AYUNTAMIENTO DE TEO

O DOCUMENTO REFUNDIDO DO PXOM DE TEO SUPERA CUN DITAME FAVORABLE O SEU PASO POR COMISIÓN INFORMATIVA

·        O pleno será o martes 20 para evitar calquera tipo de inseguridade xuridica xa que a modificacion da lei do solo entra en vigor o 21 de abril

17 de abril de 2010. O documento do PXOM de Teo superou onte pola noite outro dos seus trámites cun ditame favorable na comisión informativa, cos votos favorables de BNG, PP e In Teo e o voto en contra do PSdeG-PSOE. De todas formas esta votación non é vinculante para o pleno.

A sesión na que se debaterá a aprobación provisional do documento de cumprimentación da orde do 27 de xaneiro de 2010 da CMATI celebrarase este martes 20 as 20.00 horas. O edil de urbanismo Rafael Sisto aclara que “neste tema os prazos esgótanse xa que a modificación da lei do solo entra en vigor o 21 de abril e o plan de Teo debe superar o debate plenario antes para evitar calquera dúbida de inseguridade xurídica que puidera obrigar á súa previa adaptación”.

A proposta que se leva ó pleno do martes é o resultado da reunión mantida polos voceiros municipais das forzas políticas de Teo co Conselleiro de Medio Ambiente a iniciativa deste. Nesa xuntanza a Xunta aceptou valorar aqueles temas de interese municipal prioritario dos cuestionados na orde do 27 de xaneiro de 2010. Despois dese encontro institucional os voceiros dos grupos municipais consensuaron estes puntos, dándolle traslado a Secretaría Xeral de Urbanismo, que perfila e aclara os límites aceptables para cumprimentar a orde de 27/01/2010.

Na reunión de marzo con Agustín Hernández este trasladou que a Xunta entende que Teo debe ter canto antes Plan Xeral de Ordenación Municipal. Se o documento queda aprobado no pleno do martes terá que ser enviado de novo a Xunta que disporá dun novo  prazo de tres meses para ditaminar a aprobación definitiva ou non do planeamento urbanístico teense.

AYUNTAMIENTO DE BRION

BRIÓN ACOLLERÁ ESTE DOMINGO A PRIMEIRA MARCHA CICLOTURÍSTICA EN BTT “OS ESFOLA ARRÓS”,

QUE CONTA CON 280 INSCRITOS

A marcha discorrerá durante catro horas polos montes brioneses que rodean o val da Maía

16 de abril de 2010. Brión acollerá este domingo, 18 de abril, a primeira edición da marcha cicloturística en bicicleta de montaña “Os Esfola Arrós”, organizada polo Clube Ciclista compostelán Os Esfola Arrós en colaboración co Concello de Brión, e que contará cun total de 280 ciclistas participantes. Unha cifra que dende a organización agardan incrementar nunhas trinta ou corenta persoas máis o mesmo día da proba, co que esperan superar ampliamente os trescentos ciclistas.

A marcha sairá da Carballeira de Santa Minia ás 9:00 horas e discorrerá ao longo de 42 quilómetros polos montes de Brión e Rois que rodean o val da Maía, combinando subidas esixentes e tranquilas sendas. Un percorrido que inclúe un paso pola parroquia dos Ánxeles cara o monte Rubial, descenso cara o concello de Rois e unha nova subida de 10 quilómetros ao monte Rubial. Despois, os ciclistas pasarán por Macedos, Pedre e o monte Altamira, dende onde descenderán ata o pavillón polideportivo de Pedrouzos (Brión).

A organización sinala que a ruta é dunha dificultade media/alta, polo que piden aos ciclistas moita calma, especialmente con algúns descensos polo monte. Ademais, calculan que eses 42 quilómetros poderanse cubrir nun prazo de algo máis de 4 horas, polo que a chegada ao polideportivo de Pedrouzos está prevista para pasadas as 13:00 horas.

Festa final

A organización ofrecerá aos participantes servizo de avituallamento, duchas, lavado de bicis, servizo médico, asistencia mecánica... así como unha festa final no pavillón polideportivo de Brión con distintos regalos. Aló sortearanse unha noite na Posada Real La Cartería de Puebla de Sanabria, xentileza de Los Ángeles Gas Viajes; dúas ceas para dúas persoas na Cervexería New York (Bertamiráns) e no Hotel Casa Rosalía (Brión); unha velada termal para dúas persoas no Hotel Balneario Compostela (Brión) e un maillot oficial de David Blanco, entre outros agasallos.

Esta marcha cicloturística está organizada polo Clube Ciclista Os Esfola Arrós e conta co patrocinio do Concello de Brión, Coca-Cola, Indalsu, Asador Abelleira, Los Ángeles Gas Viajes, Disprex SL e Bicicletas Oliveira. Así mesmo, conta coa colaboración do Centro de Transfusión de Galicia, Cervecería American´s, Xanela, Casa Rosalía, Serviocio, Novo Neón, Papelería Chavián, Peluquería Manuel, Meiriño Xestión, Asvetrans, Hotel Balneario Compostela, Grupo Santitel, Planeta MTB e Cervexería New York.

AYUNTAMIENTO DE AMES

A travesía de Tarrío conta cun novo sistema de alumeado

Esta semana remataron os traballos de colocación do novo sistema de alumeado na travesía de Tarrío. A obra consistiu na instalación de 36 novos farois que lle dan a esta rúa un aspecto moito máis moderno. Así remátase a mellora desta travesía que se executou en dúas fases. Primeiro ampliouse a estrada principal que pasa por este lugar e construíronse beirarrúas nos dous lados do viario. A segunda fase da obra, na que se instalou o novo sistema de alumeado, executouse dende finais de marzo e tivo un custo de 34.930 euros.

Os 130 veciños e veciñas que residen no lugar de Tarrío, pertencente a parroquia de Bugallido, dispoñen dende esta semana dun novo sistema de alumeado. Estes traballos enmárcanse dentro da segunda fase das obras executadas neste lugar con motivo da ampliación da estrada principal que pasa por esta localidade amiense. As obras foron executadas pola empresa Instalaciones y Servicios Eléctricos Marei SL e tiveron un custo de 34.930 euros.

Neste lugar xa se realizou unha primeira fase de obras, que consistiron na ampliación da estrada principal que pasa por este lugar. Así, realizouse unha nova travesía cuns 700 metros de lonxitude e mellorouse o viario principal deste lugar. Mediante este proxecto duplicouse o ancho da pista que agora ten oito metros en total. Ademais construíronse dúas beirarrúas de metro e medio cada unha e unha estrada de cinco metros de ancho que conta con dous carrís. Porén, as obras tamén implicaron outro tipo de melloras. Así procedeuse a soterrar as conducións de pluviais, as do teléfono e tamén as do subministro eléctrico do alumeado deixando, ademais, tubaxes libres para comunicacións e outras necesidades.

Así, o Concello investiu arredor de 500.000 euros neste proxecto, mostrando de novo o seu interese pola mellora das infraestruturas municipais e de prestar un mellor servizo público a todos os veciños e veciñas deste lugar.

Reposición do alumeado

Estas obras consistiron na instalación eléctrica dun sistema de alumeado exterior dotado de 36 farois de 150W mediante unha rede de alimentación subterránea,. Para iso colocáronse catro liñas de distribución trifásicas. Estes farois son de corpo de aluminio inxectado acabado en color negro. O novo sistema de alumeado dispón dun total de 9720 W de potencia.

Ademais, co fin de obter aforro de enerxía, nas horas de menor actividade e por tanto de menor necesidade de iluminación instalouse un redutor do fluxo trifásico de 15 kVA. Tamén se controlará o acendido e apagado da iluminación mediante reloxo astronómico, polo que se consegue axustar os acendidos e apagados ás necesidades reais da instalación. Disponse así mesmo dun interruptor manual, o cal permite o acendido do sistema de alumeado con independencia do acendido automático.

Transporte público

Esta mellora únese á chegada do transporte público a esta localidade que comezou a funcionar o pasado 5 de abril. Para permitir a implantación dunha liña de autobús ata este lugar situado na parroquia de Bugallido, o Concello de Ames, comprometeuse no seu día a mellorar os accesos a este núcleo rural construíndo unha nova travesía pola que puidesen circular os autobuses. Coa implantación deste servizo e coa finalización deste proxecto o goberno municipal cumpre o compromiso adquirido cos todos os veciños e veciñas de Tarrío.

AYUNTAMIENTO DE TEO

A ÚLTIMA ETAPA DA VOLTA CICLISTA A CASTELA-LEÓN PASARÁ POR TEO ESTE DOMINGO

·        Os afeccionados ao mundo do ciclismo poderán animar a Ezequiel Mosquera, que participa na carreira

·        A concellería de deportes decidiu colocar sobre a estrada AC-841 na Ramallosa unha pancarta de ánimo e agradecemento a Mosquera

16 de abril de 2010. Os afeccionados ó ciclismo en Teo teñen unha cita este domingo con Ezequiel Mosquera. O 18 de maio a última etapa da Volta a Castela-León pasa por Teo, competición na que participa o ciclista teense co Xacobeo Galicia.

A Volta a Castela-León saiu de Burgos o 14 de abril e remata este domingo en Santiago. A quinta e última etapa une Samos e Santiago e percorren 171 quilómetros. Esta competición remata en Santiago pola celebración do Xacobeo este ano, de feito a etapa ten coincidencias co tramo do Camiño Francés que une Samos e Compostela.

Esta competición pasará por Teo entre as 13:45 e as 14:30 horas do domingo. Entrará en Teo dende Santiago pola AC-841 e na Ramallosa collerá a DP-0205 en dirección a Luou e Cornide. Na Casalonga, pola N-550, tomará Camiño a Santiago.

A concellería de Deportes decidiu colocar unha pancarta de ánimo e de agradecemento a Ezequiel xa que o deportista participou no deseño da ruta desta Volta ciclista. A pancarta estará colocada sobre a AC-841 na Ramallosa, fronte á Casa do Concello. Dase a circunstancia de que no entorno da Casa Consistorial está o pavillón municipal Ezequiel Mosquera e tamén vive o propio ciclista teense.

A Volta a Castela-León conta con figuras destacadas do ciclismo como Alberto Contador, Denis Menchov, Óscar Pereiro e o propio Mosquera. 

AYUNTAMIENTO DE AMES

A Deputación da Coruña aportará 400.000 euros para urbanizar a travesía do Porto

[16/04/2010] Esta mañá o alcalde de Ames, Carlos Fernández, e o presidente da Deputación Provincial da Coruña, Salvador Fernández Moreda, asinaron un convenio mediante o cal o organismo provincial se compromete a aportar 400.000 euros para a urbanización da travesía do Porto e a construción do parque central do Milladoiro. A Deputación da Coruña sufragará o 17 % do custo total do proxecto, presupostado polo Concello de Ames en 2.363.156 euros.

A Deputación da Coruña destinará 400.000 euros para a execución dos traballos de urbanización da travesía do Porto e do parque central do Milladoiro. Así se reflicte nun convenio de colaboración asinado entre a institución provincial e o Concello de Ames. O devandito convenio foi formalizado esta mañá polo rexedor municipal, Carlos Fernández, e o presidente do organismo provincial, Salvador Fernández Moreda.

A Deputación da Coruña, a través dos seus programas de colaboración e apoio aos concellos da provincia, financia, con eses 400.000 euros, o 17 por cento do custo total do proxecto, presupostado polo Concello de Ames en 2.363.156 euros.

O proxecto comprende a execución da travesía do Porto que se concibe como un paseo urbano con importantes espazos de uso peonil. A travesía terá unha calzada central de 7 metros, con dous carrís de circulación e aparcadoiros laterais de 2,5 metros. Unha das beirarrúas será de catro metros, e a outra de 9, cun carril bici de 2 metros de ancho, e un espazo peonil de 5,75 metros. Tamén dispoñerá de arboredo na zona de aparcadoiro e nas beirarrúas.

Parque central do Milladoiro
O proxecto recolle tamén a ordenación de zonas verdes e espazos libres do parque central de Milladoiro, actuándose tamén na urbanización da zona de acceso.

Na urbanización da praza integrarase o centro sociocultural e o pavillón polideportivo xa existentes, formulándose tamén o tratamento das respectivas fachadas. Tamén se actuará na área de acceso, manténdose o actual espazo de estacionamento, onde se plantarán distintas especies arbóreas.

Nas pistas deportivas ao aire libre eliminaranse as bancadas o que permitirá unha multiplicidade de usos. A zona da piscina reforzarase cunha área de xogo, e outra pista polideportiva coa instalación dunha pérgola que servirá de paso e delimitación entre os espazos deportivos.

Na parte norte do parque executaranse unha serie de terrazas de formigón pulido con varanda, de altura máxima de 1,50 metros para permitir a visión entre elas. Na parte sur crearase axardinamento, e un itinerario peonil. A zona central por ser a máis elevada do parque contará cunha plataforma-miradoiro que abre a súa visión cara ao val e o núcleo urbano.

Por último, proxéctase a execución dun sistema de percorridos peonís formado por ramplas e pequenas prazas, o devandito percorrido acompañarase por unha canle que vai comunicando os estanques que se asentan nas prazas e que se dirixen ata a travesía do Porto finalizando nun estanque lineal localizado na entrada principal.

O axardinamento contará con diversas especies arbóreas como tulipeiros, ginkos, cornus capitata, sophora japónica, piñeiros e carballos, e dotaráselle de céspede ornamental. En canto ao mobiliario urbano instalaranse bancos de formigón e outros máis clásicos, así como fontes e papeleiras. A iluminación proxéctase con luminarias de 8 metros de altura no aparcadoiro e no acceso ao parque.

Ademais da rede de abastecemento de auga en ambos os dous lados da travesía do Porto, construirase un sistema de rego para o parque e para as zonas axardinadas.

Carlos Fernández e Fernández Moreda valoraron positivamente este novo acordo de colaboración que permitirá mellorar as infraestruturas públicas de Ames, e a calidade de vida dos seus veciños. O rexedor municipal agradeceu a colaboración financeira da Deputación da Coruña.

PP SANTIAGO

Conde Roa: “nos choven peticións para comprobar o mal estado das rúas”

Arquivado en: 

• Actualidade municipal

 — sbaston @ 1:19 pm

A rúa Agra de Arriba atópase a menos dun quilómetro do centro da cidade

Constata que os veciños se queixan reiteradamente a Raxoi e obteñen a calada por resposta

O voceiro do Grupo Municipal Popular, Xerardo Conde Roa, manifestou hoxe que “nos choven as peticións dos veciños para comprobar o mal estado das rúas”, na visita que realizou ó barrio de Meixonfrío, concretamente a rúa Agra de Arriba, a menos dun quilómetro do centro da cidade, que se atopa en moi mal estado.

O mércores o voceiro popular, invitado tamén polos veciños, percorría a rúa de Santa Clara e a Avenida de Salamanca, e a tarde anterior a rúa Alexandre Bóveda, no barrio de Vite, onde constataba tamén o deterioro no que están os viais da nosa cidade. 

Para o voceiro popular “é inconcebible que despois de manexar durante os anos de goberno socialista máis de 40.000 millóns de pesetas canto ós orzamentos municipais e transferencias doutras administracións, a 500 metros do centro da cidade estemos na situación na que estamos”.

Tamén cualificou de lamentable que “vaiamos por onde vaiamos, estemos en onde estemos, e en calquera parte da cidade e do termo municipal atopámonos con situacións como esta, con veciños que teñen unha pista en moi mal estado, ou que carecen de alcantarillado, e que se teñen dirixido en reiteradas ocasións ó Concello tendo a calada por resposta”.

Para Conde Roa, esta rúa é, unha vez máis ”un exemplo clásico do que estamos a ver ó longo de toda a cidade, porque temos chegado a unha situación na que carece por completo de explicación a situación na que se atopa Santiago”.

En declaracións ós medios de comunicación, o voceiro popular explicou que somente se chega a esta situación cando hai un goberno que abandona a xestión ordinaria, á vez que indicou non entender onde se gastaron todos os cartos recibidos en épocas de bonanza económica, nas que se puido ter arranxado todas estas rúas, o que tería evitado atoparnos hoxe nesta situación.

Pola súa banda, tamén fixeron declaracións varios veciños desta rúa, que denunciaron o seu mal estado canto ó asfaltado, pero tamén que no século XXI non teñan alcantarillado ou que se teñan que desprazar quilómetros se queren facer separación de residuos.

AYUNTAMIENTO DE TORDOIA

TORDOIA ACOLLE HOXE SÁBADO UNHA RUADA PROTAGONIZADA POR AGRUPACIÓNS

VETERÁNS DA COMARCA DE ORDES

A Sala Calviño acollerá desde as dez da noite a celebración, na que non faltarán nin os pinchos nin un lugar para quedar a pasar a noite

17 de abril de 2010.- Os maiores do Concello de Tordoia serán os máximos protagonistas da ruada que a Sala Calviño (no lugar da Pontepedra, parroquia de Cabaleiros) acolle este sábado, 17 de abril, a partir das dez da noite. Os homes e mulleres que desde mozos dedicáronse a animar aos seus conveciños e visitantes coa pandeireta, coa gaita ou coa voz serán os que primeiro suban ao escenario da sala Calviño para demostrar o seu bo facer.

As pandereiteiras de Anxeris e as da Pontraga, as agrupacións Flor da Maquía de Ordes ou Faíscas da Pontraga serán algúns dos grupos que intervirán nesta iniciativa, promovida pola asociación cultural Brisas do Quenllo en colaboración co Concello de Tordoia e coa asociación O Buxo.

Desde a organización anímase a todos os veciños da comarca a participar nesta celebración, na que tamén terá o seu espazo todo aquel que queira tocar e cantar. Así, trala participación das agrupacións veteranas, collerá a quenda todos os grupos que así o desexen, que poderán subir ao escenario tras anotarse na mesma sala. Non faltarán os pinchos para animar á festa e, en previsión de que a celebración poida prologarse ata altas horas da madrugada, desde a organización tamén se ten previsto un lugar para quedar a durmir, habilitado no edificio fronte á mesma sala de festas, para evitar os desprazamentos. 

BNG AMES

Ames

Orzamentos municipais 2010.

O BNG consegue que se  incorporen importantes proxectos para os veciños.

Ames.16 de abril de 2010. Froito das negociacións do BNG co grupo de goberno, os Orzamentos municipais para o 2010, incorporarán importantes proxectos para os veciños e veciñas de Ames.

O BNG considera necesario e conveniente que o Concello de Ames conte cun orzamento ordinario para este ano 2010, e por iso mostrou a súa disposición a negociar a documento inicial do grupo de goberno socialista, proxecto que non recollía nengunha das propostas do BNG.

Froito desa negociación, os orzamentos recollerán partidas orzamentarias para o Transporte no Medio rural, o Parque recreativo do Milladoiro, urbanización da Travesia do Porto, un aparcamento en Bertamirans e o Centro socio-cultural de Ortoño.

Ademais o acordo conleva un compromiso, por parte do Goberno Municipal, de licitación e inicio das obras nuns prazos determinados, a partir da aprobación definitiva do orzamento.

Pagos en 90 dias e máis cartos para asociacións, clubes e familias.

Outra das propostas do BNG que se incorporará ao documento definitivo, vai dirixida a normalizar a relación económica coas pequenas empresas, conseguindo que o pago de facturas se faga nun prazo máximo de 90 dias. O BNG considera fundamental que se cumpra este obxectivo, principalmente neste momento de crise económica no que as pequenas empresas, moitas delas do noso concello, necesitan cobrar os seus traballos nun tempo razonable.

Dado que nos últimos tres anos, na lexislatura actual, no se tiñan aumentado as partidas orzamentarias para clubes, asociación e familias (p.e. escolares ), o BNG propuxo un incremento destas subvencións, que ao final quedou nun 20 % sobre as cantidades actuais.

Oferta de emprego público en tres meses

Asi mesmo, o acordo, a proposta do BNG, compromete ao Goberno Municipal a aprobar unha oferta pública de emprego, no prazo de tres meses desde a aprobación do orzamento, recollendo o máximo número de prazas que permita a Lei. Con esta proposta, o Bloque pretende que se avance na estabilidade laboral no Concello de Ames.

Segundo o Portavoz Municipal do BNG, Xosé M. Fernández: “  As propostas do BNG melloran substancialmente os Orzamentos Municipais a favor dos veciños e veciñas. Agora é responsabilidade do Goberno Municipal o seu cumprimento”. 

AYUNTAMIENTO DE BRION

A COMPAÑÍA UNIVERSITARIA “PINCHACARNEIRO” PECHARÁ HOXE SÁBADO EN BRIÓN O PRIMEIRO

CICLO DE TEATRO AFECCIONADO “TEATRO E PUNTO”

Representará a obra “Policía” no centro social polivalente ás 20.30 horas. A entrada é de balde

O auditorio do centro social polivalente de Brión acollerá hoxe sábado 17 de abril, ás 20:30 horas, a representación da comedia “Policía” a cargo da compañía de teatro universitario Pinchacarneiro. Trátase dunha versión libre da obra de Slawomir Mrozek, un dos autores polacos máis emblemáticos do século XX que, a pesares do seu nome, no fondo non fala de policías senón da relación entre a precariedade da conduta humana e as súas finalidades.

Esta actuación porá o broche de ouro ao primeiro ciclo de teatro afeccionado “Teatro...e punto”, organizado polo Concello de Brión para achegar estas representacións aos veciños e veciñas de Brión dun xeito totalmente gratuíto. Un ciclo composto por tres actuacións e que reuniron en Brión a compañías como Ditea, Teruca Bouza ou a propia Pinchacarneiro.

AYUNTAMIENTO DE MELIDE

O portavoz nacional do BNG reivindica en Melide “novas regras para o sector leiteiro”

·         Guillerme Vázquez realizou unha visita oficial ó Concello de Melide, onde coñeceu as instalacións do Local de Ensaio e gravación para grupos musicais.

O portavoz nacional do Bloque Nacionalista Galego, Guillerme Vázquez, realizou esta mañá unha visita institucional ao Concello de Melide, entre outros municipios, onde foi recibido pola alcaldesa, Socorro Cea, por outros membros do goberno e tamén pola voceira do Partido Popular.

Durante a súa visita a Melide, Guillerme Vázquez destacou a importancia do sector leiteiro desta comarca, e manifestou que “non é de recibo o que está pasando neste sector: o gandeiro non pode competir porque xoga con regras trucadas, o que explica o peche de explotacións e o despoboamento rural”. O portavoz do Bloque Nacionalista Galego insistiu en que “é necesario modificar as regras, abordar o problema nun momento coma este no que se ten voz na Presidencia da Unión Europea”, e criticou “a indiferencia coa se atende ao sector leiteiro, mentres outros sectores, como o do automóbil, son tidos por estratéxicos e si reciben os apoios dos goberno”.

Despois do seu encontro coa corporación municipal de Melide no Salón de Plenos do Concello, Guillerme Vázquez coñeceu de primeira man as instalacións do Local de Ensaio, un servizo inaugurado o ano pasado e que, en palabras de Socorro Cea –que acompañou a Vázquez na súa visita-, “é o alicerce infraestrutural da fervente e variada actividade musical que hai en Melide, tanto no campo do folk, do pop, do rock ou da música alternativa e de nova tendencia”.

O local de ensaio de Melide forma parte da “Rede Galega de locais de ensaio” que puxo en marcha o anterior goberno da Xunta de Galicia o ano pasado, e ten unha actividade diaria en Melide, tanto entre semana como nos días da fin de semana, para acoller ensaios e tamén a gravación de primeiras maquetas de grupos musicais que comezan a súa andaina profesional.

AYUNTAMIENTO DE BOQUEIXON

AXUDAS ESTUDIANTES DO CONCELLO DE BOQUEIXON. 

Os estudantes do Concello de Boqueixón van a dispoñer neste ano de máis de 20.000 € en bolsas para  estudo e o transporte.  

Así no día de onte tivo lugar o acto de entrega das axudas que a Fundación Pedro Pérez, presidida polo alcalde de Boqueixón Adolfo Gacio outorgou como cada ano os estudiantes do Concello de Boqueixón que cursa os estudos de Veterinaria ou Medicina.

Neste ano 2010 foron 4 os mozos e mozas que recibiron preto de 2.000 €  de axuda para levar a cabo os seus estudios nestas disciplinas universitarias.

A estes 8.000 € hai que sumar outros 12.000 €, neste caso aportados polo Concello de Boqueixón.  Esta achega económica está destinada   a todos aqueles mozos e mozas que cursan os seus estudios fóra do concello con fin de axudarlles a  facer fronte ós gastos de transporte e desprazamento ós seus centros escolares. Para este curso 2010 – 2011 máis de 120 estudantes do concello van a recibir esta bolsa de axuda ó transporte, facilitando así o desprazamento ós seus lugares de estudio. O acto de entrega destas bolsas de axuda ó transporte será o día 30 de abril ás 20:30 no salón de actos do CPI Antón Orza Couto.  

PP DE BRION

EL ALCALDE DE BRIÓN INCREPA AL PP POR USAR EL CASTELLANO EN UN RUEGO PLENARIO, Y LES PIDE QUE USEN TAN SOLO EL GALLEGO.

Sucedió hace cuatro meses, en el último pleno ordinario del año pasado. El Partido Popular había presentado diferentes mociones y ruegos para su debate en el pleno, y una de esas peticiones, en la que se pedía al regidor que cumpliese con la Ley de Banderas, estaba redactado en castellano.

Según el portavoz popular, Carlos Tomé: “o 90% dos escritos que presentamos no Concello se redactan en galego, pero lóxicamente, no PP traballamos moitas persoas, e cada quen é libre de escribir e redactar na língua oficial que queira”.

Pero justo ese hecho, la redacción en castellano de un escrito, fue el motivo por el que el alcalde socialista, José L. García, llamó la atención a los populares, diciendo que tenían que cumplir la normativa del uso del gallego, en concreto la Ley de Administración Local de Galicia, y presentar sus mociones, ruegos y propuestas en gallego.

Tomé, que en ese momento plenario no tenía las leyes delante, contestaba al regidor que ambas leguas son oficiales, y pueden ser utilizadas libremente, pero García insistía en su versión, increpando a los populares por usar el castellano, y pidiéndoles que usen el gallego.

Los populares consideran de vergonzosa la actitud del alcalde y de una imposición desmesurada, por ello echaron mano de las leyes para defender sus derechos. Según el art.7 de la Ley mencionada por el regidor, de Admón. Local:

“1. O galego, como lingua propia de Galicia, éo tamén da súa administración local. As convocatorias de sesións, ordes do día, mocións, votos particulares, propostas de acordo, ditames das comisións informativas, actas, notificacións, recursos, escrituras públicas, comparecencias xudiciais e todos os actos de carácter público ou administrativo que se realicen por escrito en nome das corporacións locais redactaranse en lingua galega.

2. Sen prexuízo do disposto no apartado anterior, tales entidades poden facelo, ademais, na outra lingua oficial, o castelán. “, dando así la razón al Partido Popular local.

Por ello Tomé califica de mentiroso y manipulador a García, ya que la Ley es bien clara, y deja libremente la utilización de cualquiera de ambas lenguas, si se lee la Ley entera y no sólo los apartados que al alcalde le interese, ocultando el resto y manipulando la información, con tal de imponer sus pareceres.

Pero además, el derecho a utilizar cualquiera de las dos lenguas oficiales en Galicia, viene amparado en la Constitución Española; Estatuto de Autonomía; Ley del uso del gallego como lengua oficial de Galicia; Ley de normalización lingüística; etc, etc. En todas ellas, se consideran ambas lenguas oficiales en Galicia, y defienden su uso libremente, apuntando que nadie podrá ser discriminado por razón de la lengua, y todos tienen el derecho a usarlo.

Por tal motivo, el PP de Brión aún pudiendo acudir a los Tribunales por su amparo en las Leyes, ha optado por presentar una queja ante el Valedor del Pueblo contra el regidor, evitando así que los vecinos paguen con sus impuestos, juicios debidos a las malas gestiones y actuaciones de García.

Según Tomé: “é lamentable que o Alcalde en vez de ocuparse do importante das propostas, é dicir, do seu contido para beneficiar aos veciños, se ocupe tan só da língua na que se redacte o escrito”.

Los populares recuerdan que en diversas ocasiones, han tenido que pedir al regidor que cumpla con alguna Ley, y a día de hoy, sigue sin cumplirla. Pero en cambio cuando le interesa, echa mano de alguna Ley, como la de la Memoria Histórica, para pedir la retirada de la placa de la Iglesia de Viceso. 

PP MELIDE

O PP de Melide informa de que a débeda actual do Concello ascende a máis de 4 millóns de euros

·        A representante popular indica que, ademais dos préstamos bancarios e das facturas sen pagar, hai que engadi-las facturas sen recoñecer

·        Ánxeles Vázquez denuncia a falta de transparencia de Cea á hora de render contas, xa que convocou o pleno con menos dun día de antelación, a pesar de que o esixe a lei

Melide, 13 de abril de 2010. A Voceira do Partido Popular de Melide, Ánxeles Vázquez, denuncia a nefasta xestión económica de Cea, xa que, tal e como se confirmou no pleno extraordinario celebrado no día de hoxe, a débeda actual do Concello ascende a máis de 4 millóns de euros, “o que pon de manifesto que o tempo deu a razón ó PP e que as reiteradas denuncias vertidas ó respecto eran verdade”, recorda Vázquez. Neste senso, a representante popular amosa a súa preocupación polos datos económicos que se desprenden da liquidación do 2009, xa que, “ademais dos catro millóns de euros de débeda contraída en préstamos bancarios e en facturas sen pagar, hai que sumarlle aquelas facturas que aínda non están recoñecidas”, explica.

Do mesmo xeito, Vázquez denuncia o escurantismo e a falta de transparencia de Cea á hora de render contas sobra a súa xestión económica á fronte do Concello, xa que “convocou o pleno extraordinario con menos dun día de antelación”. Neste senso, a Voceira Popular considera que unha vez máis a rexedora deu mostras do pouco respecto institucional e que, cando toca falar de economía, fuxe de convocar plenos en tempo e forma e opta, en cambio, polo segredo para que os melidenses non se decaten da situación crítica da economía do municipio.

Vázquez tacha a Cea de irresponsable, xa que unha vez máis realiza os trámites obrigatorios por lei fóra de prazo, tal e como é o caso da liquidación do ano 2009, da que tiña que dar conta antes do 1 de marzo, e do informe do cumprimento anual do plan de saneamento, que tiña que ser presentado antes do 31 de marzo. Vázquez recorda que xa como ven sendo habitual Cea incumpre reiteradamente coas  obrigacións legais o que está provocando grandes inconvenientes ós melidenses. 

AYUNTAMIENTO DE AMES

Os libros ateigarán este sábado a Praza do Concello

Con motivo da próxima celebración do Día do Libro, o Concello de Ames organiza unha feira para achegar a literatura á rúa. Este sábado, 17 de abri,l os libros saen dos espazos pechados, onde permanecen todo o ano, para achegárense a tadas persoas que andan pola rúa, mesmo a aquelas que non adoitan acudir ás bibliotecas ou librarías. A partir das 16:30 horas, a Praza do Concello en Bertamiráns acollerá unha feira de exposición e venda de libros, contacontos, presentacións de obras literarias, lecturas e música en vivo.

O 23 de abril de 1616 falecían Miguel de Cervantes e William Shakespeare, os considerados pais da literatura española e inglesa. Esa coincidencia no calendario foi a que levou á UNESCO a declarar ese día como a xornada mundial do libro. Deste modo, o Concello de Ames tamén quere render homenaxe á literatura con actos programados para celebrar a importancia da lectura como ben de intercambio cultural.

A Praza do Concello, na localidade de Bertamiráns, será o epicentro onde se xuntarán todas as actividades deseñadas para que os veciños e veciñas amienses de todas as idades gocen cunha xornada dedicada aos libros. Ás 16:30 horas comezará a celebración na que participan varias librarías do municipio como Lenda e Boas e Novas, de Bertamiráns, e Nenos-nais, do Milladoiro.

O obxectivo desta feira é sacar os libros dos espazos pechados e levalos á rúa para que todas aquelas persoas que non soen acudir habitualmente ás bibliotecas ou centros de lectura se animen a descubrir os diferentes mundos que se esconden tras cada exemplar. Ademais, a venda contará cun 10% de desconto sobre o prezo habitual nas librarías.

Ao mesmo tempo, tamén ás 16:30 horas, os nenos e nenas maiores de 4 anos poderán gozar cun contacontos que amenizará con historias e aventuras a súa estadía na feira e que lles inculcará a importancia da lectura e as posibilidades imaxinativas que esta abre. Bea Campos, do grupo Migallas Teatro, será a encargada de atrapalos cos seus contos. Esta actividade está organizada en colaboración coa Biblioteca Municipal.

Presentación

Xa ás 17:00 horas, terá lugar a presentación do último libro de Henrique Monteagudo, sociolingüista e veciño de Ames que ademais de exercer como escritor tamén é secretario do Consello da Cultura Galega e codirector da revista Grial.

As razóns do galego. Apelo á cidadanía recolle escritos e artigos de prensa ao redor da situación actual do idioma galego e os debates sociais que xurdiron coa última política lingüística. O autor alude ao dilema crítico no que se encontra a sociedade galega actual, o abandono ou a promoción do seu idioma propio. Monteagudo reflexiona sobre a nosa realidade sociolingüística e apela á conciencia civil para o futuro da lingua galega.

Na presentación desta obra, ademais do propio autor, participará Víctor Freixanes, director da Editorial Galaxia encargada da publicación do libro.

Acto literario musical

Ás 18:00 horas a música e a literatura uniranse na presentación do libro recompilatorio coas obras gañadoras do VI Certame literario Concello de Ames.

A lectura de fragmentos dos textos premiados por parte dos seus autores e autoras intercalarase coa actuación musical do dúo de zanfonas Samuel e Víctor para rematar unha xornada na que as letras serán as protagonistas.

AYUNTAMIENTO DE TEO

SERVIZOS SOCIAIS TRAMITA AS AXUDAS INDIVIDUAIS DESTINADAS Á PROMOCIÓN DA AUTONOMÍA PERSOAL E Á ACCESIBILIDADE DA XUNTA

·        As solicitudes poden recollerse no departamento de Servizos Sociais ou na web municipal e o prazo para solicitalas remata o 8 de maio

13 de abril de 2010. O departamento de Servizos Sociais informa de que xa está aberto o prazo para solicitar as axudas individuais destinadas á promoción da autonomía persoal e á accesibilidade publicadas pola Xunta de Galicia no DOG do 7 de abril. As persoas interesadas nestas subvencións poden recoller a solicitude en Servizos Sociais, na web municipal www.concellodeteo.com ou na páxina da Consellería de Benestar. O prazo para solicitalas remata o 8 de maio.

Estas axudas están dirixidas a persoas maiores, persoas con discapacidade ou con situación de dependencia e a convocatoria está dirixida a subvencionar a adaptación funcional do fogar e a supresión de barreiras arquitectónicas no interior da vivenda; adquisición de prótesis dentais ou audífonos e axudas técnicas ou productos de apoio para o normal desenvolvemento da vida diaria.

Entre os requisitos que se deben cumprir para solicitar as axudas están ser maior de 65 anos, acreditar a necesidade dun producto que non estea incluído noutras liñas de protección social ou sanitaria; ter discapacidade, se menor de 65 anos cun grao de minusvalía recoñecida igual ou superior ao 33%; ter recoñecida a situación de dependencia nos seguintes graos e niveis: grao III (niveis 1 e 2) e grao II (niveis 1 e 2); residir na comunidade autónoma galega ou non ter percibido nos dous últimos anos axudas para o mesmo fin ao abeiro desta convocatoria agás que sexan axudas complementarias ou distintas das anteriores.

AYUNTAMIENTO DE OROSO

O CONCELLO DE OROSO CONVOCA UN CONCURSO

DE RELATOS BREVES EN GALEGO CO GALLO

DO DÍA DAS LETRAS GALEGAS

Os orixinais deberán presentarse no Centro Cultural Fernando Casas e Novoa antes do vindeiro 13 de maio

13 de abril de 2010.- O Concello de Oroso vén de convocar un concurso de relatos breves para conmemorar o Día das Letras Galegas. Un concurso aberto a todos os veciños e veciñas de Oroso, que poderán participar en dúas categorías: infantil (de 6 a 14 anos) e adultos (máis de 14 anos).

Cada participante poderá presentar ata 3 relatos, tendo en conta que deberán ser orixinais, inéditos e escritos en lingua galega. Os traballos deberán presentarse, mecanografados a dobre espazo e cun máximo de 5 folios de extensión, no Centro Cultural Fernando Casas e Novoa de Sigüeiro antes do 13 de maio. Cada relato presentarase baixo o sistema de plica, de xeito que levará un título e un pseudónimo, mentres que nun sobre pechado recolleranse os datos persoais do autor xunto co devandito pseudónomo e título da obra.

Os participantes aspirarán a un premio de 100 euros (na categoría adultos) e dun lote de libros (na categoría infantil), que serán entregados durante un acto que terá lugar o 21 de maio. Ademais, os tres mellores relatos de cada categoría serán publicados na páxina web do concello (www.concellooroso.com).

AYUNTAMIENTO DE BRION

UNIÓN FENOSA CONFÍRMALLE AO CONCELLO DE

BRIÓN A INSTALACIÓN DE CATRO CENTROS DE TRANSFORMACIÓN PARA SOLVENTAR OS

PROBLEMAS DE SUBMINISTRO ELÉCTRICO

A compañía achaca a fortes tormentas eléctricas na zona os cortes de servizo producidos a finais de febreiro e na primeira semana de marzo

13 de abril de 2010.- O xefe de Distribución de Unión Fenosa na Coruña, Juan Ramón Guijarro Castro, vén de confirmarlle ao alcalde de Brión, Xosé Luis García, que “está prevista a instalación de catro centros de transformación nos lugares de Buio, Piñeiro, Souto e Sanín co fin de mellorar a calidade do subministro eléctrico no concello de Brión”. Unha comunicación remitida por carta ao Concello de Brión (con data do 29 de marzo) en resposta ás distintas queixas presentadas tanto polo Concello de Brión como pola Asociación de Empresarios Altamira diante da propia Unión Fenosa, da OCU e da Consellería de Economía e Industria.

Xosé Luís García espera que “Unión Fenosa cumpra agora coa súa palabra , tal e como fixo o ano pasado no que acometeu importantes investimentos e melloras na calidade de subministro eléctrico de Brión”. Neste sentido, o alcalde de Brión apunta que “Fenosa confirmounos que a instalación deses catro centros de transformación xa está adxudicada dende hai tempo, polo que agardamos que a instalación destes transformadores se faga canto antes”.

Cortes de subministro

Nesa misiva, a eléctrica lamenta tamén os prexuizos que tiveron lugar por causa dos cortes de servizo producidos a finais de febreiro e durante a primeira semana de marzo en Os Ánxeles (concretamente en Piñeiro, Gontade, Buio e Cabanas), Bastavales e Liñares. Uns cortes “motivados por unhas fortes tormentas eléctricas na zona”, xustifica Unión Fenosa.

De feito, a compañía eléctrica xa lle comunicara verbalmente ao Concello de Brión que os problemas de subministro rexistrados en Liñares estiveran motivados pola caída duns eucaliptos sobre a liña eléctrica en Trasouteiro, que en parte tivo que ser levantada para solventalos. Finalmente, Unión Fenosa agradeceu a colaboración prestada polo Concello de Brión na resolución destes incidentes e reiterou as súas desculpas aos veciños polo malestar ocasionado.

AYUNTAMIENTO DE BOQUEIXON

O departamento de Cultura do Concello de Boqueixón ten  aberto o prazo de inscrición para dúas actividades dirixidas á mozos de entre 12 e 18 anos, e que se van a realizar nos vindeiro fins de semana.

O primeiro deles vai a ser unha xornada de supervivencia e campismo, que vaixo o título As Tribus Perdidas se desenrolará na Carballeira de Rodiño, Sergude,  este sábado 17  de abril. Nesta actividades os mozos e mozas participantes terán a oportunidade de coñecer técnicas de campismo e supervivencia, realizarán unha comida trampera e xogos cooperativos e de aventura.

Tralas Tribus Perdidas,  e no seguinte sábado 24 de abril, toma o relevo unha nova actividade, neste caso un obradoiro de música electrónica, para que os mozos e mozas  amantes deste tipo de música poidan das os seus primeiros pasos mesturando  e producindo os seus primeiros temas.

 Esta actividade terá lugar na Casa da Cultura de Camporrapado e estará dirixida  e coordinada polo coñecido Dj e productor santiagués  Darkow.

Fora do ámbito xuvenil, tamén o departamento de Cultura do Concello de Boqueixón ten aberto prazo de inscrición para unha viaxe termal ás termas de Outariz en Ourense, que terá lugar o Xoves 22 de Abril, e no que a maiores deste espazo termal, os participantes poderán visitar o Mosteiro de Oseira e os fornos de Pan de Cea.    

As inscrición para estas actividades poden facerse no departamento de Cultura do concello de Boqueixón chamando ó 981 513 115  

AYUNTAMIENTO DE AMES

Reábrese á campaña Calidade en Galego

[12/04/2010] Despois da boa acollida que tivo a iniciativa de promoción e galeguización do comercio amiense posta en marcha o ano pasado, o Concello de Ames decidiu retomar esta iniciativa co fin de que todos os establecementos comerciais que o desexan, poidan adherirse a esta campaña e se beneficien de diversas vantaxes como a inscrición nun obradoiro de atención ao público ou a entrega dunha bolsa con material promocional para cada establecemento. Neste momento hai 200 comercios adheridos a esta campaña.

O Concello de Ames está a desenvolver nos últimos tempos diversas medidas e ferramentas para fortalecer o tecido empresarial do pequeno comercio. Este tipo de comercio ten que satisfacer as demandas dunha clientela cada vez máis esixente e facerlle fronte ás diferentes ameazas que o abordan no día a día. Para conseguirmos iso é importante unha aposta pola calidade, pola modernidade e pola diferenciación.

Para tratar de potenciar o comercio local, os departamentos de Normalización Lingüística e Promoción Económica puxeron en marcha o ano pasado a campaña Calidade en Galego, cos obxectivos de aproveitar as vantaxes que o sector comercial pode tirar do uso da nosa lingua e asentar unha imaxe de marca común para todo o pequeno comercio amiense. A lingua galega ofrece unha serie de vantaxes (modernidade, diferenciación, proximidade coa clientela, innovación, fiabilidade...) que hai que ter en conta á hora de elaborar unha estratexia comunicativa.

Todas as actuacións da campaña son gratuítas para os comercios interesados en adherirse. Durante o ano 2009 desenvolveuse a primeira fase, pero o que se pretende é crear unha rede de colaboración fluída entre os e os comerciantes e os departamentos de promoción económica e de normalización lingüística para colaborar na promoción e na galeguización do comercio. Así, agora volve reabrirse a campaña e comeza unha segunda fase na todos aqueles comercios que o desexen poderán inscribirse antes do 30 de abril.

Os comercios que se inscriban nesta segunda fase e os 200 que xa forma parte da rede Calidade en Galego dende o ano pasado poderán participar nun obradoiro de atención ao público que se vai levar a cabo en Bertamiráns (luns, martes e xoves) e no Milladoiro (martes, mércores e venres) entre o 1 e 29 de xuño.

Este curso está destinado aos traballadores e traballadoras deste sector co fin de melloraren a súa formación neste eido para así poder ofrecer un mellor servizo que repercutirá de xeito positivo na clientela e, por extensión, na cidadanía amesá. Todos os e as comerciantes e traballadores/as do pequeno comercio adheridos a Calidade en Galego poden inscribirse neste curso dende o 3 ata o 29 de maio. Para iso, só teñen que achegarse ata o Rexistro das Oficinas Municipais do Milladoiro ou no Rexistro da Casa do Concello en Bertamiráns, de luns a venres, en horario de 9:00 h. a 14:00 horas.

Campaña publicitaria
As actuacións que se están a desenvolver seguen a mesma liña que na edición anterior. Calidade en Galego consiste nunha campaña publicitaria en diferentes soportes. No reparto de materiais útiles e atractivos para os comerciantes (adhesivos para os agasallos, distintivos cos horarios de apertura e peche, paraugas de cortesía, etc.). Tamén se ofrece asesoramento lingüístico para mellorar a presenza do galego no comercio e impartirase formación para mellorar as estratexias de comunicación publicitaria e a atención ao público. Por último darase información sobre a normativa vixente e sobre posibles axudas para a promoción e galeguización do comercio.

Os establecementos que se adhiran recibirán unha bolsa con diferentes elementos promocionais como tres paraugas de cortesía identificados cos logos da campaña, un expositor de metacrilato para o horario do establecemento, ventosas para colocar o expositor, fichas para marcar o horario comercial, un cartel promocional da campaña, dípticos informativos cos obxectivos e coas actuacións da campaña , adhesivos para os agasallos e carteis para a época de Rebaixas.

Adhesión a Calidade en Galego
Na actualidade estase realizando unha actualización de todas aquelas empresas que están adheridas a esta campaña e aquelas outras que desexan adherirse. Os técnicos do departamento de Promoción Económica e do Servizo de Normalización Lingüística están visitando os establecementos comercias de nova apertura para explicarlle a cada empresario ou empresaria en que consiste esta iniciativa. Con todo, os e as comerciantes que desexen adherirse ou consultar calquera dúbida poden facelo poñéndose en contacto do departamento de Promoción Económica ou co Servizo de Normalización Lingüística nos teléfonos 981 883 002 ou 981 884 991 ou a través dos correos electrónicos promocioneconomica@concellodeames.org ou normalizacion@concellodeames.org

AYUNTAMIENTO DE MELIDE

Santa María de Melide recibirá un investimento de máis de 230 mil euros nun proxecto de restauración integral

·         O Concello de Melide priorizou esta actuación dentro das melloras que a Xunta ten previsto realizar nalgúns tramos do Camiño Francés.

·         O proxecto transformará o entorno da igrexa de Santa María mellorando os pavimentos, eliminando o cableado aéreo e instalando novos puntos de luz e mobiliario.

O entorno da igrexa e a praza pública de Santa María de Melide serán obxecto nas vindeiras datas dun proxecto de restauración integral da zona que pretende poñer en valor este entorno e recuperar a súa arquitectura e paisaxística natural.

O Concello de Melide solicitou á Xunta de Galicia a execución deste proxecto, dentro das actuacións que o ente autonómico realizará en varias localidades do Camiño Francés. No caso de Melide, Santa María é unha das zonas de maior peso histórico e cultural desta ruta, debido non só ao valor paisaxístico da zona, senón tamén á súa igrexa románica, que ten na súa bóveda pinturas de grande valor histórico. A igrexa de Santa María está considerada unha das igrexas de referencia do último tramo do Camiño de Santiago, datada no século XII, ten un elevado valor artístico e patrimonial, ademais de pola súa propia estrutura, polas pinturas murais do século XVI da ábsida.

A actuación que se realizará en Santa María consiste en mellorar o entorno tanto nas instalacións como na pavimentación. Nas primeiras, o principal aspecto de mellora será a retirada do tendido eléctrico aéreo, realizando obras para o seu soterramento. Desta maneira, liberarase o espazo visual e mellorarase o servizo. Na actualidade, esta praza está rodeada por un entramado de numerosos cables e varias columnas de formigón no medio da praza. Unha destas columnas de formigón está diante mesmo do cruceiro, o cal afea gravemente o entorno.

En canto ás pavimentacións, o proxecto pretende redefinir o trazado do Camiño, diferenciándoo do resto dos viarios que pasan polo lugar, destacando unha zona de aparcamento ordenado. Ademais, realizarase un mantemento do firme existente, saneando as zonas deterioradas e homoxeneizando a imaxe desta zona. Os tramos próximos ás vivendas, que na actualidade teñen capa asfáltica, serán levantados para colocar pedra no seu lugar. A actuación completarase coa colocación de mobiliario urbano novo: bancos, papeleiras e farolas novas.

O investimento en Santa María nesta ocasión supera os 230 mil euros –en concreto ascende a 231.136,84 €-, e responde a unha petición do Concello de Melide, formulada xa en agosto de 2009, na que se priorizaba a “recuperación da praza pública na aldea de Santa María”, por parte do equipo de goberno, ao abeiro das propostas de actuación da Consellería de Cultura para este Ano Santo.

Para a alcaldesa de Melide, Socorro Cea, trátase dunha “actuación moi agardada coa que se vai mellorar notablemente o entorno dunha das igrexas máis importantes do Camiño pola que pasan miles de peregrinos cada ano”. A rexedora municipal agradece á Consellería de Cultura que elixiran esta zona do Camiño francés para mellorar e pediralles agora que comecen as obras canto antes, posto que xa contan co permiso correspondente de Patrimonio para a execución das mesmas.