Silleda - licítanse as sendas de Mandúas

Paula Fernández amosa a súa satisfacción pola licitación das sendas de Manduas

-A Xunta sacou hoxe a concurso as obras, que incluén a mellora da calzada A Bandeira-Cruces (PO-204) , cun prazo de execución de tres meses

-A alcaldesa de Silleda reiterou hoxe ante o delegado da Xunta en Pontevedra, José Manuel Cores Tourís, a necesidade de arranxar tamén os socavóns en Portodavalde, a única vía de acceso a Parada

A alcaldesa de Silleda, Paula Fernández Pena, agradeceulle hoxe ao delegado territorial da Xunta en Pontevedra, José Manuel Cores Tourís, que visitara o municipio para dar a coñecer “a boa nova” da licitación das sendas de Manduas, unha “demanda histórica” que leva anos reivindicándose dende o Concello de Silleda e dende a Asociación de Veciños de Manduas (Avema). “Esperamos que as obras poidan iniciarse canto antes, xa que se trata dunha actuación moi necesaria para mellorar a seguridade viaria neste punto”, sinalou a rexidora.

Segundo explicou Cores Tourís, acometeranse as sendas só na marxe esquerda, nun tramo de 400 metros, dende as aceras de Manduas ata a igrexa parroquial. Os traballos comezarían este verán, cun prazo de execución de tres meses e realizarase tamén unha mellora da calzada na vía Bandeira-Vila de Cruces (PO-204). “A situación económica é a que é por iso decidimos acometer o máis prioritario”, dixo o delegado referíndose a que só se realizarán parte das sendas solicitadas.

O concelleiro de Obras e Servizos, Manuel Cuíña, e tamén os membros de Avema lembráronlle a Cores Tourís, que no vial téñense producido situacións de risco debido ao elevado tránsito de vehículos pesados procedentes das canteiras de Campomarzo e á presenza de numerosos viandantes cara a igrexa e o centro social de Manduas.

O delegado tamén sinalou que se traballará “en total colaboración co Concello” para que as obras queden o mellor posible.

A alcaldesa tamén aproveitou a visita de Cores, para lembrarlle unha petición moi urxente que xa lle trasladou por escrito: a mellora do vial de Portodavalde, o único que da acceso á parroquia de Parada, onde as tubaxes colocadas a modo de ponte xa romperon en dúas ocasións provocando o afundimento da calzada. “Toda a Corporación de Silleda amosou o seu acordo co necesario arranxo do vial. Temos un problema moi grave porque calquera día o vial afúndense”, sinalou a alcadesa sobre a petición de axuda económica, formulada tamén á Deputación de Pontevedra. O proxecto de arranxo, realizado dende a Concellería de Obras e Servizos, ten un orzamento aproximado de 50.000 euros.

Así mesmo, tamén lle lembrou que o albergue de peregrinos da Bandeira está só pendente da actuación da Xunta “xa que no Concello temos listos todos os trámites necesarios para a súa instalación”, rematou.