MÁIS DE CINCOCENTAS PERSOAS ACODEN AO INICIO DO MERCADO DE ALIMENTO LABREGO DE TEO
Concello aposta por este mercado semanal de venda directa de produtos de tempada e agarda incrementar o número de vendedores
·
Algún dos postos mesmo agotou a mercadoría que trouxera
antes das dúas da tarde, momento en que rematou o mercado
O Mercado de Alimento Labrego de Teo comezou hoxe
a súa andaina con éxito. Máis de cincocentas persoas achegáronse durante esta
mañá ata a praza dos Tilos para coñecer e mercar os diversos alimentos de
tempada ofrecidos por quince produtores da zona. O mercado, que organizan o
Concello e o Sindicato Labrego Galego, repetirase todas as mañás dos sábados,
entre as 10 e as 14 horas.
O balance que fan os responsables dos postos é moi satisfactorio, a pesar
de que a meteoroloxía desta mañá estivo un pouco revolta. Destacan tanto o
ambiente que se creou co público, nun espazo de encontro social, como o nivel
de vendas, superior ao que agardaban. Algúns dos postos, como o dun vendedor de
leite e queixo ecolóxicos de Lalín, mesmo agotaron a mercadoría antes de que
rematase o mercado, a eso das dúas da tarde. Foi a esa hora cando se sorteou
unha cesta con produtos do mercado entre todos os clientes desta xeira, unha
iniciativa dos produtores para incentivar a participación da xente e as vendas.
Este excelente inicio fai que todos os expositores confirmasen xa que van
repetir a vindeira semana. O propósito da organización é precisamente que o
mercado se consolide e incremente o número de vendedores. Nese aspecto
incidiron o alcalde de Teo, Martiño Noriega, e o concelleiro de Emprego, Anxo
Rei, que acudiron a coñecer as impresións de clientes e produtores e
aproveitaron para mercar.
O goberno municipal considera que esta iniciativa de venda directa ten o
doble valor de ofrecerlles aos cidadáns uns produtos fiables e de calidade, por
unha parte, e de servirlles aos produtores da zona como unha alternativa de
futuro e de xeración de emprego, por outra.
A propia distribución do mercado fixo tamén que as vendas se repartisen
homoxeneamente entre todos os expositores. Diferenciáronse catro tipoloxías de
productos, todos caracterizados por ser locais e de tempada: os de agricultura
sostible, que son os obtidos sen a utilización de elementos químicos
industriais; os de agricultura ecolóxica, que distingue os seus produtos con
certificados oficiais de calidade; os produtos de transformación local,
procedentes de cultivos ou produccións propias; e os alimentos naturais de
mercado.
A variedade do mercado é, por tanto, moi considerable. No apartado de
froitas e verduras non faltaron acelgas, cebolas, ceboletas, chícharos, fabas
secas, espinafres, faba loba, morangos, leitugas, patacas, porros, repolo,
verza, noces, cereixas, limóns, laranxas ou amorodos. E ademais estiveron
dispoñibles queixos e leite de producción ecolóxica, pan, galletas, biscoitos
ou empanadas caseiros, así como zumes naturais e marmeladas ecolóxicas con
etiqueta, mel, ovos ou fariñas de diverso tipo, e mesmo herbas e prantas aromáticas.
A posta en marcha deste mercado veu precedida por unha campaña de
sensibilización dirixida aos consumidores e consumidoras. Consistiu nunha serie
de catro charlas informativas sobre a importancia dunha alimentación de tempada
baseada en produtos sanos e de calidade, e como este tipo de mercados locais a
poden garantir.





Ningún comentario:
Publicar un comentario