Preto de 2.000 persoas participan nas actividades das escolas deportivas e obradoiros culturais 2011-2012
Aeróbic, ximnasia de mantemento, baloncesto, fútbol sala, natación, actividade física para discapacitados, pilates, obradoiros de teatro, xadrez ou manualidades son algunhas das actividades que se desenvolverán ao longo do curso 2011 - 2012 dentro do programa das escolas deportivas e obradoiros culturais. O deporte e os obradoiros culturais son unha boa forma de desenvolver unha vida saudable e adquirir valores tan importantes como a deportividade, o respecto e a tolerancia. Por este motivo, o Concello de Ames aposta polo desenvolvemento destas actividades que sempre acadan uns resultados positivos. Durante este curso 1.811 persoas participan nas actividades das escolas deportivas e obradoiros culturais. Dende o mes de outubro estas actividades xa se desenvolven con total normalidade en Bertamiráns, O Milladoiro, Aldea Nova e varias parroquias do rural amiense co fin de que este programa chegue a toda a veciñanza amiense.
O Concello de Ames ofrece un amplo abano de actividades deportivas e culturais co fin de mellorar a calidade de vida de toda a cidadanía amiense. Para iso púxose en marcha unha nova edición das escolas deportivas e obradoiros culturais, que se desenvolven nas localidades de Bertamiráns e O Milladoiro, así como en diferentes lugares do rural.
En total son 1.811 persoas as que están inscritas en algunha das preto de vinte actividades que se ofertan dentro deste programa municipal. O servizo municipal das escolas deportivas atende a un total de 1.477 usuarios/as. Este servizo non é exclusivo só para a mocidade senón que os adultos tamén dispoñen de varias actividades físicas que se imparten tanto nas localidades de Bertamiráns e O Milladoiro, así como en diferentes lugares do rural. Deste xeito, 738 son nenos e nenas que realizan algún tipo de actividade deportiva, mentres que 739 son persoas adultas que tamén practican deporte. Por outra banda nos obradoiros culturais participan 334 persoas.
A oferta de actividades deportivas que ofrece o Concello de Ames caracterízase pola súa variedade e por estar pensadas para todos os grupos de idade. Así, os e as amantes do deporte poden escoller entre trece actividades: aeróbic; ximnasia de mantemento; baloncesto; fútbol sala; natación; predeporte; pilates; tenis de mesa; spinning, abdominais e glúteos; patinaxe; tenis; voleibol e actividade física para discapacitados.
Nas escolas deportivas impártense deportes como poden ser o fútbol sala, o baloncesto, patinaxe, tenis, predeporte, tenis de mesa, voleibol e natación. Son moitos os cativos/as que asisten polas tarde aos pavillóns de Bertamiráns e do Milladoiro para practicar estes deportes. Un dos obxectivos deste servizo é iniciar aos nenos e nenas na práctica deportiva para que adquiran o hábito de realizar exercicio a miúdo. As actividades que máis rapaces atenden son a de patinaxe con 188 usuarios/as, tenis (174), baloncesto (117), predeporte (85) e fútbol sala (78). Cun menor índice de participación están as actividades de natación (46), voleibol (27) e tenis de mesa (23).
Actividades para adultos
Por outra banda existen unha serie de actividades físicas dedicadas ás persoas adultas que tamén teñen unha gran demanda entre a cidadanía amiense. Deste xeito son moitos os veciños que acoden as clases de aeróbic; pilates; spinning, abdominais e glúteos; ou ximnasia de mantemento. A actividade máis demandada é a de pilates con 241 usuarios/as. Este adestramento físico e metal serve para corrixir problemas no lombo ou aprender a adoptar as posturas correctas e estirar adecuadamente os músculos. Ademais hai 205 persoas que asisten ás clases de ximnasia de mantemento, 185 persoas que asisten as actividades de aeróbic, e 108 que están apuntados en spinning, abdominais e glúteos.
É importante destacar que para facilitar a asistencia de todos os participantes hai grupos tanto en Bertamiráns como no Milladoiro, pero ademais a actividade de pilates impártese na urbanización de Aldea Nova e a de ximnasia de mantemento nos lugares de Aldea Nova, Aguapesada, Ameixenda, Biduído, Tapia, Trasmonte e Covas.
Obradoiros culturais
As actividades culturais ofertadas polo Concello de Ames caracterízanse pola súa diversidade e por estar pensadas para todos os grupos de idade. Así, neste curso 2011- 2012, os e as amienses poden gozar de cinco obradoiros como son o de baile e música tradicional, baile de salón, manualidades, teatro e xadrez. Estas actividades contan con 334 usuarios/as.
O obradoiro de baile e música tradicional é o que ten maior demanda con 108 usuarios/as. Este obradoiro impártese nas parroquias de Bugallido, Biduído, Trasmonte e na localidade de Bertamiráns. A Concellería de Cultura, Educación e Patrimonio de Ames asinou un contrato coa asociación cultural amiense Os Castros polo cal esa asociación asume o obradoiro municipal de baile tradicional, gaita e pandeireta. O contrato supón un aforro duns 14.000 euros con respecto ao que había con anterioridade, pero, principalmente, supón transparencia e unha clara aposta polas asociacións do propio municipio. O contrato inclúe 15 actuacións dos Castros repartidas entre o que queda de ano e durante todo o 2012.
De preto séguelle o obradoiro de manualidades que tamén esperta a paixón de moitos veciños e veciñas de Ames. Cómpre salientar que nesta actividade son maioría as mulleres. Participan un total de 94 persoas que están divididas en dous grupos. En Bertamiráns hai 43 persoas inscritas e no Milladoiro participan 51 usuarios/as.
Nos bailes de salón participan 73 persoas (en Bertamiráns 25 e no Milladoiro 48), no obradoiro de xadrez son 24 usuarios/as (en Bertamiráns 9 e no Milladoiro 15), e no obradoiro de teatro 35 inscritos (en Bertamiráns 10 e no Milladoiro 25).
Ningún comentario:
Publicar un comentario