O Punto Limpo rexistrou 380 entradas durante o mes de maio
O Centro de Depósito de Residuos do Punto Limpo, situado no polígono do Milladoiro, continúa rexistrando uns magníficos datos que amosan a concienciación da cidadanía amiense co medio. A veciñanza segue empregando este centro de depósito para desfacerse daqueles obxectos e materiais que non van aos colectores convencionais de materiais orgánicos, inorgánicos, vidro ou papel. As cifras rexistradas durante o mes de maio, cun total de 380 entradas, amosan a tendencia do Punto Limpo que segue rexistrando un maior número de entradas mes a mes. Durante este mes destaca o incremento na achega de envases baleiros contaminados, aceite vexetal, pilas e papel. Durante o que vai de ano xa se rexistraron 1.802 entradas.
En cinco meses o Punto Limpo xa rexistrou un total de 1.802 entradas. Durante o mes de xaneiro rexistrou 401 entradas, en febreiro producíronse 314 entradas, en marzo houbo 355, en abril producíronse 352 e durante o pasado mes de maio rexistráronse un total de 380 entradas. Esta é a segunda mellor marca do ano, despois da rexistrada no mes de xaneiro. Estes datos amosan a tendencia deste depósito de superar ano a ano a media de entradas recibidas. O número de entradas rexistradas no que vai de ano supoñen unha mostra do respecto e da preocupación dos amienses polo medio e sitúan a media do ano 2011 en 360 entradas, superior claramente á media de 320, que se rexistrou no ano 2009, e moito máis ampla se temos en conta a media de 2008, que foi de 250 entradas. Ademais, o número medio de entradas deste ano xa se aproxima á media do ano pasado, que foi de 369 entradas por mes.
Durante o mes de maio, os e as amienses entregaron no Punto Limpo 2.215 quilos de equipos electrónicos, 170 quilogramos de unidades de envases baleiros contaminados, 56 unidades de tubos fluorescentes e outros tipos de lámpadas, 16 pneumáticos fóra de uso, 7 baterías de chumbo e 10 quilos de pilas. A veciñanza deixou tamén 56 quilos de pintura, 13 aerosois, 6 metros cúbicos de papel, 1 metros cúbicos de roupa, 20 metros cúbicos de plásticos, 20 de metais e outros 30 de voluminosos como colchóns, sofás e escumas. Os entullos procedentes de obras menores supuxeron 60 metros cúbicos e os restos de madeira chegaron aos 20 metros cúbicos. Por último, achegáronse 264 litros de aceites vexetais e 113 de motor. Durante este mes destaca o incremento de envases baleiros contaminados, aceite vexetal, pilas e papel que se achegaron ao Punto Limpo.
O Punto Limpo está situado na rúa das Hedras do polígono Novo Milladoiro e ata alí poden achegarse todos os veciños e veciñas de Ames para desfacerse de aqueles obxectos e materias que non van aos colectores convencionais de materiais orgánicos, inorgánicos, vidro ou papel. O centro está aberto preto de 40 horas semanais en xornada de mañá e tarde entre luns e o sábado. Así, o Punto Limpo abre de luns a venres de 10:00 h. a 14:00 h. e de 16:00 h. a 18:00 horas. Os sábados o horario é de 9:00 h. a 14:00 h. e de 16:00 h. a 20:00 horas.
Ao mesmo tempo, o Concello de Ames mantén un servizo de recollida gratuíta de mobles e trastes que se fai todos os venres. So é preciso chamar ao 981 191 240 indicando o tipo de residuo que quere tirar e deixalo xunto ao colector de lixo máis próximo á súa vivenda.
