O CONCELLO DE TEO ULTIMA OS PREPARATIVOS PARA A FEIRA DO SAN MARTIÑO
· Máis de 25 persoa en quendas, dos servizos da policía local, protección civil e voluntarios participan no dispositivo dende esta tarde noite
· Este ano cóntase con vinte postos comerciais máis que o ano pasado e máis prazas de aparcamento gratuíto
· O Concello organiza por primeira vez unha feira ecolóxica no entorno da festa
10 de novembro de 2011. O Concello de Teo ultima os preparativos para a tradicional feira do San Martiño, que se celebra mañá 11 de novembro na carballeira de Francos. Este evento, que concentra todos os anos a milleiros de persoas en Calo –Teo- precisa dun operativo coordinado pola policía local e protección civil que dende esta tarde noite xa estarán de xeito permanente no recinto ata que remate a celebración.
Este ano máis de 25 persoas, entre persoal da policía local, protección civil e voluntarios participan neste operativo, que se centrará en labores de regulación de tráfico, información e vixiancia. Tamén se destaca a colaboración doutras forzas de seguridade como a Garda Civil, que terá presencia na feira e no entorno.
A feira do San Martiño contará este ano con máis postos comerciais que en anos anteriores. Segundo as estimacións da policía local, polo menos colocaranse vinte postos novos, destacando a presenza de produtores de agricultura ecolóxica e artesanía. Nesta edición de festa o Concello, en colaboración co Sindicato Labrego Galego, pon en marcha unha feira ecolóxica na que se realizarán talleres de elaboración de produtos alimentarios ademais de ofrecer charlas sobre os beneficios do consumo ecolóxico e de producción local e actividades para os máis pequenos con monitores especializados.
Ademais destas novidades, na carballeira de Francos no faltarán os postos de venda de polbo así como outros postos comerciais onde se poderán mercar téxtil, calzado, bixutería, ou alimentos como rosquillas, castañas, embutidos, churros ou turrón. Outros puntos de venda tradicional nesta feira son a maquinaria agrícola, ferramentas ou material de xardinería.
Aínda que a feira do San Martiño é sobre todo unha feira cabalar de compravenda de animais, polo que dende moi cedo os animais irán chegando ó recinto. Este mercado tradicional de gando continúa a ser un dos elementos centrais deste evento.
Este ano como en anos anteriores o acceso ó recinto feiral estará regulado coa intención de preservar a carballeira só para os peóns. Os vehículos contan sen embargo con amplas zonas de aparcadoiro, debidamente sinalizadas, no entorno próximo da feira. Este ano incrementáronse tamén as prazas de aparcadoiro gratuíto coordinado dende o Concello, con 250 prazas máis dispoñibles. A Policía Local destaca que os vehículos que incumpran algunha indicación ou molesten serán denunciados e retirados por un guindastre.
Ningún comentario:
Publicar un comentario