Silleda - o goberno municipal levará a un pleno a ordenanza para venta ambulante


O goberno municipal levará ao vindeiro pleno ordinario a ordenanza para regular a venda ambulante
-Estableceranse taxas polo uso privativo ou aproveitamento especial da vía pública
-A alcaldesa, Paula Fernández, xa se reuniu cos responsables de polberías e do colectivo e nos vindeiros días manterá encontros cos panadeiros, froiteiros, peixeiros e outros colectivos habituais na venda ambulante

 . O goberno municipal ten previsto levar ao vindeiro pleno ordinario a aprobación inicial da ordenanza de venda ambulante, coa que se pretende acometer a necesaria regularización desta actividade no municipio. A alcaldesa e responsable do departamento municipal de Facenda, Paula Fernández Pena, xa lle presentou a proposta á directiva da Asociación de Empresarios e Comerciantes de Silleda (Ecos) e aos polbeiros e polbeiras do municipio.
A proposta da Alcaldía, que será abordada nos vindeiros días nunha xunta de portavoces, estabrece, ademais da ordenanza para regular o comercio ambulante unha taxa por uso e ocupación da vía pública con postos, barracas, casetas de vendas, espectáculos, atracións ou recreo, así como rodaxes cinematográficas ou actividades con fin cultural sen fin de lucro e gravacións con proveito comercial ou publicitario.
A ordenanza estabrece tres modalidades de venda: mercadiños tradicionais, comercio ambulante illado na vía pública e comercio itinerante. Tamén se recolle que para exercer o comercio ambulante requerirase ter previamente a autorización municipal conforme ao procedemento que se recolle na nova normativa. Antes de iniciar a actividade deberanse devengar as taxas por ocupación de vía pública. As autorizacións terán unha vixencia de tres anos, e nos casos que se autorice a venda para festas populares, o permiso limitarase á duración destas.
O titular do permiso (válido tamén para cónxuxes, fillos ou empregados con contrato de traballo e dados de alta na Seguridade Social) deberá de cumprir unha serie de requisitos, segundo a ordenanza. Así, ademais de estar ao corrente no pago de impostos de actividades económicas, das cotizacións á Seguridade Social, nas taxas municipais correspondentes, contar cun seguro de responsabilidade civil con cobertura dos riscos de actividade comercial desemnpañada, ter carné de manipulador de alimentos nos casos que corresponda, estar inscrito no Rexistro de Comerciantes Ambulantes da Xunta de Galicia, ou dispor, no caso de extranxeiros de permiso de residencia e traballo.

Procedemento para as solicitudes
Haberá un modelo de solicitude, que pode presentarse en calquera momento do ano unha vez que a ordenanza municipal entre en vigore estabrécese un prazo de dous meses para resolver a solicitude. Entre os criterios a ter en conta para conceder os permisos figuran a experiencia demostrada no exercicio da profesión, a dispoñibilidade de instalacións desmontables axeitadas e proporcionais á actividade ambulante, ter o carné de profesional da venda ambulante expedido pola Xunta, distintivos de calidade,  e tamén as dificultades para acceder ao mercado laboral por parte do solicitante ou o número de persoas que dependen económicamente do/a solicitante. Unha vez outorgado o permiso municipal, o Concello poderá realizar comprobacións, controis e inspeccións sobre o adxudicatario do permiso. 
Taxas por uso da vía pública
Ademais da ordenanza para regular a venda ambulante “algo que era moi necesario neste concello”, sinala a alcaldesa, tamén se someterá a aprobación unha normativa coa “Taxa por Utilización Privativa ou Aproveitamento Especial da Vía Pública con Postos, Barracas, Casetas de Vendas, Espectáculos, Atraccións ou Recreo, Industrias nas rúas e Ambulantes, así como rodaxes cinematográficas e eventos ou actividades con fin cultural, sen fin de lucro e gravacións con proveito comercial ou publicitario”. Neste textos estabrécense as tarifas, que serán:

-Para os días de feira tradicional , estabrécese unha taxa única de 1 euro, por metro cadrado e día.
-Paras os días de festa ou eventos especiais os prezos serán:
Ocupación de ata 5 metros cadrados….8,20€ (tarifa única por día)
Ocupación de 5 a 8 metros cadrados…….3,40 € por metro e día
Por ocupación de máis de 8 metros cadrados …5,44 € por metro e día
Non queda suxeito á taxa o vehículo usado para a actividade
comercial.

-Para a venta ambulante en vehículos con carácter itinerante a tarifa será de 15 euros ao día, mentres que no caso dos comercios itinerantes tradicionais, abonarase unha taxa única anual de 100 euros.

Tamén se comezará a cobrar pola celebración de espectáculos públicos ou rodaxes  cinematográficas. As ocupación por actividades de carácter cultural será de 0,30 euros por metro cadrado e día, e nas que teñan carácter e proveito comercial ou cultural, de 0,60 euros ao día
A normativa municipal tamén estabrece unha serie de condicións hixiénico sanitarias e en defensa dos consumidores, así como a limpeza de residuos ou desperdicios , para a que os medios serán facilitados polo Concello. Tamén recolle un réxime sancionador por infraccións tipificadas como leves (incumprimento do horario autorizado, non exhibir prezos ao público ou non limpar o posto unha vez rematada a xornada); graves (exercer a actividade sen permiso municipal, instalar o posto nun lugar non autorizado, ou incumprir as normas hixiénico-sanitarias entre outros) ou moi graves, con incumprimentos reiterados resistencia, ou coaccións á autoridade municipal, funcionarios e axentes.
          As infraccións leves suporían unha multa de ata 300 euros; de 300 a 1.000 euros as graves e moi graves, de 1.000 a 3.000 euros.
A alcaldesa, Paula Fernández, reunirase nos vindeiros días con outros colectivos relacionados coa venda ambulante, coa o caso dos panadeiros, froiteiros ou peixeiros, para presentarlles a proposta e pulsar a súa opinión. 

Ningún comentario: