BNG Ordes - no 2011 houbo máis de 1 millón de euros de gasto sen contabilizar



A INTERVENCIÓN ADVIRTE QUE NO 2011 HOUBO MÁIS DUN MILLÓN DE EUROS DE GASTO SEN CONTABILIZAR

Nun informe sobre a liquidación dos Orzamentos de 2011, o interventor confirma que o Concello de Ordes ten unha débeda de máis de 10 millóns de euros, perto de 800 euros por habitante

O portavoz municipal do BNG, Gonzalo Castro alertou da existencia dun informe da intervención municipal que “confirma a existencia de máis dun millón de euros de gasto que non se contabilizaron nos Orzamentos de 2011, o que fai sospeitar da existencia de gastos de difícil xustificación por parte do alcalde e o seu goberno”

Gonzalo Castro salientou que “o informe da intervención municipal advirte do total incumprimento do Plan de Saneamento aprobado pola Corporación en 2009 e da existencia dunha débeda acumulada de máis de 10 millóns de euros, perto de 800 euros por habitante, situando a Ordes como un  dos concellos galegos máis endebedados.”
O portavoz municipal do BNG, manifestou que “este informe da intervención municipal, que forma parte da liquidación da Conta Xeral de 2011 ven a evidenciar, unha vez máis, a existencia dunha xestión caótica por parte do alcalde e o seu goberno, co estrago de recursos públicos de forma absolutamente irresponsábel, e o que é peor sen que se teñan mellorado os servizos públicos do noso Concello, se non todo o contrario”.
Castro preguntouse “que xestión se está a facer por parte do alcalde en Ordes se cada día aumenta máis a débeda, mentres vemos como empeoran os servizos púbicos no noso concello?, en que se está gastando esta cantidade inxente de diñeiro?”.

Sen outro particular, reciban un cordial saúdo.

Ningún comentario: