O SERVIZO DE EMERXENCIAS DE BRIÓN EXTINGUE UN LUME FORESTAL EN AMES A PETICIÓN DO DISTRITO FORESTAL III SANTIAGO-MESETA INTERIOR
O alcalde de Brión critica que “a Consellería do Medio Rural non cumpre coa súa apotación ao SEBRI pero despois nos chama para atender un lume noutro concello porque non dispoñen de medios”
12 de xaneiro de 2012.- O Servixo de Emerxencias e Protección Civil de Brión (SEBRI) participou na noite de onte mércores na extinción dun pequeno lume forestal no veciño municipio de Ames, que non tivo apenas consecuencias materiais pola súa escasa entidade. Ás dez da noite, a central do SEBRI en Pedrouzos recibiu unha chamada do Distrito Forestal III Santiago-Meseta Interior na que avisaba do devandito incendio e solicitaba a intervención dos operarios brioneses ante a imposibilidade de atender a situación.
O alcalde de Brión, Xosé Luís García, critica o feito de que “a Consellería do Medio Rural non cumpra coa súa aportación ao SEBRI, pero despois nos chama para que atendamos un lume noutro concello porque eles non dispoñen dos medios precisos. Parecería unha broma se non estiveramos a falar dun tema tan serio”. Neste sentido, o alcalde brionés recolle tamén a incredulidade do persoal do SEBRI diante da actitude de Medio Rural, que recurta as axudas pero despois ten que solicitar axuda por non poder atender os sinistros.
O Concello de Brión recibiu o 28 de decembro unha carta da Consellería do Medio Rural na que “nos dicían que non ían renovar as axudas que se viñan concedendo ata agora para subvencionar aos tres traballadores do persoal estable do SEBRI para 2012 e nos anunciaban que non tiñan intención de aboar os 25.000 euros correspondentes ao ano 2011”, apunta Xosé Luís García. “Parece unha inocentada pero é algo moi serio pois nós tivemos que adiantar eses cartos para pagar as nóminas dese ano e agora non imos recibir a parte comprometida, polo que temos que asumir eses 25.000 euros”, explica o alcalde brionés.
Coherencia
O alcalde de Brión fai un chamamento á responsabilidade dos responsables da Xunta, xa que a política de defensa do medio rural contra os lumes non pode ser implementada de xeito aillado, senón integrándose nun contexto máis amplo de planificación do territorio e comprometendo a todas as administracións, tal e como recolle a propia Consellería do Medio Rural na súa páxina web.
O Servizo de Emerxencias e Protección Civil de Brión está composto por un total de 16 efectivos, dos cales 1 é o xefe de Protección Civil (posto asumido polo Concello de Brión), tres son persoal estable (oficiais-xefes de grupo cuxos salarios estaban subvencionados polo Concello de Brión e a Consellería de Medio Rural) e as outras 12 persoas están encadradas dentro do apartado de persoal eventual (3 oficiais-capataces e 9 peóns contratados en colaboración coa Consellería de Traballo e Benestar e cuxo contrato rematou a 31 de decembro –aínda que seguen a colaborar como membros da Agrupación de Protección Civil de Brión).
O parque móbil do SEBRI está composto por 4 vehículos (1camión forestal, 1 coche de mando, 1 vehículo de intervención con bomba e 1 camión urbano). De entre todos eles destaca ese camión urbano, unha Bomba Urbana Lixeira (BUL) que dispón dun equipamento tan completo que o fan o vehículo ideal para todo tipo de intervencións. Trátase dun gran camión de 9 toneladas, con 240 cabalos de potencia e con capacidade para 2.000 litros de auga, é dicir, 5 veces máis que as tradicionais “pick-up” que prestan os seus servizos noutros municipios.
O SEBRI realizou en 2011 un total de 356 intervencións, das que case a metade se corresponden con extinción de lumes e actuacións en accidentes de tráfico. De feito, se excluimos as pequenas actuacións realizadas en Brión (desatasco de sumidoiros, apertura de portas, desconexións de alarmas...), as 171 actuacións en extinción de lumes e accidentes de tráfico representan o 81,8% da actividade realizada polos efectivos do SEBRI. Unhas importantes actuacións que, xeográficamente, se concentraron en Brión (105 intervencións) e Ames (68 actuacións), o que representa o 82,7% dos casos rexistrados. Ademais, os operarios do SEBRI tamén realizaron actuación en Teo (16), Santiago (9), Rois (5), Negreira (4), Padrón (2) e Boiro (2).
