A Asemblea do BNG de Dodro reúnese para
planificar o calendario político dos vindeiros meses
Marcaron a axenda
de xuntanzas e actos que realizarán para explicar as propostas nacionalistas
ante a situación que estamos a vivir
A Asemblea Local do BNG de Dodro reuniuse esta fin de
semana para analizar a situación da organización na localidade e marcar a
axenda a seguir nos vindeiros meses. Ademais, os militantes decidiron esixirlle
aos concelleiros que anunciaron a súa marcha do BNG que entreguen as súas actas
e hoxe mesmo mandaran un escrito ao Concello para solicitar que, de non
renunciar a elas, os edís pasen a formar parte do grupo de non adscritos.
O BNG de Dodro reuniuse esta fin de semana para traballar no
calendario a seguir nos vindeiros meses. Así, manterán unha serie de xuntanzas
con organizacións e entidades do Concello ademais de facer un acto público para
explicar as súas propostas ante a situación que estamos a vivir aos veciños e
veciñas da localidade. A data para este acto aínda non está pechada e será
anunciada nos vindeiros días. Ademais, e ante o abandono do BNG dos tres
concelleiros nacionalistas, os militantes acordaron tamén solicitar a renuncia
inmediata á acta de concelleiras/os para que tomen posesión as seguintes
persoas da lista que manteñan a súa adhesión ao BNG. Xustifican esta decisión
baseándose no feito de que a elección para ditos cargos públicos foi obtida
dentro dunha candidatura do BNG, e que quen propuxo a súa integración nesa
lista foron as e os militantes do BNG de Dodro.
Baseándose niso os nacionalistas pídenlle aos tres concelleiros
que nun exercicio de coherencia e dignidade renuncien ás súas actas e hoxe mesmo mandarán un escrito ao concello de Dodro
comunicando que os tres concelleiros xa non forman parte do grupo municipal do
BNG polo que, de non renunciar ás súas actas, deberán pasar ao grupo de non
adscritos. Faríase isto aos efectos de adecuar o seu estatus na corporación
municipal, aplicando a normativa vixente en materia de réxime local, que
recolle normativamente os acordos políticos asinados pola maioría de forzas
políticas representativas para atallar o transfuguismo.
A preocupación do BNG de Dodro neste momento é seguir
traballando por un proxecto político coherente e centrado nos veciños e nas
veciñas de Dodro, coma sempre porque “o BNG non cambiou”, subliñan. Así,
seguirán desenvolvendo unha actividade
política polo que manifestan publicamente a súa vontade de manter canles de
comunicación, información e colaboración con todas as asociacións e entidades
representativas do concello de Dodro e cos seus veciños e veciñas directamente,
a fin de escoitar as súas xustas demandas e reivindicacións e ser instrumento
para que as mesmas sexan debatidas nos foros axeitados.
En
momentos tan críticos como os que estamos a vivir o que realmente importa ao
BNG é mudar as políticas nefastas e regresivas que se están adoptando e que
incrementan o actual devalar negativo da economía e o emprego. O ánimo de
contribuír a que a maioría social de Dodro mellore a súa situación económica e
social manterá aos nacionalistas firmes e visíbeis á hora de seguir
representando tanto ás persoas que lles confiaron xa o seu apoio como a todas
aquelas que coinciden na necesidade de manter un nacionalismo unido e activo en
Dodro.
Ningún comentario:
Publicar un comentario