Máis
de 2.000 persoas visitaron xa o mosteiro románico de Carboeiro entre o 15 de
xuño e o 31 de xullo
A maioría realizaron a visita en grupo ou en familia, e moitos deles
coñecían xa o emblema turístico e patrimonial de Silleda
O mosteiro románico de San Lourenzo de Carboeiro segue a ser un dos lugares
máis visitados da comarca do Deza. Segundo os datos recabados pola guía que
atende no histórico edificio, onde se sitúa tamén o punto de información
turística, dende o pasado 15 de xuño e ata o 31 de xullo, pasaron polas
dependencias monacais un total de 2.134 persoas. Se se contabiliza dende o mes
de maio, a cifra supera os 3.000 visitantes.
“Estes datos rebaten calquera teoría de que cobrar unha entrada
simbólica de 1 euro por ver o mosteiro ía traer consecuencias”, sinala o
concelleiro de Turismo, Matías Rodríguez Datorre, que advirte que cos
resultados obtidos ata o momento o balance de visitas na tempada estival
igualará, “e mesmo podería superar o de anos anteriores”.
Cabe ter en conta tamén que algúns dos visitantes solicitaron
información turística sobre Silleda e a comarca do Deza no propio monasterio,
onde se vén situando cada ano o punto de información turística municipal.
Así, no mes de xuño, dos 713 visitantes registrados, 47 solicitaron
información, e en xullo, fixérono 165 do total de 1.421 visitantes.
En canto ao perfil do turista/visitante, predomina o visitante de
mediana idade (36-65), se ben no mes de xuño case a metade foron maiores de 65
anos que formaban parte de diversas excursións. Ademais, acudiron
principalmente en grupo ou en familia, seguido de parellas.
Respecto á procedencia, a gran maioría (o 96% no mes de maio e o 94
por cento en xuño) dos visitantes residen en territorio español, sendo preto da
metade galegos. Pontevedra, seguida de A Coruña, é a provincia que máis
visitantes aporta .
Os veciños e veciña da comarca do Deza supuxeron, no mes de xullo, o
43,75% dos visitantes procedentes de Pontevedra. Tamén as persoas procedentes
de Santiago de Compostela tiveron un gran peso no balance de xullo, sendo case
o 34% dos visitantes de A Coruña veciños da cidade de Compostela.
No tocante aos visitantes de fóra de Galicia, achegáronse ata
Carboeiro principalmente persoas procedentes de Madrid, Andalucía, Cataluña,
Euskadi e Castela León. En canto aos visitantes extranxeiros, no mes de xuño,
destaca a visita de turistas de Nova Iorque, segudo de países como Suíza,
Ecuador, Arxentina, México, Francia, Canadá, Chile ou mesmo Sudáfrica.
En xullo o número de visitantes extranxeiros aumentou, sendo Francia o
país que máis súbditos aportou, seguido de Arxentina, Holanda, Costa Rica,
Estados Unidos, Alemania ou Andorra.
Aínda que a principal motivación dos visitantes e turistas que se
achegaron ata Carboeiro era coñecer a cultura e a naturaza da zona, outros
tamén apuntaron á gastronomía, como sinerxia para acudir a este enclave
histórico e patrimonial.
En canto ao aloxamento, a maioría dos visitantes do mes de xullo
estiveron en hoteis de Silleda e Lalín, aínda que algúns tamén estaban aloxados
en Sanxenxo ou Santiago de Compostela. Destaca tamén a porcentaxe de turistas
aloxados en casas de familiares ou amigos, feito relacionado co turismo de
raíces.
Cómpre reseñar tamén que a maior parte dos visitantes xa coñecían
Carboeiro e levaron a familiares, amigos, ou simplemente querían voltar ao
mosteiro. Internet sitúase tamén como un dos medios a través dos cales os
visitantes coñeceron este emblema de Trasdeza. Das enquisas realizadas pola
guía turística, Rocío Líñares, destaca tamén o papel dos aloxamentos da zona,
ao informar aos visitantes dos atractivos turísticos da zona.
Ningún comentario:
Publicar un comentario