BNG A Estrada - para o goberno non é prioritario adicarlle unha rúa os concelleiros fusilados en 1937


Para o PP non é prioritario adicarlle unha rúa ao alcalde e concelleiros fusilados en 1937
Xosé Magariños acusa ao alcalde de falta de sensibilidade perante o fusilamento dun alcalde da Estrada e varios dos seus concelleiros, elixidos democraticamente, e asasinados por defenderen a liberdade e a democracia

 Na sesión plenaria do xoves pasado o concelleiro do BNG, Xosé Magariños, preguntoulle a José López se ía iniciar os trámites para adicar unha rúa aos Mártires da Estrada, dado que este ano se cumpre o 75 aniversario do seu fusilamento. A resposta do alcalde José López non puido ser máis taxativa: “agora mesmo había outras prioridades máis importantes que atender”.
O concelleiro do BNG a respecto desta cuestión declarou non entender “a falta de sensibilidade do alcalde perante o fusilamento dun alcalde da Estrada e varios dos seus concelleiros, elixidos democraticamente, e asasinados por defenderen a liberdade e a democracia”.
“Non se entende ademais”, engadiu o concelleiro nacionalista “que habendo como hai unha petición expresa do daquela 1º tenente alcalde, Ramón Fernández Rico, de adicar unha rúa ás vítimas da máis miserábel opresión que viron os tempos (cito textualmente da carta), o noso alcalde actual se despache de xeito tan despectivo fronte aos que morreron pola liberdade, a democracia e a legalidade vixente perante a ditadura franquista”.
O concelleiro do BNG explicou que “é certo que neste tempo de crise económica hai que xestionar ben os cartos públicos e investilos acaidamente”. “Sen embargo,” engadiu Xosé Magariños, “adicar unha rúa aos Mártires da Estrada é máis económico que a famosa estatua do salmón, e xa non digamos do novo campo de fútbol que non necesitamos para nada”
“Pero non se tratar de cartos”, explicou Magariños “trátase de facer xustiza e de facer un recoñecemento público aos concelleiros fusilados en 1937; para o BNG, desde logo, é o máis importante de todo, por encima do custe dunha placa de pedra, que é o que lle vai custar ao concello esta homenaxe”.
“Por iso”, engadiu o concelleiro nacionalista”desde o BNG pedímoslle que rectifique, que deixe a un lado os seus complexos ideolóxicos, que aproveite o 75 aniversario do asasinato destes concelleiros da Estrada para facer xustiza aos Mártires da Estrada tal e como pediron nunha carta datada o 13 de marzo de 1937, dous meses antes de seren asasinados”.
Hai que recordar que os Mártires da Estrada son Jesús Puente Fontanes (alcalde), Ramón Fernández Rico (1º tenente de alcalde), Manuel Nogueira González, José María Pena López, Cándido Tafalla Froiz e José Rodríguez Sangiao, fusilados o 5 de xuño de 1937 en Pontevedra.

Ningún comentario: