TEO – DESENVOLVEMENTO POLIGONO DA RAMALLOSA

O CONCELLO DE TEO COMEZA A TRABALLAR NO DESENVOLVEMENTO DO POLÍGONO INDUSTRIAL DA RAMALLOSA

· O concelleiro de Urbanismo, Rafael Sisto, explica que está aberto un prazo que remata o 7 de outubro para que os empresarios locais interesados poidan presentar no Concello unha declaración de necesidade

· Esta semana representantes do Concello mantiveron unha xuntanza con empresarios teenses para falar do estudo de custes do proxecto e da necesidade real do polígono

24 de setembro de 2011. O concelleiro de Urbanismo do Concello de Teo, Rafael Sisto, mantivo unha xuntanza esta semana con empresarios teenses na que o principal punto de debate foi o futuro desenvolvemento do polígono comercial e industrial da Ramallosa.

Esta superficie está destinada no PXOM teense a solo industrial, e para o Concello “é unha das prioridades en materia urbanística xa que permitirá fomentar a creación do emprego e solucionar outros problemas endémicos en Teo como a deslocalización das empresas en espazos que non eran os axeitados dende un punto de vista urbanístico” destaca o edil de Urbanismo.

Neste momento estanse dando os pasos necesarios para a posta en marcha do que sería o primeiro polígono industrial en Teo. Na reunión desta semana con empresarios tratáronse dous temas de xeito pormenorizado. Os representantes municipais presentaron un estudo de costes para o desenvolvemento do polígono. Este era un dos compromisos nos que quedara o Concello cos empresarios despois dunha xuntanza previa antes das eleccións locais. Na última reunión tamén se falou do calendario e dos prazos do propio procedemento administrativo de posta en marcha do polígono.

A principal conclusión desta xuntanza, que dende a departamento de Urbanismo “se valora moi positivamente” foi a apertura dun prazo que rematará o 7 de outubro para que as persoas con actividade comercial ou empresarial en Teo poidan presentar no Concello unha declaración de necesidade en referencia ó polígono. Calquera persoa interesada no tema pode achegarse ás oficinas municipais de Urbanismo para solicitar a información sobre este proceso.

Con esto preténdese “determinar o interese real do tecido empresarial, o que lle permitirá ó Concello seguir traballando no desenvolvemento do solo industrial” explica Rafael Sisto, que se amosa confiado en que a “a resposta do empresariado sexa suficiente para poder seguir adiante”.

En paralelo a esto o Concello tamén remitirá unha carta a todo os propietarios do solo destinado a solo industrial preguntándolles polo seu interese por desenvolver algunha actividade comercial ou industrial.

O polígono industrial da Ramallosa localízase no SUND-12, no extremo da parroquia de San Xoán de Recesende sobre a AC-841. A área destinada a uso industrial é unha superficie bruta de 120.000 metros cadrados.

SANTIAGO – ORZAMENTOS 2012

A concelleira de Facenda anuncia uns orzamentos 2012 axustados, eficaces e con teito de gasto

23/09/2011 O Concello de Santiago acumula unha débeda financeira de case 70 millóns de euros e ten outros 30 millóns de euros de facturas pendentes, segundo indicou en rolda de prensa a concelleira de Facenda e Orzamentos, Cecilia Sierra. Estas cifras lévana a cualificar como "delicada" a situación das contas municipais, e de aí os axustes que está a realizar o Goberno municipal para "encauzar a situación económica".

Cecilia Sierra apuntou que a débeda bancaria a longo prazo está actualmente nuns 60 millóns de euros, aos que hai que engadir os case 1,7 millóns de euros de deducións da participación nos ingresos do Estado de 2008, os 6,3 millóns de deducións polo mesmo concepto de 2009, outros 1,1 millóns de avales a executar e unha operación a curto prazo do Auditorio de Galicia por 600.000 euros. En total, case 70 millóns de euros de débeda financeira.
Outro capítulo ao que se referiu a edil foi o das facturas pendentes. Así, citou 18,5 millóns de euros de facturas xa aprobadas, outros 8 millóns de facturas en proceso de aprobación e 3,5 millóns de facturas aínda non contabilizadas polo Concello. Isto sumaría uns 30 millóns de euros. Sumada á débeda financeira, Sierra situou a débeda total en 100 millóns de euros.
Lamentou especialmente o prexuízo que esta situación está a crear a provedores, xa que, segundo denunciou, "os períodos medios de pago aumentaron tanto no último ano que hai facturas sen pagar mesmo de novembro de 2010, ou sexa, cunha antigüidade". Isto tamén vai "en detrimento da solvencia e da credibilidade do Concello", engadiu.
Ante esta situación, o Concello adoptou unha "medida de choque", como foi a aprobación dunha operación de tesourería por importe de catro millóns de euros. Esta decisión –dixo a concelleira- permitirá "adiantar o máximo posible os pagos a esas empresas que teñen prestado servizos ao Concello e que en moitos casos teñen graves dificultades económicas". De feito, prevé que nunha ou dúas semanas ese diñeiro estea nas arcas municipais. Aclarou que esta operación de crédito é a curto prazo, de dous ou tres meses de duración, xa que está suxeita aos ingresos do IBI.
Orzamentos 2012
Xa cara a elaboración dos orzamentos 2012, Cecilia Sierra indicou que os concelleiros xa saben cal será a partida básica que deberán de manexar. Realizados os axustes necesarios, afirmou que o obxectivo é ter aprobadas as contas antes do 31 de decembro. Anunciou uns orzamentos marcados pola "eficacia e a eficiencia" e nos que "os gastos estarán axustados aos ingresos". Neste sentido, denunciou que, dende 2007, os gastos se incrementaran nun 6,27% (4,5 millóns de euros), mentres os ingresos decreceran un 7,75% (7 millóns). Fronte a isto, o Goberno municipal fixará un teito de gasto para toda a lexislatura.
Na elaboración destes orzamentos para 2012 participará un "equipo de planificación estratéxica", formado polos concelleiros e os responsables da Intervención e da Tesouraría. A súa función será non só perfilar as contas do seguinte exercicio, senón "vislumbrar obxectivos máis alá", trazando unha planificación para vindeiros exercicios.

OROSO – ACTUACIONS MUSICAIS HOXE SÁBADO

OROSO CELEBRA  O CONCERTO DE MÚSICA CORAL DE VILARROMARIZ, O FESTIVAL FOLK “BUXOS VERDES” E O BAILE PARA A TERCEIRA IDADE

As tres actividades están incluídas nos actos de celebración do certame internacional GoisOroso Artes 2011, que abre as súas portas dende hoxe venres

23 de setembro de 2011.- A música e o baile serán os grandes protagonistas en Oroso da xornada de mañá sábado 24 de setembro, declarao “Día das parroquias” dentro da programación cultural co gallo da celebración do certame internacional GoisOroso Artes 2011, que abre as súas portas na noite de hoxe venres e ata o 11 de outubro. Así, durante a tarde-noite do sábado terán lugar o festival folclórico “Buxos Verdes” en Senra (17:30 horas), o baile para a terceira idade en Sigüeiro (19:30 horas) e un concerto de música coral en Vilarromariz (21:15 horas). Todos eles son de entrada libre e de balde.

Así, a carballeira de Senra acollerá a partir das 17:30 horas o Festival Folclórico “Buxos Verdes”, organizada por esta agrupación musical da parroquia de Senra en colaboración co Concello de Oroso e a Deputación da Coruña. Un festival que contará coa participación da agrupación folclórica “Colexiata do Sar” (Santiago), do grupo “Lembranzas do Tambre” (Sigüeiro), do grupo de gaitas de “O Castro” (Figueiras), da asociación de pandereteiras “Silandeira” (San Julián de Sales) e da coral de Góis. A agrupación “Buxos Verdes”, composta por veciños e veciñas das parroquias de Senra e Cardama, porán o punto e final ao festival.

Así mesmo, a partir das 19:30 horas, o centro cultural Fernando Casas e Novoa de Sigüeiro acollerá o tradicional baile mensual de maiores. O grupo Sintonía será o encargado de animar unha velada que a Concellería de Servizos Sociais retoma despois do parón veraniego. Estes bailes, cuxa entrada é totalmente libre e de balde, volverán celebrarse os últimos sábados de cada mes.

A terceira e última cita coa música terá lugar a partir das 21:15 horas na parroquia de Vilarromariz. O local social de Vilarromariz acollerá un concerto de Música Coral organizado pola agrupación cultural “Néboas” (Sigüeiro). Un concerto no que actuarán a Coral ER de Gois (Portugal) e a propia agrupación musical “Néboas”.

SANTIAGO – O LUNS A VENDA AS ENTRADAS PARA “O BARBEIRO DE SEVILLA”

Con esta ópera de Rossini ábrese a temporada de abono do Auditorio de Galicia

Luns póñense á venta as entradas soltas para ‘O Barbeiro de Sevilla’

• As entradas poderán mercarse a partir das 12.00h da mañá do luns na web de Novacaixagalicia ou no teléfono de venta anticipada 902 434 443

• As que queden dese día, xunto con un grupo de entradas de visibilidade reducida, poñeránse á venda xa o martes na billeteira do Auditorio a partir das 12.00h

Santiago de Compostela, 23/09/2011.- O Auditorio de Galicia e a Real Filharmonía de Galicia inauguran a súa temporada de abono o vindeiro mércores, día 28 de setembro ás 20.00h coa ópera ‘O Barbeiro de Sevilla’. Unha vez rematado o proceso de abonos, póñense á venta as entradas soltas para poder asistir á ópera, que se repite en segundo pase o venres día 30. Así, o luns a partir das 12.00h todo aqueles que queiran mercar as súas entradas poden facelo na web de entradas de Novacaixagalicia e no teléfono de venta anticipada 902 434 443. E o martes a partir das 12.00h poñeranse á venda as entradas que queden xunto cun número de entradas de visibilidade reducida xa na billeteira do Auditorio en horario de 12 a 14 e de 17 a 20h. O prezo das entradas é de 20€ as xerais cun desconto do 50% para estudantes e xubilados; e de 10€ as entradas de visibilidade reducida.

‘O Barbeiro de Sevilla’, ópera de G. Rossini, é unha coproducción do Auditorio de Galicia xunto coa Real Filharmonía de Galicia que conta co patrocinio de Eroski Center e o 800 Aniversario da Catedral. A Real Filharmonía, dirixida por Antoni Ros Marbá, interpretará a ópera acompañada de Alfredo García, Fígaro; Alessandra Volpe, Rosina; Juan Antonio Sanabria, Conde Almaviva; Paolo Bordogna, Bartolo; Simón Orfila, Don Basilio; Leticia Rodríguez, Berta; Axier Sánchez, Fiorello; e o Coro Capela Compostelana. Todos baixo a dirección de escena de Curro Carreres e con escenografía de Sergio Loro; iluminación de Baltasar Patiño; vestiario de Gabriela Salaverri e coreografía de Antonio Perez.

PSOE – PIDESE INVESTIGACIÓN POLO ACCIDENTE NUN COLEXIO DE ORDES

O GRUPO PARLAMENTARIO SOCIALISTA INSTA Á CONSELLERÍA DE EDUCACIÓN A INVESTIGAR O ACCIDENTE NO ELEVADOR DO COLEXIO CASTELAO DE ORDES

Diante da alarma causada na comunidade educativa, Silvia Fraga e Xesús Pedreira queren que a Xunta investigue se o accidente foi froito dunha falta de dilixencia, dunha mala instalación ou dunha combinación de infortunios

Solicitan unha revisión autonómica de todos aqueles aparatos elevadores de características similares ao que se desprendeu no CEIP Castelao de Ordes

23 de setembro de 2011.- Silvia Fraga Santos, deputada no Parlamento de Galicia, e Xesús Pedreira Mirás, secretario xeral da Agrupación Socialista de Ordes, presentaron esta mañá na sede dos socialistas ordenses dúas iniciativas parlamentarias dirixidas a esclarecer o accidente acontecido o pasado martes 20 de setembro, cando o desprendemento dun salva-escaleiras feriu a un alumno con problemas de mobilidade que neses intres o estaba utilizando.

Xesús Pedreira indicou que “o máis importante de todo é que, afortunadamente, o rapaz evoluciona favorablemente dun accidente que puido ter unhas maiores consecuencias, e que tamén causou unha lóxica preocupación e alarma entre toda a comunidade educativa de Ordes xa que o grado de seguridade das instalacións do centro quedou en cuestión”. Por iso, o Grupo Parlamentario Socialista vén de presentar diante da Mesa do Parlamento unha proposición non de lei e unha pregunta para a súa resposta en Comisión sobre este accidente.

“Nós non estamos culpando a ninguén do accidente, pero queremos que a Consellería de Educación investigue como é posible que unha instalación que apenas leva un ano en fucionamento faie e se desprenda deste xeito”, sinala Silvia Fraga. A parlamentaria socialista insiste en que “queremos saber se o que pasou no Castelao é froito unha falta de dilixencia, dunha mala instalación ou dunha desgraciada combinación de infortunios, porque a comunidade educativa de Ordes merece unha resposta”.

Reposición e revisión

Nas súas iniciativas, o grupo parlamentario socialista esíxelle á Consellería de Educación que informe se o aparato elevador ten pasado as revisións correspondentes e se a Xunta revisa o estado destes aparellos nas datas previas ao comezo do curso. “Esperemos que as instalacións pasaran todos os controis pertinentes poi non queremos pensar que a austeridade do Goberno Feijoo chegue a estas materias, aínda que certo é que dende a chegada do PP á Xunta se reduciu considerablemente o investimento en educación”.

Por iso, os socialistas tamén esixen a reparación inmediata do aparato elevador do CEIP Castelao ou a súa reposición por outro para que estea canto antes en funcionamento para dar servizo ao alumnado con problemas de mobilidade que estuda no centro. Así mesmo, solicitan unha revisión de todos aqueles aparatos elevadores de características técnicas similares ao do CEIP Castelao que poida haber instalados en Galicia.

Moción plenaria

Por último, Xesús Pedreira confirmou que o vindeiro xoves 29 de setembro presentará diante do Pleno de Ordes unha moción para recabar o apoio de todos os concelleiros do municipio á realización dunha investigación sobre o accidente no salva-escaleiras do colexio Castelao. Pedreira insiste en que a Consellería de Educación ten que garantir a seguridade e a integridade física do alumnado ordense e agarda conseguir o apoio de todos os grupos políticos municipais á súa proposta.

SANTIAGO – AXENDA 24 SEPTEMBRO

Sábado 24

10.00 h

No Paseo Central da Alameda, o alcalde compostelán, Xerardo Conde Roa, inaugura as V Xornadas de Voluntariado e Dano Cerebral, no marco do Ano Europeo de Voluntariado.

12.00 h

Na Praza do Obradoiro, o alcalde compostelán, Xerardo Conde Roa, asiste á I Concentración de Vehículos Históricos “Compostela Monumental”.

21.00 h

No Teatro Principal, Lagarta Lagarta representa 'Unha hora na vida de Stefan Zweig' de Antonio Tabares. Dirección de Rosa Álvarez. Con Ernesto Chao, Belén Constenla e César Cambeiro. [RGTA]

VII Semana Cultural da Rocha

FESTA DA SANTA EUFEMIA

Xogos tradicionais coa Asociación do Xogo Tradicional de Compostela (xogo da chave, misa, grupo de baile As Revoltas de Conxo, sardiñada e dúo Gran Marea).

Organizan: Asociación de Veciños “Serafín Zas” e Asociación Cultural “Rocha Forte”.

Domingo 25

12.00 h

Na Rúa do Vilar, concerto da Banda Municipal de Música dirixida por Xosé Carlos Seráns.

Luns 26

12.00 h

Na Casa do Concello, ROLDA DE PRENSA do concelleiro de Tráfico e Mobilidade, Albino Vázquez, sobre asuntos da súa área.

12.30 h

Na Casa do Concello, a voceira da Xunta de Goberno Local, Paula Prado, exporá en ROLDA DE PRENSA o resumo dos acordos adoptados na última sesión.

13.00 h

En San Lázaro (edificio do Cersia), o alcalde compostelán, Xerardo Conde Roa, inaugura a Aula Multimedia do Cersia, incluída na Rede CeMIT (Rede de Centros para a Modernización e Inclusión
Tecnolóxica).

17.00 h

Na Casa do Concello, o alcalde compostelán, Xerardo Conde Roa, recibe a viúva de Fernando Múgica, María Pilar de las Heras.

18.00 h

Na Casa do Concello, o alcalde compostelán, Xerardo Conde Roa, reúnese coa xerente da Praza de Abastos, Marta Rey, e o presidente da cooperativa da praza, José Fernández.

20.00 h

Na Casa do Concello, o alcalde compostelán, Xerardo Conde Roa, reúnese co presidente de Acotés, Antonio Pérez Casas, e membros da xunta directiva.

SD BANDEIRA – I XUNTANZA

A Sociedade Deportiva Bandeira celebra unha xuntanza de confraternidade o vindeiro día 15 de agosto

-Membros da directiva do clube e o tenente de alcaldesa, Manuel Cuíña, presentaron hoxe o programa de actos

Silleda 23 de setembro de 2011. A Sociedade Deportiva (SD) Bandeira celebrarán a súa primeira xuntanza de confraternidade o vindeiro sábado 15 de outubro, unha cita na que se pretende reunir aos antigos directivos e integrantes do clube. As actividades comezarán pola tarde, a partir das 16.00 horas, cun partido de liga xuvenil entre o equipo anfritrión e o Calo B. Tamén sobre a mesma hora terá lugar a apertura da mostra fotográfica titulada Percorrido pola historia da S.D. Bandeira, no que figuran imaxes históricas recopiladas por membros da directiva do clube, algunhas delas dos anos 30 (década na que se fundou a entidade); cincuenta, setenta e da época actual, así como un libro de socios que data de 1945.

Ás 18.30 horas celebrarase o partido de Vellas Glorias e ás 20.00 horas haberá unha sesión de xogos tradicionais. A xornada rematará cunha cea de confraternidade (ás 22.00 horas) nas inmediacións do campo baixo a carpa que instalará o Concello de Silleda. O menú estará composto por empanada, carne ó caldeiro, postre, bebidas e café. O prezo é de 18 euros por persoa (gratis para os menores de 8 anos). As entradas poden retirarse ata o 11 de outubro nos bares da Bandeira (Arume, Trécola, Plazoleta, Bernabé, Hotel Victorino, A de Tachy, A de Filo, Zaux e Vinoteca Cadeira). Esta cea servirá tamén para recaudar fondos para o clube. “Queremos xuntar aos antigos membros aos actuais e tamén a futuros xogadores”, comentou na presentación José Manuel Espiño, entrenador do clube.

Pola súa banda, o concelleiro Manuel Cuíña, que tamén foi presidente do clube, amosou o apoio do Concello de Silleda na medida das súas posibilidades a esta entidade deportiva, destacando ademais esta xuntanza na promoción das actividades deportivas.

Ademais de Cuíña e Espiño participaron na presentación os membros da directiva Brais Cangas, Diego Brey, José Gómez e Andrés Gayoso.

(pé de foto, pola esquerda Brais Cangas, Diego Brey, Manuel Cuíña, José Manuel Espiño, José Gómez e Andrés Gayoso)

SANTIAGO – FASHION VICTIM DE IVAN PRIETO UNHA SEMANA MÁIS

A mostra, inaugurada o pasado 6 de xullo, pecharase o domingo 2 de outubro

‘Fashion Victim’ de Iván Prieto, permanecerá aberta unha semana máis polo éxito de público

• A intervención ía pechar inicialmente o vindeiro 25 de setembro pero o gran número de público provoca que permaneza aberta unha semana máis.

Santiago de Compostela, 23/09/2011.- ’Fashion Victim’ de Ivan Prieto permanecerá aberta na Zona “C” unha semana máis debido ao éxito de público. Así, en lugar de pechar este domingo, como estaba previsto inicialmente, pechará o vindeiro domingo, día 2 de outubro e poderá verse en horario de 11.00 a 14.00 e de 16.00 a 20.00h todos os días, agás o luns.

A comisaria da intervención, Cristina Moreiro explica que ‘a expresión Fashion Victim utilízase para referirnos a aquelas persoas que son vítimas da moda e que se guían polos canons de beleza establecidos. A intervención de Iván Prieto na Zona “C” pretende reivindicar precisamente o contrario, para demostrar o desacerto daqueles que tratan de marcar unhas pautas estéticas determinadas’. ‘Na sociedade actual valórase cada vez máis a imaxe que un proxecta de si mesmo, aínda que esta non sexa do todo real. Atendemos en exceso ás aparencias, buscando unha aceptación social aínda que para iso teñamos que mimetizarnos cos nosos semellantes e renunciar, por tanto, á nosa singularidade’ engade Moreira.

Así, o que Iván Prieto reflexiona neste sentido, en palabras de novo de Moreira, é que o interesante é ‘a beleza do erroneamente considerado como feo’ Por iso, para demostrar o seu verdadeiro potencial ‘pon ante a nosa mirada seres mutilados, híbridos, con deformacións físicas… que nos fan sentir violentos nun primeiro momento pero ao mesmo tempo atráennos. Son tipos iconográficos que resultan curiosos e repletos dunha fermosura atípica que os fai únicos. As súas formas imperfectas logran un resultado moito máis auténtico, unha fermosura baseada en lograr a diferenciación mediante o recurso á abxección, que determina por completo a súa esencia.’

‘O espazo da Zona “C” convértese con Fashion Victim nunha especie de escenario teatral onde se representan as peculiaridades dun misterioso submundo animado habitado por curiosos personaxes, que alleos ao visitante que se introduce no seu terreo, permanecen impasibles, sendo conscientes da nosa presenza, pero indiferentes ás sensacións que nos causan. Unhas sensacións complexas e contraditorias, que se van xerando no espazo que rodea ás pezas, o punto de encontro entre estas e o espectador’, remata Moreiro

Cristina Moreiro (Madrid, 1984) é licenciada en Historia da Arte, Máster en Arte Museoloxía e Crítica Contemporánea e Máster en Comunicación e Industrias Creativas pola USC.

Iván Prieto (O Barco de Valdeorras, Ourense, 1987) é licenciado en Belas Artes pola Universidade Complutense de Madrid. Un escultor que se apropia dos espazos desde unha particular obsesión confesada coa deformidade e coa revisión dos tradicionais parámetros de beleza e que neste caso pretende reivindicar e demostrar o desacerto daqueles que tratan de marcar unhas pautas estéticas determinadas.

PSOE AMES – VALORACION 100 DIAS DE GOBERNO

TEO - CURSO PARA COIDADORES DE PERSOAS CON ALZHEIMER

O CONCELLO DE TEO COMEZA A COLABORAR CON AGADEA COA POSTA EN MARCHA DUN CURSO PARA COIDADORES DE PERSOAS CON ALZHEIMER

· A xornada inaugural será o luns 24 de outubro na Casa Común de Calo, e contará coa presenza do doutor Alfredo Robles Bayón, director da unidade de neuroloxía cognitiva do hospital A Rosaleda

· Está previsto que no Concello de Teo tamén se poñan en marcha as Aulas de Estimulación Integral dirixidas a persoas en estados iniciais da enfermidade do alzheimer

23 de setembro de 2011. O Departamento de Benestar do Concello de Teo, dirixido por Ignacio Iglesias, está traballando dende hai semanas coa Asociación Galega para a axuda dos enfermos con demencia tipo alzheimer (AGADEA), de cara a buscar vías de colaboración entre as dúas entidades. Esta semana precisamente, o pasado mércores 21, celebrábase o día mundial do alzheimer.

Segundo explica o edil Ignacio Iglesias “os distintos proxectos que se porán en marcha froito desta colaboración están destinados a mellorar cualitativamente a calidade de vida das persoas do Concello de Teo, sobre todo de colectivos específicos cunhas necesidades de atención maiores”.

De feito a primeira acción que se porá en marcha é un curso para coidadores e coidadoras de persoas con alzheimer. Esta acción formativa terá unha duración de 24 horas, repartidas en sesións de 3 horas, de 18:00 a 21:00 horas, os días 24, 25, 26, 27 e 28 de outubro e o 2, 3, e 4 de novembro. A sesión inaugural do curso será o luns 24 na Casa Común de Calo e contará coa presenza do doutor Alfredo Robles Bayón, director da unidade de neuroloxía cognitiva do hospital A Rosaleda.

Esta actividade está dirixida a persoas coidadoras ou a calquera interesado persoal ou profesionalmente na temática da enfermidade tipo alzheimer. Para anotarse no curso deben dirixirse ós Servizos Sociais municipais do Concello de Teo (981 809 707). No caso de que a demanda supere a capacidade da aula a selección farase por orde de inscrición.

O curso tentará abordar diferentes aspectos relacionados con esta doenza. Así entre os contidos que se traballarán destacan o concepto, evolución e tratamento da demencia e enfermidade do alzheimer, a organización e planificación da vida diaria, a actitude da familia diante da enfermidade, as terapias non farmacolóxicas, a fisioterapia nos enfermos, as cuestións legais ou os recursos sociais dispoñibles.

Convenio con AGADEA

Sen embargo a colaboración entre o Concello de Teo e AGADEA non remata con este curso. Nas próximas semanas asinarase un convenio entre as dúas entidades polo que se poñerán en marcha en Teo as Aulas de Estimulación Integral, especialmente dirixidas ás persoas en estados iniciais de enfermidades deste tipo. Nestas aulas traballarase, para potenciar as capacidades das persoas para unha mellora da súa calidade de vida, a través de distintas técnicas como xerontoximnasia, psicomotricidade, estimulación cognitiva, musicoterapia ou arteterapia. A atención con persoal especializado posibilita intervencións individuais e grupais, favorecendo a sociabilidade e as relacións persoais.

SANTIAGO – CORTE DE TRÁFICO ATA O 26 DE OUTUBRO

ASUNTO: corte de tráfico na rúa de Xelmírez

Con motivo das obras do futuro Museo das Peregrinacións e de Santiago, a rúa de Xelmírez permanecerá pechada ao tráfico do 26 de setembro ao 26 de outubro.

O Concello de Santiago de Compostela prega a todos os cidadáns desculpen as molestias que esta alteración no tráfico lles poida ocasionar.

ASOCIACION CULTURAL O GALO - Roteiro. Entre Roma e o feudalismo na Amaía.

Hora

sábado, 15 de octubre · 9:00 - 21:00

Lugar

Santiago de Compostela, Rois, Ames

Creado por

Galo Ac

Más información

A Vila romana de Cirro, as ruínas do conxunto altomedieval de Santa Cilla, o Coto dos Mozos, o Castro Lupario, a Carballeira e o cruceiro de Francos… e para rematarmos un bon xantar. Este é o programa que propomos para coñecermos o Val da Amaía, guiados por Manuel Gago, coñecido e recoñecido autor do blog capítulo 0 sobre arqueoloxía, gastronomía e tecnoloxía.
O roteiro será o 15 de outubro, e contamos con 55 prazas. O prezo de inscrición é de 30 € e inclúe o desprazamento en autobús e o xantar
Máis información e inscrición : http://www.acogalo.net/?p=254

ASOCIACION TETA E COLIÑO - SEMANA MUNDIAL DA LACTACIÓN MATERNA

SANTIAGO – URBANISMO E PARTICIPACIÓN CIDADA

URBANISMO E PARTICIPACIÓN CIDADÁ

Axudas de ata 10.000 euros para a rehabilitación de vivendas no ámbito dos camiños de Santiago

Reunión cos representantes veciñais na Casa das Asociacións de Cornes.

Intervención do alcalde.

A técnica da Oficina de Rehabilitación Marina Sandamil, María Pardo, Francisco Noya e Xerado Conde Roa.

Vista xeral dos asistentes.

Rolda de prensa para presentar as axudas.

22/09/2011 Os concelleiros de Participación Cidadá, Francisco Noya, e de Urbanismo, María Pardo, explicaron en rolda de prensa o Plan de Axudas para a Rehabilitación de Vivendas nos camiños de Santiago. Nesta mesma xornada detallaron o programa ás 31 asociacións de veciños dos ámbitos afectados, nunha reunión na que tamén participou o alcalde, Xerardo Conde Roa.

Poden acceder a estas axudas aqueles veciños que promovan obras de rehabilitación en vivendas no ámbito da Área de Rehabilitación Integral (ARI) dos Camiños de Santiago. Os inmobles deben destinarse a domicilio habitual e permanente durante, polo menos, cinco anos. Deben ter unha antigüidade superior a 10 anos e non poden ter recibido axudas para as mesmas actuacións nos 10 anos anteriores.
As actuacións protexibles comprenden tanto as obras no edificio e en elementos comúns como nas propias vivendas. Serán para melloras en seguridade, estanqueidade, accesibilidade, habitabilidade e eficiencia enerxética, así como para a utilización de enerxías renovables.
O orzamento máximo protexible para as obras será de 68.220 euros. Deste xeito, os beneficiarios poderían acceder a unha axuda do 40% do gasto subvencionable con cargo aos fondos do Ministerio de Fomento, ata un máximo de 5.000 euros por vivenda. De modo adicional, outro 40% podería ser achegado polo Instituto Galego de Vivenda e Solo (IGVS), tamén cun máximo de 5.000 euros por vivenda. É dicir, o a axuda máxima pode chegar aos 10.000 euros.
Préstamo convido para a diferenza
A maiores, aqueles que obteñan a cualificación provisional das obras a realizar poden solicitar, se o desexan, un préstamo convido coas entidades financeiras que asinaron o convenio co Ministerio de Fomento. Esta préstamo será polo importe entre a diferenza do orzamento subvencionable e a axuda concedida. Outorgarase a un interese dun 3% e sen comisións nin gastos de apertura.
Procedemento
Os interesados en acceder a estas axudas deben presentar as súas solicitudes de cualificación provisional antes do 1 de decembro de 2011. O criterio de concesión será a orde de entrada das solicitudes presentadas en prazo e que cumpran os requisitos, e ata o límite orzamentario para cada anualidade (2012 e 2013). Por isto e porque se trata dunha partida xenérica para todos os municipios, tanto María Pardo como Francisco Noya insistiron na importancia da "celeridade na solicitude". Previamente, debe existir acordo da comunidade de propietarios. A partida total para estas axudas será de 5.730.000 euros a repartir a partes iguais nas anualidades 2012 e 2013 e achegadas ao 50% polo Ministerio de Fomento e o IGVS.
Unha vez executadas as actuacións de rehabilitación, presentarase a solicitude de cualificación definitiva e de concesión de subvención, acompañada das correspondentes facturas.
Estas axudas son incompatibles coas do Programa Renove do Plan de Vivenda e Rehabilitación 2009-2012, pero compatibles cas acudas autonómicas para o remate de fachadas e cubertas, rehabilitación e reconstrución de edificios e vivendas nos ámbitos rural, histórico e dos camiños de Santiago.
Ordenanza de terrazas
A concelleira de Urbanismo aproveitou a rolda de prensa para anunciar que o seu departamento está a elaborar unha ordenanza de terras, que estará lista na primavera de 2012. Avanzou que as terrazas terán unha delimitación física, co obxecto de compatibilizar estas terrazas co paso dos peóns, evitando así que estes elementos invadan terrazas e rúas.
Fonte de Cervantes
Ao respecto da fonte de Cervantes, danada por un camión de reparto, María Pardo indicou que hai cinco pezas descolocadas e outras tres danadas, das cales unha está moi danada. Os técnicos están a avaliar se é conveniente restaurar esta peza ou colocar unha nova. En calquera caso, o custo deberá ser asumido pola aseguradora do vehículo.

MANCOMUNIDADE ORDES – INAUGURACIÓN NOVA SEDE

A MANCOMUNIDADE DE MUNICIPIOS DA COMARCA DE ORDES ESTREA NOVA SEDE NA QUE ESTÁN UBICADOS TODOS OS SEUS SERVIZOS E PROFESIONAIS

Manuel Regos sinala que a Mancomunidade acollerase ás axudas que anuncia a Xunta para mancomunar servizos como a recollida de residuos, grúa e parque de maquinaria ou acondicionamento común de estradas

22 de setembro de 2011.- Os sete alcaldes dos concellos que conforman a Mancomunidade de Municipios da Comarca de Ordes inauguraron esta mañá a nova sede da entidade comarcal, que está situada nos baixos da Alameda de Ordes. O presidente da Mancomunidade e alcalde de Ordes, Manuel Regos, exerceu de mestre de cerimonias e guiou á comitiva oficial na súa primeira visita ás novas instalacións, nas que están ubicados todos os servizos e todos os profesionais que traballan na Mancomunidade de Ordes.

Manuel Regos asegurou que “se trata duns locais moi necesarios para que os profesionais da Mancomunidade poidan desenvolver a súa labor e poidan prestar un mellor servizo aos veciños xa que, ao ter un espazo común de traballo, gañarán en operatividade”. Deste xeito, os baixos da Alameda acollen dende hoxe aos 22 profesionais que traballan na Mancomunidade de Ordes, despois da recente contratación dunha Axente de Igualdade. Ademais, os baixos da Alameda ordense alberga as oficinas administrativas e as dependencias do Centro de Información á Muller (CIM), do Servizo de Atención Temperá, do Servizo de Prevención de Drogodependencias, do Servizo de Orientación Laboral ou das traballadoras sociais en materia de familia, menores, inmigración ou terceira idade.

Ata o de agora, todos estes servizos estaban espallados por distintas oficinas ubicadas na casa consistorial de Ordes, na antiga escola a carón da Casa da Cultura ordense ou no centro comarcal, por exemplo.

A estudio: novos servizos mancomunados

Logo da visita, o Pleno da Mancomunidade de Ordes celebrou a súa primeira sesión despois da súa constitución. Unha sesión presidida por Manuel Regos e na que participaron os outros seis alcaldes que compoñen o pleno da Mancomunidade: Xosé García Liñares (Cerceda), Miguel Prado Patiño (Frades), Mariano Iglesias Castro (Mesía), Manuel Mirás Franqueira (Oroso), Antonio Pereiro Liñares (Tordoia) e Xosé Dafonte Varela (Trazo).

Regos Boquete agradeceu especialmente o traballo realizado polos anteriores presidentes da Mancomunidade “que fixeron unha gran labor e só espero poder estar á súa altura nos próximos catro anos”. Unha lexislatura que se presenta especialmente complicada pola situación de crise económica xeralizada e que afecta especialmente aos Concellos. Por iso, Manuel Regos anunciou que “hai uns días a Xunta falaba de abrir axudas para mancomunar servizos, estamos ante un momento importante onde temos que traballar xuntos para, entre todos, poder saír desta crise”.

Así, esta primeira reunión serviu para que todos os alcaldes da Mancomunidade puxeran sobre a mesa os servizos que lles interesaría mancomunar. Deste xeito, a Mancomunidade de Ordes estudiará a posibilidadee de mancomunar os servizos de recollida do lixo, recollida de animais abandoados, crear un grupo de axuda para emerxencias, crear un parque de maquinaria e un servizo de grúa en común, o acondicionamento común de estradas e mesmo un servizo dixital para o rural (que permitiría o envío de avisos por SMS e realizar consultas electrónicas).

Deste xeito, a Mancomunidade ordense pretende acollerse ás axudas anunciadas pola Dirección Xeral de Administración Local para potenciar que se mancomunen servizos entre os concellos. Unhas propostas que se estudiarán e se tentarán concretar en vindeiras reunións xa que “todos os alcaldes estamos dispostos a mancomunar servizos para que sexan máis rentables e operativos. Estamos falando de que Ordes é unha das Mancomunidades máis antigas que existen e o que pretendemos é seguir ofrecendo servizos a menor coste polo ben de todos os nosos veciños e veciñas”, apunta Regos Boquete.

SILLEDA – REGULAMENTO DE PARTICIPACIÓN CIDADÁ

A Corporación de Silleda abordará tamén no pleno do día 29 o Regulamento de Participación Cidadá e a proposta para establecer os días festivos de 2012

-Hoxe celebráronse as comisións informativas previas á sesión ordinaria

Silleda, 22 de setembro de 2011. Os representantes dos distintos grupos municipais de Silleda celebraron hoxe as comisións informativas previas ao pleno ordinario que terá lugar o vindeiro xoves día 29 (ás 20.00 horas).

Houbo unanimidade no voto a favor das taxas para as ceremonias civís e das establecidas para o uso de instalacións deportivas. Aínda así, sorprendentemente o PP abstívose á hora de votar o regulamento de uso das instalacións deportivas municipais argumentando que non tiveran tempo de revisar a documentación, pese a que a xunta de portavoces na que se lle entregou a documentación se celebrou o día 12 de agosto. No caso dos dous suplementos de crédito, apoiados polo goberno bipartito, os membros do PP tamén se abstiveron á espera da celebración do pleno.

Saleta e luns da empanada

Por outra banda os representantes do goberno municipal propuxeron incorporar, pola vía de urxencia, outros dous asuntos para a sesión plenaria. Tratase do Regulamento de Participación Cidadá, e do establecemento dos festivos locais para o ano 2012. A proposta, en virtude das consultas aos colectivos silledenses, será a de fixar como xornadas festivas o 19 de setembro, día da Saleta, e o luns seguinte á festa da empanada da Bandeira. Nos dous casos houbo unanimidade á hora de votar á urgencia.

SANTIAGO – AXENDA VENRES 23

Venres 23

11.00 h

Na Casa do Concello, o alcalde compostelán, Xerardo Conde Roa, recibe o director executivo da Federación Española de Bebidas Espirituosas, Bosco Torremocha de la Rasilla.

11.30 h

No Museo da Catedral de Santiago (entrada pola praza do Obradoiro), o alcalde e presidente do Consorcio de Santiago, Xerardo Conde Roa, realiza unha visita ao Museo da Catedral que reabre as súas portas logo duns importantes traballos de remodelación, enmarcados no programa do 800 Aniversario da Catedral de Santiago. Asistentes:

Xerardo Conde Roa, Alcalde e Presidente do Consorcio de Santiago.

Xosé Manuel Villanueva Prieto, Xerente do Consorcio de Santiago.

José María Díaz Fernández, Deán da Catedral de Santiago.

Daniel Lorenzo Santos, Cóengo Presidente da Comisión de Cultura da Catedral.

Ramón Yzquierdo Peiró, Director do Museo da Catedral de Santiago.

12.00 h

Na Casa do Concello, ROLDA DE PRENSA do voceiro do grupo municipal socialista, Xosé A. Sánchez Bugallo, sobre asuntos de carácter local.

12.30 h

Na Casa do Concello, ROLDA DE PRENSA da concelleira de Facenda e Orzamentos, Cecilia Sierra, sobre asuntos da súa área.

13.00 h

Na Casa do Concello, ROLDA DE PRENSA da concelleira do grupo municipal socialista, Marta Álvarez-Santullano, sobre asuntos de carácter local.

18.00 h

Na Casa do Concello, o alcalde compostelán, Xerardo Conde Roa, recibe o presidente da Asociación de Escavadores de Galicia, Manuel Espiño Mejuto.

VII Semana Cultural da Rocha

No Centro sociocultural da Rocha,

16.00 h Retrátate 10 imaxes para unha exposición

18.30 h Talleres de informática: retratos de decorado

20.00 h GRUPO DE TEATRO DA ROCHA representa Bienvenido Mr. Cajapouco, dirixida por Antonio Ferrari.

BNG AMES – BALANCE 100 DIAS DE GOBERNO

100 días de escusas para ocultar a falta de proxecto e equipo do goberno Popular de Ames

Pilar Candocia: “A verdadeira austeridade do Partido Popular é de ideas, o goberno non dispón dun modelo para saber cara onde tirar, nin de equipo para liderar un Concello tan dinámico como Ames”

Ames (20.09.2011) Logo dos cen primeiros días de novo goberno en Ames xa coñecemos a realidade que nos ofrece o Partido Popular.

O primeiro que se aprecia é a carencia de modelo para o conxunto do municipio e para cada área, ata agora a acción do goberno Popular consistiu en poñer parches e saír do paso. O BNG é consciente da delicada situación das arcas municipais, pero o problema principal é a falta de rumbo e de ideas do goberno, están concentrando a atención na mera xestión económica, renunciando ao liderado político. Traslada a outros as súas responsabilidades, botando balóns fóra en vez de gobernar, as culpas dos seus problemas sempre son do equipo anterior ou do Estado. Confunde á opinión pública cunha austeridade que é falsa, unha escusa universal para eludir responsabilidades, o que entra en contradición co elevadísimo custo do goberno e do alcalde para as arcas públicas.

O PP de Ames non dispoñía de programa de goberno e continúa tirando sen proxecto e sen ideas, o que provoca unha situación de estancamento. A isto hai que engadirlle a falta dun equipo con capacidade para dirixir e impulsar as políticas municipais; os concelleiros do PP estaban pensados como candidatos para captar votos desde a oposición, pero non para gobernar. A acción (e inacción) do goberno ben presidida pola improvisación permanente, chapuzas que pretenden solucionar problemas e que rematan xerando grande confusión na cidadanía, como no ámbito cultural e deportivo onde forzan aos usuarios a matricularse en actividades sen saber quen, cando ou onde se vai impartir.

Ata agora as decisións foron encamiñadas a subir prezos, nunha liña que recorta e devalúa os servizos públicos, ao tempo que desconsidera o valor da cultura, o deporte ou a educación como investimentos de futuro; tampouco se fai cargo da discriminación social que provocan estas subidas de prezos. En determinadas áreas semella un retorno a tempos supostamente superados en Ames, e venden como favores os dereitos cidadáns ou a utilización de recursos e os servizos públicos.

En todo caso, o BNG de Ames asume a súa responsabilidade desenvolvendo unha oposición construtiva, facendo unha crítica da acción do goberno sempre acompañada de propostas alternativas viables. Abordando os problemas desde unha concepción integrada e coherente, trasladando ideas audaces que permitan mellorar a calidade de vida en Ames.

A acción do BNG caracterízase por unha defensa do público, por garantir o acceso universal aos servizos, evitando a discriminación por motivos económicos ou doutra natureza. É o momento de procurar novos sistemas de xestión que salvagarden o acceso aos servizos públicos en condicións de igualdade, conxugar a corresponsabilidade da cidadanía co principio de progresividade para que cadaquén pague en función das súas posibilidades. Tamén é tempo de velar para que a acción do Concello opere con criterios obxectivos e de transparencia.

A forma de comprender a política do BNG é como un diálogo coa sociedade, neste sentido estamos iniciando procesos abertos de diálogo coa cidadanía pulsando o sentir dos axentes sociais para acadar acordos beneficiosos para Ames.

TEO – XORNADAS SOBRE CONSUMO RESPONSABLE E AGRICULTURA ECOLÓXICA

O CONCELLO ORGANIZA UNHAS XORNADAS SOBRE CONSUMO RESPONSABLE E AGRICULTURA ECOLÓXICA PARA FOMENTAR O AUTOEMPREGO

· Esta acción formativa realizarase entre os días 3 e 7 de outubro de 10:00 a 18:00 horas na Casa Común de Oza

· Para anotarse hai que estar desempregado e deben poñerse en contacto coa Axencia de emprego e desenvolvemento local do Concello

22 de setembro de 2011. A concellería de Emprego, dirixida por Anxo Rei, está pechando estes días a organización dunhas xornadas sobre Consumo responsable e agricultura ecolóxica de cara a fomentar o autoemprego. Esta actividade está organizada polo Concello de Teo e o Sindicato Labrego Galego, e está dirixida a persoas desempregadas con interese na agricultura ecolóxica.

As xornadas realizaranse entre os días 3 e 7 de outubro de 10:00 a 18:00 horas, incluíndo o xantar. Esta acción formativa impartirase nas instalacións da Casa Común de Oza. Para anotarse, ademais de estar no paro e ter interese no tema, deben poñerse en contacto coa Axencia de emprego e desenvolvemento local do Concello, no teléfono 981 815 721. A inscrición e participación nas xornadas é totalmente gratuíta.

Esta actividade encádrase dentro dunha serie de propostas nas que está traballando o Concello de Teo para potenciar no ámbito local a producción, comercialización e consumo de produtos cultivados no propio territorio, que se irán poñendo en marcha nos próximos meses.

BRION – APARCAMENTOS EN SANTA MINIA

O CONCELLO DE BRIÓN HABILITARÁ DEZ ZONAS DE APARCAMENTO GRATUÍTO E MOBILIZARÁ UN DISPOSITIVO ESPECIAL NAS FESTAS DE SANTA MINIA

O tráfico pola avenida de Santa Minia cortarase dende o domingo ata o martes, excepto para os residentes que xa recibiron os seus pases

22 de setembro de 2011.- O Concello de Brión xa ten listo o operativo que velará pola seguridade e comodidade dos milleiros de persoas que se espera recibir entre este domingo e e o vindeiro martes 27 de setembro co gallo das Festas de Santa Minia. Un dispositivo composto por máis dunha veintena de efectivos, entre membros de Protección Civil e Policía Local, que se encargarán de atender aos milleiros de romeiros que encherán Brión durante esta fin de semana (e que superaron a cifra de 40.000 na anterior edición). Ademais haberá servizo de ambulancia.

O Concello de Brión habilitará dez zonas de aparcamento de balde, con capacidade para ata 5.000 vehículos, e que estarán convintemente sinaladas. Dende Protección Civil aconsellan aos visitantes que se deixen guiar polos efectivos que estarán na zona, que lles indicarán a mellor opción de aparcamento, segundo a ocupación de cada parcela. Este ano, como principal novidade, habilitarase unha nova zona de aparcamento moi cerca da festa: nos terreos da recén urbanizada parcela de Vila Amalia. Este parking, xunto coa da “Chica”, serán os máis cercanos á festa. Cando estas opcións estén cheas, os vehículos serán desviados a outras parcelas un pouco máis alonxadas en Lamiño ou Liñares.

Evitar a picaresca e autobuses

Dende o Concello de Brión lembran a todos os visitantes que a utilización dos aparcamentos habilitados é totalmente gratuítos e que non hai que aboar cuota algunha, de cara a evitar a picaresca dalgunhas persoas que na pasada edición se aproveitaron dalgúns romeiros para cobrarlles un “aluguer” dun euro.

Os autobuses terán que facer trasbordo no Centro Social Polivalente, pois a avenida de Santa Minia estará cortada á circulación de vehículos dende o domingo 25 e o martes 27 de setembro. Un corte xustificado polos máis de douscentos postos de venda que ocuparán ambas marxes da avenida entre o Centro Social Polivalente e a capela de Santa Minia. Ademais, e de cara a evitarlles molestias aos veciños residentes na zona, o Concello de Brión repartíu nestes días unha serie de pases para os residentes para facilitarlles o tránsito cara os seus fogares.

Programa de actividades

O programa de Santa Minia combinará as actividades máis tradicionais (queima da fachada, romería e programación relixiosa) cun amplo programa de espectáculos culturais, música e lecer que animarán o entorno da carballeira grazas á colaboración da Deputación da Coruña e da Consellería de Cultura e Turismo. Unhas actividades que comezarán durante os tres días ás 10:00 horas, cunha actuación da charanga “Os Celtas” de Negreira. Ademais, o domingo 25 terá lugar unha actuación da Banda de Música Municipal do Concello de Brión (12:00 horas). Unha hora despois, ás 13:00 horas, Volta e Dalle Teatro presentará o seu espectáculo “Rodesindo da Barrosa”, xusto antes da sesión vermú coa orquestra “Superfama”. Pola tarde, o turno é para Os Quinquilláns e o seu teatro de rúa, a partir das 18:00 horas. A Escola de Baile e Pandeireta do Concello de Brión tampouco faltará á cita e a partir das 20:30 horas terá lugar a gran verbena coas orquestras “Superfama” e Aramio.

O luns 26 será o día da percusión, con dúas citas imprescindibles: ás 13:00 horas será o turno da escola de samba Zumbón e pola noite, a partir das 21:30 horas, tocaralles aos Kilomberos de Montealto (A Coruña). A sesión vermú correrá a cargo da orquesta Solara, que tamén será a encargada de amenizar a verbena nocturna canda “Ritmo Joven”, xusto antes dun dos puntos álxidos desta festa: a queima da fachada e a sesión de fogos de artificio, que terá lugar a partir das doce da noite. Antes, os rapaces e rapazas do grupo folclórico Rosalía de Castro poñerán a nota musical, mentres que Culturactiva ofrecerá todo tipo de actividades para os rapaces coa súa iniciativa “PistaActiva”.

Día de Santa Minia

Por último, o día grande destas festas será o martes 27, Día de Santa Minia. Despois de amencer coa música da Charanga “Os Celtas”, ás 12:00 horas será o turno da agrupación Brisas da Croa, que darán paso ás 13:00 hroas á compañía Femme Fatale, co seu “Cabaré deambulante”. A orquestra “América SL” encargarase da sesión vermú, despois da cal os milleiros de romeiros cumprirán con outro dos ritos desta festa: comer o polbo nunha das pulperías instaladas no entorno da capela.

Pola tarde será tempo de música e maxia, cuns pasarrúas e zancudos estarán a cargo de Gostoso Pá e o mago Dani García. O peche das festas de Santa Minia correrá a cargo das orquestras “América SL” e “Los Satélites”.

Programación relixiosa

Finalmente, indicar que a programación relixiosa paralela ás festas comezou xa o pasado domingo 17, coa tradicional novena que inclúe misas todos os días ás 20:00 horas ata o domingo 25 de setembro. O luns 26 haberá misas ás 9, 11, 12, 18, 19 e 20 horas. No Día de Santa Minia, os oficios terán lugar ás 9, 10, 11, 12, 13 (solemne), 17, 18, 19 e 20 horas.

BNG A ESTRADA - O BNG critica o procedemento de elección do xerente da radio municipal

O BNG critica o procedemento de elección do xerente da radio municipal

Xosé Manuel Baños votou en contra da proposta do Alcalde e criticou que non se fixera un procedemento de contratación como se fai con calquera outro traballador da Fundación, cunha oferta pública, con baremación de méritos, entrevista, etc, e non do xeito que se fai agora, unha proposta emanada directamente do Alcalde, un procedemento que seguiu tamén o anterior alcalde, José Antonio Dono, cando substituíu ao anterior xerente”.

A Estrada, 21 de setembro de 2011: Logo das eleccións municipais, hoxe constituíuse o padroado da Fundación Cultural da Estrada, na que teñen representación todos os partidos políticos do concello. Por parte do BNG, o representante na Fundación é Xosé Manuel Baños, Responsábel Local do BNG da Estrada.
Coa constitución do padroado, a Fundación abordou, entre outros asuntos, o nomeamento do xerente da radio municipal, dependente da Fundación Cultural. O alcalde e presidente deste organismo, así como os representantes do Partido Popular, “xa traían pechada unha proposta, da que só cabía votar a favor ou en contra”, explicou o representante do BNG.
Neste sentido, Xosé Manuel Baños criticou “que non se fixera un procedemento de contratación como se fai con calquera outro traballador da Fundación, cunha oferta pública, con baremación de méritos, entrevista, etc, e non do xeito que se fai agora, unha proposta emanada directamente do Alcalde, un procedemento que seguiu tamén o anterior alcalde, José Antonio Dono, cando substituíu ao anterior xerente”.
“O BNG votou en contra deste nomeamento, non pola persoa proposta polo alcalde, senón polo procedemento que se seguiu”, indicou o representante do BNG; “o xerente da radio non pode depender da cor política do goberno municipal, e debe dar conta do seu traballo no seo da Fundación, que é quen o nomea, e non no despacho do alcalde de turno.”
Cobertura de zonas de sombra de A Estrada Dixital
Noutra orde de cousas, o representante do BNG na Fundación Cultural, tamén solicitou que se “atendan as zonas de sombra da rede wifi de A Estrada Dixital, como por exemplo, no lugar de Vilariño, en Requián, cuxos veciños non teñen acceso, cando a escasos 500 metros outros veciños si o teñen”, explicou Baños.
Alén disto, Xosé Manuel Baños, recordoulle ao presidente da Fundación, o Sr. López, que, “despois de cinco anos da licitación aínda segue sen funcionar a administración electrónica, que fora adxudicada nos últimos meses do anterior mandato do Partido Popular, sendo alcalde o Sr. Campos”.

PSOE ORDES – REUNION CO DELEGADO DO GOBERNO

OS SOCIALISTAS DE ORDES TRASLÁDANLLE AO DELEGADO DO GOBERNO AS PETICIÓNS VECIÑAIS PARA O REPINTADO NA N-550 AO SEU PASO POLO MUNICIPIO

Xesús Pedreira transmitiulle a Miguel Cortizo as demandas realizadas polos veciños do Mesón do Vento, Santa Cruz de Montaos e Leira

21 de setembro de 2011.- O secretario xeral da Agrupación Socialista de Ordes, Xesús Pedreira, reuníuse este mediodía na Coruña co delegado do Goberno en Galicia, Miguel Cortizo, para trasladarlle unha serie de peticións veciñais para o repintado da N-500 ao seu paso polo Mesón do Vento, Santa Cruz de Montaos e Leira. “Son unha serie de demandas que nos fixeron chegar os veciños e que mellorarían a circulación en Ordes sen ter que facer costosos investimentos”, sinala Pedreira Mirás.

Así, os socialistas de Ordes solicitaron a eliminación da liña continua na N-550 ao seu paso pola localidade do Mesón do Vento. “No partido socialista recibimos moitas peticións de veciños e empresarios da zona que piden que a liña sexa discontinua”, explica Xesús Pedreira. Ademais, Pedreira Mirás tamén solicitou que a sinalización horizontal no Brumeiral (Leira) volva a deixarse como na súa orixe, cunha liña discontinua na N-550 (sentido Coruña).

Reordenación en Santa Cruz

Así mesmo, Pedreira tamén fixo especial fincapé na necesidade dunha reordenación do tráfico ao seu paso por Santa Cruz de Montaos. “Xa existe un proxecto en Conservación de Carreteras para mellorar a seguridade nos accesos a Fosado e Queis, só hai que habilitar os desvíos cun simple repintado da zona”, indica Xesús Pedreira. Deste xeito, a opción presentada polos socialistas ordenses suporía a eliminación de parte do carril de aceleración na entrada á localidade de Santa Cruz de Montaos para poder así habilitar unha zona para o desvío dos vehículos que circulan pola N-550 (sentido Coruña) cara Fosado.

Finalmente, Xesús Pedreira tamén solicitou a mediación de Miguel Cortizo diante do ADIF para ver de buscarlle unha solución ao problema que o Concello de Ordes ten co mantemento da antiga Estación da Pontraga. “Pedímoslle ao Delegado do Goberno a súa mediación para que eses cartos que o Concello ten que pagarlle ao ADIF podan utilizarse para outros investimentos máis necesarios”, concluíu o secretario xeral da Agrupación Socialista de Ordes.

AMES – REMATA O PRAZO PARA ESCRIBIRSE NA ANDAINA DO DOMINGO

remata o prazo para inscribirse na I Andaina pola senda verde de Ames

- A inscrición pode realizarse no Pazo da Peregrina chamando ao número de teléfono 981 884 991 ou no enderezo de correo electrónico administracion.cultura@concellodeames.org.

- A intención do Concello de Ames con esta iniciativa é valorizar o itinerario cultural e ambiental da ruta e da zona co obxectivo de que a xente a coñeza mellor

O Concello de Ames organiza o próximo día 25 de setembro a I Andaina pola senda verde que une Bertamiráns e O Milladoiro a través de vellos camiños e novas pistas forestais que, nun traxecto de 12 quilómetros, percorren zonas con valor patrimonial e paisaxístico. Todas aquelas persoas que desexen participar na I Andaina de Ames poden inscribirse ata o vindeiro 22 de setembro no Pazo da Peregrina na Concellería de Deportes, no teléfono 981 884 991 ou no enderezo de correo electrónico administracion.cultura@concellodeames.org. A saída está prevista para as 10.00 horas dende o parque infantil de Ventín e prevese chegar á Praza do Concello en Bertamiráns entre as 13:30 h. e as 14:00 horas. Na Andaina participarán dúas técnicos do Concello, unha do departamento de Medio Ambiente e outra do departamento de Turismo que darán explicacións sobre o que se vai vendo.

Todas aquelas persoas que desexen participar na I Andaina de Ames poden inscribirse ata o vindeiro 22 de setembro no Pazo da Peregrina na Concellería de Deportes, no teléfono 981 884 991 ou no enderezo de correo electrónico administracion.cultura@concellodeames.org.

Na Andaina participarán dúas técnicos do Concello que darán diversas explicacións sobre o que se vai vendo pola senda. Ás 10:00 horas, antes de comezar a camiñar, darase unha breve explicación da ruta e os diferentes elementos paisaxísticos, ambientais e culturais da zona. Logo faranse varias paradas de curta duración ao longo do camiño nas que se explicarán temas como a relevancia que teñen en Galicia cultivos coma o do millo e a pataca, a lei de incendios, a xestión sostible do monte, a formación e características do Val da Maía, a Carballeira das Cortes, as Brañas da Devesa, "O Compostelán", que é a primeira liña ferroviaria de Galicia entre Cornes e Carril ou a Igrexa de Bugallido entre outros.
A saída está prevista para as 10:00 horas dende o parque infantil de Ventín e prevese chegar á Praza do Concello en Bertamiráns entre as 13:30 h. e as 14:00 horas. Esta andaina terá unha dificultade media e está dirixida ás persoas que lles guste camiñar e gozar da natureza. Recoméndase levar auga, calzado cómodo e algo para comer. Arredor das 12:00 horas farase unha parada de descanso no campo da festa de Bugallido para repoñer forzas e ir aos aseos. A intención do Concello de Ames con esta iniciativa é valorizar o itinerario cultural e ambiental da ruta e da zona co obxectivo de que a xente a coñeza mellor. Ademais, o Concello ten a intención de que a Andaina se converta nunha cita anual para todos aqueles que desexen participar. A iniciativa de organizar a I Andaina parte da concellería de Medio Ambiente, Desenvolvemento Sostible e Sanidade, que dirixe Eugenia Martín Vicente e conta coa colaboración doutras concellerías.

SILLEDA - O centro social da Bandeira xa conta con suministro eléctrico

O centro social da Bandeira xa conta con suministro eléctrico

-Paula Fernández presentou unha proposta de acordo a Hidroeléctrica de Silleda para o pago de facturas atrasadas

-“A alta do centro da Bandeira amosa a boa vontade da empresa para chegar a un acordo definitivo co Concello de Silleda”, engade a rexedora

Silleda, 21 de de setembro de 2011. O centro social dos maiores da Bandeira, nos baixos das vivendas sociais, conta con luz eléctrica dende o pasado martes, logo de que Hidroeléctrica de Silleda dera a alta correspondente. Estas dependencias municipais estaban sen suministro eléctrico dende o pasado mes de xuño. O contratista que realizou as obras a través do plan E decidiu cortar, sen previo aviso ao Concello, a luz de obra coa que contaba dende decembro de 2010 e Hidroeléctrica de Silleda negouse a dar novas altas ao Concello ata que non se lle abonasen os pagos pendentes.

“Sen dúbida algunha o feito de que a empresa accedera a dar de alta este centro é un xesto que confirma a boa vontade de Hidroeléctrica para solucionar de forma definitiva a problemática do abono de recibos pendentes”, sinala a alcaldesa de Silleda, Paula Fernández, que xa lle presentou unha proposta para chegar a un acordo.

Dende o goberno municipal, a rexedora, que xa no seu anterior mandato chegara a un acordo cos responsables da Hidroeléctrica para realizar pagamentos, confíase en alcanzar de novo un acordo coa empresa suministradora.

SANTIAGO – PANEL DE CORRESPONSABILIDADE NO POLIGONO DO TAMBRE

A Concellería da Muller organiza un panel de boas prácticas sobre conciliación e corresponsabilidade

A Concellería de Familia, Benestar Social, Muller e Emprego organiza unha serie de “Circuítos de Corresponsabilidade” no marco do programa Compostela Corresponsable. Serán catro xornadas que se desenvolverán os días 22 e 29 de setembro e 6 e 13 de outubro.

A primeira destas xornadas, hoxe xoves, denomínase “Conciliación e Responsabilidade. Panel de Boas Prácticas”. Celebrarase de 19:00 a 22:00 horas no Centro da Asociación de Empresarios do Polígono do Tambre. Intervirán Tomás R. Mosquera, representante de Galopín, S.L.; Teresa Mera, de Caeiro, S.L., e a concelleira de Familia, Benestar Social, Muller e Emprego, Paula Prado. A entrada é de balde e entregarase diploma de asistencia.

Nas seguintes xornadas abordaranse cuestións como a lexislación vixente e autonómica en materia de conciliación, as vantaxes e bonificacións, a racionalización dos horarios españois e a conciliación da vida persoal, familiar e profesional. Estas próximas sesións terán lugar o 29 de setembro e o 6 e 13 de outubro.

OROSO - MANUEL MIRÁS CELEBRA O ANUNCIO DA XUNTA DA PRÓXIMA LICITACIÓN DO CEIP

MANUEL MIRÁS CELEBRA O ANUNCIO DA XUNTA DA PRÓXIMA LICITACIÓN DO CEIP DE OROSO

O alcalde asegura que esta obra “vai paliar as deficiencias educativas no concello de Oroso para, cando menos, os próximos 10 anos”

21 de setembro de 2011.- O alcalde de Oroso, Manuel Mirás Franqueira, celebra o anuncio realizado esta mañá pola Consellería de Educación de que a Sociedade Pública de Investimentos licitará esta semana a construción do novo CEIP de Oroso, cumprindo os prazos aos que se comprometera o departamento autonómico co Goberno municipal. Mirás Franqueira cualifica este anuncio como “unha gran noticia para o ensino en Oroso” xa que “esta obra vai a paliar as deficiencias educativas no concello de Oroso para, cando menos, os próximos dez anos”.

O alcalde orosán asegura que “non esperaba menos da Consellería de Educación, unha vez salvadas as deficiencias técnicas e de que o Concello fixera os seus deberes poñendo a parcela á súa disposición”. A construción deste novo centro educativo en Oroso é prioritaria, pois o actual CEIP conta na actualidade con 587 nenos (159 en infantil e 428 en primaria), cando inicialmente estaba previsto para pouco máis de 300 rapaces.

A Consellería de Educación anunciou esta mañá que a Sociedade Pública de Investimentos licitará a construción do novo CEIP de Oroso ao longo desta semana. Un centro que estará situado ao pé do paseo do Río Carboeiro de Sigüeiro e que terá unha superficie de 8.100 m2. A obra suporá un investimento total de máis de 5,5 millóns de euros e ten un prazo de execución de 18 meses. O centro terá unha superficie construída de 4.521 metros cadrados, divididos en dúas plantas que albergarán 6 aulas de educación infantil e 12 aulas de primaria.

SANTIAGO – AXENDA XOVES 22

Xoves 22

11.30 h

Na Casa do Concello, ROLDA DE PRENSA do concelleiro do grupo municipal socialista Francisco Reyes sobre asuntos de carácter local.

12.00 h

Na Casa do Concello, ROLDA DE PRENSA dos concelleiros de Participación Cidadá, Francisco Noya, e de Urbanismo, María Pardo, para explicar o Plan de Axudas para a Rehabilitación de Vivendas no Camiño de Santiago.

12.30 h

Na Casa do Concello, ROLDA DE PRENSA do voceiro do grupo municipal do BNG, Rubén Cela, e da deputada Ana Pontón sobre asuntos de carácter local.

13.15 h

Na Casa do Concello, ROLDA DE PRENSA do concelleiro de Mobilidade e Tráfico, Albino Vázquez, sobre asuntos de carácter local.

18.00 h

No Auditorio de Galicia, o concelleiro de Educación, Ángel Currás, reúnese cos directores dos colexios públicos de educación infantil e primaria de Santiago, dentro das conversas iniciadas coas Anpas sobre asuntos de interese educativo.

19.00 h

Na Asociación de Empresarios do Polígono do Tambre, a concelleira de Benestar Social e Familia, Paula Prado, participa no programa Compostela Corresponsable “Circuítos de Corresponsabilidade”.

19.30 h

Na Rúa do Vilar, concerto da Banda Municipal de Música dirixida por Xosé Carlos Seráns.

21.00 h

Na Casa das Asociacións de Cornes, os concelleiros de Participación Cidadá, Francisco Noya, e de Urbanismo, María Pardo, reúnense coas asociacións de veciños do ámbito do Camiño de Santiago para falar sobre o Plan de Axudas para a Rehabilitación de Vivendas no Camiño de Santiago.

21.00 h

No Teatro Principal, concerto de Anna Grevelius, mezzosoprano; Philip Smith, barítono; e Roger Vignoles, piano, dentro do XII Ciclo de Lied. [Purcell, Schubert, Wolf]

VII Semana Cultural da Rocha

No Centro sociocultural da Rocha,

16.00 h Retrátate 10 imaxes para unha exposición

18.00 h talleres de xogos populares e inventos

20.30 h HISTORIA DO PSIQUIÁTRICO DE CONXO

Charla con Fernando J. P. Ponte Hernando, doutor e ex-xerente do psiquiátrico de conxo. Organiza a Asociación Cultural “Rocha Forte”.

PSOE AMES – O PASEO FLUVIAL DE BERTAMIRÁNS CADA DIA MAIS DESCOIDADO

MANOCMUNIDADE DE ORDES – INAUGURACION DA NOVA SEDE

A MANCOMUNIDADE INAUGURA HOXE XOVES A SÚA NOVA SEDE NOS BAIXOS DA ALAMEDA DE ORDES

As novas dependencias aglutinan todos os servizos e a todos os profesionais que traballan na Mancomunidade

21 de setembro de 2011.- O presidente da Mancomunidade de Municipios da Comarca de Ordes, Manuel Regos Boquete, inaugurará mañá xoves 22 de setembro, ás 12:00 horas, a nova sede do ente comarcal. Unhas novas dependencias ubicadas nos baixos da Alameda de Ordes e que aglutinan todos os servizos e a todos os profesionais que traballan na Mancomunidade ordense para que “teñan un espazo común de traballo e gañen en operatividade”, explica Regos Boquete.

Ao acto de inauguración tamén asistirán os alcaldes de Cerceda, Xosé García Liñares; Frades, Miguel Prado Patiño; Mesía, Mariano Iglesias Castro; Oroso, Manuel Mirás Franqueira; Tordoia, Antonio Pereiro Liñares; e Trazo, Xosé Dafonte Varela; así como o presidente da Mancomunidade e alcalde de Ordes, Manuel Regos Boquete.

FRADES - O EDIFICIO MULTIUSOS JOSÉ MARÍA BOTANA (FRADES) ACOLLE A EXPOSICIÓN “ELAS FAN CAMIÑO” SOBRE A CONTRIBUCIÓN DA MULLER AO CAMIÑO DE SANTIAGO

Poderase visitar ata o 9 de outubro e cabe a posibilidade de concertar visitas en grupo no Concello de Frades

21 de setembro de 2011.- O edificio multiusos José María Botana (Frades) acollerá a exposición “Elas fan Camiño”, que poderá visitarse dende mañá xoves 22 de setembro ata o domingo 9 de outubro. Trátase dunha mostra que inclúe paneis e proxeccións que renden homenaxe ás mulleres peregrinas e a todas aquelas que participaron na conservación e na promoción do Camiño de Santiago ao longo da historia.

Esta mostra dá protagonismo ás mulleres no Camiño, lembrando o papel que xogaron tanto mulleres coñecidas e famosas (raíñas, santas) como mulleres anónimas que chegaron ata Santiago percorrendo con dificultades os camiños para pregar ante o Apóstolo. Así, a exposición fai un percorrido dende as mulleres que fixeron camiño ata as que o fan hoxe en día e un vídeo sobre as vivencias no Camiño das mulleres ilustra a realidade das peregrinacións femininas a Compostela.

A entrada á mostra é totalmente libre e de balde, se ben dende o Concello de Frades se ofrece a posibilidade de organizar visitas de grupo chamando ao teléfono 981 695567. A exposición “Elas fan Camiño” está organizada pola Secretaría Xeral de Igualdade, en colaboración co Concello de Frades, o Xacobeo 2010 e o Fondo Social Europeo.

PSOE ORDES - O PSOE DE ORDES ESÍXELLE Á XUNTA QUE GARANTA A SEGURIDADE E A INTEGRIDADE DO ALUMNADO NOS CENTROS ESCOLARES

Os socialistas lamentan o accidente ocurrido esta mañá co elevador de persoas con mobilidade reducida no CEIP Castelao e demandan que a Consellería explique as circunstancias e o estado do equipo, que instalou o pasado curso

20 de setembro de 2011.- O PSOE de Ordes dirixirase á Consellería de Educación e Ordenación Universitaria para instala a que faga todo o necesario para garantir a seguridade e a integridade física do alumnado do CEIP Castelao, despois do accidente co elevador de persoas con mobilidade reducida que tivo lugar esta mañá cando estaba sendo utilizado para desprazar un alumno con discapacidade.

Os socialistas lamentan os feitos e agardan que a Xunta ofreza explicacións convincentes, detalladas e documentadas sobre as circunstancias nas que se produciu o accidente e sobre o estado de mantemento e supervisión técnica do equipo. “A Consellería –lembra Xesús Pedreira, concelleiro do PSOE de Ordes- non só debe velar pola educación dos alumnos e alumnas, senón que ten tamén a responsabilidade da seguridade das instalacións, sen descoidar o seu mantemento e cunha revisión continua do seu funcionamento”.

De cara á vindeira sesión plenaria da corporación municipal, Pedreira anuncia a presentación dunha moción para que o Concello emprace á Xunta a garantir o correcto estado das instalacións do colexio e que examine tamén as dos restantes centros escolares do municipio. Pedreira agarda que a proposta “obteña o apoio de todos os grupos políticos, incluído o PP, que o pasado curso non dubidou en utilizar de forma partidista diversos investimentos nos colexios ordenses, que previamente retrasara no tempo”.

SANTIAGO – CLASES DE INGLÉS PARA OS CONCELLEIROS

RELACIÓNS INSTITUCIONAIS

Os concelleiros asisten a clases de inglés

20/09/2011 Os concelleiros do Goberno municipal están a asistir a clases de inglés. A decisión foi adoptada pola Concellería de Relacións Institucionais á vista da que o Concello de Santiago debe recibir case a diario representantes de diversas institucións internacionais.

Dende a Concellería de Relacións Institucionais recórdase que o prestixio da cidade se manifesta tamén pola interlocución dos seus representantes políticos. Por iso, o coñecemento do inglés resulta fundamental para manter un contacto fluído con representantes doutros países. Santiago non só recibe habitualmente a persoeiros internacionais, senón que tamén participa en diversos programas internacionais.
A meirande parte dos concelleiros está asistindo a estes cursos, que se de desenvolven no propio Pazo de Raxoi. Hai dous niveis: medio e avanzado. As clases son pagadas polos propios edís.

SANTIAGO - Nova edición do concurso de investigación e redacción "Falemos da nosa historia"

20/09/2011 O CEIP López Ferreiro, coa colaboración da Concellaría de Cultura, Educación e Normalización Lingüística, convoca un ano máis o seu concurso de investigación e redacción "Falemos da nosa Historia", certame dirixido a escolares do 3º ciclo de educación primaria e a 1º ciclo da ESO de calquera centro da Comunidade Galega.

Esta oitava edición organízase arredor do lema "En tempos de María Castaña", motivo que os participantes terán que desenvolver nos seus traballos cunha extensión máxima de tres folios. As redaccións, que terán que realizarse en lingua galega, poden acompañarse tamén de ilustracións gráficas e deberán presentarse baixo pseudónimo e acompañadas de plica.
O prazo de entrega dos traballos vai do 1 ao 29 de febreiro de 2012. O 20 de marzo, coincidindo coa conmemoración do pasamento de Antonio López Ferreiro, historiador e novelista compostelán que dá nome ao centro convocante, farase entrega dos tres galardóns que prevén as bases.

BASES

FRADES – O PLENO APROBA A CONTA DO 2010

O PLENO DE FRADES APROBA A CONTA DE 2010 E DECLARAR FESTIVO O 19 DE MARZO DE 2012

20 de setembro de 2011.- A corporación municipal de Frades, reunida este mediodía en sesión extraordinaria, aprobou a Conta Xeral de 2010 cos 7 votos a favor do Grupo de Goberno e as 4 abstencións de BNG e PSOE. O de hoxe foi o último trámite administrativo da Conta de 2010, unha vez formulada e rendida polo Concello o pasado mes de maio, de ser informada pola Comisión Especial de Contas e da súa publicación no BOP de 13 de xuño. Unha conta que estivo exposta ao público durante o mes de xuño sen que se producise alegación algunha.

Así mesmo, o pleno municipal aprobou por unanimidade cambiar a relación de festivos locais para o ano 2012. Ao coincidir o día de San Miguel (29 de setembro) en sábado, o pleno decidiu trasladar o festivo ao 19 de marzo de 2012, día de San Xosé, que ademais é luns e permitirá facer unha pequena “ponte” aos veciños e veciñas de Frades. Deste xeito, os festivos locais para 2012 serán o Martes de Entroido (21 de febreiro) e o San Xosé (19 de marzo).

SANTIAGO – AXENDA DO MÉRCORES 21

Mércores 21

12.00 h

Na Casa do Concello, ROLDA DE PRENSA do voceiro do grupo municipal socialista, Xosé A. Sánchez Bugallo, sobre asuntos de carácter local.

18.00 h

Na Casa do Concello, o alcalde compostelán, Xerardo Conde Roa, reúnese coa xerente da Praza de Abastos, Marta Rey, e o presidente da cooperativa da praza, José Fernández.

20.00 h

Na Fundación Granell, o alcalde compostelán, Xerardo Conde Roa, asiste á inauguración da exposición Ilustracións E. Granell na obra literaria “Umbral de sueños” de José Rubia Barcia.

VII Semana Cultural da Rocha

No Centro sociocultural da Rocha,

16.00 h Retrátate 10 imaxes para unha exposición

18.00 h Proxección documentais, curtas e filmes cedidos polo CGAI.

Encontro da memoria da xente.

TEO - O CONCELLO PROGRAMA O ESPECTÁCULO TEATRAL “UN AVÓ ESPECIAL” COINCIDINDO COA SEMANA NA QUE SE CELEBRA O DÍA MUNDIAL DO ALZHEIMER

· A peza na que se aborda a problemática do alzheimer coa axuda do humor está dirixida a un público familiar

20 de setembro de 2011. Este mércores 21 de setembro é o día mundial do alzheimer. Con este motivo o departamento de Cultura programa unha obra de teatro na que se aborda a relación entre os avós e os rapaces/as o envellecemento dos maiores, relacionado esto coa enfermidade do alzheimer.

A obra estará representada pola compañía Migallas e será no salón de actos do centro sociocultural da Ramallosa, este venres 23 ás 17:00 horas. A entrada é libre e de balde. Esta peza teatral está especialmente dirixida ó alumnado de primaria, xa que os conceptos que se traballan e o xeito de presentalos están adaptados a estas idades.

Segundo se explica na páxina de Migallas trátase dun espectáculo no que se trata a enfermidade do alzheimer coa intención de axudarlle ós rapaces a comprender situacións que poden darse no seu entorno familiar nalgún momento. 

A pesar da seriedade do tema a obra ten un enfoque humorístico e busca fomentar actitudes optimistas, ademais de destacar o papel que poden xogar os/as nenos/as a través da súa relación cos maiores. 

BNG A ESTRADA - Por culpa do PP en 2012 pagaremos máis pola auga que consumimos

Por culpa do PP en 2012 pagaremos máis pola auga que consumimos

“Este incremento do prezo de auga, ven pola aplicación do Canon da Auga, que recolle esta Lei que aprobou o Partido Popular, co voto tamén do Alcalde, José López, e que substitúe ao Canon de Saneamento actual”

A Estrada, 20 de setembro de 2011: A Lei de Augas, que foi aprobada en solitario polo Partido Popular no Parlamento Galego en outubro do ano 2010, afronta estes días os últimos trámites burocráticos antes de que se execute esta Lei, xa que está en fase de redacción e da súa aprobación final o regulamento polo que se rexerá a Lei de Augas.

O BNG da Estrada, logo de estudar polo miúdo este regulamento, considera, a través do seu portavoz municipal, Xosé Magariños, que “unha vez se aprobe este regulamento os veciños e veciñas da Estrada pagaremos máis pola auga que consumimos, incremento que se fará efectivo a partires de xaneiro de 2012”. “Este incremento do prezo de auga, ven pola aplicación do Canon da Auga, que recolle esta Lei que aprobou o Partido Popular, co voto tamén do Alcalde, José López, e que substitúe ao Canon de Saneamento actual”, engadiu o portavoz municipal do BNG.

“Esta suba de impostos, xa que o Canon da Auga é un imposto, oscilará en función do consumo, mais as nosas estimacións varían dun incremento do 121% para unha casa habitada por unha persoa e cun consumo mensual de 6 metros cúbicos, ao 60% no caso de que viva dúas persoas cun consumo de 10 metros cúbicos ao mes”, afirmou Xosé Magariños.

“Mais”, engadiu o portavoz municipal do BNG, “este incremento aínda pode ser maior de se aplicar o Canon de Verquido, se a Xunta de Galiza se fai cargo da EDAR de Aguións, previsto para 2012”.

“De todos os xeitos”, subliñou Xosé Magariños, “este incremento só lle afecta aos veciños e veciñas que teñan da traída pública, malia que o PP non mudou a Lei de Augas para deixar fóra aos veciños do rural, pero, froito da campaña de información e de recollida de sinaturas en contra desta lei levada adiante polo BNG, o PP exclúe temporalmente aos veciños e veciñas con se subministren de pozos e traídas particulares; mais isto é temporal, no intre que a Xunta queira, con só modificar unha palabra do regulamento, todo o mundo pagará o Canon da Auga”.

"Con todo, que quede claro que a vontade do Partido Popular no futuro é cobrar o canon da auga das traídas veciñais e pozos particulares, como o demostra o feito de que no proxecto de regulamento inclúa detalladamente o método de cobro nestes casos”, subliñou O portavoz municipal do BNG.

“Como dixen anteriormente,” afirmou Xosé Magariños “esta subida de impostos farase efectiva a partires de xaneiro de 2012, unha subida que contradí a propaganda do PP, na que presumen de que eles nunca soben os impostos, cando, como estamos a ver, é xusto o contrario, pagarán máis quen menos consuma.”

OROSO - O CONCELLO ABRE O PRAZO DE INSCICIÓN NAS ACTIVIDADES GRATUÍTAS PARA A TERCEIRA IDADE

O CONCELLO DE OROSO ABRE O PRAZO DE INSCICIÓN NAS ACTIVIDADES GRATUÍTAS PARA A TERCEIRA IDADE

Este ano ofrécense ximnasia de mantemento, taichí, baile e momvemento, obradoiro de memoria e informática

20 de setembro de 2011.- O Concello de Oroso abre o prazo de inscrición nas súas actividades gratuítas para a terceira idade, que terán lugar entre os meses de outubro de 2011 e maio de 2012. Unhas actividades que terán lugar tanto na capital municipal (Sigüeiro) como nos locais sociais de Senra e Trasmonte.

O Concello de Oroso mantén a mesma oferta lúdico-formativa de pasadas edicións, composta por ximnasia de mantemento (en Sigüeiro, Senra e Trasmonte), baile e movemento, taichí, obradoiro da memoria e informática. Para participar nestes cursos, totalmente de balde, é preciso ser maior de 60 anos, estar empadroado en Oroso, non estar afectado por ningunha enfermidade infectocontaxiosa e que a actividade a desenvolver sexa compatible co estado de saúde e situación sanitaria do demandante.

De feito, para anotarse só é preciso encher unha folla de solicitude (descargables na páxina web www.concellooroso.com ou nas dependencias de Servizos Sociais) e presentar un informe médico segundo o modelo dispoñible no departamento de Servizos Sociais. Unhas solicitudes que deberán presentarse no departamento de Servizos Sociais (rúa do Deporte baixo) antes do 30 de setembro.

BRIÓN – O CONCELLO CONVOCA A TERCEIRA EDICIÓN DO CONCURSO DE FOTOGRAFÍA AMBIENTAL “BRIONATURA 2011

BRIÓN CONVOCA A TERCEIRA EDICIÓN DO CONCURSO DE FOTOGRAFÍA AMBIENTAL “BRIONATURA 2011”, CUXOS ORIXINAIS PODERÁN PRESENTARSE POR E-MAIL

As 12 fotografías finalistas servirán para confeccionar o calendario do Concello de Brión para 2012

20 de setembro de 2011.- O Concello de Brión vén de convocar a terceira edición do Concurso de Fotografía Ambiental Brionatura 2011, unha iniciativa coa que pretende poñer en valor o patrimonio etnográfico do municipio. Dirixido a todos os afeccionados ao mundo da fotografía maiores de 18 anos, sexa cal sexa a súa nacionalidade, cada participante poderá presentar ata un máximo de 3 propostas. Os únicos requisitos son que as fotografías deben estar tomadas nalgún punto da xeografía de Brión e versar sobre o seu patrimonio etnográfico.

Dende o Concello de Brión animan a todos os amantes da fotografía a participar no certame, que manterá aberto o seu prazo de entrega de orixinais ata o vindeiro 28 de outubro, ás 15:00 horas. Para facilitar a entrega dos orixinais, as fotografías a concurso deberán remitirse vía e-mail a: concellodebrion@gmail.com cunha resolución mínima de 1024 píxeles para o lado máis grande. Cada imaxe deberá enviarse nun e-mail, identificada cun título e cun documento word ou PDF no que conste o nome e apelidos do autor, enderezo, teléfono, correo electrónico, lugar onde foi tomada a fotografía e unha breve descrición da mesma.

Durante as dúas primeiras edicións rexistráronse un total de 79 e 70 participantes, polo que o Concello de Brión modificou este ano as bases para facilitar a presentación dos orixinais vía e-mail, favorecendo así a participación dun maior número de persoas, pois xa non é preciso asumir ningún gasto de envío nin ter que desprazarse ata a Casa da Cultura brionesa.

Premios

O xurado valorará a orixinalidade, creatividade e técnica fotográfica dos traballos presentados, entre os que seleccionará 12 fotografías. De entre elas sairán os dous gañadores. O primeiro premio consiste nunha cea, noite de hotel, almorzo e circuito termal no Hotel Balneario de Compostela para dúas persoas. O segundo clasificado levará unha cea, noite de hotel e almorzo no Hotel Casa Rosalía para dúas persoas.

As dúas imaxes gañadoras e as outras dez finalistas conformarán o calendario Brión 2012, que cada ano realiza e reparte gratuitamente entre todos os veciños e veciñas do municipio o Concello de Brión. Ademais, aos doce finalistas pediráselles a fotografía en tamaño orixinal para formar parte dunha exposición que terá lugar a finais de ano en Brión, coincidindo coa entrega de premios.

Na pasada edición, gañada polo brionés Rafael Arroyo Muñoz, participaron un total de 30 fotógrafos procedentes de Brión, Ames, Teo, Padrón, Porto do Son e Santiago, cun total de 79 propostas. As Torres de Altamira foron o punto máis escollido polos concursantes (ata 10 propostas) seguidos pola Igrexa de Bastavales e a ponte de Paradela, con 7 imaxes cada unha.

TORDOIA - O CONCELLO PRESENTA ESTE XOVES A EDICIÓN 23 DO PROGRAMA PREESCOLAR NA CASA

O CONCELLO DE TORDOIA PRESENTA ESTE XOVES A EDICIÓN 23 DO PROGRAMA PREESCOLAR NA CASA

20 de setembro 2011.- A Casa da Cultura de Pontepedra (Tordoia) acollerá este xoves 22 de setembro, entre as 10.30 e as 11:30 horas, a presentación do programa “Preescolar na Casa”, unha iniciativa gratuíta dirixida a todas as familias do municipio con nenos e nenas menores de tres anos. Este programa educativo, que desenvolve a Fundación Preescolar na Casa en colaboración co Concello de Tordoia, pretende orientar ás familias na educación dos seus fillos e contribuír a crear unha cultura da infancia.

Durante a sesión do xoves, os responsables de “Preescolar na Casa” presentaranlles aos pais e nais de Tordoia as vantaxes de asistiren a estas sesións quincenais, nas que se pretende “acompañar ás familias na súa labor de educadores e axudalos a resolver calquera dúbida que se lles presente na crianza dos seus fillos e fillas”, explica a mestra orientadora do Concello de Tordoia, María Victoria Dopazo. Así, cada 15 días os pais e nais de Tordoia reuniranse para compartir experiencias e resolver dúbidas sobre a educacións dos pequenos, facendo actividades axeitadas para que as familias poidan xogar relaxadamente cos seus pequenos.

A participación no programa é totalmente de balde e non é preciso que os pequenos asistan á gardería, xa que se trata dun programa de formación de pais. Despois da presentación deste xoves, as sesións comzarán comezarán a impartirse na escola unitaria de Anxeriz a partires do martes 27 de setembro, de 10:30 a 12:00 horas. Máis información na Casa da Cultura ou no 981 577 318.

OROSO – O CONCELLO PIONEIRO Á HORA DE LEVAR A BANDA ANCHA DE INTERNET POR SATÉLITE A TODO O RURAL DO MUNICIPIO

OROSO, CONCELLO PIONEIRO Á HORA DE LEVAR A BANDA ANCHA DE INTERNET POR SATÉLITE

A TODO O RURAL DO MUNICIPIO

O alcalde Manuel Mirás e técnicos de Allticnor SLNE fixeron hoxe probas de velocidade nos locais sociais de Cardama, Senra e Cachopal

19 de septiembre de 2011.- O alcalde de Oroso, Manuel Mirás Franqueira, e técnicos da empresa orosá Allticnor SLNE fixeron esta mañá unha proba do servizo de banda ancha de Internet por satélite que xa disfrutan sesenta veciños e veciñas do rural orosán. Unhas probas realizadas diante dos locais sociais de Cardama, Senra e O Cachopal (Os Ánxeles), nas que se obtiveron uns rexistros de conexión de entre 1,2 e 1,8 megas (cando a proba de conexión se facía co paquete básico de 1 mega).

Mirás Franqueira sinalou que “en Oroso somos pioneiros en poñer en marcha esta solución, que esperamos que se expanda a outros municipios. Grazas a este acordo, poderemos cumprir o noso obxectivo de levar a banda ancha de internet a calquera parte do municipio”. E é que o convenio de colaboración entre o Concello de Oroso e Allticnor SLNE chega despois de distintos intentos fallidos con diferentes sistemas e compañías realizados ao longo dos tres últimos anos. “Hoxe puidemos comprobar que todos os veciños e veciñas de Oroso poderán ter acceso á Internet independentemente da parroquia ou lugar no que vivan”, apuntou Manuel Mirás.

De feito, as probas realizadas tanto no local social de Cardama como no de Senra foron especialmente significativas, pois na zona mesmo se perdía a cobertura de móbil. Porén, ambas zonas amosaron velocidades de conexión de entre superiores aos 1,2 megas e mesmo permitiron a conexión ao tempo de varios equipos a través de wifi. Nas probas de velocidade, o alcalde de Oroso estivo acompañado por técnicos de Allticnor SLNE e polos concelleiros de Medio Rural, María del Carmen Liste; Infraestruturas e Obras, Eduardo Veiras; e de Relacións Veciñais, Luís Rey.

Nova plataforma

Miguel Anxo Gómez, un dos responsables de Allticnor SLNE, anunciou tamén a creación dunha nova plataforma de información (www.internetondequeiras.com), dispoñible tamén dende a web municipal, onde os veciños e veciñas interesados poderán facer as súas reservas. “Nestes momentos o custe da instalación é cero para os veciños, xa que os equipos son financiados polo Plan Avanza do Ministerio de Industria, Turismo e Comercio”, explica Miguel Anxo Gómez, “polo que é aconsellable que se apunten canto antes para poder disfrutar desta subvención”.

De feito, o acordo de colaboración entre o Concello de Oroso e Allticnor SLNE, asinado hai apenas mes e medio, permitirá que os veciños do rural orosán, a onde non chega o ADSL, non só poidan acceder á banda ancha senón que teñan totalmente gratis a instalación e adquisición dos dispositivos precisos para disfrutar deste servizo, consistentes nunha parabólica e un receptor. Un total de sesenta veciños das parroquias de Senra, Marzoa, Os Ánxeles e Cardama xa se anotaron en apenas mes e medio.

Os veciños interesados en contratar este servizo deberán poñerse en contacto con Allticnor SLNE nos teléfonos 664 269 770 ou 981 69 12 52 ou a través da plataforma www.internetondequeiras.com. Ao ser un servizo pensado para o cliente final, a implantación de banda ancha no rural orosán non terá custe algún para o Concello de Oroso, algo que non acontecía con outras ofertas anteriores. Despois, os veciños interesados poderán contratar distintos paquetes, dende 1 a 8 megas, a partir de 25 euros (particulares) e 44 euros (profesionais).

Allticnor SLNE prestará oe servizo co apoio de Hispasat, operador líder no mercado español e iberoamericano, grazas á súa plataforma de acceso a Internet vía satélite de última xeración especialmente deseñada para servizos de baixo custo e de altas prestacións. A firma ofrece un 100% de cobertura.

SILLEDA - Paula Fernández pide o máximo esforzo ao conselleiro Alfonso Rueda á hora de negociar cos traballadores da Fundación Semana Verde de Galicia

Silleda, 19 de setembro de 2011. A alcaldesa de Silleda, Paula Fernández Pena, que asistiu hoxe en Santiago á presentación do acordo de instalación da firma peleteira Finish Fur Sales xunto ao conselleiro de Presidencia, Administracións Públicas e Xustiza, Alfonso Rueda, aproveitou o encontro para interesarse pola negociación cos traballadores da Semana Verde. “Aínda que en principio se partiría do peor escenario, confío en que se poida optar por outras vías como un ERE temporal, sinala Paula Fernández. A rexidora silledense tamén destacou, logo de ser informada do proceso por parte do conselleiro e presidente da fundación, que viu por parte deste “unha grande vontade e disposición para resolver a situación na mellor forma posible”, sinala a alcaldesa.

Así mesmo, Paula Fernández, volveu a pedirlle ao máximo responsable da fundación un esforzo para que as negociacións que se están levando a cabo sexan o menos lesivas posible, e para que se “intensifique ao máximo o diálogo”.

BRIÓN - MILLEIROS DE PERSOAS PARTICIPARON ESTA FIN DE SEMANA NA XXIX FESTA DO CABALO

MILLEIROS DE PERSOAS PARTICIPARON ESTA FIN DE SEMANA NA XXIX FESTA DO CABALO DE BRIÓN

O corral quedou pequeno diante da gran afluencia de xente coincidindo co espectáculo de doma natural do mexicano “Chico” Ramírez

19 de setembro de 2011.- A XXIX Festa do Cabalo de Brión cumpríu con todas as súas previsións e milleiros de persoas visitaron os montes de Rañalonga durante esta fin de semana para acompañar aos case catrocentos cabalos que participaron tanto na ruta cabalar como nas distintas probas celebradas. Unhas probas nas que se repartiron máis de 4.000 euros en premios entre participantes chegados de toda a provincia.

Os dous puntos álxidos da festa foron a ruta cabalar, celebrada na tarde do sábado, e, sobre todo, o espectáculo de manexo e monta natural do cabalo a cargo do mexicano Marcelino “Chico” Ramírez, un dos grandes mestres da comunicación con cabalos e unha das primeiras figuras do mundo na especialidade de doma ecuestre natural. “Chico” Ramírez gañouse a simpatía dun público inicialmente excéptico co seu bo humor e o seu bo facer co cabalo. “Hay que ser firmes siempre, pero no maltratar al animal. Tiene que ser él quien elija voluntariamente la opción que nosotros le indicamos”, explicou.

Curiosidade do público

O mestre mexicano presentou o seu método de “Manejo natural del Caballo” diante dun gran número de afeccionados ao cabalo chegados non só de Galicia, senón tamén de comunidades como Castela-León, País Basco ou Asturias. “El caballo tienen que reconocer a su jinete como un líder y tiene que haber una jerarquía para poder enseñarle a hacer cosas”, sinalou Ramírez, que ofreceu un espectáculo dunha hora na que domou e montou un cabalo que non fora montado antes.

“Chico” Ramírez utilizou a primeira media hora da sesión en achegarse ao cabalo, que non deixaba que ninguén se achegase pola súa esquerda. Tras media hora de esforzos, o domador mexicano conseguiu colocarlle a correaxe de manexo natural. Unha tardanza que fixo que moitos dos presentes puxeran en dúbida o método e a posibilidade de que Ramírez puidese montar un cabalo con tanta personalidade. Porén, diante da sorpresa xeral, “Chico” Ramírez subiu de inmediato ao cabalo e fixo uns movementos con el.

Dúbidas dun espontáneo

A sorpresa inicial converteuse entón en dúbidas sobre a bravura do cabalo e mesmo un rapaz do público aceptou o desafío do domador mexicano e subíu ao animal. Unha vez que “Chico” Ramírez se tiña alonxado un pouco do cabalo, este encabritouse e o xinete deu co seu corpo no chan, sen que tivese que ser atendido polos servizos médicos presentes.

Unha vez demostrada a bravura do cabalo, a seguinte proba foi que se axeonllase e se tumbase no chan. Nese momento tivo lugar un dos momentos máis simpáticos da proba, pois o cabalo non respondía ás ordes en mexicano de “Chico” Ramírez e tiveron que ser os membros da Asociación Festa do Cabalo de Brión e o público presente quen lle dixesen as palabras a utilizar como “abaixo” ou “ao chan”, para que o cabalo respostase sen problemas.

Marcelino “Chico” Ramírez despediuse do público presente explicándolles que esta exhibición foi unha mistura de psicoloxía conductista e da etoloxía, rama da bioloxía que estuda o comportamento dos animais. Finalmente, non chegou a utilizar a himnose para poñer o cabalo co lomo no chan e as patas cara arriba por expreso desexo de Óscar, propietario do animal, quen tampouco quixo montar ao cabalo despois da experiencia do espontáneo anterior. “No es lo mismo. Él montó sin acariciar y para montar en esta vida primero hay que acariciar”, bromeou o mestre mexicano, “tú estás acariciando al caballo y tienes sobre él una posición de liderazgo, por lo que podrás montarlo sin problemas”.

Doma e probas de morfoloxía

O tempo acompañou durante toda a xornada e fixo máis vistoso tanto o concurso de morfoloxía, que tivo lugar dende as 11 da mañá, como a embretada de xovencas, na que uns equipos de xinetes seleccionaban de entre unha serie de vacas as marcadas cunha cor e as metían nun cerco. Ademais, tamén foi moi aplaudido o espectáculo de doma clásica, na que se amosaron as habilidades dun xinete a lomos dun fermoso cabalo andaluz.

Carlos Suárez

Nós Comunicación

AMES - MULLERES DE VÍTIMAS DE VIOLENCIA DE XÉNERO APRENDEN HABILIDADES PARA XESTIONAR SITUACIÓNS DE RISCO

MULLERES DE AMES VÍTIMAS DE VIOLENCIA DE XÉNERO APRENDEN HABILIDADES PARA XESTIONAR SITUACIÓNS DE RISCO

• No marco dunha iniciativa posta en marcha pola Secretaría Xeral da Igualdade para desenvolver cursos de autoprotección, en colaboración co Sindicato Unificado de Policía.

• As beneficiarias practican técnicas de seguridade estática e dinámica para reaccionar ante unha situación de violencia e a forma adecuada de actuar se hai un menor presente.

Ames, 19 de setembro de 2011.- Un grupo de 13 mulleres residentes no municipio de Ames, vítimas de violencia de xénero, asisten desde hoxe a un curso para a aprendizaxe de técnicas de autoprotección, organizado pola Secretaría Xeral da Igualdade en colaboración co concello e o Sindicato Unificado de Policía. Falar cunha voz segura e potente, pero sen gritar, practicar movementos de esquivas ou usar correctamente a distancia ante o agresor son destrezas útiles para afrontar unha situación de risco por violencia e constitúen unha parte importante das sesións do curso, que foi presentado esta mañá en rolda de prensa pola secretaria xeral da Igualdade, Marta González; o alcalde de Ames, Santiago Amor, e o axente de policía coordinador do curso, Alejandro Gómez. Tamén asistiron a concelleira de Servizos Sociais, Familia Dependencia e Maiores, María Dolores Fernández, e a concelleira de Medio Ambiente, Desenvolvemento Sostible e Sanidade Eugenia Martín Vicente.

Os contidos didácticos están orientados á adquisición de destrezas que proporcionen ás participantes unha maior habilidade para xestionar positivamente as situacións de risco por violencia e, consecuentemente, teñan unha percepción de maior seguridade persoal. O curso ten unha duración de 12 horas, divididas en sesións teóricas e prácticas, consistentes en analizar a tipoloxía dos comportamentos violentos que se producen e os escenarios máis frecuentes destes, entre os que o máis habitual é o domicilio. A partires desa análise, as mulleres aprenden destrezas básicas para xestionar con habilidade a situación sorteando o risco, mediante a combinación de técnicas de seguridade estática e dinámica. O curso desenvolverase durante os días 19, 20, 22, 26, 27 e 29 de setembro en horario de 18.00 h. a 20.00 horas da tarde.

Segundo os datos facilitados pola secretaria xeral da Igualdade, Marta González, en Ames hai un total de 47 mulleres que teñen algunha medida de protección, entre ordes de protección e medidas cautelares. Esta foi un dos factores polos que se elixiu Ames para acoller este curso de autoprotección para mulleres vítimas da violencia de xénero.

Contidos prácticos

Técnicas para practicar esquivas totais ou parciais, o uso correcto da distancia ante unha agresión, os movementos precisos para un desprazamento eficaz, o comportamento recomendable se hai menores presentes ou o uso da voz son algunhas das destrezas que se exercitan nos cursos. A voz é un factor decisivo para frear a violencia do agresor. As mulleres aprenden a importancia de empregar palabras curtas e contundentes, cun ton de voz seguro e potente, pero sen gritar, tratando de ganar tempo e buscar unha saída ao escenario de violencia.

Policías especialistas na custodia de mulleres con ordes de protección

Os axentes de policía que imparten as sesións son especialistas en violencia de xénero, que desempeñan o seu traballo en unidades policiais vinculadas a esta problemática e en tarefas de custodia das mulleres con ordes de protección.

O curso que comeza hoxe en Ames forma parte da serie de 11 cursos programados este ano en Galicia, dos que xa se celebraron os correspondentes ás localidades de Arteixo, Ribeira, Vilalba, O Barco, Verín, Cangas, Moaña e Ponteareas, coa participación dun total de 130 mulleres. Por provincias, a participación está encabezada por Pontevedra con 48 beneficiarias, seguida de A Coruña con 42, Ourense con 25 e Lugo con 15 participantes. Faltan por celebrar os cursos de Monforte e Vigo, previstos para outubro.

A iniciativa, programada pola Secretaría Xeral da Igualdade por segundo ano consecutivo, está a ofrecer resultados moi positivos, tanto cuantitativamente polo cada vez maior número de mulleres interesadas en participar -o pasado ano celebráronse sete cursos, con asistencia de 80 mulleres- como cualitativamente, xa que as participantes se involucran activamente e valoran a súa nova capacidade para afrontar situacións de violencia trala participación nestas sesións.