ORDES CELEBRARÁ UN DEBATE ELECTORAL SOBRE AS ELECCIÓNS XERAIS NO SALÓN DE PLENOS DO CONCELLO
- O debate terá lugar o mércores 16 de novembro, ás 20:00, e será retransmitido por Radio Ordes.
- Tanto o BNG como o PSOE confirmaron no último Pleno a súa participación no debate, quedando pendente de confirmar a participación do PP.
O último Pleno da Corporación Municipal, celebrado o pasado 27 de outubro, acordou a celebración dun debate electoral entre as formacións políticas que concurren ás eleccións xerais do vindeiro 20 de novembro.
A proposta foi tomada en consideración a iniciativa do Bloque Nacionalista Galego (BNG), e no citado Pleno anunciaron a súa participación no debate tanto o BNG como o PSOE, quedando pendente de confirmar a participación do Partido Popular.
A proposta dos nacionalistas instaba ao alcalde a poñer o salón de Plenos a disposición dos grupos políticos que concorren ás eleccións xerais para realizar un debate electoral aberto ao público e emitido por Radio Ordes, anunciándose a celebración do mesmo por parte da emisora municipal.
Gonzalo Castro, portavoz municipal do BNG e promotor da iniciativa, anunciou que “o alcalde de Ordes ven de comunicar ao BNG que o vindeiro mércores, 16 de novembro, ás 20:00 horas, o salón de plenos do Concello e a Radio Municipal estarán a disposición dos partidos políticos que concurren ás eleccións xerais para a celebración dun debate electoral”.
Gonzalo Castro amosou a súa satisfacción pola celebración deste debate e manifestou que “o 20 de novembro celébranse unhas importantes eleccións xerais, e desde o BNG consideramos que os veciños e veciñas de Ordes teñen dereito a estar informados deste proceso electoral, e que mellor para conseguir este obxectivo que confrontar os diferentes proxectos políticos nun debate público con presenza dos representantes locais das forzas políticas que concurren a estas eleccións”.
O portavoz nacionalista ratificou a presenza do BNG neste debate e amosou a súa convición de que “os representantes das demáis formacións políticas con presenza no noso Concello amosarán o seu respecto democrático aos veciños e veciñas de Ordes participando deste debate”.
Ningún comentario:
Publicar un comentario