A Concellería de Benestar
promoverá a creación dunha asociación para dinamizar o Centro Social dos
Maiores
-A creación deste colectivo suporía unha maior implicación dos
usuarios na organización das actividades e no propio funcionamento do centro
-Máis de 20 usuarios estarían dispostos a formar parte da directiva,
segundo unha enquisa
Coa creación deste colectivo acadaríase unha maior implicación dos
usuarios que acoden habitualmente a estas depedencias municipais, e que
participarían directamente na súa dinamización e na organización de
actividades. Así mesmo, coa súa conformación podería optarse á convocatoria de
subvencións ou axudas públicas que contribuirían ao financiamento de
actividades.
A idea de crear unha asociación tivo moi boa resposta entre os
usuarios das dúas instalacións do centro (en Silleda e A Bandeira). Das 107
persoas enquisadas, case a práctica totalidade (103 en concreto), amosaron a
súa conformidade con esta iniciativa, e un total de 82 afirma que estaría
disposto a integrar a sociedade. “Tivo
moi boa acollida, tanto é así que un total de 24 persoas estarían xa despostas
a formar parte da xunta directiva”, destaca a concelleira Dolores García.
Na enquisa realizada polo departamento municipal de Benestar Social e
Igualdade, tamén se consultou aos usuarios do Centro Social dos Maiores sobre
as súas preferencias na organización de actividades. A celebración de
excursións e sesións de baile encabezan o ránquin de preferencias dos usuarios,
seguidas de obradoiros para exercitar a memoria, de pintura ou de novas tecnoloxías.
Algúns dos enquisados tamén aportaron as súas suxerencias relativas a
outras actividades ou sobre cómo mellorar o funcionamento do centro. Algúns dos
enquisados apuntaron que se debería de ampliar o horario dos centros para
abrilos todos os días (pechan na xornada dos luns). Sobre outras actividades os
usuarios suxeriron a celebración de cursos de mecánica, a creación dun coro, ou
un taller de risoterapia.
Ningún comentario:
Publicar un comentario