Brión – o concello usará codigos QR

O CONCELLO DE BRIÓN VAI UTILIZAR OS CÓDIGOS QR PARA AXILIZAR O ACCESO Á INFORMACIÓN AOS VECIÑOS E VECIÑAS DO MUNICIPIO DENDE OS MÓBILES

Os códigos comezarán a utilizarse en distintos soportes como web, bandos, postes informativos ou paradas do autobús

9 de novembro de 2011. Consultar os horarios do Transporte Metropolitano, ver a programación cultural do día ou ollar as distintas webs municipais será moito máis sinxelo a partir de agora para os veciños e veciñas de Brión. O Concello de Brión está iniciando unha campaña para potenciar o uso dos Códigos QR para así axilizar o acceso á información aos veciños e veciñas do municipio dende os seus dispositivos móbiles.

A intención do Concello de Brión é utilizar os Códigos QR en distintos soportes (web, bandos, postes informativos, paradas do autobús, etc) para poder poñer información actualizada que calquera veciño, a través do seu dispositivo móbil, poderá consultar in-situ e en tempo real.BRION - CODIGOS QR

Códigos QR

Un Código QR (Quick Response Barcode) é un sistema para almacenar información nun código de barras bidimensional. Caracterízanse polos tres cadrados que se atopan nas esquinas e que permiten detectar a posición do código ao lector. A diferenza dun código de barras convencional, a información está codificada dentro dun cadrado, permitindo almacenar gran cantidade de información alfanumérica.

Aínda que o desenrolo inicial dos códigos QR tiña como obxectivo principal a súa utilización na industria da automoción, hoxe en día a posibilidade de leer códigos QR dende teléfonos e dispositivos móbiles permite o seu uso nun sinfin de aplicacións. Para poder leer eses códigos QR dende o dispositivo móbil, o veciño só terá que seguir dous sinxelos pasos:

- Descargar no móbil, se non dispón xa del, un lector de códigos bidimensionais. Na web municipal do Concello de Brión hai un enlace web a "i-nigma" de 3G visión, xa que é gratuito, está moi completo e está dispoñible para a maioria de dispositivos.

- Unha vez instalado, só hai que iniciar o programa e dirixir a cámara do teléfono cara o código QR para dispoñer de toda a información na palma da man.

Ningún comentario: