Antonio Couso solicita á Demarcación de Estradas do Estado a reposición e colocación de sinais nas dúas vías nacionais que conflúen en Silleda
-Hai casos urxentes coma o de Escuadro, onde a falta de indicadores no acceso dende a N-640 fai que moitos conductores elixan outro acceso para o que hai que realizar un cambio de sentido
-Tamén se solicita a colocación de indicadores de situación en Taboada e Chapa ou a corrección do topónimo Cervaña, que figura con “b”
Silleda, 8 de novembro de 2011. O concelleiro de Medio Rural de Silleda, Antonio Couso Álvarez, remitiu un escrito ao xefe de Demarcación de Estradas do Estado, José Manuel Piris Ruesga, no que solicita unha mellora na sinalización de viais que son competencia do Ministerio de Fomento.
Na misiva explícase que, logo de realizar un traballo de campo sobre a sinalización integral do municipio de Silleda, obsérvanse unha serie de deficiencias de información nas estradas nacionais N-525 (Santiago-Ourense) e N-640 (Chapa-Carril), que conflúen nun tramo de 8 kilómetros.
A falla de información en determinados puntos, ben de situación ou para indicar direccións, ou a desaparición de indicadores, como ocorre en Chapa logo da recente construcción do novo cruce, son algúns dos aspectos advertidos nesta petición.
Entre as necesidades máis urxentes figura a sinalización da parroquia da Escuadro para os conductores que circulan pola N-640. A única indicación atópase nun cruce onde unha liña continua impide aos vehículos xirar (se circulan en dirección A Estrada) a altura de Senra, tendo que facer un cambio de sentido e percorrendo varios kilómetros. Por iso, se pide ao organismo estatal que dote de sinalización o cruce cara a Escuadro situado na recta de Rellas (no lugar coñecido como Brañas de Romeo). “É sen dúbida un dos casos máis apremiantes, xa que con este sinal evitaríamos que os conductores tivesen que cambiar de sentido no alto da Rocha”, apunta Antonio Couso.
Tamén se pide a revisión da sinaléctica de entrada en Taboada e Lamela, as dúas localidades que marcan o límite municipal na N-525, e en Moalde (Xindiriz) na N-640.
No caso de Chapa, circulando en dirección a Santiago, só hai a día de hoxe un sinal que indica fin de poboación. En Taboada, non hai tampouco indicador de situación.
Outra das peticións pasa por sinalizar, na N-525 as direccións cara a parroquia de Margaride (entrada por Vilanova e xunto á fábrica de Nudesa) e cara a Rellas (accedendo por Riocalvo).
Tamén se solicita no escrito que se realicen as correccións no caso do topónimo Cervaña (así figura no nomenclator oficial), que aparece nas dúas vías nacionais reseñado coa letra “b”.
“Esperamos que dende a Demarcación se atenda esta petición, ao igual que se fixo con outras solicitudes propostas nos últimos meses, xa que unha boa sinalización é tamén básica á hora de falar do estado das nosas infraestruturas”, engade o concelleiro.
Informe policial sobre o cruce de Escuadro
Por outra banda, dende o Concello tamén se encargou nos últimos días un informe á Policía Local sobre a situación do cruce das Brañas de Romeo (Escuadro) coa N-640, ante as queixas veciñais pola perigosidade deste punto, para ver a posibilidade de reducir riscos cunha sinalización axeitada ou outras medidas.
Ningún comentario:
Publicar un comentario