As Xornadas de Música Contemporánea continúan coa súa programación durante esta fin de semana e o luns. Hoxe sábado poderemos escoitar ás 20.30 h na Igrexa da Universidade a Xocas Meijide, clarinete, con Celso Fernández Sanmartín de narrador. Domingo ás 12.00 h no Auditorio de Galicia chega a colaboración da Banda Municipal de Música nas Xornadas, nun concerto no que participa o coro de Cantigas e Agarimos e o gaiteiro ‘Josele’ e que estará presentado por Beatriz e Alberto Cancela. Na xornada do luns chega a Compostela o Cuarteto Gerhard: ás 20.30 h estarán no Paraninfo da Universidade e ás 21.30 h na Igrexa da Universidade.
Ademais, esta fin de semana temos dúas propostas dentro de AdesTempo, o programa didáctico das Xornadas. Sábado 24 ofreceremos a versión familiar do concerto da Real Filharmonía de Galicia interpretando o Frankenstein de Gruber dirixida por Diego García e con Julián Hernández, ex Siniestro Total, de chansonnier. Será a partir das 18.30 h no Auditorio de Galicia. E xa o domingo, no Salón Teatro a partir das 19.00 h o Grupo de Danza Contemporánea do Conservatorio Profesional de Danza de Lugo e o Grupo de Percusión do Conservatorio Profesional de Música Xoán Montes presentan ‘Resonancias en movemento’.
O concerto da Banda será con entrada libre ata completar aforo; o familiar da RFG terá un prezo de 5 euros (os menores de 14 anos, coa entrada mercada, terán á súa disposición dous convites) e os outros concertos serán de balde pero hai que retirar antes invitación. As entradas poden mercarse en entradas.abanca.com, no 902 434 443 ou no despacho de billetes do Teatro Principal (aberto de martes a sábado e días de evento de 18.00 a 21.00 h) onde tamén se poden retirar os convites. Ademais tanto mercar entradas como retirar convites pode facerse tamén nos propios lugares de celebración dos concertos desde unha hora antes de que comecen.
Nas seguintes páxinas engadimos información de cada un dos concertos por orde cronolóxica:
REAL FILHARMONÍA DE GALICIA. AdesTempo
Sábado ás 18.30 h no Auditorio de Galicia
Frankenstein!! é teatro musical, cabaré, ópera... iso e máis. O singular compositor e artista vienés HK Gruber atravesa as barreiras entre xéneros na estela dos heroes de cómic e iconas cinematográficas que enchen os versos de H. C. Artmann. As fantasías infantís mestúranse con pesadelos de adultos na medida en que atopamos a Frankenstein, vampiras, a Superman ou a Batman, en situacións que van do macabro ao humorístico... A desmitificación que fai no seu texto H. C. Artmann dos heroicos viláns ou dos vilanescos heroes atopan un paralelo musical na persistente “alienación” do son orquestral convencional creada por HK Gruber, utilizando instrumentos de xoguete cuxo papel principal é musical máis que cómico. HK Gruber combina idiomas musicais tradicionais con outros máis novidosos e máis populares na súa intención de permanecer fiel á enganosa simplicidade duns textos que a primeira vista suxiren unha atmosfera inxenua e de inocente felicidade.
REAL FILHARMONÍA DE GALICIA
Iniciou a súa actividade en 1996 no Auditorio de Galicia, en Santiago de Compostela, onde presenta a súa temporada estable de concertos. O seu primeiro director titular foi Helmuth Rilling (1996-2000), a quen sucedeu Antoni Ros Marbà (2000-2012). Dende 2013, Paul Daniel é o seu director titular e artístico. O compostelán Maximino Zumalave, vinculado á orquestra dende o seu nacemento, é director asociado, e Christoph König o principal director convidado. Ademais da temporada de concertos en Santiago mantén unha activa presenza no resto de cidades galegas e realizou varias xiras internacionais por Austria, Alemaña, Francia, Brasil, Arxentina e, especialmente, Portugal. Paralelamente, potencia a súa actividade en Santiago cun ciclo de cámara e cos concertos didácticos que dende 1996 organiza co Auditorio de Galicia e polos que pasan máis de 7.000 escolares galegos cada ano. En 2009 presentou dous traballos discográficos inéditos dedicados a Manuel de Falla e Frederic Mompou e, en 2012, un novo disco dedicado a Ravel. Estreitamente vinculada á RFG está a Escola de Altos Estudos Musicais que imparte o Curso avanzado de especialización orquestral, cos músicos da orquestra como profesores. Forma parte da Asociación Española de Orquestas Sinfónicas.
DIEGO GARCÍA RODRÍGUEZ director
Traballa regularmente con orquestras en España, Inglaterra, Polonia e Francia. Os seus compromisos máis recentes inclúen programas sinfónicos coa Real Filharmonía de Galicia, Orquestra Sinfónica de Galicia, Orquesta de Extremadura, Orquestra Académica e Coro de Bydgoszcz (Polonia) e da Orquestra Nova da Sinfónica de Galicia. En xaneiro de 2015 realizou o seu debut no Teatro Real (Madrid) coa produción Hänsel e Gretel de Humperdinck. Dirixiu a estrea mundial de It makes no Difference... de Simone Spagnolo no Festival Tête á Tête en Londres e encargouse da dirección musical de Carmen de Bizet na Opera Baltykca en Gdansk (Polonia) e da produción do Centro Dramático Galego A ópera dos tres reás de Kurt Weill. É director artístico do Taller Atlántico Contemporáneo (TAC), ensemble co que desenvolve unha intensa actividade a prol da música contemporánea e de colaboración con outras disciplinas artísticas. Na tempada 2010-2011 do Teatro Real de Madrid foi director asistente de Josep Pons en The turn of the screw de Britten e de Paul Daniel en Król Roger de Szymanowski. En Inglaterra traballou con Diego Masson e dirixiu Madama Butterfly de Puccini e As vodas de Fígaro de Mozart.
JULIÁN HERNÁNDEZ chansonnier
Aínda que nacido en Madrid, pasou a súa infancia en Vigo onde comeza a súa relación co rock and roll e se relaciona con poetas do movemento Rompente, así como outros intelectuais da época. Formou parte dos grupos Coco y los del Mil Quinientos e Mari Cruz Soriano y los que afinan su piano. En 1981 comeza a súa actividade como membro fundador de Siniestro Total, grupo no que inicialmente tocaba a batería; posteriormente pasou a tocar a guitarra, teclados, harmónica e será a voz solista manténdose á fronte da banda ata hoxe. Durante este tempo, gravan 18 discos oficiais entre os que destacan ¿Cuándo se come aquí?, Ante todo mucha calma, Made in Japan ou o recente Country & Western. Tamén foi integrante de grupos como Def con Dos e Transportes Hernández y Sanjurjo, no que se achega a un estilo máis próximo ao folk e ao blues acústico. Julián Hernández creou o selo discográfico Discos de Freno, formou parte de proxectos cinematográficos con Antonio Blanco, Ricardo Llovo, Marco Aurelio Beviá e Antonio Díaz e foi columnista en diversos medios de comunicación como Público, El País ou 20 minutos, entre outros. Xunto a Manuel M. Romón participou no V Festival Internacional de Spoken Word Palabra e Música no Teatro Lope de Vega de Sevilla co espectáculo audiovisual Arte efímera e tamén puxo en escena o recital Ópera Aperta (en parte) Volume 1 na Fundación Luís Seoane, representando no Auditorio Municipal Praza do Rei de Vigo a segunda parte do recital titulado Ópera Aperta (en parte) Volume 2. Ademais foi invitado no ciclo Os seráns do Taller Atlántico Contemporáneo no que se combinaba música contemporánea, humor e cociña.
XOCAS MEIJIDE e <CELSO FERNÁNDEZ SANMARTÍN
Sábado ás 20.30 h na Igrexa da Universidade
Joaquín Meijide, máis coñecido como Xocas, é un versátil e inquedo clarinetista galego, apaixonado da música contemporánea e de cámara, cunha traxectoria avalada, entre outros moitos argumentos, polo prestixioso galardón Henri Selmer para clarinete baixo… Co poeta Celso Fernández Sanmartín como cómplice compañeiro de viaxe, Xocas presenta en Doubles un singular programa con obras para clarinete e clarinete baixo (unha obra por instrumento e compositor) de referencias das vangardas musicais do século XX, como o italiano Luciano Berio ou o norteamericano Elliott Carter, e creadores de diferentes recunchos do mundo, algúns clarinetistas, que atoparon unha frutífera fonte de inspiración neste instrumento.
XOCAS MEIJIDE clarinete / clarinete baixo
Nacido en Lalín, estudou principalmente con Orentino Sueiro, Joan Enric Lluna, Jo
sé Luís Estellés, Nancy Braytwaite e Henri Bok. É licenciado superior en clarinete pola Guidhall School of Music and Drama of London e polo Rotterdam Conservatorium, máster en interpretación en clarinete pola Universidade da Coruña e posúe cadanseu posgrao en clarinete e en clarinete baixo polo Rotterdam Conservatorium (CODARTS). Como solista de ambos os dous instrumentos está considerado como un dos mellores solistas galegos e gañou varios concursos a nivel internacional como o Concurso Internacional do Forum de Música de Barcelona, o primeiro premio de xurado e público no Concurso de Música de Cámara de Link (Tilburg, Holanda) e o primeiro premio no Henri Selmer Bass Clarinet Competion (Holanda). Na súa xuventude foi seleccionado para participar no Ciclo de Novos Intérpretes da Fundación Barrié e coa Orquestra Nova da Sinfónica de Galicia e, xa no ámbito profesional, colaborou coa Orquestra de Cámara de Galicia, Orquestra Sinfónica de Galicia e Real Filharmonía de Galicia. Tocou como solista coa Sinfónica de Galicia, Orquestra de Cámara de Galicia e, en numerosas ocasións, coa Banda Municipal da Coruña e nos principais festivais galegos, Cameralia, Festival Internacional de Música de Galicia, Imaxinasons etc. Ten actuado no Auditorio Nacional (Madrid) e La Pedrera (Barcelona) e en países como Cuba, Arxentina, Francia, Portugal, Bélxica, Holanda, China etc. A súa discografía inclúe gravacións como Doubles (Xingra.com), Windsongs (Vienna Modern Masters, con música de D. Loeb para dous clarinetes baixos e para clarinete e clarinete baixo xunto ao prestixioso solista Henri Bok e a Banda Municipal da Coruña), A Berenguela (Xingra.com, un conto de Manuel María musicado por Nani García interpretado polo cuarteto Xeríon e María Inés Cuadrado), 8 Pezas Europeas (Ézaro Ediciones, libro-disco con novela de Quinito Mourelle e música de Roberto Somoza interpretadas pola Orquestra Voland) e The Wind Factor (Xingra.com, concerto para clarinete baixo solista e banda composta por Nani García). Apaixonado da música contemporánea e da música de cámara compaxina o seu traballo de clarinete baixo na Banda Municipal da Coruña coa súa faceta de concertista cos proxectos manOcas ensamble (plataforma de linguaxes sonoras electroacústicas para clarinetes, percusión, poesía e electrónica formado por Xocas, Javier Ferreiro e Celso Fernández Sanmartín), Orquestra Voland, Vertixe Sonora, Orquestra de Jazz de Galicia, Axente das palabras (espectáculo poético-musical de María Inés Cuadrado con clarinetes), 8 Sons (proxecto de cadros sonoros) etc.
CELSO FERNÁNDEZ SANMARTÍN narrador
Nado en Lalín en 1969, é poeta e contacontos, faceta profesional que o levou por diferentes lugares do mundo con enorme éxito. Aínda que a súa obra poética foi publicada, na súa gran maioría, en edicións de autor de moi pequena tirada, esta circunstancia non representou un impedimento para lograr o aprecio de lectores e crítica. Así, é unha voz referencial á hora de estudar a poesía dos anos noventa e posteriores en Galicia. En palabras de Helena González (profesora da Universidade Central de Barcelona), Celso Fernández Sanmartín ofrécenos "unha poesía que se ve, úlese, tócase e ten sabor, porque o mundo sensorial se converte nun revelador máxico do oculto, ata o punto de que non escapan os seus versos á dimensión memorística que subxace tamén na literatura popular, pero tampouco á tenrura que permite ao autor volver os seus ollos ao que para os demais nos resulta invisible". Xa o crítico e profesor Miro Villar sinalaba que o poemario sen título que edita en 1995 –e que, en boa medida, o dá a coñecer ao gran público– era "un libro sedutor, inclusive para lectoras e lectores que non frecuenten a palabra poética xa que a proposta poética de Celso Fernández Sanmartín é froito da distensión, da busca do equilibrio e da unidade expresa do discurso". Tematicamente, toda a súa obra ten como epicentro a experiencia vital dun eu poético que nos revela, utilizando as formas dunha fabulación e a sinxeleza do naif, todo aquilo que de maxia e pureza existe na infancia, no amor, na amizade... A natureza é outro dos grandes eixes temáticos da súa obra e a súa linguaxe poética oscila entre os códigos identificativos da oralidade, algúns termos dialectais, certos elementos da fraseoloxía popular e algún trazo surrealista para plasmar a memoria ancestral. Esa materia coa que traballa na súa faceta de colleiteiro-contador que tamén nos transmite con admiración e profundo respecto na súa poesía. Así, a experta en literatura comparada e profesora María do Cebreiro Rábade Villar sinala que Celso Fernández Sanmartín outorga á palabra "a ese coro comunal de voces que alimentan a memoria da colectividade", mentres que o crítico Xosé M. Eiré afirma que nela sempre se dá unha busca constante e inconformista da poesía".
Banda Municipal de Música, coro de Cantigas e Agarimos e ‘Josele’.
Domingo ás 12h no Auditorio de Galicia
Froito do proxecto de recuperación do arquivo histórico da formación compostelá impulsado polo programa Descubrindo as nosas músicas, na primeira parte dedicada á música galega de finais do século XIX e principios do XX, poderemos gozar da inspiración que Rosalía de Castro supuxo no compostelán Pepe Curros (A orillas del Sar e Airiños da miña terra) e dun valse de Felipe Paz Carbajal. Dúas estreas absolutas incluídas (Simón Couceiro e Mario Diz), xunto a recuperación dunha fantasía para banda e gaita do coruñés Antón Alcalde, conforman a segunda parte de autores actuais deste programa da Banda Municipal de Santiago de Compostela dedicado á música para banda de compositores galegos.
BANDA MUNICIPAL DE MÚSICA DE SANTIAGO
É unha das máis antigas de Galicia (1849). Durante os primeiros anos foi unha agrupación de afeccionados, ata que en 1876 o Concello decide facerse cargo dela e comeza a profesionalizarse. Na actualidade realiza os seus concertos no Teatro Principal, na rúa do Vilar, na praza da Quintana, na Alameda e noutros lugares e barrios da cidade na temporada de verán. A súa actividade baséase fundamentalmente nos concertos dominicais ao longo de todo o ano, concertos de verán xoves e domingos, concertos didácticos en período lectivo nos que participan centos de escolares de Santiago e da bisbarra, intercambios e actos culturais e protocolarios.
JUAN MIGUEL ROMERO LLOPIS director
Foi director titular da Banda Musical La Lira de Monforte del Cid, a Agrupación Musical Santa Cecilia de Castalla e a Orquesta Sinfónica de San Vicente del Raspeig e, durante catro tempadas, director asistente da Banda Municipal de Barcelona. Acompañou a solistas internacionais como Ara Malikian, Ionut Podgoreanu, Ximo Vicedo, Marta Matheu etc., e participou en espectáculos con artistas como o coreógrafo Cesc Gelabert ou a bailaora flamenca Eva “la Yerbabuena", entre outros. Ocupou a cátedra de dirección de orquestra no Conservatorio Superior de Música Manuel Massotti Littel de Murcia ata 2013, momento no que gaña a praza de director titular da Banda Municipal de Santiago de Compostela.
GRUPO DE DANZA CONTEMPORÁNEA DO CONSERVATORIO PROFESIONAL DE DANZA DE LUGO e GRUPO DE PERCUSIÓN DO CONSERVATORIO PROFESIONAL DE MÚSICA XOÁN MONTES
Domingo 25 ás 19.00 h no Salón Teatro
Duración, intensidade, altura e timbre: estes son os catro parámetros do son como fenómeno acústico considerados e estudados tradicionalmente, pero a estas catro calidades hai que engadirlles unha máis, que toma vida e emerxe no contexto dunha sala ou espazo concreto, a resonancia. Resonancias en movemento é un espectáculo didáctico de música e danza para público xuvenil e familiar que reflexiona sobre as diferentes formas nas que a resonancia pode ser tratada e abordada, así como os reflexos que poden inspirar na danza. Música e danza camiñan xuntas na busca dunha sinerxía que converta sensacións paralelas (ondas sonoras e movementos) nun todo máxico.
GRUPO DE PERCUSIÓN DO CONSERVATORIO PROFESIONAL DE MÚSICA XOÁN MONTES
Formado por alumnos e exalumnos de percusión do Conservatorio Profesional de Música Xoán Montes, desenvolve a súa actividade no marco das clases deste conservatorio baixo a dirección académica e artística dos profesores de percusión do centro. A formación do grupo é flexible e adáptase ás diferentes necesidades de cada un dos proxectos musicais desenvoltos.
GRUPO DE DANZA CONTEMPORÁNEA DO CONSERVATORIO PROFESIONAL DE DANZA DE LUGO
Formado por alumnas de grao profesional da especialidade de danza contemporánea do Conservatorio Profesional de Danza de Lugo, desenvolven a súa actividade no marco das clases deste centro baixo a dirección académica e artística das profesoras. A formación do grupo é flexible e adáptase ás diferentes necesidades de cada unha das coreografías propostas.
Cuarteto Gerhard. Luns ás 20.30 e 21.30 h no Paraninfo e Igrexa da Universidade
O Cuarteto Gerhard nace en 2010. Máster de Música de cámara na Hochschule für Musik de Basilea (Suíza), con Rainer Schmidt (Hagen Quartett). Obtivo o primeiro premio INJUVE de Música de Cámara Ciutat de Vinaròs, primeiro premio no Concurso Internacional de Música de Capellades e o segundo premio no Concurso Permanente de Jóvenes Intérpretes de Juventudes Musicales de España.
Foron seleccionados ademais polo programa Clásicos en Ruta da AIE realizando concertos por todo o estado español. Recibiron o premio The most convincing newcomer ensemble 2011 de Mocidades Musicais de Alemaña no marco do International Music Campus de Weikersheim. Actuaron no Festival de Segovia, no Círculo de Bellas Artes de Madrid e no prestixioso festival MozartFest de Würzburg (Alemaña) dentro do ciclo Rising Stars. As súas interpretacións foron retransmitidas pola SWR (a radio pública alemá) e RNE. Recentemente actuaron en L'Auditori de Barcelona no ciclo de Cámara e Recitais.
