O CONCELLO ORGANIZA UNHA FEIRA ECOLÓXICA DENTRO DA FESTE DO SAN MARTIÑO EN FRANCOS
· Instalarase unha carpa no que se poderán mercar produtos ecolóxicos
· Tamén se realizarán talleres durante a xornada para ver como ser elabora dun xeito sostible o pan ou o marmelo
07 de novembro de 2011. Achégase o 11 de novembro e con esa data a celebración popular máis importante do Concello de Teo, a feira cabalar do San Martiño. Este ano dende o Concello estanse realizando actividades de promoción desta festa con séculos de historia e a propia xornada festiva non será unha excepción. O venres 11 está previsto realizar unha feira ecolóxica dentro do entorno da carballeira de Francos.
Esta I Feira Ecolóxica desenvolverase nunha carpa municipal colocada para esta actividade. Durante todo o día nese espazo poderanse mercar produtos ecolóxicos. No entorno da carpa tamén se colocará un pequeno mercado de artesanía. Sen embargo na carpa realizaranse actividades máis aló da compra venta. Haberá monitores que organicen xogos populares para os máis pequenos/as durante todo o día. E seguro que os máis novos/as da casa tamén estarán atentos ós talleres gastronómicos sobre a elaboración de produtos como o pan, o marmelo ou a marmelada dun xeito sostible.
Nesta I Feira ecolóxica do San Martiño, que conta coa colaboración do Sindicato Labrego Galego, haberá dúas charlas didácticas relacionadas co cultivo da agricultura ecolóxica. Ás 12:00 horas poderase escoitar unha sobre O consumo responsable no marco da soberanía alimentaria, mentres que ás 16:00 horas será o momento de falar da Producción local como alternativa de futuro.
A feira cabalar de Francos celébrase todos os 11 de novembro na carballeira da Francos. Segundo quedou demostrado documentalmente trátase dunha festa con séculos de historia. Este ano o Concello apostou por realizar actividades de dinamización ó carón desta celebración, para pór en valor este importante patrimonio inmaterial do Concello de Teo.
Ningún comentario:
Publicar un comentario