Sesenta escolares silledenses visitan a exposición micolóxica na Casa da Xuventude
-O ciclo, realizado polos alumnos do curso de monitor en Educación Ambiental, comezou esta tarde coa primeira sesión de recolección de cogumelos
Silleda, 10 de novembro de 2011. Un total de 60 escolares pertencentes ao CEIP de Silleda e ao Colexio María Inmaculada visitarán mañá venres na Casa da Xuventurde a exposición micolóxica realizada polos alumnos e alumnas do ciclo de monitor en Educación Ambiental. Os alumnos percorrerán a mostra e asistirán a outras actividades en dúas quendas, de 11.00 a 12.00 (logo doutra sesión para recoller os cogumelos) e de 12.00 a 13.00 horas. Ás xornadas que comezaron hoxe coa primeira sesión de recolección guiada de especies na carballeira das Pedrosas foron convidados todos os centros educativos do municipio. A mostra estará aberta ao público en xeral tamén na xornada do sábado, en horario de 11.00 a 14.00 e de 16.30 a 20.30 horas.
A concelleira de Formación e Emprego, Margarita Campos Espiño, explica que con esta iniciativa se pretende complementar o ciclo teórico para desempregados que rematará o vindeiro día 16, “ao tempo que se lles ofrece aos escolares unha visión amena e divertida de asignaturas como a de Coñecemento do Medio”, engade.
Ningún comentario:
Publicar un comentario