Silleda – ITV agrícola

Silleda é un dos municipios con máis vehículos agrícolas da provincia de Pontevedra

-O municipio conta cun censo de 1.988 unidades e case 1800 remolques

-A unidade móbil da ITV estará en Marzo en catro localidades silledenses, ampliando calendario e horarios

Silleda, 9 de novembro de 2011. A unidade móbil da Inspección Técnica de Vehículos (ITV) agrícolas visitará o concello de Silleda en marzo do vindeiro ano. Dende o departamento municipal de Medio Rural, que dirixe o concelleiro Antonio Couso, solicitouse á entidade que realiza as visitas ampliar o percorrido respecto ao ano pasado, así coma os horarios. Así, ademais das parroquias de Laro, A Bandeira e Escuadro, a unidade móvil para pasar a revisión aos vehículos agrícolas estará o vindeiro ano na capital municipal, en Silleda, “ao ser un punto importante para cubrir as parroquias da súa área de influencia”, engade o concelleiro Antonio Couso.

Así mesmo, a petición formulada dende o departamento municipal vén respaldada polo alto volumen de maquinaria existente no municipio, un dos máis elevados da provincia de Pontevedra. No padrón municipal figuraban , a día 1 de xaneiro 1.988 vehículos agrícolas censados, e un total de 1799 remolques.

Á vista deste número de vehículos, a ITV de vehículos agrícolas supón un servizo imprescidible para os veciños de Silleda, con gran peso no sector agrario.

O calendario proposto comezaría os días 8 e 9 de marzo na parroquia de Laro (campo da festa) ; o 12 e 13 en Silleda (detrás do ambulatorio); os días 14,15, e 16 en A Bandeira (xunto ao CEIP), e os días 19, 20 e 21 en Escuadro (fronte ao cemiterio). O horario será nos catro casos de 09.00 a 18.00 horas.

Ningún comentario: