PROTECCIÓN CIVIL DE TEO SINALIZA CASE 400 HIDRANTES, PARA FACILITAR O TRABALLO EN CASO DE INCENDIOS
· Neste momento xa está
lista a zona norte, dende Os Tilos, Parque Montouto, San Sadurniño e parte de
Cacheiras
·
Dende o Concello reitérase
a importancia da prevención de riscos para evitar incendios nestas xornadas de
intenso calor
O Servizo Municipal de Emerxencias do Concello de
Teo está realizando dende as últimas semanas a sinalización e rexistro de todos
os hidrantes e bocas de rego do termo municipal. Segundo estiman dende este
departamento serán case 400 puntos nos que se está facendo un pintado en
vermello e blanco na beirarrúa para ter localizados estes puntos e ser máis
operativo en caso de que haxa incendios. As bocas de rego ou hidrantes son
puntos da rede de abastecemento municipal preparadas para que os camións contra
incendios poidan coller auga.
Segundo explican dende Protección Civil este traballo de rexistro de todas
as bocas é de vital importancia para traballar con axilidade no caso dun lume.
“Nese momento a reacción ten que ser rápida e debemos ter claro en qué zonas
teremos hidrante e qué características técnicas ten cada unha delas e se hai
presión de auga suficiente para cargar o camión con rapidez”. Esta labor comezouse
na zona norte do Concello e neste momento xa están sinalizadas as dos Tilos,
Parque Montouto e San Sadurniño, Cacheiras e Ramallosa. Nas zonas nas que non
hai traída municipal tamén se teñen localizados lugares onde coller auga como
ríos, regatos, corgos, lavadoiros públicos...
No rexistro dos hidrantes aparecen datos como a localización exacta do
mesmo, o tipo, o tamaño de boca para a mangueira que se debe usar así como as
coordenadas de GPS. Esta información complétase con imaxes do lugar para a súa
ubicación de xeito máis sinxelo.
En relación con este traballo dende o Concello lémbrase que nestas xornadas
de intenso calor hai que tomar precaucións para evitar o risco de incendios.
Deste xeito prohíbese calquera uso de lume, lémbrase a prohibición de tirar
cabichas ou cigarros acendidos no monte ou na estrada, non tirar lixo ou vidro
que poida orixinar un incendio... No caso de que se produza un incendio débese
avisar á maior brevidade posible ós servizos de emerxencia. Concretamente ó 112
ou ós números do Servizo Municipal de Emerxencias 649 804 702 ou da Policía
Local 606 984 838.
O Servizo Municipal de Emerxencias de Teo traballa durante os meses de
agosto e setembro con servizo 24 horas, precisamente por tratarse dos meses de
máis perigo de incendios. Este horario prolóngase ó mes de outubro se
persistiran as condicións de perigo.
Ningún comentario:
Publicar un comentario