MIRÁS AMÓSASE “SORPRENDIDO E DECEPCIONADO” POR QUE A ASOCIACIÓN DE HOSTELERÍA APOIE A DESAPARICIÓN DO MERCADO DE GANDO DE AMIO
O alcalde orosán segue defendendo a permanencia do mercado en Santiago, ou na comarca, e considera que o pronunciamento da asociación “está motivado por intereses políticos, non dos hosteleiros”
11 de novembro de 2011.- O alcalde de Oroso, Manuel Mirás, amósase “moi sorprendido e profundamente decepcionado” diante do comunicado emitido onte pola Asociación de Hostelería de Santiago, quen apoiou o traslado da feira de gando de Amio. Mirás Franqueira considera que o pronunciamento realizado pola asociación “está máis motivado por intereses políticos, que dos propios hosteleiros”.
O alcalde orosán non comprende “cómo unha asociación pode decidir non defender os intereses dos seus propios asociados, pois en Oroso sabemos que o mercado de gando de Amio xera un tránsito de persoas polo noso municipio e que a nosa hostelería nota e se beneficia deses días nos que hai mercado”. Mirás entende que “en Oroso temos moi claro que a desaparición do mercado de gando de Amio suporía un perxuizo para os nosos gandeiros e para os nosos hosteleiros, pois sería outra cousa máis que marcha da zona e iso significa menos riqueza”.
Manuel Mirás lembra que “a feira de Amio dálle un movemento importante a esta zona, non só para os gandeiros, senón que tamén beneficia de xeito indirecto a outros sectores como hostalería, restauración, etc polo que sería unha mágoa que desaparecera. Por iso nós imos defender con todas as nosas forzas que quede en Santiago”.
Contas da leiteira
O alcalde de Oroso entende que dende a Asociación de Hostelería de Santiago se fale das moitas posibilidades que ofrece o recinto feiral para acoller outras actividades, pero advirte dos riscos deste posicionamento, pois lembra que o mercado de gando “é algo real que estivo funcionando e xerando riqueza en Santiago nos últimos 130 anos, pero agora se fala de cambiar as cousas pensando no que podería ser pero aínda non é”. Así, o alcalde orosán teme que “ao final imos quedar sen mercado de gando en Santiago e nos vai pasar algo parecido á fusión das Caixas, que nos venderon como un éxito e a realidade é e o tempo demostraron que non é así”.
O alcalde orosán insiste en que o Concello de Oroso seguirá actuando en defensa do sector gandeiro e dos seus hostaleiros ao seguir esixindo que o mercado de gando permaneza en Amio e, de non ser finalmente así, que sexa reubicado na comarca. Unha reivindicación que non é só de Manuel Mirás, senón que é compartida por toda a corporación municipal (composta por PSOE, PP, BNG e PG), tal e como se aprobou no pleno do pasado 29 de setembro.
Ningún comentario:
Publicar un comentario