Silleda - o concelleiro de medio rural acusa o PP de demagoxia


Antonio Couso pídelle ao PP de Silleda que se deixe de demagoxias e que repase o calendario de desbroces

-Lémbralle a Espiño Espantoso que no Concello hai como todos os anos  un listado coas festas de todas as parroquias, criterio as seguir para limpar as fincas, e que as festas de Cortegada, Ponte e Margaride aínda non se celebraron


-“As vías que usan os peregrinos tamén son usadas polos veciños”, sinala o concelleiro de Medio Rural

O concelleiro de Medio Rural e Medio Ambiente de Silleda, Antonio Couso, advirte que “non se entenden as novas críticas do PP sobre os desbroces”, máxime cando falan de casos concretos nas parroquias de Margaride, Ponte e Cortegada. O concelleiro explica que “como todos os veciños saben xa a estas alturas”, os desbroces no rural fanse seguindo o calendario das festas, “pero parece que o señor Espiño aínda non leu o listado que está a súa disposición nesta Concellería”, engade. No plano aprobado o pasado mes de marzo xa se recollían todas as localidades do municipio, tomando como referencia a celebración das festas parroquiais.
Así, e sobre os tres casos concretos que cita o PP de Silleda, Couso advirte que as festas de Cortegada se celebran os vindeiros 27, 28 e 29 de xullo; as de Margaride os días 1 e 2 de agosto, e as de Ponte os día 9 e 29 de setembro, “co que ademais de ter tempo, queda demostrado unha vez máis que o PP sigue buscando titulares en vez de molestarse en facer unha oposición seria”.

Por outro lado, Antonio Couso ve demagóxico que o PP diga que se preocupa máis polos peregrinos que polos veciños. “ A miña obriga como concelleiro é preocuparme polos veciños, claro está, pero tamén polos moitos peregrinos que transitan polo territorio municipal”, di Couso, lembrando que o Xacobeo, que viña asinando convenios cos Concellos para os desbroces, optou este ano por adxudicar todos os traballos a unha empresa. A semana pasada remitiuse ao organismo autonómico un informe sobre as deficiencias na Vía da Prata na que figuran moitas vías que son usadas polos veciños en xeral “algunhas delas, propiedade da Deputación ou da Xunta, organismos aos que tamén se lle requeriu xa dende o Concello de Silleda que procedan á limpeza e desbroce das zonas da súa titularidade”, remata.

Ningún comentario: