Ordes - recollida de material escolar

O Concello de Ordes leva a cabo unha campaña de recollida de material escolar para as familias máis desfavorecidas
Nela tamén participan Cruz Vermella e Cáritas. Todo o recadado repartirase entre os usuarios do servizo municipal de alimentos 
Neste inicio de curso que acaba de ter lugar o departamento de Servizos Sociais do Concello de Ordes quere lembrar unha vez máis a campaña solidaria de recollida de material escolar para familias desfavorecidas de cara ó vindeiro curso 2012-13. Unha iniciativa levada conxuntamente con Cáritas Ordes e Cruz Vermella Ordes. 

Co fin de recadar únicamente o material que sexa útil os centros académicos espallados polo municipio elaboraron unha lista na que se precisa o máis indispensable. Lápices, bolígrafos, gomas de borrar, rotuladores, libretas de distintos tamaños, regras, carpetas, etc, pódense depositar ata o vindeiro 5 de outubro nas caixas destinadas a tal fin. Éstas están ubicadas tanto nos centros de ensino como nos locais de Cáritas, Cruz Vermella, no departamento de Servizos Sociais, así como nas librerías Arume, La Repro, Tango, Emilia e Paraíso. Todo o recadado repartirase entre os menores que formen parte das familias que estén inscritas no servizo de reparto municipal de alimentos.

Ningún comentario: