Cuíña denuncia que os veciños de Silleda estarían “perdidos e condenados á miseria se gobernara José Luis Espiño”
-O goberno lamenta a desfachatez do voceiro do PP cuestionando a inversión no campo de fútbol da Bandeira
-“O que é un despropósito é que critique unha actuación conveniada coa Deputación e que aínda por riba fale en nome doutros clubes, abrindo un debate e creando un malestar innecesario”, dí o alcalde, Manuel Cuíña
O alcalde de Silleda, Manuel Cuiña Fernández , asiste “con asombro e estupor” ás últimas manifestacións do voceiro do PP sobre a inversión na renovación da iluminación no campo de fútbol da Bandeira. Cuíña califica de “desfachatez” a “desafortunada reacción, ás que xa nos ten acostumados o señor Espiño, que se gobernara en Silleda estariamos perdidos e condenados á miseria”, engade
O rexedor lamenta que “ao igual que fixo cos danos do temporal o PP cuestione unha nova inversión para este municipio, da que se beneficiarán neste caso numerosas persoas e deportistas ”, sinala.
Cuiña explica que “por se xa non fora grave chamar despropósito á mellora dun equipamento público, aínda por riba descoñece que esta actuación forma parte dunha actuación de mellora integral do campo” acordada no seu día coa Deputación de Pontevedra.
“O que é criticable é a total e absoluta falta de descoñecemento coa que fala o voceiro popular. Primeiro porque parece descoñecer o estado no que se atopa o campo da Bandeira, que a día de hoxe é con diferencia o que maiores deficiencias presenta de todo o municipio, e segundo porque nin siquera sabe que a dotación de luminarias é o compromiso que adquiriu o goberno co organismo provincial para facer as obras”, engade.
Compromiso coa Deputación e coste mínimo para o Concello
Así, Cuíña recorda que neste caso, ao igual que se fai noutros Concellos, o acordo coa Deputación para renovar o céspede dos estadios, pasa por que as Administracións locais asuman a renovación do alumeado. “Parece que o señor Espiño aínda non se enterou de que xa hai tres semanas que os técnicos da Diputación viñeron a facer o levantamento topográfico para as obras. Recoméndolle que mellore as vías de comunicación co organismo provincial ou que se informe mellor antes de sair públicamente a decir sandeces”.
Así mesmo, Cuíña lémbralle que a renovación da iluminación da Bandeira terá un coste mínimo para as arcas municipais, xa que se fará con cargo aos cartos que lle corresponden a Silleda polo Fondo de Compensación Ambiental. “Non sabemos onde está o despropósito porque a nosa obriga como Administración Local é buscar recursos para lograr inversión que melloren as condicións de vida dos nosos veciños e veciñas. E aínda por riba neste caso temos que dar cumprimento a un acordo coa Diputación, ao igual que fixeron outros concellos”, engade o alcalde.
“Se 42.000 euros lle parecen un despropósito non sabemos que lle parecerán os preto de 600.000 euros aproximadamente que se comprometeu a investir a Deputación”, sinala o rexedor.
Inversións en instalacións deportivas e inminente actuación en Outeiriño
Dende o goberno municipal, o concelleiro de Deportes, Klaus Brey, lémbralle ademais a José Luis Espiño que nos últimos tres anos o Concello de Silleda fixo un “enorme esforza na mellora e renovación das instalacións e infraestruturas deportivas”.
Así lembra que logo da mellora integral do campo de fútbol de Lamela, con unha destacada inversión para dotar o campo de herba natural, acometeuse outra actuación similar no campo de fútbol de Laro, que se inaugurou hai agora un ano. Tamén recorda que no caso do campo de Outeiriño se fixo o equipamento dos vestiarios, pintado e dotación de mobiliario. Do mesmo xeito, o concelleiro explica ademais que o Concello leva varias semanas planificando en colaboración coa directiva da S.D. Silleda a mellora e mantemento do terreo de xogo, que se fará de xeito inminente. “Parece que sobre esta cuestión o voceiro Popular fala de oídas”, di Brey sobre as críticas do PP.
Tamén se renovou por completo a cuberta do pavillón polideportivo da Bandeira, e entre outras melloras de mantemento, destaca tamén o proxecto para a cuberta das pistas de pádel de O Castro, ou a recente estrea das instalacións da cancha de entrenamento da Escola de Golf, que se continuará mellorando.
Críticas por falar en nome dos clubes
“O que é un despropósito é que critique unha actuación conveniada coa Deputación e que aínda por riba fale en nome doutros clubes, abrindo un debate e creando un malestar innecesario”, dí o alcalde, Manuel Cuíña.
“Logo de ver a actuación estelar do señor Espiño cando tocou reclamar ao Estado axuda para reparar os cuantiosos danos do temporal, e agora esta nova salida de tono, o que teño moi claro e que se este señor gobernara en Silleda o municipio estaría literalmente condenado”, engade o alcalde.
Cuíña di que “o que xa é o colmo e que se erixa en portavoz dos clubes do municipio, creando un malestar innecesario, polo que lle recomendo que se deixe de guiar por comentarios de taberna e que se poña a aprender cómo se fai política de unha vez”.
Agradecemento á Diputación
Por último, Cuíña agradece a colaboración e “a boa sintonía” cos responsables da Deputación de Pontevedra “que están a cumprir os compromisos adquiridos”. O alcalde agarda que as obras poidan acometerse no menor prazo de tempo posible, “ e que de unha vez todas neste concello se acaben con declaracións surrealistas sobre esta e outras actuacións”, engade.
