Santiago - aCadaCanto no teatro principal


aCadaCanto, O PROXECTO DE GUADI GALEGO, XABIER DÍAZ, GUILLERME FERNÁNDEZ E XOSÉ LOIS ROMERO, EN DIRECTO EN SANTIAGO

hoxe ás 21 horas no Teatro Principal

Hoxe ás 21 horas terá lugar no Teatro Principal de Santiago de Compostela dentro do ciclo ‘Íntimo&Acústico’ o concerto de Guadi Galego, Xabier Díaz, Guillerme Fernández e Xosé Lois Romero co proxecto aCadaCanto, o novo disco de Músicas de Salitre no que conflúen por primeira vez de maneira conxunta as carreiras musicais destes catro músicos. Compañeiros en outras formacións coma Berrogüetto, Espido, ou Nova Galega de Danza, os catro xúntanse na gravación do sexto disco de Músicas de Salitre.


Presentación do concerto
O concerto do Teatro Principal presentouse  no Teatro Principal, acto no que participaron Xabier Díaz e Guillerme Fernández de aCadaCanto e José Victor Carou, director-xerente do Auditorio de Galicia. Segundo Xabier e Guillerme, “este proxecto musical é limitado no tempo, todos temos outras obrigacións musicais, pero da mesma maneira que nos xuntamos no estudio para gravar o disco, xuntarémonos no escenario para tocalo. Ademais, para quen aínda non ten o disco, poderá mercarse no Teatro Principal”.

José Victor Carou, director-xerente do Auditorio de Galicia, amousouse encantado de poder contar con este proxecto pechando a programación do ciclo ‘Íntimo&Acústico’ que puxo en marcha a concellaría este ano. O ciclo acolleu a artistas como Aline Frazao, Simon Finn, Rebeca Jiménez, Maika Makovski, Abe Rábade Trío ou Ariel Rot, entre outros moitos e volverá despois do verán con novas propostas.

O repertorio deste concerto estará conformado polas trece cancións do disco aCadaCanto, máis algúns dos temas do resto de discos de Músicas de Salitre. Os prezos das entradas son 10 € anticipada e 12 € no despacho de billetes

Sexto disco de Músicas de Salitre
Músicas de Salitre é o selo discográfico formado por Xabier Díaz e Guillerme Fernández e aCadaCanto é a sexta referencia do seu catálogo:

-         Músicas de Salitre (2005)
-         Espido (2005)
-         Coplas para Icía (2007)
-         Benzón (2009)
-         Arrolos de Salitre (2010)
-         aCadaCanto (2012)

Sobre Guadi Galego
Gaiteira, compositora e unha das voces imprescindibles da música contemporánea galega. Voz de Berrogüetto durante anos, tamén participou nas formacións Espido e Nordestinas, ademais de editar en solitario o disco Benzón.

Sobre Xabier Díaz
Produtor musical e compositor, comezou como cantante no disco de Músicas de Salitre. Coa compañía de danza Nova Galega de Danza, estivo nomeado como finalista aos Premios Max como Mellor Espectáculo Revelación. É a voz actual de Berrogüetto.

Sobre Guillerme Fernández
Músico, compositor e guitarrista, compaxina dende hai anos o seu labor en Berrogüetto con proxectos musicais diversos como Espido ou a experiencia radiofónica Tres peixes voando, compartida con Xabier Díaz. Colaborou con artistas coma Xosé Manuel Budiño, Donald Shaw ou Karen Matheson.

Sobre Xosé Lois Romero
Percusionista, acordeonista e compositor, foi cofundador e director musical da compañía Nova Galega de Danza. Forma parte do trío Vaamonde, Lamas & Romero, é mestre de percusión tradicional na escola Tradescola de Lugo e participa en proxectos paralelos.

Ningún comentario: