Teo - Chevere ofrece 3 "ultranoiteo" esta fin de semana


A COMPAÑÍA CHÉVERE OFRECE TRES ‘ULTRANOITEO’ ESTA FIN DE SEMANA


·        Aos dous espectáculos nas noites do venres e do sábado únese unha sesión vermú especial o domingo a mediodía

·        As entradas poden adquirirse por anticipado en redenasa.tv e en tres establecementos do municipio, e en billeteira o propio día

 A compañía Chévere Teatro, residente en Teo, ofrece esta vindeira fin de semana tres actuacións do seu espectáculo ‘Ultranoiteo’ no auditorio do Centro Sociocultural da Ramallosa. Ás representacións das noites do venres e do sábado, as dúas ás 23 horas, únese unha especial o domingo a partir das 13 horas, a modo de sesión vermú con opción de xantar degustación.


No caso do venres e do sábado, existe a posibilidade de ir ata o auditorio -e retornar para a casa- facendo uso do Ultrabús. Este servizo de transporte para quen desexen acudir tranquilamente mantense pola moi boa acollida na súa estrea. Sae desde a Rúa da Rosa en Santiago e vai facendo diversas paradas ao longo da estrada comarcal AC-841, en Pontepedriña, nos Tilos, en Montouto e en Cacheiras, antes de deterse na Ramallosa.

As entradas están xa á venda de maneira anticipada por internet, a través da web www.redenasa.tv. Tamén se venden en tres establecementos do municipio: o bar A Santa Sede (A Ramallosa), o bar A Capilla (Calo), e o bar A Senra (Pontevea). As entradas que sobren da venda anticipada estarán dispoñibles, para os rezagados, no propio auditorio desde unha hora antes do inicio do espectáculo.

Escarnio da actualidade
Chévere Teatro anuncia que os temas estrelas do seu espectáculo, caracterizado por facer escarnio humorístico da actualidade, van ser a economía, os recortes e a crise. Sobre o escenario sairán “a nacionalización de Bankia, a estampida de presidentes de bancos, o rescate de España e a banca española pola Unión Europea, e falando de Europa, menos mal que nos queda Eurovisión, con esas mulleres rusas poñendo un pouco de cor”, segundo explican.

Tamén anticipan que tratarán temas específicos de Galicia, como a marcha de Xerardo Conde Roa da alcaldía de Santiago, a xestión de Alberto Núñez Feijóo, ou a situación do Centro Dramático Galego, a Cidade da Cultura e a Real Academia Galega. E todo sen pasar por alto a Eurocopa e a súa utilidade “para apaciguar ás masas”, afirma Chévere Teatro.

Éxito desde abril
As ‘Ultranoites’ representáronse por primeira vez en Teo a mediados do mes de abril, con tan boa acollida que Chévere ofreceu unha función extra para satisfacer a todos os que quedaran sen entrada para as dúas programadas inicialmente.

A excelente resposta que están recibindo as actividades de Chévere Teatro constitúen para o Concello de Teo unha constatación de que a súa chegada como compañía residente ten un efecto dinamizador a nivel local non só na programación cultual, senón tamén no eido económico. Hai que ter en conta que, ademais de espectadores de Teo, unha gran parte do público que acode á Ramallosa son veciños de Santiago e doutros municipios da comarca.

Compañía residente
Chévere Teatro convertiuse en compañía residente de Teo en virtude dun convenio asinado entre a compañía e o Concello o pasado mes de marzo. O acordo contempla arredor de medio cento de actividades que se suman á programación cultural teense: ademais das representacións no auditorio da Ramallosa, obradoiros nas Casas Comúns e propostas específicas para nenos e adolescentes. O Concello beneficiase ademais da dotación técnica que a compañía instalou no centro sociocultural, e que está tamén dispoñible para actividades do tecido asociativo.

Ningún comentario: