio de Galicia un concerto dirixida por Víctor Pablo Perez. Interpretarán pezas de Fazil Say, Albert William Ketèlbey, Carls Nielsen e Camille Saint-Saëns e na primeira parte do concerto, onde poderemos escoitar o Concerto para violín e orquestra ‘1001 Noites no Harén’ de Say estarán acompañados pola violinista Patricia Kopatchinskaja.

Creada en 1992 polo Concello da Coruña, onde ten a súa sede, a Orquestra Sinfónica de Galicia é unha das agrupacións orquestrais de maior proxección en España. Víctor Pablo Pérez é o seu director titular e Jesús López Cobos o principal director invitado. Foi orquestra residente do Festival Rossini de Pésaro de 2003 a 2005 e do Festival Mozart da Coruña desde a súa creación en 1998. Realizou varias xiras por Alemaña e Austria e ofrece concertos nas mellores salas e ciclos de concertos españois. A OSG conta habitualmente con solistas e directores de recoñecido prestixio e foi premiada coa Medalla de Ouro da Real Academia Galega de Belas Artes e é Premio Cultura Galega da Música 2010.

Patricia Kopatchinskaja, violinista, naceu en Moldavia. De pais músicos, estudou composición e violín en Viena e Berna. Gañou o concurso internacional Szeryng-Competition en México e o prestixioso Premio Internacional Credit Suisse Group Young Artist Award (que consistiu nunha actuación coa Filarmónica de Viena e Mariss Jansons no Festival de Lucerna). Representou a Austria no Rising Stars Concert Series debutando en Nova York e outras capitais europeas. Gañou o BBC Music Magazine Award no 2010 pola súa visión personalísima do Concerto para violín de Beethoven con Philippe Herreweghe e a Orchestre des Champs-Elysées. É embaixadora de boa vontade para a organización benéfica “Terre des Hommes”, mediante a cal apoia proxectos para nenos en Moldavia.

PROGRAMA DO CONCERTO

I

FAZIL SAY (1970)

Concerto para violín e orquestra,

“1001 Noites no Harén”*

Allegro

Allegro Assai

Andantino

Patricia Kopatchinskaja, violín

II

ALBERT WILLIAM KETÈLBEY (1875-1950)

Nun mercado persa*

CARL NIELSEN (1865-1931)

Suite “Aladino” Op. 34*

Marcha oriental festiva

Soño de Aladino e Danza da

mañá brumosa

Danza hindú

Danza chinesa

O mercado en Isfahán

Danza dos prisioneiros

Danza do negro

CAMILLE SAINT-SAËNS (1835-1921)

Sansón e Dalila: Danza bacanal

* primeira vez pola OSG

Ames – obras da ponte da Condomiña

As obras da ponte da Condomiña completaranse con sendas peonís para garantir a seguridade dos viandantes

As obras que corresponden estritamente á ponte están rematadas, agora estase a traballar na dotación e mellora de accesos á infraestrutura

Ames, mércores 18 de xaneiro de 2012. A Ponte da Condomiña situada na localidade de Bertamiráns contará cunha prolongación de sendas peonís a modo de beirarrúas que garantirán a seguridade dos peóns. No pleno da Deputación do 25 de novembro de 2011 aprobouse o proxecto reformado de mellora da seguridade viaria da estrada DP 2205 de Bertamirás a Ramallosa. Este proxecto contempla a ampliación das beirarrúas da Ponte da Condomiña por un importe de 18.868,96 euros. En total o custe da obra da ponte máis a mellora dos accesos mediante a creación de sendas de mistura bituminosa ascende a uns 164.000 euros.

O Plan de travesías provinciais 2008-2011 da Deputación Provincial da Coruña incluíu as obras de mellora da Ponte da Condomiña para dotala dun paso peonil. Este Plan de Travesías naceu coa finalidade de mellorar as infraestruturas da provincia e contribuír a unha mellora da seguridade viaria.

As obras que corresponden estritamente á ponte están rematadas

A ampliación da ponte levouse a cabo mediante unha dobre estrutura composta por un conxunto de perfís metálicos perpendiculares ao taboleiro, traballando en voladizo, e outros dispostos perpendicularmente aos primeiros, sobre os que se asenta o pavimento formado por madeira. Pola cara exterior rematouse coa colocación dun tipo de varanda como a que xa existe neste lugar. Pola cara interior executouse un pequeno muro que dunha altura aproximada de 50 centímetros, que ademais de ter unha función estrutural, protexe aos viandantes do tráfico rodado. O tránsito normal de vehículos xa se puxo en servicio no pasado mes de decembro.

A Deputación Provincial da Coruña foi a encargada de redactar o proxecto técnico. Antes da redacción do proxecto varios técnicos da Deputación achegáronse ata Ames para comprobar o estado no que se atopaba esta estrada ao seu paso pola ponte da Condomiña. Así puideron ver de primeira man a necesidade de construír un paso máis amplo para os peóns.

A execución desta obra suporá a mellora do tráfico rodado na intersección de catro estradas, e contribuirá a incrementar os niveis de seguridade viaria. A aprobación do proxecto reformado de mellora da seguridade viaria na estrada DP 2205 supón unha gran mellora na seguridade dos peóns que saen de Bertamiráns e tamén para os que chegan a Bertamiráns vindo dende a zona da Tarroeira ou mesmo transitando pola Senda Verde.

Valoración do alcalde

O alcalde de Ames, Santiago Amor, valora moi positivamente a reforma do proxecto e o feito de que se contemple unha continuidade na beirarrúa despois da ponte “pois doutro xeito os viandantes terían que camiñar directamente pola estrada, co perigo que iso implica”. Santiago Amor expresou o seu agradecemento á Deputación Provincial da Coruña pola sensibilidade que tivo á hora de dotar dunha beirarrúa un tramo que sen ela, sería perigoso para os viandantes.

Esta medida de peatonalizar ese tramo pretende potenciar a seguridade tanto en dirección aos núcleos coma en dirección á zona aos terreos da Red Natura que están preto.

Oroso – concurso de receitas

O CONCELLO DE OROSO CONVOCA O CONCURSO DE RECEITAS DE ENTROIDO “EN GALEGO SABE MELLOR”

O gañador levará unha cea para dúas persoas no restaurante Cortés e o prazo de presentación remata o 14 de febreiro

18 de xaneiro de 2012.- O Concello de Oroso convoca o concurso de receitas de entroido “En galego sabe mellor”, unha iniciativa que chega este ano á súa terceira edición e coa que se busca combinar a recuperación de receitas tradicionais de entroido co uso da lingua galega. Por iso, o xurado non só valorará a presentación e a creatividade do prato, senón tamén o uso que se fai na receita do idioma galego.

O concurso está aberto para todos os veciños e veciñas de Oroso maiores de 16 anos, puidendo presentar ata un máximo de dúas receitas por participante. O gañador levará unha cea para dúas persoas no restaurante Cortés (Sigüeiro), mentres que o finalista acadará un libro de cociña. Ambas receitas serán publicadas posteriormente na páxina web municipal (www.concellooroso.com) para que así tamén as poidan saborear todos os internautas que o desexen.

As receitas deberán entregarse mecanografadas no centro cultural Fernando Casas e Novoa antes do vindeiro 14 de febreiro. Posteriormente, deberase presentar o prato cociñado da casa nunha data que será comunicada polo xurado con suficiente antelación. Os premios entregaranse o 18 de febreiro, ás 19:30 horas, nun acto aberto ao público no centro cultural de Sigüeiro. As bases do concurso poden recollerse no centro cultural ou descargarse da páxina web www.concellooroso.com.

Ames – programación teatral

Os veciños e veciñas de Ames poderán gozar dunha ampla programación teatral durante o primeiro semestre do ano 2012

Haberá 14 representacións teatrais repartidas entre Bertamiráns e O Milladoiro

Ames, 18 de xaneiro de 2012. A Concellaría de Cultura xa ten pechada a programación teatral do primeiro semestre deste ano. A veciñanza amiense poderá gozar de 14 representacións teatrais durante os meses de xaneiro, febreiro, marzo, abril, maio e xuño. Esta programación está repartida entre Bertamiráns e O Milladoiro. Ademais está pensada tanto para o público infantil como adulto. Deste xeito, nove representacións teatrais estarán dirixidas ao público infantil e cinco para o público adulto. Esta programación está incluída dentro das obras de teatro que ofrece a Axencia Galega das Industrias Culturais (AGADIC). Ao mesmo tempo o Concello de Ames forma parte da Rede Galega de Teatros e Auditorios, o que permite traer a Ames obras de teatro de gran calidade e sona.

O Concello de Ames ofrece a toda a veciñanza amiense unha ampla programación cultural para todos os públicos. Todas as fins de semana organízanse numerosas actividades nas Casas da Cultura de Bertamiráns e do Milladoiro. A estas actividades tamén se suman en moitas ocasións varias exposicións de pintura ou outro tipo de artes que normalmente se poden visitar no Pazo da Peregrina. Co obxectivo de ampliar esta programación o Concello de Ames forma parte da Rede Galega de Teatros e Auditorios.

Deste xeito, a Concellaría de Cultura xa ten pechada a programación de teatro para o primeiro semestre deste ano. Durante os meses de xaneiro, febreiro, marzo, abril, maio e xuño a veciñanza amiense poderá gozar de catorce representacións repartidas entre a Casa da Cultura do Milladoiro e de Bertamiráns. Esta programación está pensada tanto para o público infantil como para as persoas adultas.

Programación teatral para o primeiro trimestre de 2012

A programación de teatro comezou o pasado 13 de xaneiro coa representación da obra Cociña Económica, de Mofa e Befa. Nesta peza de teatro recréase un estudio de televisión onde se está gravando un programa de cociña. Reprodúcese o esquema que se segue en tantos programas nos que un cociñeiro de gran prestixio presenta á audiencia (que seguindo o ronsel destes programas suponse maioritariamente feminino) unha receita de execución simple e custo reducido. Neste programa Cociña Económica realízanse pratos de cociña internacional utilizando, exclusivamente, desfeitos sacados de colectores, pois o lema do programa é: Todo se come. Nada se Tira. Esta obra foi representada na Casa da Cultura de Bertamiráns e estivo dirixida ao público adulto.

A programación teatral continua coa obra infantil Dous pallasos en apuros a cargo da compañía Os 7 magníficos +1. Fran Rei e Pedro Brandariz, presentan un espectáculo que rende homenaxe ás farsas clásicas dos pallasos, pero adaptándoas á Galicia do século XXI. Dende a compañía Os 7 magníficos+1, Rei e Brandariz propuxéronse dignificar o traballo dos pallasos e recuperar o espírito que tiñan estes maestros do humor nos anos 40, cando decidiron deixar os circos para ocupar os teatros. Esta obra representarase o venres 27 de xaneiro, ás 19:00 horas, na Casa da Cultura do Milladoiro.

Para 10 de febreiro queda a obra Moito Conto da compañía Redrum Producións. Dirixida ao público familiar, a comedia musical Moito Conto está protagonizada por Mónica García, Guillermo Carbajo e Tamara Canosa, e baséase no conto Hansel e Gretel. Desta peza teatral faranse dúas representacións no auditorio da Casa da Cultura de Bertamiráns. Pola mañá, ás 11:00 horas, haberá unha sesión escolar, mentres que pola tarde, ás 18:30 horas, realizarase un segundo pase para o público infantil en xeral.

A programación teatral de febreiro complétase o venres 24, ás 21:00 horas, na Casa da Cultura do Milladoiro coa representación da peza teatral Citizen Completo, da compañía Chévere. Citizen fala da construción dun imperio económico desde a periferia. Fala de como utilizar o que nos ofrece a historia en beneficio propio, de como se constrúe a realidade coma se tratásese dun culebrón. É a biografía inventada dun personaxe real, Amancio Ortega, que se converte en escusa para falar, ironizar e cuestionar os efectos da globalización en relación coas nosas identidades colectivas e individuais. Esta obra está dirixida ao público adulto.

O mes de marzo comeza coa representación obra infantil Os limóns da compañía Galitoon. A peza, que se representará o venres 2 na Casa da Cultura do Milladoiro, é unha homenaxe á figura e a obra do artista galego Luís Seoane no centenario do seu nacemento. A historia está orientada a un público infantil, e relata a historia de dona Alicia, que colleu tres limóns e os coidou, limpou e mimou coma se fosen uns recén nacidos. Tempo despois, as froitas partiron para América co obxectivo de atopar a don Luís e traelo de volta á súa amada Galicia. A obra servirá para introducir aos cativos de entre catro e seis anos de idade no complexo mundo artístico e vital de Luís Seoane. Desta peza teatral tamén se farán dúas representacións. Pola mañá, ás 11:00 horas, haberá unha sesión escolar, mentres que pola tarde, ás 18:30 horas, realizarase un segundo pase para o público infantil en xeral.

O 23 de marzo, ás 21:00 horas, chega á Casa da Cultura de Bertamiráns a obra Último Comboy da compañía Teatro do Noroeste. Esta comedia aceda sobre a nosa realidade máis complexa e inmediata, segundo o seu autor e director, Eduardo Alonso, é a produción máis recente da compañía fundada por Alonso e por Luma Gómez. Un traballo que defenden no escenario, en todo un espectáculo actoral, a propia Luma e Miguel Pernas. Esta obra dirixida ao público adulto.

Programación teatral para o segundo trimestre de 2012

Para o segundo trimestre de 2012 quedan seis representacións teatrais. A compañía Galitoon representará o venres 13 de abril na Casa da Cultura de Bertamiráns a obra Rosalía, a pulga que escribía. A partir das 18:30 horas os máis pequenos de Ames poderán gozar con Rosalía, unha pulga que prepara unha festa sorpresa para un dos seus mellores amigos: Bruno, o canguro carteiro. A forma na que se vai ir organizando a festa e a sorpresa que levará Bruno farán as delicias dos rapaces e rapazas que asistan á representación.

A programación teatral continua o 27 de abril, ás 21:00 horas, na Casa da Cultura do Milladoiro coa representación da peza teatral O turista madrileño, da compañía Producións Teatrais Excéntricas, que está dirixida ao público adulto. Trátase dunha montaxe da compañía Producións Teatrais Excéntricas protagonizada polo actor Evaristo Calvo. O turista madrileño é un dos personaxes televisivos da serie Air Galicia, programa de humor emitido durante varias temporadas na Televisión de Galicia e gañador do Premio Mestre Mateo á mellor serie do audiovisual galego no ano 2008. Co seu polo rosa, riñonera e gorra de España, este personaxe amosa a súa particular visión do pobo galego.

Para o mes de maio están programadas outras dúas representacións teatrais. O 11 de maio o auditorio da Casa da Cultura de Bertamiráns acolle a peza de teatro infantil Ao ritmo da maxia, da compañía Fusionarte. Mentres que para o 25 de maio queda a obra Oeste solitario da compañía Producións Teatrais Excéntricas, que tamén se representa na Casa da Cultura de Bertamiráns.

A programación teatral rematará o 1 de xuño coa posta en escena da peza Moito conto da compañía Redrum Producións. Esta obra será representa na Casa da Cultura do Milladoiro en dous pases diferentes. Primeiro farase unha sesión escolar e posteriormente terá lugar outra representación para o público infantil en xeral.

Santiago – axenda xoves 19 e corte de tráfico

Xoves 19 11.00 h No Auditorio de Galicia, Concerto Didáctico da Real Filharmonía de Galicia dirixida por Maximino Zumalave. 12.00 h Na Casa do Concello, ROLDA DE PRENSA do concelleiro de Tráfico e Mobilidade, Albino Vázquez, sobre asuntos da súa área. 12.00 h No stand de Galicia en Fitur, o alcalde compostelán, Xerardo Conde Roa, e a concelleira de Turismo, Reyes Leis, presentan a Guía da Convention Bureau e o vídeo promocional de turismo. 21.00 h No Auditorio de Galicia, concerto da Orquestra Sinfónica de Galicia dirixida por Víctor Pablo Pérez con Patricia Kopatchinskaja, violín [Say, Grieg, Ketelbey, Nielsen]

Corte de tráfico nun carril da avenida do Camiño Francés Por mor das obras de construción dun túnel na avenida do Camiño Francés pecharase ao tráfico o carril sentido San Lázaro-centro cidade da devandita avenida no tramo comprendido entre a avenida de Xoán Pablo II e a rotonda de Rodríguez de Viguri. O corte terá lugar o vindeiro xoves, 19 de xaneiro, entre as 9.30 e as 21.00 horas. Deste xeito, os vehículos que queiran acceder ao centro da cidade desde San Lázaro serán desviados pola avenida de Xoán Pablo II - as Cancelas - praza de España. O outro sentido de circulación permanecerá aberto. O Concello de Santiago de Compostela prega aos cidadáns desculpen as molestias que esta alteración no tráfico lles poida ocasionar.

Brión – concesión de axudas a centros escolares

O CONCELLO DE BRIÓN CONCEDE UNHAS AXUDAS DE 7.000 EUROS PARA TRANSPORTES E ACTIVIDADES CULTURAIS NO CEIP DE PEDROUZOS E NO IES BRIÓN

17 de xaneiro de 2012. O Boletín Oficial da Provincia publica hoxe martes a concesión de sendas subvencións por parte do Concello de Brión aos centros educativos do municipio por un importe total de 7.000 euros. Unhas axudas dirixidas a proxectos educativos e culturais complementarios emprendidos polos centros educativos no ano 2011 co obxectivo de mellorar a calidade educativa dos centros e promocionar a cultura, o deporte e actividades relacionadas coa saúde, a paz, o medio ambiente ou a educación cívica.

Así, o CEIP de Pedrouzos recibirá 4.000 euros para o transporte dos alumnos, mentres que o IES Brión levará 3.000 euros para a financiación da biblioteca do centro e de actividades complementarias (exposicións, concertos didácticos, etc).

Silleda – o concello reclama pezas relacionadas co mosteiro de Carboeiro

O Concello de Silleda solicitará á Sociedade para o Desenvolvemento Comarcal as pezas e materiais relacionados con Carboeiro que se mostran en Expo Deza

-O concelleiro de Turismo, Matías Rodríguez da Torre, formula esta petición para a zona expositiva do edificio románico, ao ser coñecedor do definitivo desmantelamento da fundación comarcal

Silleda, 17 de xaneiro de 2012. O responsable municipal de Turismo de Silleda, Matías Rodríguez da Torre, vén de remitir á xerencia da Sociedade para o Desenvolvemento Comarcal de Galicia unha petición para trasladar ao mosteiro de Carboeiro material que se atopa exposto na sede da Fundación Comarcal (Expo Deza).

Esta solicitude xurde pola mudanza que se está a producir co desmantelamento definitivo do Centro de Exposicións e Recursos do Deza, sito xunto ao polígono de Lalín e para procurar que o material quede nun lugar da comarca “onde realmente teña aproveitamento”, dí o concelleiro. Na misiva, Da Torre incide na importancia do mosteiro de San Lourenzo de Carboeiro, como referente do románico en Galicia, o seu significado histórico e como elemento de identificación “que vai máis aló do municipio de Silleda, sendo considerado xa como un símbolo de toda a comarca dezá e mesmo da Galicia interior”, apunta.

O concelleiro de Turismo destaca que a día de hoxe figuran na sede de Expo Deza moitas pezas de pedra, cerámica o vidro, así como maquetas, paneis e outros materiais e recursos vencellados ao mosteiro románico que poderían amosarse no propio cenobio “polo seu gran valor e utilidade”.

Con estes elementos, ademais dalgunhas pezas de mobiliario, axeitaríanse para o espazo de exposicións habilitado nas dependencias do mosteiro. Na petición arguméntase así mesmo a importancia de Carboeiro como referencia para as persoas e turistas que se achegan ata a comarca, lembrando que a media de visitas nos últimos anos se situa en torno ás 8.000 só durante a tempada estival.

A través da Concellería de Turismo do Concello de Silleda propónse así a cesión e traslado dos obxectos ata Carboeiro “na crenza que tan só neste emprazamento tan singular se atenderían os obxectivos marcados de formar, informar aos visitantes e poñer en valor toda a riqueza que estas terras atesouran”, sinala Rodríguez da Torre.

BNG Negreira – o Bloque pide que se atendan antes as necesidades de Negreira que as de Santa Comba

O BNG PIDELLE Ó GOBERNO LOCAL QUE ATENDA ANTES AS NECESIDADES DE NEGREIRA, QUE AS DE SANTA COMBA

Solidaridade sí, pero primeiro cos veciños de Negreira.

Negreira, 17 xaneiro:

O BNG lémbralle ó Goberno Local que antes de solidarizarse con Santa Comba para defender arranxos nun vial, se solidaricen cos veciños de Negreira que sufren a diario as malas condicións de varias estradas. O voceiro nacionalista Antonio Ponte sinala que “está ben o espíritu solidario con Concellos veciños, pero antes hai que arranxar os problemas dos veciños de Negreira, que son os que lles pagan o soldo”.

Antonio Ponte critica o esquecemento de completar a ampliación da estrada Negreira-Pontenafonso, o pintado do perigoso traxecto entre A Pena e Xallas, que xa solicitou o BNG no mes de novembro, ou a entrada terceiromundista que presenta a aldea de Logrosa, entre outros exemplos.

Depuración de responsabilidades na desaparición de material do Concello.

O Bloque Nacionalista Galego de Negreira califica de inaceptable a desaparición de 27 teléfonos móbiles do Concello e insta ó Goberno local a investigar ata o fondo este asunto, recurrindo incluso á vía xudicial.

Según o voceiro nacionalista, Antonio Ponte, “os veciños merecen saber qué pasou realmente cos teléfonos móbiles propiedade do Concello e o Goberno local ten a obriga de aclarar o asunto e depurar responsabilidades.”

Oroso – novo local para a policia

O NOVO POLICÍA LOCAL DE OROSO INCORPORARASE AO SERVIZO NO ÚLTIMO TRIMESTRE DE 2012

O concelleiro de Seguridade Cidadá, Pepe Castro, asegura que “esta incorporación permitirá dar un servizo máis exhaustivo, sobre todo nas entradas e saídas dos colexios”

17 de xaneiro de 2012.- Oroso contará en breve cun terceiro axente de policía local, logo da finalización do proceso selectivo convocado en xaneiro de 2011 e que rematou no día de onte co nomeamento de Francisco Javier Mayobre Rodríguez como funcionario en prácticas (dentro da escala Administración Especial, subescala servizos especiais. Grupo C1). Logo de superar as cinco probas selectivas, este candidato ingresará na Academia Galega de Seguridade Pública para rematar a súa formación, consistente en 6 meses de formación teórica e outros 3 meses de prácticas no que será o seu destino final, Oroso. Deste xeito, Oroso contará cun novo policía local en outubro-novembro de 2012.

O concelleiro de Seguridade Cidadá, Pepe Castro, asegura que “esta incorporación permitirá dar un servizo máis exhaustivo á veciñanza, sobre todo en temas como a regulación do tráfico en Sigüeiro nas horas puntas ou nas entradas e saídas dos colexios”. Ademais, o incremento do plantel de axentes suporá tamén unha maior dispoñibilidade horaria dos mesmos.

Longa espera

Francisco Javier Mayobre Rodríguez superou as cinco probas da oposición libre convocada polo Concello de Oroso para a praza de policía local. Unha oposición á que concurriron un total de 74 persoas e na que houbo un empate a oito puntos na primeira posición, que finalmente se decantou por L.M.G.L. por ter conseguido unha mellor marca na proba dos 50 metros lisos: 6,49 fronte a 6,96). Sen embargo, L.M.G.L. renunciou o pasado xoves 12 de xaneiro ao seu nomeamento, polo que a Alcaldía resolveu nomear a Francisco Javier Mayobre Rodríguez para o posto.

A incorporación dun terceiro policía local xa estaba contemplada na oferta de emprego público do Concello de Oroso para o exercicio 2010, pero non puido ser cuberta xa que ningún dos aspirantes conseguíu superar todas as probas requeridas. Isto motivou que en marzo de 2010 o Concello de Oroso iniciase un novo procedemento que rematou onte luns co nomeamento do novo funcionario en prácticas. Agora, o seleccionado deberá superar un curso de formación teórico-práctico na Academia Galega de Seguridade Pública, así como un periodo de prácticas para a adquisición da condición de funcionario/a de carreira.

Teo – o concello reunirase cos sindicatos para falar dos orzamentos 2012

O CONCELLO DE TEO REUNIRASE COS SINDICATOS O PRÓXIMO LUNS PARA FALAR DO PROXECTO DOS ORZAMENTOS DO 2012

· Rafael Sisto destaca que “chama a atención a sensibilidade do PP cos sindicatos cando noutras administracións gobernadas por eles se están botando persoas á rúa”

17 de xaneiro de 2012. O alcalde de Teo, Martiño Noriega, ten convocada a mesa Xeral de negociación do persoal do Concello de Teo para o vindeiro luns 23 de xaneiro de 2012 ás 13:00 horas cun único punto na orde do día, que se tratará precisamente do Proxecto dos orzamentos municipais para este ano.

A esta reunión están convocadas as centrais sindicais (CIG, UXT e CCOO), o comité de empresa e os representantes dos traballadores. Todos eles teñen xa información sobre o estado de gastos e ingresos do proxecto de orzamentos, o anexo de persoal e o plan de saneamento económico-financeiro.

Así as cousas chama a atención que “antes desta reunión o Partido Popular de Teo critique a xestión do grupo de goberno neste punto”. Sen embargo “aínda chama máis a atención que sexa o Partido Popular o que pide sensibilidade cos sindicatos, cando se están vendo exemplos de administracións gobernadas por eles onde si se están tocando postos de traballo cubertos neste momento e se están poñendo a interinos na rúa, ademais de recortar outros dereitos sociais” explica Martiño Noriega.

Ames – notas mércores 18

Comeza o VI ciclo de conferencias de formación complementaria do IES de Ames Nesta edición realizaranse un total de doce conferencias, que se impartirán cada mércores ás 18:30 horas, na Casa da Cultura de Bertamiráns Ames, martes 17 de xaneiro de 2012. O IES de Ames pon en marcha mañá un novo ciclo de conferencias didácticas, que este ano se centrarán na temática da creatividade. Baixo o título A voltas coa creatividade os profesores e profesoras desde centro de ensino impartirán doce charlas abordando esta temática dende diferentes puntos de vista. A primeira charla, que leva por título Todos/as podemos ser creativos.... queres?, será impartida por Renata Otero, ás 18:30 horas, na Casa da Cultura de Bertamiráns. O Concello colabora con esta actividade do Instituto de Ames cedendo as instalacións da Casa da Cultura de Bertamiráns para as conferencias ás que está convidada toda a comunidade educativa e a veciñanza de Ames e que terán lugar os mércores ás seis e media da tarde. “Ciencia: causalidade e casualidade”, “Como se fan as matemáticas: Pascal e Turing”, “Consciencia e física cuántica”, “Creadores de mapas na época dos descubrimentos” ou “Arquitectura popular versus arquitectura moderna” son algúns dos títulos das charlas que os profesores e profesoras do IES de Ames ofrecerán ao longo deste curso dentro do Ciclo de Exposicións de Formación Complementaria que organiza o departamento de Filosofía e que este ano leva como título xenérico A voltas coa creatividade. O ciclo comeza mañá ás 18:30 horas na Casa da Cultura de Bertamiráns. Nesta edición realizaranse un total de doce conferencias, que se impartirán cada mércores ás 18:30 horas na Casa da Cultura de Bertamiráns. A primeira charla deste curso, que será impartida pola profesora Renata Otero, titúlase Todos/as podemos ser creativos.... queres? Precisamente, Renata Otero, foi a profesora que propuxo o tema da creatividade para que centrase o ciclo de conferencias deste curso. Anxo Sampedro, profesor de filosofía, e un dos creadores deste programa de conferencias, destaca a boa acollida desta iniciativa que xurdiu hai seis anos e que segue adiante debido á implicación dos profesores do IES de Ames. É o sexto ano que o departamento de Filosofía do IES, dirixido polo profesor Anxo Sampedro, organiza un ciclo temático no que implica á meirande parte dos profesores e profesoras do Instituto de Ames e de cuxas reflexións se beneficia toda a comunidade educativa. Non é a primeira vez pois que as familias dos alumnos e das alumnas, o propio alumnado e profesorado e a veciñanza de Ames asiste a un ciclo de exposicións complementarias como este. Nas edicións anteriores os temas sobre os que se traballou desde os distintos departamentos do Instituto foron os gregos, a ciencia, a auga, o amor e as viaxes. Este ano, profesores e profesoras de distintas disciplinas traballarán sobre a creatividade. Programa de conferencias As conferencias terán lugar os mércores ás seis e media da tarde, agás aqueles que coincidan con períodos de vacacións ou épocas fortes de avaliacións. O Concello cede as instalacións da Casa da Cultura de Bertamiráns para desenvolver o ciclo que continuará o mércores 25 de xaneiro coa conferencia “Ciencia: causalidade e casualidade” a cargo do profesor Suso Fidalgo. Para o 1 de febreiro, José Alberto Berriochoa ten previsto expoñer a conferencia “Como se fan as matemáticas: Pascal e Turing”. A quenda será a continuación para o profesor Antonio Vázquez, que o día 8 de febreiro abordará a relación que hai entre a consciencia e a física cuántica. “Creadores de mapas na época dos descubrimentos” é o título da exposición da profesora Pilar Tobar que terá lugar o 15 de febreiro. O 29 de febreiro, Rosa M. Ferreiro falará de “Arquitectura popular versus arquitectura moderna”. Lucinda Sousa inaugurará o mes de marzo, o día14, impartindo a conferencia “As forzas creativas da lingua inglesa”. Xa no mes de abril, o día 11, Federico Bouza ofrecerá a charla ¡Socorro: son creativo!. Para o día 18 do mesmo mes está previsto que o profesor Fernando Sainz ofreza a conferencia “A creatividade do creador na pintura”. O mércores 25, Anxo Sampedro, director do departamento de Filosofía e alma máter na creación do ciclo falará de “Entre o apolíneo e o dionisíaco”. En maio, o día 9, Sonia Rohrer exporá a charla “Excéntricos e orixinais” e o día 23 Margarita Olivar dirixirá unha sesión de lecturas estimulantes na Biblioteca do IES de Ames. Nesta última xornada realizarase unha exposición comentada de libros. Esta última sesión do ciclo incluirá, como xa ven sendo tradicional, unha degustación culinaria que leva por nome “Creando sabores”.

Familias de acollida organizan unha cea solidaria para recadar fondos para traer  a Galicia nenos saharauís no verán Familias de acollida dos concellos de Ames, Santiago, Brión, Negreira e Val do Dubra organizaron unha cea para recadar fondos e conseguir traer no verán a Galicia uns 80 nenos e nenas saharauís Ames, 17 de xaneiro de 2012. O Concello de Ames colabora co programa Vacacións en Paz que leva a cabo a Asociación Solidariedade Galega co Pobo Saharauí, a través do cal as familias do municipio poden acoller durante os meses de xullo e agosto nenos e nenas saharauís que viven nunha situación complexa nos campamentos de refuxiados de Tindouf en Alxeria. Coma o de Ames, son moitos os concellos de toda Galicia que colaboran con esta boa causa e este ano traerán 2 avións cheos de nenos e nenas que poderán pasar o verán na nosa comunidade. Con todo, familias de acollida a través da asociación Solidariedade Galega co Pobo Saharauí están organizando numerosos actos por toda Galicia para poder traer un terceiro avión e igualar así a cifra de nenos e nenas saharauís que viñeron o ano pasado. As familias de acollida dos concellos de Ames, Santiago, Brión, Negreira e Val do Dubra organizaron unha cea para recadar fondos e conseguir traer no verán a Galicia uns 80 nenos e nenas saharauís. A cea será o próximo día 4 de febreiro no restaurante Balboa de Santiago de Compostela ás 21,30 horas. O prezo da cea para os adultos é de 25 euros mentres que para os nenos é de 10 euros. A recadación irá destinada ao financiamento dos billetes dos nenos saharauís que veñen a Galicia da man do Programa Vacacións en Paz. Para asistir á cea pódese contactar con Esther Ybarra, portavoz da asociación Solidariedade Galega co Pobo Saharauí no teléfono 609 76 49 45. O Concello de Ames asinou de novo este ano un convenio coa asociación Solidariedade Galega co Pobo Saharauí a través do cal durante os meses de xullo e agosto de 2012 virán ao concello tres nenos saharauís. Dúas familias de acollida repiten a experiencia e para outra das familias será a primeira vez que reciban un neno saharauí. A concelleira amiense de Servizos Sociais, Familia, Dependencia e Maiores, Dolores Fernández, fai un chamamento para que todos os que poidan que se acheguen a esa cea xa que “axudando entre todos podemos conseguir un gran sorriso nos nenos e nenas saharauís e abrir unha nova ventá no mundo para eles”. A crise humanitaria que se vive nos campamentos dos que proceden os nenos é cada vez maior, de aí xorde a iniciativa de intentar incrementar o número de menores saharauís que poidan acollerse ao programa que os trae a Galicia.

Podes inscribirte na II Andaina Concello de Ames ata o vindeiro venres 20 de xaneiro Ames, 17 de xaneiro de 2012. O Concello de Ames, a través da brigada de restauración de marxes fluviais e forestal dependente da concellería de Medioambiente, Desenvolvemento Sostible e Sanidade, limpou durante os últimos meses as marxes fluviais do Rego dos Pasos. Agora vai promover unha nova ruta para dar a coñecer este fermoso entorno natural. O vindeiro domingo 22 de xaneiro levarase a cabo a II Andaina Concello de Ames co lema “Camiña pola conservación do río” e coa finalidade de ofrecer unha nova ruta neste municipio e de concienciar ás persoas da importancia de colaborar no mantemento e conservación do entorno natural. A II Andaina Concello de Ames partirá ás 11.00h do aparcamento de Carrefour que está a carón do paseo fluvial de Bertamiráns para facer un percorrido aproximado de 6 quilómetros. As incripcións deben facerse ata o venres día 20 de xaneiro no departamento de medio ambiente situado na Casa do Concello, nos teléfonos 660 004 665 ou 662 377 544 entre as 9.00h e as 21.00h ou no correo electrónico medioambiente@concellodeames.org. O Concello de Ames organiza a II Andaina co lema "Camiña pola conservación do río" que se celebrará o próximo 22 de xaneiro a partir das 11.00 h. Trátase de promocionar unha nova ruta que percorre uns seis quilómetros a carón do Rego dos Pasos. A dificultade da ruta é baixa, polo que con calzado e roupa cómodos é sinxela de facer. Recoméndase levar auga e comida xa que se prevé facer unha parada na metade da ruta, nos muíños de Pousada. O Rego dos Pasos O Rego dos Pasos é un regato que percorre varios quilómetros do municipio amiense dende a parroquia de Ames ata a localidade de Bertamiráns, onde desemboca no río Sar. O Concello de Ames, a través da concellería de Medioambiente, Desenvolvemento Sostible e Sanidade, comezou a limpeza do Rego dos Pasos a principios do mes de setembro e rematará a finais deste mes. As principais actuacións que se levaron a cabo son a retirada de madeira das árbores que estaban caídas no río, a roza das marxes fluviais en zonas de entre un e tres metros, a retirada de madeira, follas e pequenos materiais orgánicos acumulados nas raíces das árbores da ribeira debido á corrente da auga. Tamén se levou a cabo a retirada de residuos sólidos orgánicos que foron aparecendo por todo o cauce así como a eliminación de especies invasoras. A importancia de manter a ruta A importancia da nova ruta radica principalmente en que a xente que se anime a camiñar por ella pode contribuír á conservación do entorno coa recollida de residuos ou avisando ao Concello da caída de árbores ou de posibles problemas que se poidan atopar. A concelleira de Medioambiente, Eugenia Martín Vicente, explicou que " dende o Concello de Ames se está a traballar para coidar o medioambiente, e para a súa conservación". A concelleira anima a todo o mundo a que participe na II Andaina Concello de Ames " na que unha técnico municipal dará unha pequena charla sobre aspectos relacionados coa ruta e coa limpeza levada a cabo nas marxes fluviais".