MÁIS DE 300 PERSOAS ACLAMARON EN
TORDOIA AOS 35 DEPORTISTAS E ENTIDADES DEPORTIVAS PREMIADOS NA III GALA DO
DEPORTE DA MANCOMUNIDADE DE ORDES
O presidente
da Mancomunidade destacou a importancia desta gala “para recoñecer o traballo
dos nosos deportistas”
O alcalde de
Tordoia anunciou un “ambicioso Centro Deportivo que se converterá nun referente
en toda a comarca”
15 de maio de 2010.- Máis de trescentas
persoas chegadas dos sete municipios da comarca ordense participaron na noite
deste venres na III Gala do Deporte da Mancomunidade de Ordes, celebrada no
ximnasio do CPI Pecalama de Tordoia. Unha gala presentada por Xaime Arias e
Jessica Figueroa e na que se premiou aos 35 deportistas e entidades deportivas máis
destacados no 2009 nos concellos de Cerceda, Frades, Mesía, Ordes, Oroso,
Tordoia e Trazo.
O presidente da Mancomunidade de Ordes, Miguel
Prado Patiño, felicitou a todos os premiados e premiadas “por facer da nosa
comarca un referente no deporte”. Prado Patiño explicou que “a gala do deporte
naceu porque botabamos en falta na comarca un acto que servira para recoñecer o
traballo dos nosos deportistas” e para “valorar a labor diaria que dende os
clubes e asociacións deportivas dos sete concellos da comarca se levan a cabo”.
Pola súa banda, Antonio Pereiro Liñares, alcalde
de Tordoia e anfitrión da gala, felicitou aos deportistas e entidades
galardoadas por seren “exemplo de xogo limpo e da entrega por superarse e ser
mellores”. Así mesmo, destacou que o Concello de Tordoia “vén realizando un
importante esforzo para dotarse de infraestruturas deportivas que pronto se
verán complementadas cun ambicioso Centro Deportivo que se converterá nun
referente en toda a comarca”.
Entrega de premios
Cada un dos sete concellos que conforman a
Mancomunidade de Ordes entregou de tres galardóns aos tres mellores deportistas
ou entidades deportivas do curso 2009-2010. Uns premios valorados en 200, 300 e
600 euros para os terceiro, segundo e primeiro clasificados. Ademais, cada
municipio entregou unha distinción á mellor promesa e un recoñecemento especial
á traxectoria dun deportista ou clube deportivo.
Uns premios que foron entregados polos alcaldes
da Mancomunidade e por distintas autoridades deportivas e deportistas invitadas
á gala como José Docobo, presidente do Obradoiro; Isidoro Hornillos, presidente
da Federación Galega de Atletismo; José García, vicepresidente da Federación
Galega de Pesca; Miguel Ramos, vicepresidente da Federación Galega de Iudo; ou
Carlos Sanjurjo, vicepresidente da Federación Galega de Caza.
Momentos especiais
A gala desenvolveuse con rapidez e axilidade, a
pesar de que os 35 galardoados tiveron ocasión de tomar o micro: uns para
contar as súas experiencias, outros para reclamar máis apoios ás súas
modalidades deportivas, coma no caso dos dous premiados na modalidade de
autocross: Adrián Queijo (2º premio de Cerceda) e José Pena (2º premio de
Ordes).
Durante a III Gala do Deporte da Mancomunidade de
Ordes tamén houbo momentos especiais, como o protagonizado polo pequeno Martín
Losada, un rapaz de apenas seis anos e que foi premiado na categoría Promesa de
Tordoia polo seu entusiasmo á hora de patinar (a pesar de que recoñeceu que
“patino máis na casa” e que “a familia enfádase”). Un dos premiados máis
aplaudidos da noite foi Vicente Cabeza Grela (coñecido como “Vicente Mallo”) do
que dixeron que non só foi un gran xogador de fútbol e un gran adestrador,
senón que tamén fai unhas boas parrilladas.
A maioría dos premios da noite tiveron aos máis
pequenos da casa como protagonistas. Foi o caso de rapaces como Míriam Garabato
Liñares (Promesa de Oroso, única rapaza do equipo masculino do Xuventude Oroso
e que “é un baluarte na defensa, todo coraxe e técnica”, aseguran os seus
adestradores); ou o tracense Adrián Castro Otero (Promesa de Trazo, que acaba
de superar dúas probas co Real Madrid e está a unha proba, que fará en verán,
de incorporarse á canteira branca).
Sen embargo, foron os máis veteráns os que
arrincaron os maiores aplausos da noite. Ademais do nomeado Vicente Mallo,
foron especialmente ovacionados os maiores de Mesía que practican o cachibol,
unha nova modalidade deportiva semellante ao voleibol que produce moitos
beneficios na saúde dos maiores. De feito, estes maiores aproveitaron a ocasión
para pedir aos demais concellos da comarca que implanten este deporte para
poder organizar unha liga comarcal.
Tamén foron especialmente ovacionados Marcial
Iglesias, presidente do Sigüeiro FC; Manuel Juncal Castro (Tordoia), que animou
aos pais a apostar polo deporte como xeito de educar aos seus fillos; a
asociación cultural e deportiva de Olas (Mesía); e os fradenses Jesús Prado
Souto e Manuel Mandayo, que son o cazador con máis antigüidade de Frades e un
dos maiores expertos no mundo da pesca na comarca, deporte ao que adica ata 10
horas diarias.
