BOLANDA - nace o proxecto Santiago oculto dos peregrinos


Nace O Santiago Oculto dos Peregrinos un proxecto que permitirá coñecer os segredos mellor gardados de Compostela

·       Trátase dun conxunto de iniciativas de cidade e colectivas destinadas a coñecer as pegadas xacobeas existentes en Santiago e na súa catedral, e nunca antes recompiladas
·       A próxima semana terá lugar a presentación do proxecto, que inclúe unha guía, un plano de sinalización e unha web 2.0

·       Unha segunda etapa desta iniciativa contempla unha exposición interactiva na que peregrinos e visitantes poderán recuperar os ritos e tradicións xacobeas de distintos espazos da cidade e da catedral, como a imposición de mans no Pórtico da Gloria
 - A próxima semana presentarase un novo proxecto de dinamización relacionado co Camiño de Santiago e coa influencia que este tivo na configuración da súa meta, Santiago de Compostela. Trátase dun conxunto de propostas agrupadas baixo a denominación O Santiago Oculto dos Peregrinos. Iacobus Absconditus Peregrinorum que permitirán a peregrinos, turistas e veciños coñecer os segredos da capital galega vinculados ao mundo xacobeo.
O obxectivo é facilitar o descubrimento das historias, costumes e lugares xurdidos ao longo dos séculos en atención aos peregrinos de toda Europa que chegaban á cidade. Para iso elaborouse unha guía, un mapa de sinalización e unha web 2.0 que permitirá coñecer a historia xacobea compostelá, unha historia exclusiva, que só existe e ten sentido en Santiago. É o seu factor diferencial.
A guía La catedral de Santiago para peregrinos. Guía secreta revela as pegadas xacobeas do templo meta do Camiño, mentres que o mapa O Santiago oculto dos peregrinos é o primeiro plano centrado no itinerario histórico dos peregrinos pola cidade. Revela a pegada vivencial, en gran medida oculta polo tempo e moi descoñecida, dos camiñantes que chegaban en peregrinación á cidade e facían seus determinados e simbólicos espazos da mesma (hospitais, igrexas, fontes, rúas, cemiterios, etc). Este plano terá a súa prolongación nas placas identificativas que se colocarán nos distintos emplazamentos do percorrido.
A iniciativa complétase cunha web 2.0 que dá unha nova dimensión ao proxecto e permite achegar toda esta información, nunca antes recompilada, a calquera cidadán do mundo interesado en coñecer a dimensión xacobea da cidade. Deste xeito, fomentarase un novo recurso cultural e turístico para a capital galega, axudando a alongar a estancia media do visitante e, especialmente, dos millóns de peregrinos que cada ano chegan a ela. Moitos destes peregrinos preguntan con frecuencia por información que recolla as pegadas xacobeas da cidade e da propia catedral. Este proxecto pretende, en definitiva, dar resposta, contido e sentido a esa demanda.
Colaboradores e patrocinadores
Iacobus Absconditus Peregrinorum é un proxecto de Bolanda Edicións e Marketing –responsable de numerosas iniciativas promocionais e divulgativas xacobeas como a Gran Enciclopedia del Camino de Santiago–, baixo a coordinación do xornalista e profesor da USC Manuel F. Rodríguez. Conta co patrocinio e apoio da Xunta de Galicia a través da Secretaría Xeral para o Turismo, Turgalicia e o Xacobeo, o Concello de Santiago, o Arcebispado, a Fundación e o Cabido da Catedral de Santiago, Novagalicia Banco, a Universidade de Santiago, así como a Cámara de Comercio da cidade, as asociacións de hostalería e distintas entidades xacobeas galegas. Ademais, colaboraron numerosas empresas, organizacións e institucións que se envorcan nun proxecto destinado a dar un novo impulso á cidade como meta do Camiño de Santiago, o itinerario histórico máis vivo e máis seguido por persoas de todo o mundo.
Exposición interactiva
O proxecto contempla, no seu caso, unha segunda fase consistente nunha ampliación dos contidos descritos e nunha exposición interactiva, Neopórtico. A catedral oculta dos peregrinos, que permitiría ver, admirar, vivir e sentir aos peregrinos históricos xacobeos na propia cidade e, sobre todo, no seu templo meta.
O punto de conexión desta mostra en proxecto será o Pórtico da Gloria da basílica. Desde finais da pasada década os peregrinos non poden realizar o rito da imposición de mans na columna do parteluz do Pórtico da Gloria. A perda deste costume tan popular e tan sentido polos peregrinos, sobre todo polos que chegaban a pé á cidade, debeuse á necesidade de protexer o conxunto do Pórtico. Enténdense as razóns, pero os peregrinos seguen buscándoo e necesitándoo. Os ritos, na súa mellor versión, son esenciais para os peregrinos.
Polo tanto, preténdese pór en marcha unha exposición interactiva que reproduza, con todo respecto, o Pórtico, dando a posibilidade de volver realizar, só de forma simbólica, o desaparecido rito. Tratáse, en definitiva, dunha reinterpretación do espazo orixinal ao estilo da Neocueva de Altamira, nacida tamén para preservar o valor do orixinal. De aí o seu título: Neopórtico. Afondando na liña argumental da guía que se presenta o xoves, Neopórtico completaría o seu sentido descubrindo os espazos dos grandes os costumes dos peregrinos das máis diversas nacionalidades na cidade e na catedral a través dos séculos. Todos os contidos de Neopórtico serán interactivos. Á vez que se verá a históricos peregrinos franceses, alemáns, holandeses, italianos, ingleses, etc., realizando estes ritos nos distintos espazos catedralicios e da cidade, os visitantes que o desexen poderán reproducilos, nunha liña de difusión que preservará en todo momento o valor deste patrimonio de alcance europeo e único, hoxe perdido.

Ningún comentario: